အွန်လိုင်း သမ္မာကျမ်းစာ

Tõoma 27 - Farefare Ninkaré

Ba tarɩ Apolɩ wɛ'ɛsa Rom

¹ Tɩ ba daan looge yɛm tɩ ba botɩ tõma kẽ õorŋɔ sẽŋɛ Itali, tɩ ba dɩkɛ Apolɩ la nẽrba basɛba tɩ ba yʋ la, ẽŋɛ sʋda-kɛ'ɛma yʋ'ʋrɛ n de Azuliyusi nu'usum, a daan de la sʋda-sɛba tɩ ba wi'iri tɩ na-keko sʋdaasɩ la kɛ'ɛma ayɩla.

² La õorŋɔ n ze'ele Adramiti tẽŋam daan bɔna bilam yetɩ a sẽŋɛ tẽnsɩ basɛba n boe Azi ko-kãtɛ la nõorʋm. Tɩ tõma kẽ wɛ'ɛsa, tɩ Aristarkɩ n ze'ele Tesaloniki n boe Masedʋanɩ so'olʋm, wa'am wa doose tõma.

³ Tɩ beere wiige, tɩ tõma paagɛ Sidõ tẽŋam, tɩ Azuliyusi ẽŋɛ Apolɩ sõŋa bɔ ẽ nõorɛ tɩ a sẽŋɛ ka bɩsɛ a sɩrdõma, dee tɩ ba sõŋɛ ẽ.

⁴ Tɩ tõma le kẽ õorŋɔ bilam wɛ'ɛsa. Tɩ kʋsebgo vugra tʋ'ʋsra tõma, tɩ tõma wẽrgɛ bẽglɛ Sipri sẽŋɛ.

⁵ La tõma doose la ko-kãtɛ la n lɛm Silisi la Pãnfili la, sẽŋɛ ka paagɛ Miira n boe Lisi so'olʋm sige.

⁶ Bilam tɩ sʋda-kɛ'ɛma la yẽ õorŋɔ n ze'ele Alɛgsãndri tɩ a sẽŋɛ Itali. Tɩ a botɩ tõma kẽ.

⁷ La dabsa faa tɩ tõma nãmsɛ la õorŋɔ la sẽnna fẽfẽ halɩ ka lɛm Kinidi tẽŋam. La kʋsebgo la ka botɩ tõma yãŋɛ sẽŋɛ bilam bɔba, tɩ tõma lɔkɛ sẽŋɛ lɛm Salmõnɩ bẽglɛ Krɛtɩ sẽŋɛ.

⁸ La tõma daan bẽglɛ la ko-kãtɛ la nõorʋm, daan nãmsɛ halɩ, dee yãŋa paagɛ zẽ'a yʋ'ʋrɛ n de õorŋɔ ze'elgo zẽ'e-sõŋɔ n lɛm Laze.

⁹ La dabsa zozo'e daan tole mɛ, tɩ Zifdõma nõorɛ lʋa daarɛ tole. La wakat-ẽŋa la daan de la toogo bɔ nẽrba tɩ ba dɩkɛ õorŋɔ doose ko'om na pʋam. Bɛla tɩ Apolɩ yele ba yetɩ:

¹⁰ «Bʋraasɩ wã, mam mi tɩ tõma sẽnnɛ wã wʋn wa dɛna la toogo. La dagɩ lɔgrɔ, la õorŋɔ la mã'a n wʋn sã'am, la de la tõma mẽŋa yõorɛ põsga.»

¹¹ Tɩ sʋda-kɛ'ɛma la ka selse Apolɩ n yele se'em na, a selse la sɛka n bɩsrɩ õorŋɔ la sẽnnɛ yelle, la õorŋɔ la dãana yetɔga.

¹² La õorŋɔ ze'elgo zẽ'a na ka ãn sõŋa tɩ ba wʋn gã'arɛ tɩ kʋsebgo, la ɔɔrɔ wakatɛ la tole. Bɛla tɩ nẽrba la zozo'e yetɩ, tɩ basɛ bilam dee wĩbe sẽŋɛ paagɛ Fenigsi n mẽ boe Krɛtɩ so'olʋm. Zẽ'e-ẽŋa õorŋɔ ze'elgo zẽ'am la tɔglɛ la zanõrɛ gɔbga, la zʋʋgɔ nu'ugo bɔba. Bilam tɩ ba tã wʋn zĩ'ire tɩ kʋsebgo, la ɔɔrɔ wakatɛ la tole.

Kʋseb-kãtɛ vugri ko'om zuo

¹³ Tɩ kʋsebgo ze'ele gɔbga bɔba wa'am wa vugra fẽfẽ. Tɩ ba tẽ'esɛ tɩ ba tã wʋn ẽŋɛ ban boorɩ se'em, bɛla tɩ ba mãasʋm õorŋɔ la basɛ zẽ'e-ẽŋa, dee bẽgla Krɛtɩ ko-kãtɛ la nõorʋm wɛ'ɛsa.

¹⁴ Tɩ la ka yuuge, tɩ kʋseb-kãtɛ tɩ ba wi'iri tɩ «Erakilõ» ze'ele Krɛtɩ tẽŋa bɔba, wa'am wa vugra ke'enke'em wẽ'era õorŋɔ la.

¹⁵ Tɩ tõma ka yãŋɛ botɩ õorŋɔ la sẽŋɛ nẽŋa bɔba, tɩ tõma basɛ õorŋɔ la tɩ kʋsebgo la tarɩ ẽ wɛ'ɛsa.

¹⁶ Tɩ tõma sẽŋɛ ka lɛm tẽn-pɩka yʋ'ʋrɛ n de Koda tɩ ko'om gilge ẽ, bẽgla ẽ tɩ kʋsebgo la ka le vugra ke'enke'em tʋ'ʋsra tõma. Tɩ tõma keŋe tɩ mẽŋa õbgɛ õorŋ-pɩka la zoole õorŋ-kãtɛ la zuo, la, la ka ẽŋɛ nãana.

¹⁷ Tɩ ba dɩkɛ mĩ'isi lʋ õorŋ-kãtɛ la kãŋkãŋɛ tɩ a tara pãŋa. Ba zotɩ mɛ tɩ, tɩ sãn paagɛ zẽ'e-sɛka yʋ'ʋrɛ n de Sirti n dagɩ kʋlko'om tɩ tẽntõnbĩ'isgo bɔna mĩ na, a wʋn fɩrɛ. Bɛla tɩ ba sike õorŋɔ la fu-kãtɛ, dee tɩ kʋsebgo la zã'ara ẽ sẽnna fẽfẽ.

¹⁸ La kʋsebgo la ken vugra la ke'enke'em nãmsra tõma, tɩ beere wiige, tɩ ba yese lɔg-sɛba n boe õorŋɔ la pʋam na, lobe basɛ ko'om na pʋam.

¹⁹ Tɩ beere le wiige, tɩ ba mẽŋa yese õorŋɔ la mẽŋa lɔgrɔ lobe basɛ ko'om na pʋam.

²⁰ Tɩ la ẽŋɛ dabsa se'em, tɩ tõma ka yẽ wẽntulle la wõrbiɛ, tɩ kʋsebgo la ken vugra ke'enke'em nãmsra tõma. Tɩ tõma kɔ'ɔgɛ vɔm pʋtẽ'erɛ.

²¹ Tɩ la daan yuuge tɩ nẽrba la ka di. Tɩ Apolɩ ze'ele ba tẽŋasʋka yetɩ: «Ya daan sãn sakɛ nɩ mam nõorɛ la, daan ka fõrgɛ Krɛtɩ, tɩ kãn yẽ nɩ nãmsgɔ la yel-bãna wã wuu.

²² La lɛɛlɛ wã, mam sosrɩ ya tɩ ya keŋe ya sũure. Tɩ nẽra baa ayɩla kãn ki ya pʋam, sãn dagna õorŋɔ la mã'a n wʋn sã'am.

²³ Zaam yʋ'ʋŋɔ Nawẽnnɛ n soe mam tɩ mam dɛna a tõntõnna la, tõm a malɛka tɩ a wa ze'ele mam zẽ'am

²⁴ yetɩ: ‹Apolɩ, da zoe dabeem. Dẽnɩ tɩ fʋ ka ze'ele na-keko la nẽŋam. La Nawẽnnɛ ẽŋɛ fʋ yel-sõnnɛ mɛ botɩ sɛba n boe õorŋɔ pʋam na wuu vɔa.›

²⁵ Bɛla, bʋraasɩ wã, keŋe-ya ya sũure, tɩ mam bɔ Nawẽnnɛ sɩra mɛ tɩ la wʋn ẽŋɛ wʋ malɛka la n yele mam se'em na.

²⁶ La kʋsebgo la wʋn pe'ege tɩ ka basɛ la tẽŋa tɩ ko'om gilge.»

²⁷ La daan de la dabsa pia la anaasɩ yʋ'ʋŋɔ, tɩ kʋsebgo la vugra pɛ'ɛra tõma ko-kãtɛ la yʋ'ʋrɛ n de Adriyatiki la zuo. Tɩ sõnsʋa tɩ nẽr-sɛba n tõnnɩ õorŋɔ la tõoma la tẽ'esɛ tɩ tɩ lɛm na tẽŋa.

²⁸ Tɩ ba dɩkɛ mĩ'a lʋ bõn-tɩbsgɔ basɛ ko'om na pʋam tɩ ba bɩsɛ kʋlga la n kɔ zõna se'em, makɛ tɩ la dɛna wʋ mẽtrɩ pitã la ayopɔɩ. Tɩ la ẽŋɛ fẽe, tɩ ba le makɛ bɩsɛ tɩ la dɛna wʋ mẽtrɩ pisyi la anii.

²⁹ Tɩ ba zɔta dabeem tɩ õorŋɔ la wʋn wẽ tãmpĩisi, tɩ ba dɩkɛ kuto n botɩ õorŋɔ zɛ'ɛta banaasɩ basɛ ko'om pʋam õorŋɔ la poorʋm, dee kã'ara Nawẽnnɛ tɩ beere wiige.

³⁰ Tɩ nẽr-sɛba n tõnnɩ õorŋɔ la tõoma la daan bɔɔra tɩ ba zoe dee basɛ õorŋɔ la, bɛla tɩ ba sike õorŋ-pɩka la ko'om pʋam, ẽŋɛ wʋ ba boorɩ tɩ ba dɩkɛ la kuto n botɩ õorŋɔ zɛ'ɛta basɛba basɛ õorŋɔ la nẽŋam.

³¹ Tɩ Apolɩ yele sʋda-kɛ'ɛma, la sʋdaasɩ la yetɩ: «Nẽr-bãna wã sãn ka bɔna õorŋɔ wã pʋam, yãma wuu kãn yãŋɛ põsɛ.»

³² Tɩ sʋdaasɩ la wã mĩ'i-sɛba n lʋ õorŋ-pɩka la, dee basɛ ẽ tɩ ko'om tarɩ ẽ fõrgɛ.

³³ Tɩ beere bɔna mĩ wiira, tɩ Apolɩ belem ba wuu tɩ ba di dia, yele ba yetɩ: «Zĩna de la dabsa pia la anaasɩ n wãna, tɩ ya tẽ'esrɩ kũm la vɔm, dee ka di sɛla.

³⁴ Bɛla mam belnɩ ya mɛ tɩ ya di dia yẽ pãŋa vɔa, tɩ ya zomto baa ayɩla kãn bɔɩ.»

³⁵ Ẽn yele bɛla la, dee dɩkɛ borborɩ pʋ'ʋsɛ Nawẽnnɛ ba wuu nẽŋam, dee fiise borborɩ la obe.

³⁶ Tɩ ba wuu yẽ bʋraanɛ mẽ di dia la.

³⁷ La tõma wuu daan de la nẽrba kɔbsyi la pisyopɔɩ la ayoobɩ õorŋɔ la pʋam.

³⁸ Tɩ ba di tɩgɛ, dee dɩkɛ bõnkɔɔla n boe õorŋɔ la pʋam na, lobe basɛ ko'om na pʋam, ba boorɩ tɩ õorŋɔ la n fakɛ.

Õorŋɔ sã'aŋɔ yelle

³⁹ Tɩ beere wiige, tɩ ba ka bãŋɛ tẽŋa la. La ba yẽ la zẽ'a n tã wʋn dooge, tɩ ba yetɩ, ba sãn tãna, ba botɩ õorŋɔ la tɔglɛ bilam.

⁴⁰ Tɩ ba lorge kuto la n botɩ õorŋɔ zɛ'ɛta la basɛ ko-kãtɛ la pʋam, dee lorge mĩ'isi la n lʋ dɔ-sɛba n wʋn botɩ õorŋɔ la sẽŋɛ ban boorɩ zẽ'e-sɛka la basɛ, dee zẽkɛ fuugo la n boe õorŋɔ la nẽŋam na, tɩ kʋsebgo wẽ'era fuugo la, tɩ õorŋɔ la wɛ'ɛsa doone.

⁴¹ Tɩ õorŋɔ la sẽŋɛ zẽ'a tɩ ko'om ka zo'oge mĩ ka zom tẽntõnbĩ'isgo zuo, tɩ a nẽŋam fɩrɛ, tɩ a koŋe sẽnnɛ. Tɩ ko-mĩ'isi wẽ'era a poorʋm la pãŋa, tɩ a sã'am.

⁴² Tɩ sʋdaasɩ la bɔɔra tɩ ba kʋ nẽr-sɛba tɩ ba yõgɛ la, tɩ sɛka da lui ko'om pʋam pãm dooge zoe fõrgɛ.

⁴³ Tɩ sʋda-kɛ'ɛma la bɔɔra tɩ a fãagɛ Apolɩ basɛ, ka sakɛ tɩ ba kʋ nẽrba la, dee bɔ nõorɛ yetɩ, sɛba n mi ko'om bũŋa la ẽgɛ lui ko'om pʋam yiɛn pãm dooge doone.

⁴⁴ Dee tɩ sɛba n ka mi bũŋa la dɩkɛ dɔ-palagsɩ, la õorŋɔ la bõn-sɛka n sã'am woo bũn dooge. Bɛla tɩ tõma wuu daan põsɛ dooge doone.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ