Tõoma 12 - Farefare Ninkaré

Ba kʋ Azakɩ, dee yʋ Apɩyɛɛrɩ

¹ La masɛ la wakat-ẽŋa tɩ naba A'erɔdɩ daan nãmsra Azezi nẽrba basɛba,

² dee botɩ ba kʋ Azakɩ n de Azã sɔbia la sʋkɔbgɔ.

³ La ẽn yẽ tɩ la ẽŋɛ Zifdõma sũure yẽlʋm mɛ na, a le botɩ ba yõkɛ la Apɩyɛɛrɩ, wakat-sɛka tɩ Zifdõma diti borborɩ n ka tarɩ dãbɩllɛ kibsa la.

⁴ La ẽn yõkɛ ẽ kẽ'esɛ yʋ'a deem na, a botɩ sʋdaasɩ pia la ayoobɩ n pʋɩ bana-banaasɩ gu'ura ẽ sɔɔsna taaba. A boorɩ tɩ Zɔɔg-basɛ kibsa n tole, dee tɩ a tarɩ ẽ yese nẽrba la nẽŋam ka di a sarɩya.

⁵ Bɛla tɩ ba daan pagɛ Apɩyɛɛrɩ basɛ yʋ'a deego la pʋam. Tɩ Azezi nẽrba la daan pʋ'ʋsra Nawẽnnɛ a ĩyã halɩ ka basɛ.

Malɛka yese Apɩyɛɛrɩ yʋ'a deem basɛ

⁶ Be-sɛka n wʋn wiige tɩ A'erɔdɩ yese Apɩyɛɛrɩ la, daar-ẽŋa yʋ'ʋŋɔ Apɩyɛɛrɩ daan gã la sʋdaasɩ bayi tẽŋasʋka gĩsra. Ba daan ba ẽ mɛ la bãnsɩ bayi, tɩ gu'urba la bɔna zanõrʋm gu'ura yʋ'a deego la.

⁷ La haya! Tɩ Nawẽnnɛ malɛka kɔ'ɔn wa'am. Tɩ peelem kɔ'ɔn nẽegɛ deego la pʋam. Tɩ malɛka la wẽ Apɩyɛɛrɩ lʋgrɛ nẽegɛ ẽ yetɩ: «Isge tɔtɔ.» Tɩ bãnsɩ la ba'agɛ lui tẽŋa dee basɛ a nu'usi la.

⁸ Tɩ malɛka la yele ẽ yetɩ: «Ga fʋ sagãnnɛ, dee pire fʋ tagra.» Tɩ a ẽŋɛ bɛla. Tɩ malɛka la le yele ẽ yetɩ: «Yɛ fʋ fuugo dee doose mam.»

⁹ Tɩ Apɩyɛɛrɩ doose ẽ yese yẽŋa, dee ka bãŋɛ tɩ malɛka la n ɩtɩ se'em na de la sɩra, a tẽ'esɛ tɩ la ãna wʋ a zãasʋm mɛ na.

¹⁰ La ban gãŋɛ pɔspɔsɩ gu'urba la, la gu'urba bʋyi dõma la, ba yãŋa paagɛ la kut-yan-sɛka n yesrɩ kẽ'era tẽŋa la pʋam na, tɩ yaŋa la yo'oge a mẽŋa, tɩ ba yese yẽŋa yãŋa dɔla sore wɛ. Bilam zẽ'am tɩ malɛka la fõrgɛ dee basɛ Apɩyɛɛrɩ.

¹¹ Tɩ Apɩyɛɛrɩ yɛm yãŋa wa'am, tɩ a yetɩ: «Lɛɛlɛ wã mam bãŋɛ sɩra sɩra, tɩ Zuudãana n tõm a malɛka tɩ a wa'am wa fãagɛ mam A'erɔdɩ nu'usum, la bõn-sɛka wuu tɩ Zifdõma eerɩ tɩ ba ẽŋɛ mam na.»

¹² La ẽn bãŋɛ bõn-ẽna võorɛ la, a sẽŋɛ la Azã-markɩ ma Amaari yire. La nẽrba n lagsɛ bilam zo'oge bɔna mĩ pʋ'ʋsra.

¹³ La ẽn paagɛ mĩ na, a wẽ la yaŋa nõorɛ, tɩ pɔsɔɔ yʋ'ʋrɛ n de Arode wa'am tɩ a bɩsɛ.

¹⁴ La ẽn bãŋɛ Apɩyɛɛrɩ kõa la, tɩ a sũure ẽŋɛ yẽlʋm tɩ a ka yo'oge yaŋa la, dee zoe kẽ ka yetɩ: «Apɩyɛɛrɩ ze yaŋa nõorʋm.»

¹⁵ Tɩ ba yele pɔsɔɔ la yetɩ: «Fõn de la zɔlgɔ.» Tɩ a le yetɩ: «La de la ẽŋa.» Tɩ ba lerge yetɩ: «La de la a sɩa».

¹⁶ Tɩ Apɩyɛɛrɩ ken wẽ'era yaŋa la. Tɩ ba yo'oge yẽ tɩ la de la ẽŋa. Tɩ la di'ige ba.

¹⁷ Tɩ Apɩyɛɛrɩ yɩbsɛ nu'usi pa'alɛ ba yetɩ, ba ãna sĩm. Dee tɔgɛ pa'alɛ ba Zuudãana n ẽŋɛ se'em tarɩ ẽŋa yʋ'a deego la pʋam yese yẽŋa. Dee yele ba yetɩ: «Yele-ya Azakɩ, la tɩ sɔbiisi la, sɛla n ẽŋɛ la.» Dee yese sẽŋɛ zẽ'a ayẽma.

¹⁸ La beere n wiige la, dãmŋɔ zozo'e n wa'am sʋdaasɩ la tẽŋasʋka, tɩ ba bɔɔra tɩ ba bãŋɛ, la ẽŋɛ la wãne tɩ Apɩyɛɛrɩ ka bɔna.

¹⁹ Tɩ A'erɔdɩ botɩ ba ɛ Apɩyɛɛrɩ, ka yẽ ẽ. Tɩ a di gu'urba la sarɩya, bɔ nõorɛ yetɩ, ba kʋ ba. La bɛla poorʋm a yese Zude sẽŋɛ la Sezaare ka bɔna bilam.

A'erɔdɩ kũm yelle

²⁰ La naba A'erɔdɩ sũure daan yĩige mɛ halɩ la Tiiri la Sidõ tẽnsɩ nẽrba. Tɩ ba ẽŋɛ nõorɛ ayɩla tɩ ba sẽŋɛ ka yẽ ẽ, yãŋa lagsɛ taaba dẽŋɛ yõkɛ Ablastisi n bɩsrɩ naba A'erɔdɩ yire yelle la sɩa. Tɩ bãma la ẽŋa yãŋa doose taaba sẽŋɛ ka sose naba A'erɔdɩ yetɩ, a basɛ tɩ sũ-mã'asʋm wa'am bãma la ẽŋa tẽŋasʋka. Se'ere n soe la, ba dia daan ze'etɩ la naba la tẽŋam sẽnna.

²¹ La A'erɔdɩ looge la daarɛ yetɩ, ba tɔgɛ yetɔga la. La daarɛ la n paagɛ la, a yɛ la a na'am futo zĩ'ire a na'am kʋka zuo tɔgra yetɔg-kãra bɔ'ɔra nẽrba la.

²² Tɩ ba kaasɛ yetɩ: «Kõa wã de la Nawẽnnɛ kõa, la dagɩ nẽrsaala kõa.»

²³ Tɩ Nawẽnnɛ malɛka botɩ bã'a yõkɛ A'erɔdɩ bilam zẽ'am, tɩ zũnzũa di ẽ, tɩ a ki, ẽn ka pẽgɛ Nawẽnnɛ dee pẽgɛ a mẽŋa la ĩyã.

²⁴ Tɩ Nawẽnnɛ yetɔga la daan saagɛ zẽ'a wuu, tɩ nẽrba zozo'e sakra yetɔga la pa'asra.

²⁵ La Abarnabasɩ la Asolɩ n daan tõm ba tõoma Zerizalɛm ba'asɛ la, ba daan tarɩ Azã-markɩ mɛ lebe Antɩyɔsɩ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ