အွန်လိုင်း သမ္မာကျမ်းစာ

Lilegere 14 - Farefare Ninkaré

Pebila, la sɛba n boe la ẽ

¹ Tɩ mam le bɩsɛ, yẽ Pebila la n ze Siyõ tãŋa zuo. Tɩ nẽrba tʋskɔbga la tʋspinaasɩ la anaasɩ (144'000) zɛ a zẽ'am, ba tarɩ la Pebila la yʋ'ʋrɛ, la a Sɔ yʋ'ʋrɛ n gʋlsɛ ba dĩa zuto.

² Tɩ mam wõm kõa n ze'ele Nawẽnnɛ yire tɩ a dãmnɛ ãna wʋ ko-kãtɛ dãmnɛ, dee ãna wʋ saaga n tãsrɩ sũnna, dee ãna wʋ kõl-wẽ'erba n wẽ'erɩ ba kõnnɔ.

³ Nẽr-kʋʋŋɔ bãma ze la na'am bĩmbĩnne, la bõn-vɔɔsɩ banaasɩ, la kẽma la nẽŋam yõona yõom-paalɛ. Nẽra nẽra ka tã wʋn zãsʋm yõonɛ na, sãn dagna nẽrba tʋskɔbga la tʋspinaasɩ la anaasɩ la n yẽ fãarɛ dũnia zuo la mã'a.

⁴ Nẽr-bãma ka dẽgɛ ba mẽŋa la pɔgsɩ, ba tarɩ ba mẽŋa sõŋa mɛ. Ba dolɩ la Pebila la zẽ'e-sɛka woo tɩ a we'esɩ. Ba yẽ fãarɛ nẽrsaalba pʋam tɩ ba dɛna la pɔspɔsɩ dõma bɔ Nawẽnnɛ, la Pebila la.

⁵ Põmpɔrŋɔ yetɔga ka tole ze'ele ba nõorʋm, ba ka tarɩ tuure.

Malɛkadõma batã kõosɩ

⁶ Tɩ mam yẽ malɛka ayẽma n ẽgrɩ saazuum-zuum, a tarɩ la Nawẽnnɛ kõ-yẽlga n boe wakatɛ wuu tɩ a mõolɛ bɔ nẽr-sɛba wuu n boe dũnia zuo, so'olʋm wuu nẽrba, la buuri wuu nẽrba, la yetɔga buuri wuu nẽrba, la tẽnsɩ wuu nẽrba.

⁷ A daan tɔgrɩ mɛ ke'enke'em yetɩ: «Zoe-ya Nawẽnnɛ, la ya nã'asɛ ẽ, se'ere n soe la, wakatɛ paagɛ mɛ tɩ a wʋn di nẽrba sarɩya. Ka-ya dũma nã'asɛ Nawẽnnɛ n nãam saazuum, la tẽŋa, la ko-kãtɛ, la kʋlsɩ wuu n bulli la.»

⁸ Tɩ malɛka bʋyi dãana dɔla pɔspɔsɩ dãana la poore yɛta tɩ: «A lui mɛ, a lui mɛ, Babilɔnɩ n de tẽn-kãtɛ la lui sã'am mɛ. Ẽŋa n botɩ so'olʋm wuu nẽrba tõm a yalsɩ tõoma zozo'e wʋ dãam tɩ a yũuse ba la.»

⁹ Tɩ malɛka bʋtã dãana dɔla malɛkadõma bayi la tɔgra ke'enke'em yetɩ: «Nẽra sãn nã'asɛ dũŋa la, la a bõnɔ na tɩ ba mãalɛ la, la a sãn to'oge a dãalgɔ la a dĩire zuo bɩɩ a nu'ugo zuo,

¹⁰ Nawẽnnɛ sũure wʋn yĩige la ẽ, tɩ a sɩbgɛ ẽ wʋ dã-ke'eŋo n ka pulum tɩ a pɩrɛ wannɛ bɔ ẽ tɩ a yũ. A wʋn nãmsɛ la kidibre n diti bugum pʋam, malɛg-sõma, la Pebila la nẽŋam.

¹¹ Nẽr-bãma nãmsgɔ bug-zũ'usi zonnɩ la saazuum wakatɛ wuu. Nẽr-sɛba wuu n nã'asrɩ dũŋa la, la a bõnɔ na tɩ ba mãalɛ la, dee to'oge a yʋ'ʋrɛ dãalgɔ la, kãn malɩn yẽ vo'osgo wʋntɛɛŋa la yʋ'ʋŋɔ.»

¹² Bɛla, dẽnɩ tɩ Nawẽnnɛ nẽrba n sakra a nõorɛ dee bɔ Azezi sɩra la, tara sũ-ke'eŋo.

¹³ Tɩ mam wõm kõa n ze'ele saazuum yele mam yetɩ: «Gʋlsɛ yetɩ: ‹Lan pɔsɛ lɛɛlɛ wã, nẽr-sɛba n kiiri Zuudãana doosgo pʋam na tarɩ zu-yẽlga.› Tɩ Nawẽnnɛ Sɩa yetɩ: ‹La de la sɩra, ba wʋn vo'ose la ba tõon-tooro, ba tõon-sõma la dolɩ ba mɛ.› »

Dũnia bõnkɔɔla lagsgɔ

¹⁴ Tɩ mam bɩsra, yẽ sawatɛ n de pɛɛlga, tɩ nẽra n wõn na nẽrsaala dayʋa zɔa a zuo. A vuge la sãlma mũŋa, dee tarɩ geego n saasɛ tara nõorɛ a nu'um.

¹⁵ Tɩ malɛka ayẽma ze'ele Wẽnde-kãtɛ la pʋam yese tɔgɛ la sɛka n zo sawatɛ zuo la ke'enke'em yetɩ: «Dɩkɛ geego la sɛɛra, tɩ lagsgɔ wakatɛ paagɛ mɛ, se'ere n soe la, tẽŋa zuo bõnkɔɔla bɩ mɛ seke lagsgɔ.»

¹⁶ Tɩ sɛka n zĩ sawatɛ zuo la dɩkɛ a geego la doose tẽŋa zuo, sɛ tẽŋa bõnkɔɔla lagsɛ.

¹⁷ Tɩ malɛka ayẽma ze'ele Wẽnde-kãtɛ n boe saazuum na pʋam yese, ẽŋa mẽ tarɩ la geego n saasɛ tara nõorɛ.

¹⁸ Tɩ malɛka ayẽma n tarɩ ke'eŋo sɔna bugum ze'ele kãabgɔ bĩmbĩnne na zẽ'a yese tɔgɛ ke'enke'em la malɛk-sɛka n tarɩ geego n tarɩ nõorɛ la yetɩ: «Dɩkɛ fʋ geego la sɛ viinye tɩɩsɩ la biɛ n boe tẽŋa zuo la. Se'ere n soe la, ba biɛ la bɩ mɛ.»

¹⁹ Tɩ malɛka la dɩkɛ a geego doose tẽŋa zuo sɛ viinye tɩɩsɩ la biɛ, dɩkɛ ba lobge bõn-kãtɛ tɩ ba wẽkrɩ viinye biɛ a pʋam n pa'alɩ Nawẽnnɛ sũ-yĩire la pʋam.

²⁰ Tɩ ba wẽkɛ biɛ la wẽkrɛ bõnɔ na pʋam tẽŋa la kẽnkɛrŋa. Tɩ zɩɩm ze'ele wẽkrɛ bõnɔ na pʋam yese pɩrɛ tẽŋa zoe paagɛ kilomẽtrɩ kɔbstã. Tɩ wemõa sãn sige ba pʋam, la de ko'ogo paara la a garẽŋrɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ