အွန်လိုင်း သမ္မာကျမ်းစာ

Tõoma 24 - Farefare Ninkaré

Zifdõma dõrɛ Apolɩ Afeligsi nẽŋam

¹ La dabsa anuu daarɛ, tɩ kãabgɔ kẽma nẽŋadãana Ananiyasɩ doose la kẽma basɛba, la yetɔg-mita yʋ'ʋrɛ n de Atɛrtuli wa'am Sezaare. Tɩ ba dɩkɛ Apolɩ yelle la tɩ ba tɔgɛ bɔ gɔmna la.

² Tɩ ba wi Apolɩ tɩ a wa'am. Tɩ Atɛrtuli yãŋa tɔgra dõta Apolɩ yetɩ: «Gɔmna sõŋɔ Afeligsi. La de la fõn bɩsrɩ tõma sõŋa la ĩyã tɩ tẽŋa la tara laafɛ, tɩ yɛla zozo'e teege tɩ tẽŋa la malgɛ.

³ Fõn ẽŋɛ sɛla wuu zẽ'esɩ wuu bɔ tõma la, tõma to'oge mɛ pʋ'ʋsra fʋ zozo'e.

⁴ La mam ka boorɩ tɩ m gʋ'ʋm fɔ, bɛla mam sosrɩ fʋ mɛ tɩ fɔ ẽŋɛ sugri dee selse m yetɔga wã fẽfẽe.

⁵ Tõma yẽ nẽr-ẽna tɩ a de la tẽn-wã'ara, ẽŋa n sa'asrɩ Zifdõma dũnia wuu zuo tɩ ba gita tẽnsɩ. A de la Nazarɛtɩ dõma põmpɔrŋɔ sore la nẽŋadãana.

⁶ A zɩgrɩ tɩ a sã'am la Wẽnde-kãtɛ la sisgo, tɩ ba yõkɛ ẽ. [La tõma daan boorɩ tɩ tɩ di a sarɩya la tõma mẽŋa lɔɔ.

⁷ Tɩ sʋda-kɛ'ɛma Alisiasɩ wa'am wa fãagɛ ẽ tõma zẽ'am la pãŋa,

⁸ dee bɔ nõorɛ yetɩ, sɛba n sãm ẽ na wa'am fõn zẽ'am.] Fʋ sãn soke ẽ fʋ mẽŋa, fʋ wʋn wõm bõn-sɛba wuu n botɩ tõma sãm ẽ.»

⁹ Atɛrtuli n tɔgɛ ba'asɛ la, tɩ Zifdõma la lagɩm sakɛ yetɩ, la de la bɛla.

Apolɩ tɔgɛ po'oge a mẽŋa Afeligsi nẽŋam

¹⁰ Zifdõma la n tɔgɛ kɩ'ɩlɩm na, tɩ gɔmna la bɔ Apolɩ nõorɛ tɩ a tɔgɛ. Tɩ Apolɩ yetɩ: «Mam mi tɩ fõn de la sarɩyadita so'olʋm ẽna wã pʋam halɩ yʋʋma n zo'oge. Bɛla mam sũure ãn yẽlʋm tɩ m tɔgɛ to'oge m mẽŋa.

¹¹ Fõn tã wʋn bãŋɛ mɛ tɩ la ka gãŋɛ dabsa pia la ayi tɩ mam sẽŋɛ Zerizalɛm tɩ m ka pʋ'ʋsɛ Nawẽnnɛ.

¹² La Zifdõma la ka yẽ mam tɩ mam wẽ'erɩ nõke'ene la nẽra Wẽnde-kãtʋm na, la ba ken ka yẽ tɩ mam sa'asrɩ nẽrba ba wẽndeto la pʋam bɩɩ tẽŋa la zẽ'e-sɛka.

¹³ La ba kãn yãŋɛ yẽ sɛla pa'alɛ tɩ bãma n yetɩ mam ẽŋɛ se'em na de sɩra.

¹⁴ La mam yetɩ fʋ tɩ mam sɩrɩ dolɩ la so-sɛka tɩ ba yetɩ põmpɔrŋɔ sore la. La mam pʋ'ʋsrɩ la Nawẽnnɛ tɩ tõma yaabdõma yʋʋn pʋ'ʋsrɩ la, dee sakra sɛla wuu n gʋlsɛ bɔna Amoyisi lɔɔ pʋam, la Nawẽnnɛ nõtɔ'ɔsrɩba gõnnɔ pʋam na.

¹⁵ Mam tarɩ pʋtẽ'erɛ la Nawẽnnɛ wʋ bãma n tarɩ pʋtẽ'erɛ se'em na, tɩ nẽrba wuu, nẽr-sõma la nẽr-bɛ'ɛsɩ wʋn vo'oge mɛ.

¹⁶ Bɛla tɩ mam mõrgra daarɛ woo tɩ m bãŋɛ m sũure pʋam tɩ mam ka ẽŋɛ be'em Nawẽnnɛ la nẽrba nifum.

¹⁷ La de la yʋʋma zozo'e tɩ mam daan ka boe Zerizalɛm, dee yãŋa tarɩ ligri leme tɩ m sõŋɛ m tẽŋa nẽrba, dee bɔ bɔ'a tɩ ba kãabɛ bɔ Nawẽnnɛ.

¹⁸ Mam daan boe mĩ ɩta la bɛla, tɩ ba yẽ mam Wẽnde-kãtʋm na, tɩ mam daan põn malgɛ m mẽŋa Nawẽnnɛ zẽ'am kɩ'ɩlɩm mɛ, la nẽrba daan ka boe la mam mĩ zo'oge, la ba mẽ daan ka gire mĩ.

¹⁹ La Zifdõma basɛba n ze'ele Azi so'olʋm n daan boe mĩ, ba sãn tara nɩ na yelle la mam, ba mẽŋa n wʋn wa'am nɩ wa yele fʋ mam n ẽŋɛ se'em.

²⁰ La nẽr-bãna wã sãn yẽ mam tõon-be'ego, wakat-sɛka tɩ mam daan boe ba sarɩyadia zẽ'am na, ba yele.

²¹ La ba kãn yẽ sɛla, sãn dagna mam daan ze'ele ba tẽŋasʋka tɔgɛ ba ke'enke'em yetɩ: ‹La de la mam n tarɩ pʋtẽ'erɛ tɩ sɛba n ki la wʋn vo'oge mɛ na ĩyã, tɩ mam zɛ ya nẽŋam tɩ ya dita mam sarɩya zĩna wã.› »

²² La Afeligsi n daan põn mina kõ-yẽlga la sore yelle la, tɩ a viige yetɔga la, dee yele ba yetɩ: «Sʋda-kɛ'ɛma Alisiasɩ sãn paam, mam wʋn kʋ'ʋgɛ yetɔga la bɔ ya.»

²³ Dee bɔ sʋda-kɛ'ɛma la n gu'uri Apolɩ la nõorɛ yetɩ, a bɩsra ẽ, la a bɔ ẽ yolsgo, la a sɩrdõma sãn tara sɛla bɔɔra tɩ ba bɔ ẽ, a basɛ tɩ ba bɔ ẽ.

Apolɩ ze Afeligsi la Adrisili nẽŋam

²⁴ La dabsa fẽe n tole, tɩ Afeligsi lagɩm na a pɔga Adrisili n de Zifu botɩ ba wi Apolɩ, tɩ a wa'am wa tɔgra nẽra n wʋn bɔ Azezi-krisi sɩra se'em yelle, tɩ ba sɛlsra.

²⁵ La Apolɩ n yãŋa wa tɔgra ɩrgɔ n masɛ, la yõk-m-mẽŋa, la sarɩyadia n sẽm yelle, tɩ dabeem yõkɛ Afeligsi, tɩ a yele Apolɩ yetɩ: «Basɛ bɛla, mam sãn wa yẽ nẽŋa, mam wʋn le wi fo.»

²⁶ A daan tẽ'esrɩ tɩ Apolɩ na'an wʋn bɔ ẽ na ligri, bɛla ĩyã tɩ a ẽn wi'ira ẽ sõsra la ẽ lɛ.

²⁷ Tɩ yʋʋma ayi tole, tɩ Apɔrsusi-fɛstusi yãŋa sɔɔgɛ Afeligsi zẽ'am. La Afeligsi daan boorɩ tɩ a ẽŋɛ la sɛla n ãn Zifdõma sũure yẽlʋm, bɛla ĩyã tɩ a basɛ tɩ Apolɩ ken bɔna yʋ'a deem.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ