အွန်လိုင်း သမ္မာကျမ်းစာ

Lilegere 22 - Farefare Ninkaré

¹ Tɩ malɛka la pa'alɛ mam ko'om n bɔ'ɔrɩ vɔm kʋlaaga. Kʋlaaga la yẽgrɩ wʋ bɩsga la. A ze'ele la Nawẽnnɛ, la Pebila na'am bĩmbĩnne na zẽ'am

² zɔta tẽŋa la pʋam pallɛ tẽŋasʋka. Tɩa n bɔ'ɔrɩ vɔm n boe kʋlaaga la sakʋgrɔ bayi la wɔnna biɛ nõorɛ pia la ayi yʋʋnɛ pʋam. A wɔnnɩ na nõorɛ ayɩla wõrga woo pʋam. Tɩa la võorɔ bɔ'ɔrɩ la dũnia so'olʋm wuu ĩmã'asʋm.

³ Sɛla tɩ Nawẽnnɛ kã be'em bɔ ẽ kãn le bɔna tẽŋa la pʋam. Nawẽnnɛ, la Pebila la na'am bĩmbĩnne n wʋn bɔna mĩ. Tɩ Nawẽnnɛ tõntõnɩba wʋn nã'asra ẽ.

⁴ La ba wʋn yẽ a nẽŋa, la a yʋ'ʋrɛ wʋn gʋlsɛ ba dĩa zuto.

⁵ Yʋ'ʋŋɔ kãn le bɔna. Nẽrba kãn bɔɔra tɩ fɩtla, bɩɩ wẽntulle nẽegɛ peelem, Zuudãana Nawẽnnɛ n wʋn nẽegɛ peelem bɔ ba. La ba wʋn di la na'am wakatɛ n ka ba'asrɩ.

Azezi lemŋo

⁶ Tɩ malɛka la yele mam yetɩ: «Yetɔg-bãna wã wuu de la sɩra, masɛ tɩ ba bɔ sɩra. La de la Zuudãana Nawẽnnɛ mẽŋa n botɩ a nõtɔ'ɔsrɩba tɔ'ɔsra a yetɔga tɔgra la, n tõm a malɛka tɩ a wa'am wa pa'alɛ a tõntõnɩba sɛla n kãn yuuge dee ẽŋɛ.»

⁷ Azezi yetɩ: «Selse-ya! La kãn yuuge dee tɩ mam wa'am. Sɛka n sakrɩ gõŋɔ wã yetɔga tɩ ba to'osrɩ Nawẽnnɛ zẽ'am tɔgra la tarɩ zu-yẽlga.»

⁸ La de la mam Azã n wõm dee yẽ bõn-bãma. La mam n wõm dee yẽ ba la, mam ka la dũma tẽŋa malɛka la n pa'alɛ mam bõn-bãma la nẽŋam tɩ m nã'asɛ ẽ.

⁹ Tɩ a yele mam yetɩ: «Da ẽŋɛ bɛla, tɩ mam mẽ de la tõntõnna wʋ fõn, la fʋ sɔbiisi n de nõtɔ'ɔsrɩba, la nẽr-sɛba wuu n sakrɩ gõn-ẽna wã yetɔga la. Nawẽnnɛ n de fʋ nã'asɛ.»

¹⁰ A yele bɛla dee yele mam yetɩ: «Da sʋgɛ gõŋɔ wã yetɔga tɩ Nawẽnnɛ puke pa'alɛ fʋ la, se'ere n soe la, wakat-sɛka tɩ bõn-bãna wʋn ẽŋɛ la lɛm mɛ.

¹¹ Sɛka n de tõon-be'ero dãana, a ken tõnna be'em. Sɛka n de tõon-dẽgrɔ dãana, a ken tõnna tõon-dẽgrɔ. La sɛka n ɩtɩ sɛla n masɛ, a ken ɩta sɛla n masɛ. Tɩ sɛka n de pʋpeelem dãana, ken sẽŋɛ nẽŋa la pʋpeelem.»

¹² Azezi yele yetɩ: «Selse-ya! La kãn yuuge dee tɩ mam wa'am. La mam tarɩ la yɔɔrɔ sẽna tɩ m yɔ nẽra woo masɛ wʋ ẽn tõm se'em.

¹³ Mam de la Alfa, la Omega, pɔspɔsɩ dãana, la poorʋm dãana, sɛla woo pĩ'iluŋo, la ba'asgɔ.»

¹⁴ Sɛba n peege ba futo tarɩ zu-yẽlga. Bãma n wʋn tara nõorɛ tɩ ba di vɔm tɩa la biɛ, la bãma n wʋn doose tẽŋa la nõa kẽ tẽŋa la pʋam.

¹⁵ La nẽr-sɛba n tõnnɩ tõon-dẽgrɔ, la sɛba n tõnnɩ tɩɩm tõoma, la sɛba n tõnnɩ yalsɩ tõoma, la nẽr-kʋʋrba, la sɛba n nã'asrɩ bõndõma tɩ ba mãalɛ, la nẽr-sɛba wuu n nõŋɛ põmpɔrŋɔ dee parna la, wʋn weege la yẽŋa, ba kãn kẽ tẽŋa la pʋam.

¹⁶ «Mam Azezi n tõm m malɛka tɩ a wa'am wa tɔgɛ bõn-bãma wuu pa'alɛ m nẽrba. Mam de la naba Adavidi yɩɩŋa, la bewã'arɛ n nẽerɩ.»

¹⁷ Nawẽnnɛ Sɩa, la pɔka la n mãasʋm a mẽŋa tɩ a ele la yetɩ: «Wa'am!» Sɛka n wõm bɛla, a mẽ yetɩ: «Wa'am!» Koyũuro n tarɩ sɛka, a wa'am, sɛka n boorɩ ko'om n bɔ'ɔrɩ vɔm, a wa'am wa to'oge zãŋa.

Ba'asgɔ yetɔga

¹⁸ Nẽr-sɛka woo n wõm Nawẽnnɛ yetɔga wã n boe gõŋɔ wã pʋam, mam Azã kã'anɩ ẽ yetɩ, nẽr-sɛka sãn pa'asɛ sɛla yetɔga wã pʋam, Nawẽnnɛ wʋn botɩ a yẽ tooro sɛba n gʋlsɛ gõŋɔ wã pʋam na.

¹⁹ La nẽr-sɛka sãn yese sɛla gõŋɔ wã yetɔga pʋam, Nawẽnnɛ wʋn yese a pʋrɛ tɩ a kãn po di vɔm tɩa la biɛ, la a kãn kẽ Nawẽnnɛ tẽŋa la pʋam wʋ lan pa'alɛ se'em gõŋɔ wã pʋam na.

²⁰ Sɛka n tɔgɛ yetɔg-bãna bɔ la yetɩ la de la sɩra, a yetɩ: «Asɩra, la kãn yuuge dee tɩ mam wa'am.» Amina! La dɛna bɛla. Zuudãana Azezi, wa'am.

²¹ Tɩ Zuudãana Azezi yel-sõnnɛ bɔna la ya wuu.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ