အွန်လိုင်း သမ္မာကျမ်းစာ

Tõoma 21 - Farefare Ninkaré

Apolɩ we'esɩ Zerizalɛm

¹ Tɩ tõma keese ba, dee kẽ õorŋɔ sẽŋɛ tẽntẽa ka paagɛ Kɔsɩ. Tɩ beere wiige, tɩ tõma paagɛ Rɔdɩ ze'ele bilam sẽŋɛ Patara.

² La bilam tɩ tõma yẽ õorŋɔ ayẽma n we Fenisi. Tɩ tõma kẽ sẽŋɛ.

³ La tõma daan sẽŋɛ mɛ ka tũule yẽta Sipri, la tõma daan basɛ Sipri tẽŋa la gɔbga bɔba, dee tole ka paagɛ Siiri so'olʋm sige Tiiri. Bilam tɩ ba yetɩ ba sike õorŋɔ la lɔgrɔ.

⁴ Tɩ tõma sige sẽŋɛ ka yẽ Azezi karẽnbiisi bilam, zĩ'ire la ba lɛ dabsa ayopɔɩ. Tɩ ba yele Apolɩ la Nawẽnnɛ Sɩa pãŋa yetɩ, a da sẽŋɛ Zerizalɛm.

⁵ La dabsa ayopɔɩ la daarɛ, tɩ tõma isge tɩ tɩ tole, tɩ bãma la ba pɔgba, la ba kɔma wuu kɔlgɛ tõma yese tẽŋa la kẽnkɛrŋa. Tɩ tõma wuu ka dũma ko-kãtɛ la nõorʋm pʋ'ʋsɛ Nawẽnnɛ,

⁶ dee keese taaba. Tɩ tõma yãŋa kẽ õorŋɔ, dee tɩ ba lebe kulla.

⁷ La tõma ze'ele Tiiri sẽŋɛ la Tolemasɩ ka pʋ'ʋsɛ Azezi karẽnbi-sɛba n boe bilam na, dee ẽŋɛ daarɛ ayɩla ba zẽ'am.

⁸ Tɩ beere wiige, tɩ tõma ze'ele bilam sẽŋɛ Sezaare ka sige Afilipi yire kẽ'era bilam. Afilipi daan de la nẽrba bayopɔɩ la tɩ ba daan looge Zerizalɛm na nẽra ayɩla, a daan mõolɩ la Azezi kõ-yẽlga.

⁹ A daan tarɩ la pɔyɔɔsɩ banaasɩ n ka mi bʋraasɩ, ba daan to'osrɩ la Nawẽnnɛ yetɔga tɔgra bɔ'ɔra nẽrba.

¹⁰ Tõma daan ẽŋɛ bilam na dabsa faa, tɩ Nawẽnnɛ nõtɔ'ɔsa yʋ'ʋrɛ n de Agabisi ze'ele Zude wa'am,

¹¹ wa paam tõma zẽ'am wa fooge Apolɩ sagãnnɛ lʋ a mẽŋa nãma la a nu'usi, dee yetɩ: «Nawẽnnɛ Sɩa yele la wãna yetɩ: ‹Zifdõma wʋn lʋ sagãn-ẽna wã dãana la wãna Zerizalɛm, dɩkɛ ẽ ẽŋɛ bu-zãŋsɩ nu'usum.› »

¹² La tõma n wõm bɛla la, tɩ tõma la nẽr-sɛba n boe bilam na, daan bɛlna Apolɩ yetɩ, a da sẽŋɛ Zerizalɛm.

¹³ Tɩ a lerge tõma yetɩ: «Bẽm tɩ ya kaasrɩ sã'ana m sũure? Mam sakɛ mɛ tɩ ba lʋ ma, la dagɩ bɛla mã'a, baa mam sãn wʋn ki Zerizalɛm Zuudãana Azezi yʋ'ʋrɛ ĩyã, mam ken sakɛ mɛ.»

¹⁴ La tõma n kãn yãŋɛ botɩ a sakɛ bɔ tõma la ĩyã, tɩ tõma koŋe yele ẽ yetɩ: «Zuudãana n boorɩ se'em ẽŋɛ.»

¹⁵ Bɛla poorʋm tɩ tõma daan yãŋa mãasʋm wɛ'ɛsa Zerizalɛm.

¹⁶ Tɩ Sezaare tẽŋa karẽnbiisi basɛba kɔlgɛ tõma sẽŋɛ Aminasõ yire, bilam tɩ tõma wʋn ka gã'arɛ. Aminasõ de la Sipri nẽra, a de la Azezi karẽnbia halɩ kʋrʋm kʋrʋm.

Apolɩ sõsɛ la kẽma Azakɩ yire

¹⁷ La tõma n paagɛ Zerizalɛm na, tɩ sɔbiisi la to'oge tõma la sũ-yẽlga.

¹⁸ Tɩ beere wiige, tɩ tõma doose Apolɩ sẽŋɛ Azakɩ yire. Tɩ Azezi nẽr-kʋʋŋɔ kẽma la wuu wa'am mĩ.

¹⁹ Tɩ Apolɩ pʋ'ʋsɛ ba, dee tɔgɛ pa'alɛ ba bõn-sɛba wuu tɩ Nawẽnnɛ ẽŋɛ bu-zãŋsɩ la tẽŋasʋka ẽŋa tõonɛ na pʋam.

²⁰ La ban wõm bɛla la, ba pẽgɛ Nawẽnnɛ mɛ, dee yele Apolɩ yetɩ: «Tɩ sɔbia, fõn yẽ Zifdõma tʋsa tʋsa n bɔ Azezi sɩra se'em dee mõrgɛ sakra Amoyisi lɔɔ sõŋa sõŋa.

²¹ Ba wõm tɩ ba yetɩ, fõn zãsnɩ Zifdõma sɛba wuu n boe bu-zãŋsɩ tẽnsʋm na, yɛta tɩ ba basɛ Amoyisi lɔɔ, la ba da wãta ba kɔma, la ba da dɔla Zifdõma dɔgmike.

²² Ba wʋn wõm tɩ fõn wa'am mɛ, tɩ wʋn ẽŋɛ la wãne?

²³ Ẽŋɛ tõma n wʋn yetɩ fʋ ẽŋɛ se'em na. Nẽrba banaasɩ n boe tõma zẽ'am kalam bĩŋe nõorɛ la Nawẽnnɛ.

²⁴ Tarɩ ba sẽŋɛ ka lagɩm na ba malgɛ fʋ mẽŋa Nawẽnnɛ zẽ'am, dee yɔ, ba wʋn yɔ se'em na bɔ ba tɩ ba siige ba zuto. Bɛla wʋn botɩ nẽrba wuu bãŋɛ tɩ fõn mẽŋa dolɩ la Amoyisi lɔɔ la, la ban tɔgɛ fʋ yelle se'em na wuu dagɩ sɩra.

²⁵ La sãn dɛna bu-zãŋsɩ la n bɔ Azezi sɩra la yelle, tõma daan looge yɛm gʋlsɛ gõŋɔ yele ba yetɩ: ‹Ba da dita di-sɛba tɩ ba kãabɛ bɔ baga, la ba da di zɩɩm, la ba da di sɛla tɩ ba tẽgɛ kʋ. La ba da tõnna yalsɩ tõoma.› »

²⁶ Ban yele bɛla la, tɩ beere wiige, tɩ Apolɩ tarɩ nẽrba banaasɩ la sẽŋɛ tɩ ba ka lagɩm malgɛ ba mẽŋa Nawẽnnɛ zẽ'am, dee tɩ a sẽŋɛ ka kẽ Wẽnde-kãtʋm na, tɔgɛ pa'alɛ dabsa se'em n deege tɩ ba wʋn malgɛ ba mẽŋa kɩ'ɩlɩm, dee tɩ ba yãŋa kãabɛ bɔ Nawẽnnɛ nẽra woo ĩyã.

Ba yõkɛ Apolɩ Wẽnde-kãtʋm

²⁷ La dabsa ayopɔɩ la n dee fẽe la a ba'asɛ la, tɩ Zifdõma ze'ele Azi so'olʋm wa'am wa yẽ Apolɩ Wẽnde-kãtʋm na, botɩ nẽrba la sũnsõa yĩige la Apolɩ, tɩ ba yõkɛ ẽ,

²⁸ dee tĩi tɔgra yetɩ: «Ɩsrayɛlɩ dõma, sõŋɛ-ya tɔ! Bʋra-ẽna wã gilgri la tẽnsɩ wuu zãsna nẽrba tɩ ba sɩ'ɩsra Ɩsrayɛlɩ dõma ka dɔla Amoyisi lɔɔ, dee tɔgra Wẽnde-kãtɛ la tɔg-be'ero. A tarɩ la nẽrba n dagɩ Zifdõma wa'am wa kẽ Wẽnde-kãtɛ la pʋam dẽgɛ Nawẽnnɛ zẽ'e-sõŋɔ la.»

²⁹ Se'ere n soe la, ba daan yẽ la Efɛɛzɩ nẽra Atrofim n dolɩ Apolɩ tẽŋa la pʋam, tɩ ba tẽ'esɛ tɩ a doose ẽ kẽ la Wẽnde-kãtɛ la pʋam.

³⁰ Tɩ tẽŋa la daan gire, tɩ nẽrba wuu zoe lagsɛ taaba yõkɛ Apolɩ ve'ege ẽ Wẽnde-kãtʋm na yese. Dee yʋ zanõa la tɔtɔ.

³¹ Tɩ ba daan zɩgra tɩ ba kʋ Apolɩ. Tɩ Rom sʋdaasɩ kɛ'ɛndõma kɛ'ɛma wõm tɩ Zerizalɛm tẽŋa wuu gire mɛ.

³² Tɩ a kɔ'ɔn doose sʋdaasɩ, la ba kɛ'ɛndõma tɩ ba zoe sẽŋɛ nẽrba la zẽ'am. La ban yẽ sʋdaasɩ kɛ'ɛndõma kɛ'ɛma, la sʋdaasɩ la, tɩ ba basɛ ka le wẽ'era Apolɩ.

³³ Tɩ sʋdaasɩ kɛ'ɛndõma kɛ'ɛma la paagɛ yõkɛ Apolɩ, dee bɔ sʋdaasɩ la nõorɛ yetɩ, ba ba ẽ na bãnsɩ bayi. Dee tɩ a soke bãŋɛ ẽn de nẽr-sɛka, la ẽŋa n ẽŋɛ sɛla.

³⁴ Tɩ nẽr-kʋʋŋɔ la tãsra yẽma yẽma, halɩ tĩi vɔɔla tɩ sʋdaasɩ kɛ'ɛndõma kɛ'ɛma la ka tã'agɛ wõm sɛla n ẽŋɛ, tɩ a bɔ sʋdaasɩ la nõorɛ yetɩ, ba tarɩ ẽ sẽŋɛ bãma yi-kãtɛ la pʋam.

³⁵ La ban tarɩ ẽ paagɛ bĩmbĩna la n zonnɩ kẽ'era deego la pʋam na, ba buke ẽ mɛ, nẽrba la n ba gita la ĩyã.

³⁶ Tɩ ba wuu dɔla tɔgra ke'enke'em yetɩ: «Kʋ-ya ẽ.»

Apolɩ tɔgɛ tɩ a to'oge a mẽŋa
( Tõoma 9:1-19 ; 26:9-18 )

³⁷ La ban yetɩ ba kẽ'esɛ Apolɩ sʋdaasɩ la yire la, tɩ Apolɩ soke sʋda-kɛ'ɛma la yetɩ: «Mam tarɩ nõorɛ tɩ m yele fʋ sɛla mɛ bɩɩ?» Tɩ kɛ'ɛma la soke ẽ yetɩ: «Fõn wõnnɩ Grɛkɩ yetɔga mɛ?

³⁸ Bɛla fõn dagɩ Ezipti nẽr-sɛka n daan sa'asɛ nẽrba la gɔmna, dee daan doose nẽr-kʋʋrba tʋsanaasɩ sẽŋɛ weem na?»

³⁹ Tɩ Apolɩ lerge ẽ yetɩ: «Ayɛɩ, mam de la Zifu, mam ze'ele la Tarsɩ n boe Silisi so'olʋm. Mam de la tẽn-ẽŋa n tarɩ yõorɔ la nẽra. Mam sosrɩ fʋ mɛ, bɔ mam sore tɩ m tɔgɛ la nẽrba la.»

⁴⁰ Tɩ kɛ'ɛma la bɔ ẽ nõorɛ. Tɩ Apolɩ ze'ele bĩmbĩna la zuo zẽkɛ a nu'ugo. Tɩ nẽrba la ãna sĩm. Tɩ a tɔgɛ Ebre n de ba mẽŋa yetɔga bɔ ba.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ