အွန်လိုင်း သမ္မာကျမ်းစာ

Tõoma 10 - Farefare Ninkaré

Akɔrnɛlɩ wi Apɩyɛɛrɩ

¹ Bʋraa n daan boe Sezaare, tɩ a yʋ'ʋrɛ dɛna Akɔrnɛlɩ. A daan de la sʋda-kɛ'ɛma, ba wi'iri sʋda-sɛba tɩ a de kɛ'ɛma ba pʋam na tɩ Itali dõma sʋdaasɩ.

² A daan de la nẽr-sõŋɔ, tɩ ẽŋa la a yir-dõma wuu daan nanna Nawẽnnɛ. La a daan sõŋrɩ la Zifdõma nasdõma zozo'e, dee pʋ'ʋsra Nawẽnnɛ daarɛ woo.

³ Tɩ wẽnnɛ daan gelge, tɩ a yẽ Nawẽnnɛ malɛka wʋ a zãasʋm mɛ na, tɩ a wa'am wa kẽ a zẽ'am yele ẽ yetɩ: «Akɔrnɛlɩ!»

⁴ Tɩ a daan bɩsra malɛka la zĩi, tɩ dabeem tara ẽ, tɩ a yetɩ: «M dãana, fʋ yetɩ bo?» Tɩ a lerge yele ẽ yetɩ: «Fʋ pʋ'ʋsgɔ la, la fõn sõŋrɩ nasdõma la paagɛ Nawẽnnɛ yɛm mɛ, a tẽrɩ fʋ yelle mɛ.

⁵ La nãnannɛ wã, tõm nẽrba tɩ ba sẽŋɛ Zope ka yele Asimõ-pɩyɛɛrɩ tɩ a wa'am.

⁶ A de la sãana bɔna Asimõ n de gãnzapa la yire. A yire la lɛm na ko-kãtɛ la nõorʋm.»

⁷ La malɛka la n tɔgɛ la Akɔrnɛlɩ dee fõrgɛ la, tɩ Akɔrnɛlɩ wi a tõntõnɩba bayi, la a sʋda-sõŋɔ ayɩla n tõnnɩ a tõoma, dee mẽ nanna Nawẽnnɛ,

⁸ yãŋa tɔgɛ sɛla n ẽŋɛ la wuu pa'alɛ ba, dee tõm ba tɩ ba sẽŋɛ Zope.

⁹ La beere n wiige, tɩ ba bɔna sore wɛ ka lɛm Zope, tɩ Apɩyɛɛrɩ zom gɔsgɔ tɩ a pʋ'ʋsɛ, la masɛ wʋ wʋntɛɛŋa zuu-tẽŋasʋka.

¹⁰ Tɩ a kɔm daan dõnna, tɩ a bɔɔra tɩ a di. La ban nãn boe mĩ ɩta dia tɩ ba bɔ ẽ na, tɩ a bɩsɛ yẽ wʋ a zãasʋm mɛ na,

¹¹ a daan yẽ tɩ saazuum n yo'oge, tɩ sɛla n ãn wʋ fu-kãtɛ n lʋ zẽ'esɩ sɩnaasɩ signa tẽŋa.

¹² La dũnsi buuri wuu, la tẽŋa bõn-vuula, la bõn-ẽgla buuri wuu n boe a pʋam.

¹³ Tɩ a wõm kõa n yele ẽ yetɩ: «Apɩyɛɛrɩ, isge kʋ di.»

¹⁴ Tɩ Apɩyɛɛrɩ lerge ẽ yetɩ: «Ayɛɩ, Zuudãana, mam ken ka di sɛla n de sisgo bõnɔ bɩɩ bõn-dẽgrɔ baa fẽe.»

¹⁵ Tɩ kõa la le yele ẽ yetɩ: «Bõn-sɛka tɩ Nawẽnnɛ yetɩ, a ãn sõŋa, da kãn yetɩ, a de la bõn-dẽgrɔ.»

¹⁶ Bõnɔ la ẽŋɛ la nõor-atã, dee yãŋa lebe saazuum.

¹⁷ Tɩ Apɩyɛɛrɩ daan zɛ yɛrɩ, tẽ'esra a pʋtẽ'erʋm bõn-ẽŋa tɩ a yẽ la võorɛ. La wakat-ẽŋa tɩ sɛba tɩ Akɔrnɛlɩ daan tõm na soke Asimõ yire n boe zẽ'a, wa'am wa zɛ yaŋa nõorʋm,

¹⁸ yãŋa wi soke yetɩ, Asimõ-pɩyɛɛrɩ boe la kalam bɩɩ?

¹⁹ La Apɩyɛɛrɩ ken tẽ'esra la bõnɔ la tɩ a yẽ la yelle, tɩ Nawẽnnɛ Sɩa yele ẽ yetɩ: «Bʋraasɩ batã n eerɩ fo, ban wãna.

²⁰ Isge sige doose ba, da sẽ'ena, tɩ mam n tõm ba.»

²¹ Tɩ Apɩyɛɛrɩ sige bʋraasɩ la zẽ'a ka yele ba yetɩ: «Mam tɩ ya eerɩ la. Bẽm yelle ĩyã tɩ yãma wa'am kalam?»

²² Tɩ ba yele ẽ yetɩ: «Akɔrnɛlɩ, a de la sʋda-kɛ'ɛma, tɩ a ɩrgɔ masɛ, tɩ a nanna Nawẽnnɛ, tɩ Zifdõma wuu tɔgra a yelle sõŋa. Tɩ Nawẽnnɛ daan tõm a malɛka tɩ a wa'am wa yele ẽ yetɩ, a botɩ fõn wa'am a yire wa yele ẽ fõn tarɩ yetɔg-sɛka la.»

²³ Tɩ Apɩyɛɛrɩ botɩ ba kẽ yire la gã'arɛ. Tɩ beere wiige, tɩ a isge dɔla ba wɛ, tɩ Azezi karẽnbiisi basɛba n boe Zope la kɔlgɛ ẽ tɩ ba sẽŋɛ.

²⁴ La dabsa ayi daarɛ tɩ ba paagɛ Sezaare. Tɩ Akɔrnɛlɩ daan wi a yir-dõma la a sɩrdõma lagsɛ gu'ura ba.

²⁵ La Apɩyɛɛrɩ n paagɛ kẽ'era la, tɩ Akɔrnɛlɩ tʋ'ʋsɛ ẽ ka dũma tẽŋa a nẽŋam nã'asɛ ẽ.

²⁶ Tɩ Apɩyɛɛrɩ gʋrɛ ẽ yetɩ: «Isge, mam mẽ de la nẽrsaala wʋ fõn na.»

²⁷ Tɩ ba sõsra la taaba kẽ'era, tɩ Apɩyɛɛrɩ yẽ nẽrba n lagsɛ zo'oge.

²⁸ Tɩ a yele ba yetɩ: «Ya mi tɩ Zifdõma sisri mɛ, ba ka lagnɩ la nẽra n de sãana, la ba ka kẽ'erɩ a yire. La Nawẽnnɛ pa'alɛ mam mɛ tɩ m da yetɩ, nẽrsaala de dẽgrɔ dãana, bɩɩ a ka narɩ m lagɩm na ẽ.

²⁹ Bɛla ĩyã tɩ fõn wi mam, tɩ mam wa'am ka zagsɛ. La mam boorɩ tɩ m bãŋɛ la bẽm yelle ĩyã tɩ yãma botɩ mam wa'am?»

³⁰ Tɩ Akɔrnɛlɩ lerge ẽ yetɩ: «La de la dabsa anaasɩ n wãna wẽngɛlŋa wʋ wakat-ẽna wã, tɩ mam daan boe m yire pʋ'ʋsra, tɩ bʋraa kɔ'ɔn yɛ fuugo n yẽgrɩ zɛ mam nẽŋam,

³¹ dee yetɩ: ‹Akɔrnɛlɩ, Nawẽnnɛ to'oge fʋ pʋ'ʋsgɔ la, la a tẽrɩ fõn sõŋrɩ nasdõma se'em na mɛ.

³² Bɛla, tõm nẽrba tɩ ba sẽŋɛ Zope ka wi Asimõ-pɩyɛɛrɩ tɩ a wa'am. A boe la Asimõ n de gãnzapa la yire. A yire la lɛm na ko-kãtɛ la nõorʋm.›

³³ Bɛla ĩyã tɩ mam tõm nẽrba tɔtɔ tɩ ba wa'am wa wi fʋ tɩ fʋ wa'am. La fõn wa'am wã, fʋ ẽŋɛ sõŋa. Tɩ wuu yãŋa boe la Nawẽnnɛ nẽŋam kalam tɩ tɩ selse bõn-sɛka wuu tɩ Zuudãana Nawẽnnɛ yele fõn yetɩ, fʋ yele tõma la.»

Apɩyɛɛrɩ mõolɛ Nawẽnnɛ yetɔga bɔ Akɔrnɛlɩ

³⁴ Tɩ Apɩyɛɛrɩ yãŋa pɔsɛ yele yetɩ: «Sɩra sɩra, mam yãŋa bãŋɛ mɛ tɩ Nawẽnnɛ ka tũ'usri nẽrba.

³⁵ La buuri wuu pʋam nẽr-sɛka n nannɩ Nawẽnnɛ dee ɩta sɛla woo tɩ la masra, ẽŋa dãana n paagɛ a yɛm.

³⁶ Tɔ. Ya mi tɩ Nawẽnnɛ tõm a yetɔga la bɔ la Ɩsrayɛlɩ dõma, a de la kõ-yẽlga n pa'alɩ tɩ tɩ wʋn tara sũ-mã'asʋm la Nawẽnnɛ Azezi-krisi ĩyã, ẽŋa n de nẽrsaalba wuu Zuudãana.

³⁷ Yãma mi yel-sɛba wuu n daan ẽŋɛ Zude la, la daan pĩ'ilum na Galile Azã n daan mõolɛ Nawẽnnɛ yetɔga dee mise nẽrba ko'om pʋam na poorʋm.

³⁸ Ya ken mina Azezi n yese Nazarɛtɩ la, la Nawẽnnɛ n daan bɔ ẽ a Sɩa pãŋa se'em, tɩ a daan sẽŋɛ zẽ'esɩ wuu ẽŋɛ ɩr-sõma, botɩ Asũtãana n daan nãmsrɩ sɛba la wuu yẽ ĩmã'asʋm. Se'ere n soe la, Nawẽnnɛ daan boe la ẽ mɛ.

³⁹ Tõma yẽ bõn-sɛba wuu tɩ a daan tõm Zerizalɛm la Zifdõma so'olʋm na wuu mɛ, dee tɩ ba daan ka ẽ dɔ-puurŋa zuo kʋ.

⁴⁰ Tɩ Nawẽnnɛ daan vo'oge ẽ dabsa atã daarɛ, botɩ a dɩkɛ a mẽŋa pa'alɛ.

⁴¹ La a ka dɩkɛ a mẽŋa pa'alɛ nẽrba la wuu, a dɩkɛ a mẽŋa pa'alɛ la tõma sɛba n de kaset-dõma tɩ Nawẽnnɛ daan põn dẽŋɛ looge la. A vo'ore la poorʋm, tõma daan lagɩm na ẽ mɛ di dee yũ.

⁴² A daan bɔ tõma nõorɛ yetɩ, tɩ mõolɛ ẽŋa yetɔga, dee yele nẽrba, tɩ la de la ẽŋa tɩ Nawẽnnɛ looge tɩ a di nẽr-vɔɔsɩ la kɩ'ɩndõma sarɩya.

⁴³ Nawẽnnɛ nõtɔ'ɔsrɩba la wuu yʋʋn tɔgɛ a yelle mɛ yetɩ, sɛka woo n bɔ ẽ sɩra, Nawẽnnɛ wʋn basɛ a dãana tõon-be'ero taalɛ a yʋ'ʋrɛ ĩyã.»

Sɛba n dagɩ Zifdõma la to'oge Nawẽnnɛ Sɩa

⁴⁴ Apɩyɛɛrɩ n daan ken tɔgra yetɔg-bãna la, tɩ Nawẽnnɛ Sɩa sige sɛba wuu n wõm yetɔga la zuto.

⁴⁵ La Nawẽnnɛ n daan botɩ a Sɩa la mẽ sige bu-zãŋsɩ la zuto la, la daan di'ige Zifdõma sɛba n bɔ Azezi sɩra n doose Apɩyɛɛrɩ wa'am na mɛ.

⁴⁶ Se'ere n soe la, ba daan wõm tɩ ba tɔgrɩ la bu-zãŋsɩ yetɔga pẽgra Nawẽnnɛ yʋ'ʋrɛ.

⁴⁷ Tɩ Apɩyɛɛrɩ yetɩ: «Nẽr-bãna wã to'oge la Nawẽnnɛ Sɩa wʋ tõma n daan to'oge se'em na. Bɛla, ãne n wʋn tã'agɛ gu ba yetɩ, ba da to'oge ko'om misga?»

⁴⁸ Dee bɔ nõorɛ yetɩ, ba mise ba ko'om pʋam la Azezi-krisi yʋ'ʋrɛ. Tɩ ba sose Apɩyɛɛrɩ yetɩ, a weege bãma zẽ'am ẽŋɛ dabsa fẽe pa'asɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ