အွန်လိုင်း သမ္မာကျမ်းစာ

Tõoma 11 - Farefare Ninkaré

Apɩyɛɛrɩ tɔgɛ pa'alɛ lan ẽŋɛ se'em tɩ ẽŋa sẽŋɛ bu-zãŋsɩ zẽ'am

¹ La Azezi Tõntõnɩba, la a karẽnbi-sɛba n boe Zude so'olʋm na wõm mɛ tɩ nẽr-sɛba n dagɩ Zifdõma la mẽ sakɛ Nawẽnnɛ yetɔga mɛ.

² La Apɩyɛɛrɩ daan lebe la Zerizalɛm, tɩ Zifdõma basɛba n bɔ Azezi sɩra la wẽ'era nõke'ene la ẽ,

³ yele ẽ yetɩ: «Bẽm n ẽŋɛ tɩ fõn kẽ lagɩm na bu-zãŋsɩ n ka wãtɩ la dita?»

⁴ Tɩ Apɩyɛɛrɩ yãŋa pa'alɛ ba yɛla la wuu n daan doose se'em na yetɩ:

⁵ «Mam daan boe la Zope pʋ'ʋsra, yẽ sɛla wʋ zãasŋɔ la, tɩ sɛla la ze'ele saazuum sigra wʋ fu-kãtɛ n lʋ zẽ'esɩ sɩnaasɩ sige wa paam mam boe zẽ'a la.

⁶ Tɩ mam bɩsra bõnɔ na zĩi, yẽ yire dũnsi, la we-dũnsi, la bõn-vuula, la bõn-ẽgla.

⁷ Tɩ mam wõm kõa n yetɩ: ‹Apɩyɛɛrɩ, isge kʋ di.›

⁸ Tɩ mam yetɩ: ‹Ayɛɩ, Zuudãana, sɛla n de sisgo bõnɔ bɩɩ bõn-dẽgrɔ ken ka kẽ mam nõorʋm.›

⁹ Tɩ kõa la le ze'ele saazuum tɔgɛ bɔ mam yetɩ: ‹Bõn-sɛka tɩ Nawẽnnɛ yetɩ, a ãn sõŋa, da kãn yetɩ, a de la bõn-dẽgrɔ.›

¹⁰ La daan ẽŋɛ la nõorɛ atã, dee viise lebe saazuum.

¹¹ Tɩ bʋraasɩ batã kɔ'ɔn paam yi-sɛka tɩ mam boe mĩ na. Ba daan tõm ba la Sezaare tẽŋam yetɩ, ba wa'am mam zẽ'am.

¹² Tɩ Nawẽnnɛ Sɩa yele mam yetɩ, m doose ba sẽŋɛ, m da sẽ'ena. Tɩ tɩ sɔbiisi bãna bayoobɩ wã kɔlgɛ mam, tɩ tõma sẽŋɛ ka kẽ Akɔrnɛlɩ yire.

¹³ Tɩ a yele tõma tɩ ẽŋa daan yẽ la malɛka n ze ẽŋa yire, yele ẽŋa yetɩ: ‹Tõm nẽrba tɩ ba sẽŋɛ Zope ka wi Asimõ-pɩyɛɛrɩ tɩ a wa'am.

¹⁴ Ẽŋa n wʋn tɔgɛ yetɔg-sɛba n wʋn botɩ fõn na fʋ yir-dõma wuu yẽ fãarɛ.›

¹⁵ Mam n boe mĩ tɩ m tɔgɛ la, tɩ Nawẽnnɛ Sɩa sige ba zuto wʋ ẽn daan sige tõma zuo se'em pɔspɔsɩ la.

¹⁶ Bɛla tɩ mam tẽegɛ Zuudãana n daan yetɩ: ‹Azã daan misri nẽrba la ko'om pʋam, la Nawẽnnɛ wʋn mise ya a Sɩa pʋam.›

¹⁷ La sãn dɛna tɩ Nawẽnnɛ bɔ ba a Sɩa, wʋ ẽn daan bɔ tõma n bɔ Zuudãana Azezi-krisi sɩra se'em na, mam de la ãne wʋn sɩ'ɩsɛ Nawẽnnɛ?»

¹⁸ Ban wõm bɛla la, ba sĩm mɛ dee pẽgra Nawẽnnɛ yetɩ: «Bɛla, Nawẽnnɛ botɩ bu-zãŋsɩ mẽ yẽ sore mɛ tɩ ba teege yɛm basɛ tõon-be'ero yẽ yõvore.»

Antɩyɔsɩ nẽrba bɔ Azezi sɩra

¹⁹ La A'etɩɛnɩ kũm na poorʋm, nẽr-sɛba n yẽ nãmsgɔ la wɩrgɛ mɛ, sẽŋɛ halɩ Fenisi, la Sipri, la Antɩyɔsɩ ka mõola Nawẽnnɛ yetɔga la bɔ'ɔra Zifdõma mã'a.

²⁰ La ba bʋraasɩ basɛba daan ze'ele la Sipri, la Sirɛnɩ so'olʋm sẽŋɛ Antɩyɔsɩ mẽ ka mõolɛ bu-zãŋsɩ, tɔgɛ Zuudãana Azezi kõ-yẽlga la bɔ ba.

²¹ La Zuudãana pãŋa daan boe la ba mɛ. Tɩ nẽrba zozo'e daan bɔ Zuudãana sɩra dɔla ẽ.

²² La Azezi nẽr-kʋʋŋɔ la n boe Zerizalɛm na n wõm bɛla la, ba tõm na Abarnabasɩ yetɩ a sẽŋɛ Antɩyɔsɩ.

²³ La ẽn paagɛ yẽ tɩ Nawẽnnɛ ẽŋɛ nẽrba la yel-sõnnɛ se'em na, a sũure ẽŋɛ yẽlʋm mɛ. Tɩ a pa'alɛ ba yetɩ, ba keŋe ba mẽŋa dɔla Zuudãana la ba sũure wuu da basɛ.

²⁴ Se'ere n soe la, a daan de la nẽr-sõŋɔ, dee bɔ Azezi sɩra zo'oge, tɩ Nawẽnnɛ Sɩa bɔna la ẽ. La nẽrba zozo'e n daan pa'asɛ dɔla Zuudãana.

²⁵ La Abarnabasɩ babsɛ mɛ sẽŋɛ Tarsɩ tɩ a ka ɛ Asolɩ.

²⁶ La ẽn yẽ ẽ na, a tarɩ ẽ mɛ wa'am Antɩyɔsɩ. La yʋʋnɛ tõrɛ tɩ ba lagsɛ la Azezi nẽr-kʋʋŋɔ la, dee zãsʋm nẽrba zozo'e. La de la Antɩyɔsɩ tẽŋam tɩ ba daan pɔsɛ wi karẽnbiisi la tɩ Krisi nẽrba.

²⁷ La wakat-ẽŋa tɩ Nawẽnnɛ nõtɔ'ɔsrɩba daan ze'ele Zerizalɛm sẽŋɛ Antɩyɔsɩ.

²⁸ Tɩ ba nẽra ayɩla yʋ'ʋrɛ n de Agabisi isge ze'ele tɔgɛ la Nawẽnnɛ Sɩa pãŋa yetɩ, kɔm kãtɛ n wʋn wa'am dũnia wuu zuo. La kɔm ẽŋa sɩrɩ wa'am mɛ na-keko Akloorɩ wakatʋm.

²⁹ Tɩ karẽnbiisi la yetɩ, nẽra woo looge ẽn tarɩ sɛla bɔ tɩ ba to'oge sõŋɛ Azezi nẽr-sɛba n boe Zude la.

³⁰ Tɩ ba daan ẽŋɛ bɛla dɩkɛ ligri la ẽŋɛ Abarnabasɩ la Asolɩ nu'usum, tõm ba yetɩ, ba tarɩ sẽŋɛ ka bɔ Azezi nẽr-kʋʋŋɔ la kẽma n boe Zerizalɛm na.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ