အွန်လိုင်း သမ္မာကျမ်းစာ

Hiburuduma 8 - Farefare Ninkaré

Azezi n de nõor-bĩŋre paalga kãabgɔ kẽema

¹ Tõma yetɔga la tɩ tõma tɔgrɩ la zuo n wãna: Tõma tarɩ la kãabgɔ kẽma nẽŋadãana, ẽŋa n zĩ saazuum Nawẽnnɛ n de ke'eŋo dãana la na'am bĩmbĩnne zʋʋgɔ.

² Ẽŋa n boe zẽ'e-sõŋɔ mẽŋa mẽŋa la pʋam tõnna bɔ'ɔra Nawẽnnɛ, zẽ'e-ẽŋa de la Zuudãana Nawẽnnɛ mẽŋa yire, la dagɩ zẽ'e-sɛka tɩ nẽrsaalba tĩ pʋ'ʋsra Nawẽnnɛ na.

³ Ba loorɩ kãabgɔ kẽma nẽŋadãana woo tɩ a bɔ'ɔra la Nawẽnnɛ bɔ'a, la a kãabra bɔ'ɔra ẽ. Bɛla tɩ la mẽ masɛ tɩ ẽŋa tara sɛla bɔ Nawẽnnɛ.

⁴ Azezi sãn boe nɩ na tẽŋa wã zuo, a ka de nɩ kãabgɔ kẽema. Se'ere n soe la, kãabgɔ kẽma põn bɔna mɛ bɔ'ɔra bɔ'a wʋ Amoyisi lɔɔ la n de se'em na.

⁵ Bãma n tõnnɩ tõon-sɛka la de la sɛla n ɩtɩ Nawẽnnɛ yire la wõnnɛ, la a mãmsgɔ. La ãn wʋ Amoyisi n yʋʋn yetɩ a tĩ zẽ'e-sɛka tɩ ba pʋ'ʋsra Nawẽnnɛ na, Nawẽnnɛ yʋʋn yele ẽ yetɩ: «Bɩsɛ sõŋa sõŋa tɩ fʋ wʋn tĩ ẽ tɩ a ãna wʋ mam n pa'alɛ fʋ tãŋa zuo se'em na.»

⁶ La lɛɛlɛ wã, Azezi tarɩ la tõon-keko gãnna bãma. Nõorɛ tɩ Nawẽnnɛ bĩŋe la tõma Azezi ĩyã la n ãn sõŋa gãnna, se'ere n soe la, sɛla tɩ a yetɩ a ẽŋɛ bɔ tɔ nõor-bĩŋre ẽna pʋam na n ãn sõŋa gãnna.

⁷ Pɔspɔsɩ nõor-bĩŋre la yʋʋn sãn ka gelge nɩ, la ka de nɩ tɩ Nawẽnnɛ bĩŋe nõorɛ bʋyi dãana.

⁸ La Nawẽnnɛ zɛrgɛ ba mɛ, bɛla tɩ a yele yetɩ: «Dabsa n sẽm tɩ mam wʋn bĩŋe nõor-paalga la Ɩsrayɛlɩ dõma, la Zuda dõma lɛ.

⁹ La kãn ãna wʋ nõor-bĩŋre sɛka tɩ mam yʋʋn bĩŋe la ba yaabdõma wakat-sɛka tɩ mam gʋrɛ ba nu'usi tarɩ ba Ezipti yese la. Ba yʋʋn ka doose mam nõorɛ la tɩ mam bĩŋe yetɩ ba ẽŋɛ se'em na, bɛla n soe tɩ mam basɛ ba. Mam n de Zuudãana la n yele.

¹⁰ Mam n yetɩ m bĩŋe m nõorɛ se'em la Ɩsrayɛlɩ dõma dabsa bãma poorʋm n wãna: Mam wʋn dɩkɛ m lɔɔ la ẽŋɛ la ba pʋtẽ'era pʋam, mam wʋn gʋlsɛ ba la ba sũure pʋam. Mam wʋn dɛna ba Nawẽnnɛ, tɩ ba dɛna mam nẽrba.

¹¹ Nẽra nẽra kãn le zãsʋm a tadãana bɩɩ a sɔbia yele ẽ tɩ a bãŋɛ Zuudãana la, se'ere n soe la, ba nẽrba wuu wʋn bãŋɛ mam mɛ, halɩ lan pɔsɛ la kɔm-pɩgsɩ ka paagɛ bõnkɛgsɩ.

¹² Lan de se'em na, mam wʋn basɛ ba koŋre la taalɛ mɛ, mam kãn le tẽra ba tõon-be'ero la yɛla.»

¹³ Nawẽnnɛ n tɔgrɩ nõor-bĩŋre paalga yelle la, a botɩ pɔspɔsɩ dãana la dɛna la kɛka. La sɛla n lebge kɛka kʋrgɛ deege la a bɔɩ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ