အွန်လိုင်း သမ္မာကျမ်းစာ

Tõoma 23 - Farefare Ninkaré

¹ Tɩ Apolɩ bɩsra sarɩyaditba la zĩi, dee yele yetɩ: «M sɔbiisi, mam n tõm m tõoma la wuu Nawẽnnɛ nẽŋam wa paam zĩna, mam bãŋɛ m sũure pʋam mɛ tɩ la ãn sõŋa.»

² Tɩ kãabgɔ kẽma nẽŋadãana Ananiyasɩ bɔ nõorɛ yetɩ, sɛba n ze lɛm Apolɩ la wẽ a nõorɛ.

³ Tɩ Apolɩ yele ẽ yetɩ: «Nawẽnnɛ wʋn wẽ fɔ. Fʋ ãn wʋ dagoone tɩ ba saasɛ, tɩ a zuum mã'a ãna sõŋa la, fõn zĩ tɩ fʋ di mam sarɩya wʋ lɔɔ n yele se'em na, la fõn sã'am lɔɔ la mɛ, fõn bɔ nõorɛ yetɩ, ba wẽ mam na.»

⁴ Tɩ sɛba n ze lɛm Apolɩ la yele ẽ yetɩ: «Fõn tʋʋrɩ la Nawẽnnɛ kãabgɔ kẽma nẽŋadãana?»

⁵ Tɩ a lerge yetɩ: «M sɔbiisi, mam ka mi tɩ a de la Nawẽnnɛ kãabgɔ kẽma nẽŋadãana. Se'ere n soe la, Nawẽnnɛ gõŋɔ pʋam la gʋlsɛ yetɩ: ‹Da tɔgɛ fʋ buuri nẽŋadãana be'em.› »

⁶ Tɩ Apolɩ bãŋɛ tɩ sarɩyaditba la basɛba de la Saduse dõma, dee tɩ basɛba mẽ dɛna Farisi dõma, tɩ a tɔgɛ ke'enke'em yele ba wuu yetɩ: «M sɔbiisi, mam de la Farisi nẽra, mam sɔ de la Farisi mẽŋa mẽŋa. Mam n tarɩ pʋtẽ'erɛ tɩ sɛba n kiiri la wʋn le vo'oge mɛ na, bɛla ĩyã tɩ ba sãm mam.»

⁷ Ẽn yele bɛla la, tɩ Farisi dõma la Saduse dõma wẽ'era nõkɛ'ɛma la taaba, tɩ nẽrba la welse.

⁸ Se'ere n soe la, Saduse dõma la ka sakɛ tɩ kũm wʋn vo'oge, la ba ka sakɛ tɩ malɛkadõma la sɩɩsɩ bɔna, la Farisi dõma sakɛ bɛla wuu mɛ.

⁹ Tɩ lɔɔ karẽnsãandõma basɛba n de Farisi dõma la isge yãbra ke'enke'em yetɩ: «Tõma ka yẽ bʋra-ẽna wã tõon-be'ego. Tã tɩ la dɛna la sɩa, bɩɩ malɛka n tɔgɛ bɔ ẽ.»

¹⁰ Tɩ nõke'ene na wẽ'a daan zo'oge gãŋɛ. Tɩ sʋdaasɩ kɛ'ɛndõma kɛ'ɛma la zɔta dabeem yetɩ, ba na'an wʋn ãasʋm Apolɩ. Bɛla tɩ a bɔ sʋdaasɩ la nõorɛ yetɩ, ba sẽŋɛ ka to'oge ẽ nẽrba la zẽ'am, tarɩ ẽ wa'am wa yʋ sʋdaasɩ la yire.

¹¹ Tɩ daar-ẽŋa yʋ'ʋŋɔ, tɩ Zuudãana Azezi wa'am Apolɩ zẽ'am wa yele ẽ yetɩ: «Keŋe fʋ sũure, tɩ fõn tɔgɛ mam yɛla Zerizalɛm kalam se'em na, dẽnɩ tɩ fʋ ken tɔgɛ mam yɛla Rom tẽŋam bɛla.»

Ba eerɩ sore tɩ ba kʋ Apolɩ

¹² Tɩ beere wiige, tɩ Zifdõma basɛba lagsɛ taaba ẽŋɛ nõorɛ ayɩla pɔɩ yetɩ, bãma kãn di dia bɩɩ yũ ko'om, sãn dagna bãma kʋ la Apolɩ.

¹³ Sɛba n daan lagsɛ ẽŋɛ nõorɛ ayɩla bɛla la, daan gãnnɩ nẽrba pinaasɩ mɛ.

¹⁴ La ba daan sẽŋɛ la kãabgɔ kẽma nẽŋadõma, la kẽma la zẽ'am ka yetɩ: «Tõma lagsɛ mɛ pɔɩ yetɩ, tõma kãn di sɛla, sãn dagna tɩ tõma kʋ la Apolɩ.

¹⁵ Bɛla ĩyã, yãma sarɩyaditba la wuu, tõm-ya tɩ ba ka yele sʋda-kɛ'ɛma la tɩ a tarɩ Apolɩ wa'am ya zẽ'am, dee ẽŋɛ-ya wʋ ya boorɩ tɩ ya soke bãŋɛ la a yelle la pa'asɛ, tɩ tõma mãasʋm mɛ tɩ kʋ ẽ tɩ a nãn ka paam.»

¹⁶ Tɩ Apolɩ tã dayʋa bãŋɛ ban bãm yele se'em na, sẽŋɛ sʋdaasɩ la yire ka yele Apolɩ.

¹⁷ Tɩ Apolɩ wi sʋda-kɛ'ɛndõma la ayɩla yele ẽ yetɩ: «Tarɩ budib-ẽna wã sẽŋɛ ya kɛ'ɛma la zẽ'am, tɩ a tarɩ la sɛla tɩ a yele ẽ.»

¹⁸ Tɩ sʋda-kɛ'ɛma la tarɩ ẽ sẽŋɛ ba kɛ'ɛma la zẽ'am ka yele ẽ yetɩ: «Apolɩ tɩ ba yʋ la n wi mam yetɩ, m tarɩ budib-ẽna wã wa'am fʋ zẽ'am, tɩ a tarɩ la sɛla tɩ a yele fo.»

¹⁹ Tɩ kɛ'ɛma la gʋrɛ a nu'ugo tarɩ ẽ yese kẽnkɛrŋa ka soke ẽ yetɩ: «Fõn tarɩ la bẽm yelle tɩ fʋ yele mam?»

²⁰ Tɩ a lerge ẽ yetɩ: «Zifdõma n bãm yetɩ, bãma wʋn sose fõn beesã tɩ fʋ tarɩ Apolɩ wa'am ba sarɩyadia zẽ'am, wʋ bãma boorɩ tɩ ba bɩsɛ la a yelle la pa'asɛ.

²¹ La, da sakɛ ban wʋn yele se'em na, tɩ ba nẽrba n gãŋɛ pinaasɩ n sʋgɛ gu'ura Apolɩ. Ba wuu pɔɩ mɛ yetɩ, bãma kãn di dia bɩɩ yũ ko'om, sãn dagna tɩ bãma kʋ la Apolɩ. Ba mãasʋm gu'ura la fõn wʋn lerge se'em.»

²² Tɩ kɛ'ɛma la yele budibla la yetɩ: «Da yele nẽra tɩ fõn yele mam sɛla.» Dee botɩ a lebe.

Ba tarɩ Apolɩ sẽŋɛ ka ẽŋɛ gɔmna Afeligsi nu'usum

²³ Tɩ sʋdaasɩ kɛ'ɛndõma kɛ'ɛma la wi a sʋda-kɛ'ɛndõma bayi yele ba yetɩ: «Basɛ-ya tɩ sʋdaasɩ kɔbsyi, la wi-bã'arba pisyopɔɩ, la kãn-lɔbrɩba kɔbsyi mãasʋm. Tɩ yʋ'ʋŋɔ ẽna wã karf-awɛɩ ya sẽŋɛ Sezaare.

²⁴ Mãasʋm-ya wiiri bɔ Apolɩ tɩ a bã tɩ ya tarɩ ẽ sẽŋɛ gɔmna Afeligsi zẽ'am la ĩmã'asʋm.»

²⁵ Dee gʋlsɛ gõŋɔ yetɩ:

²⁶ «Mam Akloorɩ-lisiasɩ n gʋlsɛ gõŋɔ wã bɔ'ɔra fõn gɔmna sõŋɔ Afeligsi. Mam pʋ'ʋsrɩ fɔ.

²⁷ Zifdõma n daan yõkɛ bʋra-ẽna wã bɔɔra tɩ ba kʋ ẽ. Tɩ mam wõm tɩ a de la Rom tẽŋa nu'ugo nẽra, tɩ mam sẽŋɛ la sʋdaasɩ ka fãagɛ ẽ,

²⁸ dee bɔɔra tɩ m bãŋɛ bõn-sɛka n soe tɩ ba dõrɛ ẽ tarɩ ẽ sẽŋɛ ba sarɩyadia zẽ'am.

²⁹ La mam daan yẽ tɩ la de la Zifdõma lɔɔ yɛla ĩyã, dee a ka ẽŋɛ sɛla n narɩ ba kʋ ẽ, bɩɩ ba yʋ ẽ yʋ'a deem.

³⁰ Tɩ ba yele mam yetɩ, Zifdõma bãm mɛ tɩ ba kʋ ẽ, bɛla ĩyã tɩ mam ẽŋɛ tɔtɔ tõm tɩ ba tarɩ ẽ wa'am fõn zẽ'am, dee bɔ nõorɛ yetɩ, sɛba n sãm ẽ na wa'am fõn zẽ'am wa tɔgɛ ẽn ẽŋɛ se'em.»

³¹ Tɩ sʋdaasɩ la ẽŋɛ ẽn yele ba se'em na, tarɩ Apolɩ yʋ'ʋŋɔ ẽŋa sẽŋɛ Antipatrisi.

³² Tɩ beere wiige, tɩ sʋda-sɛba n sẽnnɩ nãma la lebe ba yire la, dee tɩ sɛba n bã wiiri la tarɩ Apolɩ sẽŋɛ.

³³ La ban paagɛ Sezaare la, ba dɩkɛ gõŋɔ la mɛ bɔ gɔmna la dee dɩkɛ Apolɩ ẽŋɛ a nu'usum.

³⁴ Tɩ a karẽŋɛ gõŋɔ la, dee soke yetɩ, ẽŋa yese la so'olʋm kãna? Tɩ Apolɩ pa'alɛ ẽ tɩ ẽŋa yese la Silisi so'olʋm.

³⁵ Tɩ gɔmna la yele ẽ yetɩ: «Sɛba n tarɩ fʋ wa'am sãm na sãn paam, mam wʋn soke bãŋɛ lan ẽŋɛ se'em.» A yele bɛla dee bɔ nõorɛ yetɩ, ba kẽ'esɛ ẽ naba A'erɔdɩ yire tɩ ba gu'ura ẽ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ