အွန်လိုင်း သမ္မာကျမ်းစာ

Hiburuduma 9 - Farefare Ninkaré

Nẽrba n yʋʋn pʋ'ʋsrɩ Nawẽnnɛ se'em fuu-deego la pʋam

¹ Pɔspɔsɩ nõor-bĩŋre la yʋʋn tarɩ la zẽ'e-sõŋɔ tẽŋa zuo, la sɔa tɩ ba dɔla pʋ'ʋsra Nawẽnnɛ.

² Ba yʋʋn tĩ la fuu-deego beŋe zẽ'esɩ bayi, wi'ira pɔspɔsɩ zẽ'a la tɩ Nawẽnnɛ zẽ'e-sõŋɔ. Bilam, fɩtladõma dɔglgɔ zẽ'a, la taablɩ tɩ ba dɔglɩ borborɩ bɔ'ɔra Nawẽnnɛ n boe mĩ.

³ La fuugo la n beŋe deego bʋyi dãana la, ba wi'iri bilam tɩ Nawẽnnɛ zẽ'e-sõŋɔ mẽŋa mẽŋa.

⁴ Kãabgɔ bĩmbĩnne n de sãlma tɩ ba yõ'orɩ tɩdarɛ a zuo n boe mĩ, pa'asɛ la nõor-bĩŋre daka tɩ ba dɩkɛ sãlma yũlge a wuu. Sãlma lɔkɔ tɩ mannɩ boe a pʋam, la Aarõ dasaarɛ n puse võorɔ la, la kug-palagsɩ sɛba tɩ Nawẽnnɛ n bɔ nõorɛ se'em na gʋlsɛ ba zuto la n boe daka la pʋam.

⁵ Daka la zuo, ba ẽŋɛ la malɛkadõma tɩ ba wi'iri tɩ seribẽ n pa'alɩ Nawẽnnɛ na'am pãŋa ẽŋɛ mĩ, tɩ ba kempagsɩ yɛrgɛ tɩ ba mã'asʋm pĩ zẽ'e-sɛka tɩ ba ɩtɩ zɩɩm mĩ tɩ Nawẽnnɛ basra nẽrba tõon-be'ero taalɛ la. La lɛɛlɛ wã, mam kãn wɛgsɛ bõn-bãma yelle pa'alɛ ya.

⁶ Sɛla woo mãasʋm na bɛla bɔna a zẽ'a, tɩ kãabgɔ kẽma la kẽ'era pɔspɔsɩ deego la pʋam daarɛ woo tõnna ba tõoma.

⁷ La deego bʋyi dãana la pʋam, kãabgɔ kẽma nẽŋadãana la mã'a n kẽ'erɩ mĩ nõorɛ ayɩla yʋʋnɛ pʋam. A sãn kẽ'era mĩ, dẽnɩ tɩ a tara dũnsi zɩɩm ka bɔ Nawẽnnɛ, a mẽŋa tuure, la nẽrba tuure ĩyã.

⁸ Bɛla, Nawẽnnɛ Sɩa pa'alɩ tɩ pɔspɔsɩ deego la n daan ken bɔna la, sore ka pakɛ tɩ nẽra tãna wʋn kẽ Nawẽnnɛ zẽ'e-sõŋɔ mẽŋa mẽŋa la pʋam.

⁹ Bɛla de la mãmsgɔ pa'ala tõma bõn-sɛba n boe lɛɛlɛ wã võorɛ. Bɔ'a, la dũnsi tɩ ba kãabrɩ bɔ'ɔra Nawẽnnɛ na, ka tã wʋn basɛ tɩ sɛba n ɩtɩ bɛla pʋ'ʋsra Nawẽnnɛ na sũure masɛ a zẽ'am.

¹⁰ Ba de la dia, la bõn-yũula, la ko'om peere buuri to'oto'ore yelle mã'a. Ɩrgɔ bãma de la ĩyã yɛla n de dũnia wã bõnɔ n yʋʋn boe tɩ nẽrba dɔla, halɩ wa paagɛ wakat-sɛka tɩ Nawẽnnɛ malɩn malgɛ sɛla woo sõŋa.

Azezi-krisi ĩyã tɩ Nawẽnnɛ bĩŋe nõor-paalga

¹¹ La Krisi n wa'am na, a de la kãabgɔ kẽma nẽŋadãana, ẽŋa n bɔ tõma bõn-sõma tɩ tɩ tarɩ wã, ẽŋa n kẽ zẽ'e-sõŋɔ n masɛ sɛla woo pʋam n gãnnɩ na, la dagɩ fuugo deego tɩ nẽrsaalba tĩ, a dagɩ dũnia wã bõnɔ.

¹² A daan kẽ Nawẽnnɛ zẽ'e-sõŋɔ la pʋam na nõorɛ ayɩla mã'a wakatɛ wuu ĩyã. La dagɩ bʋʋsɩ zɩɩm, la lɔl-pɔla zɩɩm tɩ a dɩkɛ kãabɛ bɔ Nawẽnnɛ, a dɩkɛ la a mẽŋa zɩɩm kãabɛ bɔ Nawẽnnɛ fãagɛ tõma wakatɛ n ka ba'asrɩ ĩyã.

¹³ Ba yʋʋn tarɩ la bʋʋsɩ, la lɔlsɩ zɩɩm, la na-sa'arɛ tɩ ba yõ tãmpɛglʋm mĩisra nẽr-sɛba n sã'am lɔɔ la, tɩ ba le malgɛ ba tɩ ba ãna sõŋa masɛ la lɔɔ la.

¹⁴ Krisi zɩɩm na tarɩ pãŋa mɛ gãnna bɛla zozo'e. Ẽŋa ka tarɩ tuure, la doose la Nawẽnnɛ Sɩa n boe wakatɛ wuu tɩ a dɩkɛ a mẽŋa bɔ Nawẽnnɛ, peege tɩ tõon-be'ero n sẽm na kũm na, tɩ tɩ sũure ãna sõŋa, tɩ tɩ tõnna bɔ'ɔra vɔm dãana Nawẽnnɛ.

¹⁵ La de la bɛla ĩyã tɩ Nawẽnnɛ bĩŋe nõor-paalga ẽŋa ĩyã. Ẽn ki la ĩyã, a yɔ fãagɛ nẽr-sɛba n tuuge pɔspɔsɩ nõorɛ bĩŋre la pʋam mɛ, tɩ Nawẽnnɛ n wi ba la, ba wʋn to'oge bõn-sõma tɩ a bĩŋe nõorɛ tɩ a bɔ a nẽrba la wakatɛ n ka ba'asrɩ ĩyã.

¹⁶ Nẽra sãn pa'alɛ ba wʋn pʋɩ ẽŋa bõntarsõm se'em ẽŋa kũm poorʋm, dẽnɩ tɩ a ki dee tɩ ba yãŋa pʋɩ ba.

¹⁷ Nẽra la sãn ken vɔa, a nõorɛ la tɩ a bɔ la de la yoogo. La de la a kũm poorʋm tɩ a tarɩ yõorɔ.

¹⁸ La mẽ de la bɛla baa la Nawẽnnɛ pɔspɔsɩ nõor-bĩŋre la, la de la dũnsi zɩɩm n yese tɩ a pɔsɛ tõnna.

¹⁹ Amoyisi n yʋʋn tɔgɛ Nawẽnnɛ lɔɔ wuu pa'alɛ nẽrba wuu wʋ Nawẽnnɛ n yele se'em kɩ'ɩlɩm na, a yãŋa dɩkɛ la lɔl-pɔla, la bʋʋsɩ zɩɩm, la ko'om, dɩkɛ pesgo kõbrɔ n ãn mõlga, vile izɔpɩ võorɔ lʋsɛ ba pʋam, mĩise nõor-bĩŋre gõŋɔ la, la nẽrba la wuu,

²⁰ dee yele yetɩ: «Zɩɩ-bãna wã n pa'alɩ tɩ Nawẽnnɛ bĩŋe nõorɛ la ya lɛ tɩ ya sakɛ ẽ.»

²¹ Amoyisi yʋʋn ken dɩkɛ zɩɩm na mĩise fuu-deego la, la pʋ'ʋsgɔ lɔgrɔ la wuu mɛ.

²² La sãn dɛna lɔɔ la sore, la ãn wʋ la de la sɛla woo tɩ zɩɩm malgrɩ tɩ ba le ãna sõŋa Nawẽnnɛ zẽ'am. Tɩ zɩɩm sãn ka yese, Nawẽnnɛ ka basrɩ nẽrba tõon-be'ero taalɛ.

Krisi kũm n yese nẽrba tõon-be'ero basɛ

²³ Lan yʋʋn masɛ tɩ ba dɩkɛ dũnsi zɩɩm malgɛ bõn-sɛba n mãmsrɩ sɛla n boe Nawẽnnɛ yire la, tɩ ba le ãna sõŋa bɛla la, la sãn dɛna bõnɔ la mẽŋa n boe Nawẽnnɛ yire la, dẽnɩ tɩ la dɛna kãabgɔ n ãn sõŋa gãnna bɛla.

²⁴ Krisi n kẽ zẽ'e-sɛka la, dagɩ deego tɩ nẽrsaala ẽŋɛ bɔ Nawẽnnɛ n mãmsrɩ Nawẽnnɛ zẽ'e-sõŋɔ mẽŋa mẽŋa la, a kẽ la Nawẽnnɛ yire mẽŋa, bɔna Nawẽnnɛ nẽŋam tõma sõŋrɛ ĩyã.

²⁵ Krisi ka kẽ nõorɛ faa wʋ kãabgɔ kẽma nẽŋadãana la n kẽ'erɩ zẽ'e-sõŋɔ la yʋʋnɛ woo la zɩɩm n dagɩ a mẽŋa zɩɩm na, a kẽ la nõorɛ ayɩla mã'a dɩkɛ a mẽŋa kãabɛ bɔ Nawẽnnɛ.

²⁶ La sãn dagɩ nɩ bɛla, a daan wʋn nãmsɛ nɩ mɛ nõorɛ faa, halɩ lan pɔsɛ dũnia pĩ'iluŋo wa paam zĩna. La sɛla n de sɩra, a wa'am na nõorɛ ayɩla mã'a dũnia ba'asgɔ wakatɛ wã, tɩ a yese tõon-be'ero, ẽn dɩkɛ a mẽŋa kãabɛ la ĩyã.

²⁷ Nẽra woo kiiri la bʋyɩla, dee tɩ Nawẽnnɛ dita a sarɩya.

²⁸ Bɛla mẽ, Krisi dɩkɛ a mẽŋa bɔ la nõorɛ ayɩla yese nẽrba zozo'e tõon-be'ero basɛ. A wʋn le leme wa'am mɛ nõorɛ bʋyi pʋam, la, la kãn dɛna tõon-be'ero yɛsga ĩyã, la de la nẽr-sɛba n gu'uri ẽ tɩ ba yẽ fãarɛ la ĩyã.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ