အွန်လိုင်း သမ္မာကျမ်းစာ

Tõoma 3 - Farefare Ninkaré

Kɔɔrŋɔ yẽ ĩmã'asʋm

¹ Daarɛ ayɩla zaanõorɛ karf-atã, tɩ Apɩyɛɛrɩ la Azã dɔla taaba wɛ Wẽnde-kãtʋm na, wakat-sɛka tɩ nẽrba ẽn sẽnna pʋ'ʋsra la.

² La bʋraa n boe tɩ ba dɔgɛ ẽ tɩ a dɛna kɔɔrŋɔ. La daarɛ woo ba ẽn tara ẽ sẽnna zĩ'ita la Wẽnde-kãtɛ la nõ-sɛka tɩ ba wi'iri tɩ nõ-sõŋɔ la, tɩ a sɔsra nẽr-sɛba n kẽ'erɩ Wẽnde-kãtɛ la pʋam na.

³ La kɔɔrŋɔ la n yẽ Apɩyɛɛrɩ la Azã n boe mĩ tɩ ba kẽ Wẽnde-kãtʋm na, tɩ a sose ba yetɩ, ba bɔ ẽ sɛla.

⁴ Tɩ ba bɩsra ẽ zĩi, tɩ Apɩyɛɛrɩ yele ẽ yetɩ: «Bɩsɛ tõma.»

⁵ Tɩ a malɩn bɩsra ba, tẽ'esra tɩ ba wʋn bɔ ẽ sɛla.

⁶ Tɩ Apɩyɛɛrɩ yele ẽ yetɩ: «Mam ka tarɩ ligri wʋn bɔ fɔ. La sɛla tɩ mam tarɩ la, mam wʋn bɔ fɔ. La Azezi-krisi n ze'ele Nazarɛtɩ yʋ'ʋrɛ ĩyã, isge sẽnna.»

⁷ La Apɩyɛɛrɩ gʋrɛ la a zʋʋgɔ nu'ugo zẽkɛ ẽ tɩ a isge. Tɩ a nãma la zĩila keŋe bilam mẽŋa,

⁸ tɩ a vaagɛ isge ze'ele saazuo, sẽnna dɔla ba kẽ'era Wẽnde-kãtʋm na, ẽgra sisra, dee pẽgra Nawẽnnɛ.

⁹ Tɩ nẽrba la wuu yẽ ẽ tɩ a sẽnnɩ dee pẽgra Nawẽnnɛ.

¹⁰ Tɩ ba bãŋɛ tɩ la de la ẽŋa n ẽn zẽa Wẽnde-kãtɛ la nõ-sõŋɔm na sɔsra. La ban yẽ sɛla n ẽŋɛ ẽ na, la di'ige ba mɛ zozo'e.

Apɩyɛɛrɩ mõolɛ Nawẽnnɛ yetɔga Wẽnde-kãtʋm

¹¹ La nẽrba la n yẽ bʋra-sɛka n daan de kɔɔrŋɔ la n dolɩ Apɩyɛɛrɩ la Azã la, la di'ige ba wuu mɛ, tɩ ba zoe ka lagsɛ taaba ba zẽ'am zẽ'e-sɛka yʋ'ʋrɛ n de «Asalomõ võnana» na.

¹² La Apɩyɛɛrɩ n yẽ bɛla la, tɩ a soke nẽrba la yetɩ: «Ɩsrayɛlɩ dõma, bẽm tɩ bõn-ẽna wã di'ige ya? La bẽm tɩ ya bɩsra tõma, wʋ la de la tõma mẽŋa pãŋa, bɩɩ tõma n ba dɔla Nawẽnnɛ sõŋa la ĩyã tɩ tõma botɩ bʋra-ẽna isge sẽnna?

¹³ La de la Nawẽnnɛ tɩ tɩ yaabdõma Abraham, la A'izakɩ, la Azakɔbɩ yʋʋn pʋ'ʋsrɩ la, n zẽkɛ a tõntõnna Azezi la yʋ'ʋrɛ. Ẽŋa tɩ ya daan yõkɛ sẽŋɛ ka ẽŋɛ sɛba n soe pãŋa la nu'usum, tɩ baa gɔmna Apilatɩ n daan boorɩ tɩ a basɛ ẽ na, ya daan zagsɛ mɛ a nẽŋam.

¹⁴ La yan daan zagsɛ Azezi la, ya zagsɛ la pʋpeelem dãana, la sɩra dãana, dee daan bɔɔra tɩ Apilatɩ basɛ nẽr-kʋʋra la bɔ ya.

¹⁵ Bɛla yãma botɩ ba kʋ la yõvore dãana, ẽŋa tɩ Nawẽnnɛ vo'oge. Tõma daan yẽ bõn-ẽna mɛ, tɔgra a yelle bɔ'ɔra ya.

¹⁶ La de la Azezi yʋ'ʋrɛ n tarɩ pãŋa la ĩyã, la tõma n bɔ ẽ sɩra la n botɩ bʋra-ẽna tɩ yãma mi dee yẽ wã keŋe. La de la ẽn bɔ Azezi sɩra la n botɩ a yẽ ĩmã'asʋm sõŋa ya wuu nẽŋam wã.

¹⁷ Tɔ. M sɔbiisi, mam bãŋɛ tɩ yan ka mi la ĩyã, tɩ yãma la ya nẽŋadõma daan ẽŋɛ bɛla.

¹⁸ La bɛla pʋam tɩ Nawẽnnɛ n yʋʋn põn dẽŋɛ botɩ a nõtɔ'ɔsrɩba wuu tɔgɛ yetɩ, dẽnɩ tɩ Krisi wa nãmsɛ la, ẽŋɛ.

¹⁹ Bɛla, teege-ya yɛm basɛ tõon-be'ero, dee wa doose Nawẽnnɛ, tɩ a wʋn basɛ ya tõon-be'ero taalɛ,

²⁰ dee bɔ ya sũ-mã'asʋm, dee tõm Krisi tɩ a daan põn dẽŋɛ looge la bɔ ya. Ẽŋa n de Azezi.

²¹ Dẽnɩ tɩ a bɔna Nawẽnnɛ yire halɩ ka paagɛ wakat-sɛka tɩ sɛla wuu wʋn teege lebge paalsɩ, wʋ Nawẽnnɛ n yʋʋn põn botɩ a nõtɔ'ɔsrɩba tɔgɛ kʋrʋm kʋrʋm se'em na.

²² Bɛla tɩ Amoyisi yʋʋn yetɩ: ‹Ya Zuudãana Nawẽnnɛ wʋn botɩ nẽra ayɩla ze'ele ya buuri pʋam dɛna a nõtɔ'ɔsa bɔ yãma, wʋ ẽŋa n botɩ mam dɛna a nõtɔ'ɔsa se'em na. Dẽnɩ tɩ ya selse bõn-sɛba wuu tɩ a wʋn tɔgɛ bɔ ya la,

²³ la nẽr-sɛka woo n ka selse Nawẽnnɛ nõtɔ'ɔs-ẽŋa, ba wʋn yese ẽ mɛ Nawẽnnɛ nẽrba tẽŋasʋka kʋ.›

²⁴ Nawẽnnɛ nõtɔ'ɔsrɩba, lan pĩ'ilum la Asãmwɛlɩ la sɛba n tɔgɛ ẽŋa poorʋm na wuu, yʋʋn põn tɔgɛ dabs-bãna yelle mɛ.

²⁵ Yetɔg-sɛba tɩ Nawẽnnɛ botɩ a nõtɔ'ɔsrɩba yʋʋn tɔgɛ la de la yãma ĩyã, la ẽn yʋʋn bĩŋe a nõorɛ la tɩ yaabdõma la ken dɛna la yãma ĩyã. A yele Abraham yetɩ: ‹Fʋ yɩɩsɩ la ĩyã tɩ mam wʋn ẽŋɛ dũnia buuri wuu yel-sõnnɛ.›

²⁶ Nawẽnnɛ looge a tõntõnna la, dẽŋɛ tõm ẽ na ya zẽ'am tɩ a ẽŋɛ ya yel-sõnnɛ botɩ ya nẽra woo basɛ a tõon-be'ero.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ