အွန်လိုင်း သမ္မာကျမ်းစာ

Tõoma 17 - Farefare Ninkaré

Yel-sɛba n ẽŋɛ Tesaloniki tẽŋam

¹ Apolɩ la Asɩlaasɩ doose la Amfipoli, la Apoloni tẽnsʋm tole sẽŋɛ Tesaloniki, zẽ'e-ẽŋa Zifdõma wẽndeego n daan boe mĩ.

² Tɩ Apolɩ daan kẽ mĩ wʋ ẽ ẽn ɩta se'em na, tɔgɛ bõn-sɛba n boe Nawẽnnɛ gõŋɔ pʋam na pa'alɛ ba vo'osgo dabsa atã.

³ A tɔgɛ pa'ala ba yetɩ, la masɛ mɛ tɩ Krisi nãmsɛ ki dee vo'oge. Dee yetɩ: «Azezi tɩ mam mõolɩ a yelle bɔ'ɔra ya wã de la Krisi la.»

⁴ Tɩ ba nẽrba basɛba, la Grɛkɩdõma nẽrba zozo'e n pʋ'ʋsrɩ Nawẽnnɛ, la pɔgsɩ zozo'e n de nẽrzuto daan sakɛ po dɔla Apolɩ la Asɩlaasɩ.

⁵ Tɩ Zifdõma daan ẽŋɛ sũure, sẽŋɛ da'am ka ɛ nẽrba n ka tarɩ võorɛ lagsɛ tɩ ba dãm tẽŋa la. Tɩ ba sẽŋɛ Azasõ yire ka ɛɛra Apolɩ la Asɩlaasɩ tɩ ba tarɩ ba sẽŋɛ tẽŋa la nẽrba zẽ'am.

⁶ La ba sẽŋɛ ka ɛ ka yẽ ba, yõkɛ Azasõ la Azezi karẽnbiisi basɛba sẽŋɛ tẽŋa la kɛ'ɛndõma zẽ'am ka tĩi tɔgɛ yetɩ: «Nẽr-bãna wã eerɩ dãmna la dũnia wuu. La ban wãna n wa'am kalam,

⁷ tɩ Azasõ to'oge ba. Nẽr-bãna wã wuu sɩ'ɩsrɩ la Rom na-keko nõorɛ yetɩ, naba ayẽma n boe tɩ a yʋ'ʋrɛ dɛna Azezi.»

⁸ La kɛ'ɛndõma la, la nẽr-kʋʋŋɔ la n wõm bɛla la, ba sũure isge mɛ.

⁹ Tɩ ba botɩ Azasõ la sɛba n dolɩ ẽ na bĩŋe ligri, dee tɩ ba basɛ ba.

Apolɩ la Asɩlaasɩ sẽŋɛ Beere

¹⁰ La wẽnnɛ n daan sobe, tɩ Azezi karẽnbiisi la botɩ Apolɩ la Asɩlaasɩ sẽŋɛ Beere. La ban paagɛ la, ba sẽŋɛ mɛ ka kẽ Zifdõma wẽndeem.

¹¹ La bãma tarɩ pʋtẽ'e-sõnnɛ mɛ gãnna Zifdõma sɛba n boe Tesaloniki la, sakɛ to'oge Nawẽnnɛ yetɔga la ba sũure wuu, dee daan karẽŋra Nawẽnnɛ gõŋɔ la daarɛ woo tɩ ba bɩsɛ Apolɩ n yele se'em na de la sɩra bɩɩ la dagɩ sɩra.

¹² La ba nẽrba zozo'e, la Grɛkɩdõma pɔgsɩ n de yʋ'ʋrɛ dõma, la bʋraasɩ zozo'e sakɛ bɔ Azezi sɩra mɛ.

¹³ Tɩ Zifdõma sɛba n boe Tesaloniki la wõm tɩ Apolɩ mõolɩ Nawẽnnɛ yetɔga Beere, tɩ ba sẽŋɛ mĩ ka dãm nẽrba la, sa'asɛ ba la Apolɩ la Asɩlaasɩ.

¹⁴ Tɩ karẽnbiisi la ẽŋɛ tɔtɔ botɩ nẽrba basɛba kɔlgɛ Apolɩ sẽŋɛ ko-kãtɛ la nõorʋm. Dee tɩ Asɩlaasɩ la Atimõtɩ weege Beere.

¹⁵ La sɛba n kɔlgɛ Apolɩ la tarɩ ẽ paagɛ la Atɛnɩ, tɩ Apolɩ soolʋm ba yetɩ, ba sãn paagɛ, ba yele Asɩlaasɩ la Atimõtɩ yetɩ, ba wa'am tɔtɔ.

Apolɩ boe Atɛnɩ mõola Nawẽnnɛ yetɔga

¹⁶ La Apolɩ daan boe la Atɛnɩ gu'ura Asɩlaasɩ la Atimõtɩ. La a daan yẽ la baga n boe tẽŋa la pʋam zozo'e, tɩ a sũure sã'am.

¹⁷ Tɩ a sẽŋɛ Zifdõma wẽndeem ka tɔgra la Zifdõma, la sɛba n dagɩ Zifdõma dee pʋ'ʋsra Nawẽnnɛ, dee tɔgra daarɛ woo la nẽrba n boe da'am.

¹⁸ Tɩ bãŋrɩba daan bɔna mĩ tɔgra la Apolɩ, basɛba dolɩ la A'epikiri zãsŋɔ, dee tɩ basɛba dɔla Astoyisi zãsŋɔ. Tɩ nẽrba basɛba soke yetɩ: «Yetɔg-tɔgsa wã boorɩ tɩ a yetɩ bẽm?» Tɩ basɛba yetɩ: «La ãn wʋ a mõolɩ la wẽn-paalsɩ yelle la.» Se'ere n soe la, Apolɩ mõolɩ la Azezi kõ-yẽlga, la kũm vo'ore yelle.

¹⁹ Tɩ ba tarɩ ẽ sẽŋɛ Arewopaazɩ zẽ'am ka yetɩ: «Tõma boorɩ la tɩ bãŋɛ zãsŋɔ paalga sɛka tɩ fõn tɔgrɩ la võorɛ.

²⁰ Fõn tɔgɛ yel-sɛba tɩ tõma wõm wã de la yel-sãasɩ bɔ tõma, bɛla tɩ tõma bɔɔra tɩ bãŋɛ a võorɛ.»

²¹ Wakatɛ wuu Atɛnɩ dõma, la nẽr-sɛba n kẽ'erɩ bilam na, tɔgrɩ la yel-paala dee sɛlsra yel-paala.

²² Tɩ Apolɩ isge ze'ele Arewopaazɩ la tẽŋasʋka yetɩ: «Atɛnɩ tẽŋa nẽrba, mam yẽ tɩ ya de la nẽrba n nã'asrɩ baga zozo'e sɛla woo pʋam.

²³ Mam n gilge ya tẽŋa wã pʋam na, mam yẽ bõn-sɛba tɩ ya ẽŋɛ nã'asra mɛ, la mam yẽ la kãabgɔ bĩmbĩnne zuo tɩ la gʋlsɛ yetɩ: ‹Wẽn-sɛka tɩ tõma ka mi.› Wẽn-sɛka tɩ yãma nã'asrɩ dee ka mina ẽ na, tɩ mam mõolɩ bɔ'ɔra ya.

²⁴ Nawẽnnɛ ẽŋa n nãam dũnia la sɛla wuu n boe ba pʋam, ẽŋa n soe saazuum la tẽŋa. A ka kẽ'erɩ deego tɩ nẽrsaalba mẽ pʋam.

²⁵ Sɛla ka pɔ'ɔgɛ ẽ tɩ a bɔɔra tɩ nẽrsaalba tõm bɔ ẽ. Ẽŋa n bɔ'ɔrɩ sɛla woo yõvore, la vo'osʋm, la sɛla woo.

²⁶ A nãam la nẽra ayɩla botɩ nẽrba buuri wuu n boe dũnia zuo ze'ele la ẽŋa zẽ'am. Ẽŋa n makɛ wakat-sɛba la zẽ'e-sɛba tɩ ba wʋn bɔna.

²⁷ A ẽŋɛ bɛla tɩ ba ɛ ẽ mɛ, ba sãn ɛɛra babla, tã tɩ ba wʋn yẽ ẽ. La a ka zãagɛ la tɩ nẽra baa ayɩla.

²⁸ Ẽŋa n botɩ tɩ bɔna, sẽnna dee tara vɔm, wʋ yãma Atɛnɩ so'olʋm nẽrba basɛba n daan yetɩ: ‹Tõma mẽ de la a kɔma.›

²⁹ Tõma n de a kɔma la, tɩ da tẽ'esɛ tɩ Nawẽnnɛ wõn na bõn-nãanɩsɩ tɩ nẽrsaalba dɩkɛ sãlma bɩɩ zũuro bɩɩ kuga tẽ'esɛ mãalɛ la nu'usi.

³⁰ Nawẽnnɛ ka geele wakat-sɛka tɩ tõma daan ka mi la. La lɛɛlɛ wã, a bɔ nõorɛ zẽ'a woo yetɩ, nẽrba wuu teege yɛm basɛ tõon-be'ero.

³¹ Se'ere n soe la, a looge la daarɛ tɩ a di dũnia nẽrba sarɩya, a dẽŋɛ looge la nẽra, ẽŋa n wʋn di nẽrba la wuu sarɩya la sɩra. A vo'oge nẽr-ẽŋa pa'alɛ tɩ la de la sɩra.»

³² Ban wõm tɩ Apolɩ tɔgrɩ kũm vo'ore yelle la, tɩ sɛba la'ara ẽ, dee tɩ basɛba yetɩ: «Tõma wʋn le selse fʋ yetɔg-bãna la da-se'ere.»

³³ Tɩ Apolɩ ze'ele ba zẽ'am fõrgɛ.

³⁴ La nẽrba basɛba daan doose ẽ mɛ bɔ Azezi sɩra. Nẽr-sɛba n daan bɔ sɩra la de la Adenisi, ẽŋa de la Arewopaazɩ sarɩyaditba nẽra ayɩla, la pɔka ayɩla yʋ'ʋrɛ n de Adamarisi, la nẽrba basɛba.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ