အွန်လိုင်း သမ္မာကျမ်းစာ

Tõoma 19 - Farefare Ninkaré

Apolɩ boe Efɛɛzɩ

¹ La Apolɔsɩ n daan nãn boe Korẽntɩ la, Apolɩ doose la tãnsɩ zuo tẽnsɩ la wuu pʋam tole, sẽŋɛ ka paagɛ Efɛɛzɩ yẽ karẽnbiisi basɛba bilam,

² soke ba yetɩ: «Yãma n bɔ Azezi sɩra la, yãma to'oge Nawẽnnɛ Sɩa mɛ bɩɩ?» Tɩ ba lerge yetɩ: «Ayɛɩ, tõma nãn ka wõm tɩ Nawẽnnɛ Sɩa boe.»

³ Tɩ Apolɩ soke ba yetɩ: «Ko'om misga kãna tɩ yãma to'oge?» Tɩ ba lerge yetɩ: «Tõma to'oge la Azã ko'om misga.»

⁴ Tɩ Apolɩ yele ba yetɩ: «Azã daan misri nẽrba ko'om pʋam pa'ala tɩ ba teege la yɛm basɛ tõon-be'ero. A daan yetɩ nẽrba la, tɩ nẽra n weege ẽŋa poorʋm sẽna, ba doose ẽŋa. Nẽr-ẽŋa de la Azezi.»

⁵ La ban wõm bɛla la, ba botɩ ba mise ba ko'om pʋam mɛ Zuudãana Azezi yʋ'ʋrɛ ĩyã.

⁶ Tɩ Apolɩ dɩkɛ a nu'usi paglɛ ba zuto, tɩ Nawẽnnɛ Sɩa wa'am ba zuo, tɩ ba tɔgra yetɔg-zãŋsɩ dee to'oge Nawẽnnɛ yetɔga tɔgɛ bɔ nẽrba.

⁷ Ba daan de wʋ nẽrba pia la ayi.

⁸ Apolɩ daan kẽ Efɛɛzɩ la wõr-sɩtã, daan kẽ'era Zifdõma wẽndeem mõola Nawẽnnɛ yetɔga la bʋraanɛ bɔ'ɔra nẽrba, dee mõrgɛ pa'alɛ ba Nawẽnnɛ so'olʋm yɛla tɩ ba sakɛ.

⁹ Tɩ basɛba daan kɛ'ɛm ba sũure ka sakɛ, dee tɔgra Zuudãana sore la tɔg-be'ero nẽrba nẽŋam. Tɩ Apolɩ basɛ ba dee welge karẽnbiisi la fõrgɛ. Tɩ daarɛ woo tɩ a zãsna ba Atiranusi karẽndeego pʋam.

¹⁰ A ẽŋɛ bɛla la yʋʋma ayi. La nẽr-sɛba wuu n boe Azi tẽnsʋm na wõm Zuudãana yetɔga mɛ, Zifdõma, la bu-zãŋsɩ wuu.

Aseeva dayɔɔsɩ yelle

¹¹ La Nawẽnnɛ daan basɛ tɩ Apolɩ tõm na tõon-yãlm-kãra.

¹² La ba daan sãn ẽn dɩkɛ ãnkɩra bɩɩ futo n kalʋm a ĩyã tarɩ sẽŋɛ ka kalʋm bã'adõma, ba yẽtɩ ĩmã'asʋm mɛ, tɩ kʋlkã'arsɩ yɛsra dee basra ba.

¹³ Tɩ Zifdõma basɛba n daan gilgri digra kʋlkã'arsɩ nẽrba zẽ'am, daan makɛ tɩ ba dige kʋlkã'arsɩ la Zuudãana Azezi yʋ'ʋrɛ, yele ba yetɩ: «Mam yetɩ ya la Azezi sɛka tɩ Apolɩ mõolɩ la yʋ'ʋrɛ tɩ ya yese.»

¹⁴ Ba daan de la Aseeva n de Zifdõma kãabgɔ kẽma nẽŋadãana dayɔɔsɩ bayopɔɩ n ɩtɩ bɛla.

¹⁵ Tɩ kʋlkã'arga lerge ba yetɩ: «Mam mi Azezi mɛ, dee mina Apolɩ n de sɛka, la yãma de la ãndõma?»

¹⁶ Tɩ kʋlkã'arga la n tarɩ sɛka la isge zɛbɛ ba la pãŋa yãŋɛ ba wuu, tɩ ba ze'ele yire la zoe yese bɛɛla la pɔglʋŋɔ.

¹⁷ Tɩ Zifdõma, la bu-zãŋsɩ la wuu n boe Efɛɛzɩ la wõm yel-ẽna wã. Tɩ dabeem kẽ ba wuu, tɩ ba pẽgra Zuudãana Azezi yʋ'ʋrɛ.

¹⁸ Tɩ nẽrba zozo'e bɔ Azezi sɩra wa'am wa pelge ba pʋa tɔgɛ ba tõon-be'ero nẽrba nẽŋam.

¹⁹ Tɩ ba zozo'e n tarɩ ba gõnnɔ tõnna tɩɩm tõoma la, lagsɛ ba yõ la bugum nẽrba la wuu nifum. Tɩ ba geele gõnnɔ na wuu ligri, tɩ ba de la lig-kõba tʋspinuu.

²⁰ La Zuudãana n pa'alɛ a pãŋa bɛla la, tɩ a yetɔga la saara zẽ'a wuu dee yẽta pãŋa.

Efɛɛzɩ dõma dãmŋɔ yelle

²¹ Bɛla poorʋm tɩ Apolɩ tẽ'esɛ a sũurum yetɩ, ẽŋa wʋn sẽŋɛ la Masedʋanɩ, la Akayi ka ze'ele bilam sẽŋɛ Zerizalɛm, dee yetɩ: «Mam sãn paagɛ bɔna Zerizalɛm, dẽnɩ tɩ mam paagɛ Rom.»

²² La a tõm na Atimõtɩ, la A'erastɩ n de a sõŋrɩba tɩ ba sẽŋɛ Masedʋanɩ, dee weege a mẽŋa Azi yuuge fẽe.

²³ La wakat-ẽŋa dãmŋɔ zozo'e n isge Efɛɛzɩ Zuudãana Azezi sore la doosgo yelle.

²⁴ La bʋraa n daan de kuta, tɩ a yʋ'ʋrɛ dɛna Ademetrisi. A daan tarɩ la zũuro kuta bõndõma tɩ ba wõna la ba wẽnnɛ Artemisi deego la. Tɩ zũuro tõntõnɩba la daan yẽ yõorɔ zozo'e tõon-ẽŋa pʋam.

²⁵ Tɩ Ademetrisi lagsɛ ba, la sɛba wuu n tõnnɩ tõon-ẽŋa buuri, yele ba yetɩ: «Bʋraasɩ wã, ya mi tɩ tõon-ẽna wã pʋam tɩ tɩ yẽtɩ bõntarsõm.

²⁶ Ya mẽŋa wõm dee yẽ Apolɩ n ɩtɩ se'em. A pa'alɩ nẽrba tɩ wẽn-sɛba tɩ nẽrsaalba ẽŋɛ la ba mẽŋa nu'usi la dagɩ wẽna sɩra sɩra. A ẽŋɛ bɛla mõrgɛ teege nẽrba zozo'e pʋtẽ'era mɛ Efɛɛzɩ kalam, la, la dee la fẽe tɩ a paagɛ Azi tẽnsɩ wã wuu pʋam.

²⁷ Bõn-ẽna wʋn botɩ tõma tõonɛ na sã'am mɛ. La sɛla n pa'asɛ, wẽn-kãtɛ Artemisi deego la wʋn lebge la zãŋa, la Artemisi mẽŋa tɩ Azi nẽrba, la dũnia nẽrba wuu nã'asrɩ la, pãŋa wʋn sã'am mɛ.»

²⁸ La ban wõm yetɔg-bãna la, ba sũa yĩige mɛ tɩ ba tĩi tɔgɛ yetɩ: «Efɛɛzɩ dõma wẽnnɛ Artemisi n tarɩ pãŋa.»

²⁹ Tɩ tẽŋa la wuu dãmɛ. Tɩ nẽrba la yõkɛ Agayusi la Aristarkɩ tarɩ ba zoe sẽŋɛ lagsgɔ zẽ'am, bãma bayi de la Masedʋanɩ nẽrba n dolɩ Apolɩ.

³⁰ Tɩ Apolɩ bɔɔra tɩ a kẽ nẽr-kʋʋŋɔ la zẽ'am, tɩ karẽnbiisi la ka sakɛ.

³¹ Tɩ Azi tẽŋa nẽŋadõma basɛba n de a sɩrdõma tõm nẽrba yetɩ, ba wa'am a zẽ'am wa belem ẽ yetɩ, a da sẽŋɛ lagsgɔ zẽ'am na.

³² Tɩ nẽr-kʋʋŋɔ la lagɩm vɔɔla zozo'e, tɩ nẽra woo tɔgra ẽŋa n tẽ'esɛ se'em, tɩ ba zozo'e ka mina bõn-sɛka n botɩ ba lagsɛ.

³³ Tɩ Zifdõma looge Alɛgsãndrɩ tɩ a sẽŋɛ nẽrba la nẽŋam ka tɔgɛ, tɩ nẽrba la basɛba pa'alɛ ẽ yelle la võorɛ. Tɩ Alɛgsãndrɩ yɩbsɛ la nu'usi tɩ a tɔgɛ yelle la pa'alɛ nẽrba la.

³⁴ La ban bãŋɛ tɩ a de la Zifu la, tɩ ba wuu lagɩm taaba tĩi kaasɛ yetɩ: «Efɛɛzɩ dõma wẽnnɛ Artemisi n tarɩ pãŋa.» Ba kaasɛ bɛla paagɛ karf-ayi.

³⁵ Tɩ tẽŋa la gõn-gʋlsa botɩ ba go'oge, tɩ a yele ba yetɩ: «Efɛɛzɩ nẽrba, dũnia nẽrba wuu mi mɛ tɩ wẽn-kãtɛ Artemisi pʋ'ʋsgɔ deego la boe la Efɛɛzɩ kalam, la tõma n de a pʋ'ʋsgɔ deego la gu'urba, la kugre la n wõn na Artemisi ze'ele saazuum lui la gu'urba.

³⁶ Nẽra nẽra kãn yãŋɛ sɩ'ɩsɛ yel-ẽna. Bɛla ĩyã, go'oge-ya voole, da lɔgɛ-ya ẽŋɛ sɛla n ka masɛ.

³⁷ Yan tarɩ nẽr-bãna wa'am kalam wã, ba ka yele tɩ wẽnnɛ na yel-be'ego, la ba ka kẽ a pʋ'ʋsgɔ deem na ẽŋɛ sɛla n de be'em.

³⁸ La Ademetrisi la a tõntõnɩba la sãn tara yelle la nẽr-sɛka, sarɩyadia daarɛ boe mɛ, la sarɩyaditba mẽ boe mɛ. A sãn bɔɔra, a tarɩ ba sẽŋɛ bilam ka sãm.

³⁹ La ya sãn yẽ la yel-sɛka tɩ ya bɔɔra tɩ ya malgɛ, tẽŋa la nẽrba lagsgɔ daarɛ, tɩ wʋn malgɛ.

⁴⁰ Yãma n ẽŋɛ sɛla zĩna wã wʋn wa'am na yelle, tɩ ba wʋn dõrɛ tɩ yetɩ, tɩ gire la tẽŋa. La tɩ kãn yãŋɛ pa'alɛ sɛla n botɩ tɩ lagsɛ gire girga la. La tɩ kãn yãŋɛ tɔgɛ la võorɛ sõŋa.»

⁴¹ Ẽŋa n yele bɛla kɩ'ɩlɩm na, dee yele ba tɩ ba wɩrgɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ