အွန်လိုင်း သမ္မာကျမ်းစာ

Tõoma 13 - Farefare Ninkaré

Ba tõm Abarnabasɩ la Asolɩ tɩ ba sẽŋɛ ka mõolɛ Nawẽnnɛ yetɔga

¹ Azezi nẽr-kʋʋŋɔ n boe Antɩyɔsɩ la pʋam, Nawẽnnɛ nõtɔ'ɔsrɩba, la karẽnsãandõma n daan boe mĩ. Ba de la Abarnabasɩ, la Asimeyõ tɩ ba wi'iri tɩ nẽr-sabga, la Alusiyusi n ze'ele Sirɛnɩ, la Amanayɛnɩ tɩ ba daan uge ẽ la naba A'erɔdɩ, la Asolɩ.

² La daarɛ ayɩla ba daan lʋ la nõorɛ pʋ'ʋsra dee pẽgra Nawẽnnɛ, tɩ Nawẽnnɛ Sɩa yele ba yetɩ: «Looge-ya Abarnabasɩ la Asolɩ tɩ ba tõm tõon-sɛka tɩ mam looge ba tɩ ba tõm na.»

³ Tɩ ba lʋ nõorɛ dɩkɛ nu'usi paglɛ ba zuto pʋ'ʋsɛ, dee basɛ ba tɩ ba sẽŋɛ.

Asolɩ la Abarnabasɩ boe Sipri so'olʋm mõola Nawẽnnɛ yetɔga

⁴ La Nawẽnnɛ Sɩa n tõm ba la, ba sẽŋɛ la Selesi tẽŋam ka kẽ õorŋɔ bilam sẽŋɛ Sipri so'olʋm tɩ ko'om gilge la.

⁵ La ban paagɛ Salamini tẽŋam na, ba daan mõolɩ Nawẽnnɛ yetɔga mɛ Zifdõma wẽndeto pʋam. Ba daan tarɩ la Azã-markɩ tɩ a sõŋra ba.

⁶ La ba daan doose la Sipri so'olʋm la pʋam ka paagɛ Pafɔsɩ. Bilam ba yẽ la tɩɩm dãana n parɩm tɩ ẽŋa de la Nawẽnnɛ nõtɔ'ɔsa. A de la Zifu, a yʋ'ʋrɛ de la Abar-zezi.

⁷ A daan boe la tẽŋa la gɔmna Asɛryusi-polusi n de yɛm dãana la zẽ'am. Tɩ gɔmna la daan botɩ ba wi Abarnabasɩ la Asolɩ, a daan boorɩ tɩ a wõm na Nawẽnnɛ yetɔga.

⁸ La tɩɩm dãana la yʋ'ʋrɛ la Grɛkɩ de la A'elimasɩ. A daan sɩ'ɩsrɩ Asolɩ la Abarnabasɩ yetɔga la mɛ, dee daan ɛɛra tɩ a gu gɔmna la tɩ a da sakɛ Nawẽnnɛ yetɔga la.

⁹ Tɩ Nawẽnnɛ Sɩa bɔna la Asolɩ yʋ'ʋrɛ ayẽma n de Apolɩ la pãŋa, tɩ a bɩsra tɩɩm dãana la zĩi,

¹⁰ yele ẽ yetɩ: «Fʋ tarɩ la yɛmkẽgsɩga la pã'asgɔ, fʋ de la Asũtãana bia, fʋ de la tõon-sõma wuu bɛ. Fõn dɩkrɩ Zuudãana Nawẽnnɛ sɩra la mɛ tɩ a lɛbgra põmpɔrŋɔ.

¹¹ Lɛɛlɛ wã, bãŋɛ tɩ Zuudãana pãŋa wʋn botɩ fʋ fɔ mɛ. Fʋ kãn le yẽ peelem halɩ ka paagɛ wakat-sɛka.» La bilam zẽ'am tɩ tɩɩm dãana la kɔ'ɔn fɔ, ba'abra ɛɛra nẽra tɩ a ve'ege ẽ.

¹² La gɔmna la n yẽ lan ẽŋɛ se'em na, a bɔ yetɔga la sɩra mɛ, se'ere n soe la, Zuudãana zãsŋɔ la daan kẽ a sũure mɛ.

Apolɩ la Abarnabasɩ boe Antɩyɔsɩ n boe Pisidi so'olʋm

¹³ Apolɩ la a taaba la ze'ele la Pafɔsɩ kẽ õorŋɔ sẽŋɛ Pɛrzɩ n boe Pãnfili so'olʋm pʋam na. Tɩ Azã-markɩ basɛ ba bilam dee lebe Zerizalɛm.

¹⁴ Tɩ ba daan ze'ele Pɛrzɩ sẽŋɛ Antɩyɔsɩ n boe Pisidi so'olʋm pʋam na. Tɩ Zifdõma vo'osgo daarɛ paagɛ, tɩ ba kẽ ba wẽndeem zĩ'ire.

¹⁵ La ban karẽŋɛ Nawẽnnɛ lɔɔ, la Nawẽnnɛ nõtɔ'ɔsrɩba gõnnɔ kɩ'ɩlɩm na, tɩ wẽndeego la nẽŋadõma tõm nẽrba tɩ ba sẽŋɛ ka yele ba yetɩ: «Tɩ sɔbiisi, ya sãn tara yetɔga n wʋn bɔ nẽrba la bʋraanɛ, ya tɔgɛ.»

¹⁶ Tɩ Apolɩ isge yɩbsɛ la nu'ugo yele ba yetɩ: «Ɩsrayɛlɩ nẽrba, la yãma sɛba n po nanna Nawẽnnɛ, selse-ya.

¹⁷ Nawẽnnɛ tɩ Ɩsrayɛlɩ dõma pʋ'ʋsrɩ wã, ẽŋa n yʋʋn looge tɩ yaabdõma, ban yʋʋn boe Ezipti na, ẽŋa n botɩ ba yɩrgɛ zo'oge. La ẽŋa n yʋʋn tõm pãŋa tõoma tarɩ ba yese Ezipti.

¹⁸ La ban boe weem yʋʋma pinaasɩ la, a ẽŋɛ sũ-mã'asʋm la ba mɛ.

¹⁹ Dee yʋʋn sã'am buuri bayopɔɩ Kanaan so'olʋm pʋam, dee bɔ ba tẽŋa la tɩ ba sɔna.

²⁰ Bɛla wuu yuuge masɛ wʋ yʋʋma kɔbsnaasɩ la pinuu. La bɛla poorʋm a bɔ ba la nẽŋadõma, tɩ ba sɔna ba wa paagɛ Nawẽnnɛ nõtɔ'ɔsa Asãmwɛlɩ wakatʋm.

²¹ Tɩ ba yãŋa sose yetɩ, bãma boorɩ la naba. Tɩ Nawẽnnɛ bɔ ba Akisi dayʋa Asayuli n de Abẽnzamẽ buuri nẽra, tɩ a di na'am yʋʋma pinaasɩ.

²² Tɩ Nawẽnnɛ yʋʋn to'oge Asayuli na'am na, dee botɩ Adavidi dɛna naba. Nawẽnnɛ yʋʋn tɔgɛ Adavidi yelle yetɩ: ‹Mam yẽ la Azese bia Adavidi n ãn mam sũure yẽlʋm. Ẽŋa n wʋn ẽŋɛ mam n boorɩ se'em na wuu.›

²³ La de la ẽŋa buuri nẽra ayɩla n de Azezi tɩ Nawẽnnɛ botɩ a dɛna Fãagra bɔ Ɩsrayɛlɩ dõma, wʋ ẽn yʋʋn bĩŋe a nõorɛ se'em na.

²⁴ Ẽŋa n daan nãn ka wa'am na, Azã n daan mõolɩ a wa'aŋɔ yelle bɔ Ɩsrayɛlɩ nẽrba wuu yetɩ, ba teege yɛm basɛ tõon-be'ero tɩ ba mise ba ko'om pʋam.

²⁵ La Azã n daan boe mĩ tɩ a tõm a tõoma ba'asɛ la, a soke ba yetɩ: ‹Yãma tẽ'esɛ tɩ mam de la ãne? Yãma n tẽ'esɛ tɩ mam de nẽr-sɛka la, mam dagɩ ẽŋa. La selse-ya, ẽŋa boe la mam poorʋm sẽna, mam ka masɛ tɩ m pirge a tagra.›

²⁶ M sɔbiisi, yãma n de Abraham yɩɩsɩ, la yãma sɛba n po nanna Nawẽnnɛ, la de la tõma ĩyã tɩ Nawẽnnɛ tõm fãarɛ kõa wã.

²⁷ La Zerizalɛm nẽrba, la ba nẽŋadõma daan ka bãŋɛ Azezi n de nẽr-sɛka. La ba ka bãŋɛ Nawẽnnɛ nõtɔ'ɔsrɩba yetɔga la tɩ ba karẽŋrɩ vo'osgo daarɛ wuu la võorɛ. La ban di Azezi sarɩya la, nõtɔ'ɔsrɩba la n yʋʋn yele se'em na ẽŋɛ mɛ.

²⁸ Baa ban ka yẽ bõn-sɛka n wʋn botɩ ba kʋ ẽ na, ba sĩm mɛ dee yele Apilatɩ yetɩ, a basɛ tɩ ba kʋ ẽ.

²⁹ La ban daan ẽŋɛ sɛla wuu wʋ lan põn gʋlsɛ a yelle se'em ba'asɛ la, ba sike ẽ dɔ-puurŋa la zuo mɛ laagɛ.

³⁰ Tɩ Nawẽnnɛ daan botɩ a vo'oge.

³¹ La a dɩkɛ a mẽŋa mɛ pa'alɛ sɛba n daan doose ẽ Galile sẽŋɛ Zerizalɛm na dabsa faa, bãma n de a kaset-dõma Ɩsrayɛlɩ nẽrba la tẽŋasʋka.

³² La tõma mõolɩ la kõ-yẽlga la bɔ yãma: Nawẽnnɛ n yʋʋn bĩŋe a nõorɛ la tɩ yaabdõma la,

³³ a ẽŋɛ bõn-ẽŋa bɔ la tõma n de ba yɩɩsɩ la. La de la a vo'oge Azezi mɛ. La ãn wʋ lan gʋlsɛ yõoma gõŋɔ yõoma bʋyi dãana la pʋam yetɩ: ‹Fʋ de la mam bia. Zĩna mam n lebge fʋ sɔ.›

³⁴ Nawẽnnɛ yʋʋn yetɩ, ẽŋa wʋn vo'oge ẽ tɩ a kãn põ'ogɛ. Bɛla tɩ a yʋʋn yetɩ: ‹Mam wʋn bɔ ya bõn-sõma sɩra sɩra tɩ mam põn bĩŋe nõorɛ la Adavidi la.›

³⁵ Bɛla ĩyã tɩ la yele yõoma gõŋɔ pʋam zẽ'a ayẽma yetɩ: ‹Fʋ kãn basɛ fʋ pʋpeelem dãana tɩ a põ'ogɛ.›

³⁶ Wakat-sɛka tɩ Adavidi yʋʋn vɔa la, a tõm Nawẽnnɛ yɛm n boorɩ se'em mɛ, dee ki tɩ ba laagɛ ẽ a yaabdõma yɔɔm, tɩ a ĩyã põ'ogɛ.

³⁷ La Nawẽnnɛ n vo'oge sɛka la ka põ'ogɛ.

³⁸ Bɛla, m sɔbiisi, yãma masɛ tɩ ya bãŋɛ tɩ la de la Azezi ĩyã tɩ tõma mõolɛ pa'alɛ yãma tɩ Nawẽnnɛ wʋn basɛ tõon-be'ero taalɛ. Se'ere n soe la, Amoyisi lɔɔ yʋʋn ka tã wʋn basɛ tɩ ya yelle masɛ Nawẽnnɛ zẽ'am,

³⁹ la nẽr-sɛka woo n bɔ Azezi sɩra, a yelle masɛ Nawẽnnɛ zẽ'am mɛ.

⁴⁰ Bɛla, guuse-ya tɩ lan gʋlsɛ se'em Nawẽnnɛ nõtɔ'ɔsrɩba gõnnɔ pʋam na da paagɛ ya.

⁴¹ La yetɩ: ‹Bãŋɛ-ya tɩ yãma sɛba n de sɩ'ɩsrɩba la, ya palẽŋa wʋn ẽkɛ mɛ tɩ ya ki. Se'ere n soe la, tõon-sɛka tɩ mam wʋn tõm ya zamãana wã pʋam na, ya kãn nan tɩ la wʋn sɩrɩ ẽŋɛ, baa nẽra sãn tɔgɛ pa'alɛ ya.› »

⁴² La Apolɩ la Abarnabasɩ n daan isge tɩ ba yese la, tɩ nẽrba la sose ba yetɩ, ba le wa'am vo'osgo daarɛ wa tɔgɛ yetɔg-sɛba tɩ ba tɔgɛ la.

⁴³ La ban yese tɩ ba fõrgɛ la, tɩ Zifdõma zozo'e, la nẽrba basɛba n dagɩ Zifdõma dee sakɛ dɔla Nawẽnnɛ lɔɔ tɩ a bɔ Zifdõma, daan dɔla Apolɩ la Abarnabasɩ. Tɩ Apolɩ dõma pa'alɛ ba yetɩ, ba mõrgɛ bɔna Nawẽnnɛ yel-sõnnɛ na pʋam.

⁴⁴ Tɩ vo'osgo daarɛ le paagɛ, tɩ nẽrba lagsɛ zozo'e wʋ la de la tẽŋa la nẽrba wuu la, tɩ ba selse Nawẽnnɛ yetɔga.

⁴⁵ La Zifdõma n yẽ nẽr-kʋʋŋɔ la n zo'oge la, tɩ ba ẽŋɛ sũure sɩ'ɩsɛ Apolɩ n tɔgɛ se'em na, dee tɔgra tɔg-be'ero.

⁴⁶ Tɩ Apolɩ la Abarnabasɩ daan kãbɛ sũure tɔgɛ ba yetɩ: «Tõma wʋn dẽŋɛ nɩ tɔgɛ Nawẽnnɛ yetɔga wã bɔ la yãma. La yãma n zagsɛ la, yãma pa'alɛ tɩ ya ka masɛ tɩ ya yẽ vɔm n ka ba'asrɩ. Bɛla ĩyã tõma wʋn basɛ yãma, dee sẽŋɛ la bu-zãŋsɩ zẽ'am.

⁴⁷ Se'ere n soe la, Zuudãana Nawẽnnɛ bɔ tõma nõorɛ yetɩ: ‹Mam looge fo tɩ fʋ ãna wʋ peelem bɔ bu-zãŋsɩ, botɩ nẽrba yẽ fãarɛ dũnia zẽ'esɩ wuu.› »

⁴⁸ La bu-zãŋsɩ la n wõm bɛla la, ba sũure ẽŋɛ yẽlʋm mɛ halɩ, tɩ ba pẽgra Nawẽnnɛ yetɔga la. La nẽr-sɛba n masɛ tɩ ba yẽ vɔm n ka ba'asrɩ la daan sakɛ bɔ Azezi sɩra mɛ.

⁴⁹ Tɩ Zuudãana yetɔga la saagɛ tẽŋa la wuu.

⁵⁰ Tɩ Zifdõma daan sa'asɛ pɔgsɩ n pʋ'ʋsrɩ Nawẽnnɛ, dee dɛna yʋ'ʋrɛ dõma, la tẽŋa la nẽrzuto, botɩ ba nãmsɛ Apolɩ la Abarnabasɩ dige ba ba tẽŋa la pʋam tɩ ba yese.

⁵¹ Tɩ Apolɩ la Abarnabasɩ pɩɩsɛ ba nãma tẽntõnnɔ basɛ, pa'alɛ tɩ tẽŋa la nẽrba ka ẽŋɛ sõŋa, dee wɛ'ɛsa Ikonim.

⁵² La Azezi karẽnbiisi la n boe Antɩyɔsɩ la daan tarɩ sũ-yẽlga zo'oge mɛ, dee tɩ Nawẽnnɛ Sɩa bɔna la ba.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ