အွန်လိုင်း သမ္မာကျမ်းစာ

Tõoma 14 - Farefare Ninkaré

Apolɩ la Abarnabasɩ boe Ikonim

¹ Apolɩ la Abarnabasɩ n paagɛ Ikonim la, ba le kẽ la Zifdõma wẽndeego pʋam tɔgɛ bɔ nẽrba. Tɩ nẽr-kʋʋŋɔ zozo'e, Zifdõma la nẽrba basɛba n dagɩ Zifdõma, bɔ Nawẽnnɛ sɩra.

² La Zifdõma nẽr-sɛba n ka sakɛ yetɔga la, bãma n sa'asɛ bu-zãŋsɩ botɩ ba sũure sã'am la Azezi karẽnbiisi la.

³ La Apolɩ la Abarnabasɩ daan yuuge Ikonim mɛ, te'ege Zuudãana Azezi tɔgɛ a yetɔga la bʋraanɛ. Tɩ Zuudãana daan bɔ ba pãŋa tɩ ba tõm tõon-yãlma la yel-kɩrsɩ n pa'alɩ tɩ ẽŋa yel-sõnnɛ na tɩ ba tɔgrɩ la de la sɩra.

⁴ La tẽŋa la nẽrba daan welse mɛ, tɩ basɛba bɔna Zifdõma poorʋm, tɩ basɛba bɔna Azezi Tõntõnɩba la poorʋm.

⁵ Tɩ bu-zãŋsɩ, la Zifdõma, la ba nẽŋadõma bɔɔra tɩ ba nãmsɛ Apolɩ la Abarnabasɩ lobe ba la kuga.

⁶ Tɩ ba bãŋɛ, zoe sẽŋɛ Likoni tẽnsʋm, Listri, la Dɛrbɩ, la tẽn-pɩgsɩ sɛba n lɛm bilam na pʋam.

⁷ Bilam ba daan mõolɛ kõ-yẽlga la mɛ.

Ba lobe Apolɩ la kuga Listri tẽŋam

⁸ La bʋraa n daan boe Listri ka tãna sẽnna. A ma dɔgɛ ẽ tɩ a dɛna la kɔɔrŋɔ.

⁹ Tɩ a daan zẽa sɛlsra Apolɩ n tɔgrɩ la. Tɩ Apolɩ bɩsra ẽ zĩi, bãŋɛ tɩ a bɔ Azezi sɩra mɛ tãna wʋn yẽ ĩmã'asʋm.

¹⁰ Tɩ Apolɩ tɔgɛ ke'enke'em yele ẽ yetɩ: «Isge ze'ele saazuo.» Tɩ kɔɔrŋɔ la vaagɛ isge sẽnna.

¹¹ La nẽr-kʋʋŋɔ la n yẽ Apolɩ n ẽŋɛ se'em na, tɩ ba tĩi tɔgɛ la Likoni tẽŋa yetɔga yetɩ: «Wẽna n lebge nẽrsaalba sigum tõma zẽ'am.»

¹² Tɩ ba daan wi'ira Abarnabasɩ tɩ Azeyusi, dee wi'ira Apolɩ tɩ A'ɛrmẽsɩ, ẽŋa n tarɩ yetɔga la wa'am na ĩyã.

¹³ Ba daan tarɩ la deego tẽŋa la zanõ-bɔba kãabra Azeyusi. Tɩ kãabgɔ kẽema la tarɩ lɔlsɩ, la tɩɩsɩ puuro wa'am zanõrʋm na, tɩ ẽŋa la nẽr-kʋʋŋɔ la bɔɔra tɩ ba kãabɛ Abarnabasɩ la Apolɩ.

¹⁴ La Tõntõnɩba Apolɩ la Abarnabasɩ n wõm ban yetɩ ba ẽŋɛ se'em na, ba sũure sã'am mɛ, tɩ ba ãasʋm ba futo, dee zoe kẽ nẽr-kʋʋŋɔ la pʋam tĩi tɔgɛ yetɩ:

¹⁵ «Nẽrba wã, bẽm tɩ ya yetɩ ya ẽŋɛ wãna? Tõma mẽ de la nẽrsaalba wʋ yãma n ãn se'em na, la tõma mõolɩ la kõ-yẽlga pa'ala yãma tɩ ya basɛ bõn-bãna wã n ka tarɩ yõorɔ, dee dɔla Nawẽnnɛ n de vɔm dãana. Ẽŋa n nãam saazuum la tẽŋa, la ko-kãtɛ, la bõn-sɛba wuu n boe ba pʋam na.

¹⁶ Kʋrʋm kʋrʋm, Nawẽnnɛ yʋʋn basɛ buuri wuu tɩ ba ɩta la ba mẽŋa yɛm n boorɩ se'em.

¹⁷ La baa bɛla wuu, Nawẽnnɛ ɩtɩ sõŋa mɛ pa'alɛ ẽŋa n de sɛka. Ẽŋa n botɩ saaga niira bɔ'ɔra ya, tɩ ya bõnkɔɔla bɩta, tɩ dia bɔna zo'oge, tɩ ya sũure ãna yẽlʋm.»

¹⁸ Baa la Apolɩ n tɔgɛ bɛla la, la ẽŋɛ la toogo bɔ ba, dee tɩ ba yãŋɛ gu nẽr-kʋʋŋɔ la tɩ ba ka kãabɛ ba.

¹⁹ La Zifdõma n ze'ele Antɩyɔsɩ n boe Pisidi so'olʋm, la Ikonim wa'am wa sa'asɛ nẽrba la, botɩ ba lobe Apolɩ la kuga, vuuge ẽ tẽŋa la pʋam yese basɛ, dee tẽ'esɛ tɩ a ki mɛ.

²⁰ Tɩ Azezi karẽnbiisi la lagsɛ gilge ẽ, tɩ a isge kẽ tẽŋa la pʋam. Tɩ beere wiige, tɩ ẽŋa la Abarnabasɩ sẽŋɛ Dɛrbɩ.

Apolɩ la Abarnabasɩ lebrɩ Antɩyɔsɩ n boe Siiri so'olʋm

²¹ La Apolɩ la Abarnabasɩ mõolɛ kõ-yẽlga Dɛrbɩ mɛ, tɩ nẽrba zozo'e lebge Azezi karẽnbiisi, dee tɩ ba yãŋa lebe Listri, la Ikonim, la Antɩyɔsɩ n boe Pisidi so'olʋm.

²² La ba daan tɔgɛ pa'alɛ karẽnbiisi la mɛ, bɔ ba bʋraanɛ yetɩ, ba mõrgɛ bɔna Azezi sɩra la pʋam da basɛ. Dee yele ba yetɩ: «Tɩ wʋn yẽ la nãmsgɔ zozo'e dee kẽ Nawẽnnɛ so'olʋm pʋam.»

²³ La tẽn-sɛba wuu tɩ ba sẽŋɛ la, ba looge la kẽma Azezi nẽrba la pʋam, lʋ nõorɛ pʋ'ʋsɛ Nawẽnnɛ, dee dɩkɛ ba basɛ Zuudãana tɩ ba bɔ sɩra la nu'usum.

²⁴ La ban doose Pisidi la, ba paagɛ Pãnfili so'olʋm.

²⁵ La ba mõolɛ Nawẽnnɛ yetɔga Pɛrzɩ mɛ, dee sẽŋɛ Atali.

²⁶ La ba kẽ la õorŋɔ bilam sẽŋɛ Antɩyɔsɩ, tẽn-sɛka tɩ ba daan dɩkɛ ba ẽŋɛ Nawẽnnɛ nu'usum tɩ a sõŋɛ ba tɩ ba tõm tõon-sɛka tɩ ba tõm ba'asɛ wã.

²⁷ La ban paagɛ la, ba botɩ Azezi nẽrba la lagsɛ mɛ, tɩ ba tɔgɛ pa'alɛ ba Nawẽnnɛ n tõm la bãma se'em, la a yo'oge sore mɛ bɔ bu-zãŋsɩ tɩ ba tãna wʋn bɔ ẽ sɩra.

²⁸ La ba boe la karẽnbiisi la lɛ bilam yuuge mɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ