အွန်လိုင်း သမ္မာကျမ်းစာ

Taitusi 1 - Farefare Ninkaré

¹ Mam Apolɩ n gʋlsɛ gõŋɔ wã, mam de la Nawẽnnɛ yamŋa, la Azezi-krisi Tõntõnna tɩ a tõm tɩ m mõolɛ a kõ-yẽlga tɩ sɛba tɩ Nawẽnnɛ looge la bɔ sɩra, dee bãŋɛ Nawẽnnɛ sɩra n pa'alɩ ban wʋn dɔla Nawẽnnɛ sore se'em.

² Tɩ tarɩ pʋtẽ'erɛ tɩ tɩ wʋn yẽ la vɔm n ka ba'asrɩ, tɩ Nawẽnnɛ n dagɩ põmpɔrma la daan bĩŋe nõorɛ halɩ tɩ dũnia nãn ka nãam.

³ La wakatɛ n paagɛ la, a puke bõn-ẽŋa mɛ pa'alɛ a yetɔga pʋam, a dɩkɛ a yetɔga la ẽŋɛ la mam nu'usum tɩ m mõolɛ bɔ nẽrba, wʋ Nawẽnnɛ n de tɩ Fãagra n bɔ nõorɛ se'em na.

⁴ Mam n gʋlsɛ gõŋɔ wã bɔ'ɔra Atiti n lebge mam mẽŋa bia, tõma n lagɩm dɔla Azezi-krisi la ĩyã. Tɩ Sɔ Nawẽnnɛ, la tɩ Fãagra Azezi-krisi wʋn ẽŋɛ fɔ a yel-sõnnɛ, dee bɔ fɔ a sũ-mã'asʋm.

Atiti n wʋn tõm se'em Krɛtɩ

⁵ Mam n daan botɩ fʋ weege Krɛtɩ la, la de la fʋ malgɛ bõn-sɛba n deege dɛna ba malgɛ ba'asɛ la, la fʋ looge kẽma tẽŋa woo Nawẽnnɛ nẽrba pʋam wʋ mam n yele fʋ se'em na.

⁶ Kẽema masɛ tɩ a dɛna la nẽra n ka tarɩ dõrga, la a dɛna pɔg-yẽŋa dãana, tɩ a kɔma bɔ Azezi-krisi sɩra, ka ɩta yooryooro, dee nanna nẽrba.

⁷ Dẽnɩ tɩ nẽŋadãana n bɩsrɩ Nawẽnnɛ nẽrba yelle dɛna nẽra n ka tarɩ dõrga, la a da dɛna pa'al-m-mẽŋa dãana, bɩɩ sũ-isgre dãana, a da dɛna dã-yũura, bɩɩ zɛbzɛbra, bɩɩ nẽra n ɩtɩ sɛla n ka masɛ yẽta bõntarsõm.

⁸ La masɛ mɛ tɩ a ɩta sãama sãanɔ, la a dɛna nẽra n nõŋɛ sɛla n ãn sõŋa ɩrgɔ, la a tara pʋtẽ'e-sõŋɔ, la a dɛna nẽra n masɛ sɛla woo pʋam, la a dɛna pʋpeelem dãana, la a tãna a mẽŋa yõkra.

⁹ La masɛ tɩ a tara sɩra zãsŋɔ la kãŋkãŋɛ, wʋ ban zãsʋm ẽ se'em na, tɩ a wʋn tã'agɛ bɔ nẽrba bʋraanɛ tɩ ba dɔla sɩra zãsŋɔ la, dee tã'agɛ pa'alɛ sɩ'ɩsrɩba tɩ ba bãŋɛ ba koŋre.

¹⁰ Se'ere n soe la, nẽrba zozo'e n boe dɛna sɩ'ɩsrɩba, la yetɔg-yooro dõma, dee pã'asra nẽrba. Lan gãnnɩ wuu, nẽr-bãma boe la Zifdõma n wãtɩ la pʋam.

¹¹ La masɛ tɩ fʋ gu ba tɩ ba da tɔgra bɛla, tɩ ba zãsnɩ nẽrba la sɛla n ka masɛ, wã'ara nẽrba basɛba yiɛ, ba zãsnɩ sɛla n ka masɛ ɛɛra la bõntarsõm.

¹² Krɛtɩ dõma mẽŋa bãŋra ayɩla yʋʋn yetɩ: «Krɛtɩ dõma de la põmpɔrndõma wakatɛ wuu, la pʋtʋʋl-dõma ãna wʋ we-dũnsi la, ba de la zẽyãgsɩ dee tara pʋyã'anɛ.»

¹³ Yel-ẽŋa de la sɩra, bɛla ĩyã, kã'an ba sõŋa sõŋa tɩ ba dɔla Nawẽnnɛ sɩra la sõŋa.

¹⁴ Yele ba tɩ ba basɛ Zifdõma sɔlma, la bõn-sɛba tɩ nẽrba zagsɛ sɩra dee bɔ nõorɛ tɩ ba ɩta la.

¹⁵ Sɛla woo ãn sõŋa mɛ bɔ nẽr-sɛka n de pʋpeelem dãana, la sɛka n de tõon-dẽgrɔ dãana ka sakra Nawẽnnɛ, sɛla sɛla ka boe n ãn sõŋa bɔ ẽ. Ẽŋa pʋtẽ'erɛ, la a yɛm wuu ki mɛ.

¹⁶ Ba yetɩ bãma mi Nawẽnnɛ mɛ, la ba tõoma la pa'alɩ tɩ ba sɩ'ɩsrɩ Nawẽnnɛ mɛ. Ba de la nẽr-bɛ'ɛsɩ gãŋɛ, la ba ka sakrɩ Nawẽnnɛ nõorɛ, dee ka tãna wʋn tõm tõon-sõŋɔ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ