အွန်လိုင်း သမ္မာကျမ်းစာ

Hiburuduma 7 - Farefare Ninkaré

Amelkisedɛkɩ n de kãabgɔ kẽema gãnna Leviti dõma

¹ Amelkisedɛkɩ ẽŋa yʋʋn de la Salɛm naba, la Nawẽnnɛ n gãnnɩ wuu kãabgɔ kẽema. Abraham n yʋʋn sẽŋɛ ka zɛbɛ yãŋɛ na'adõma dee lebe kulla la, Amelkisedɛkɩ n tʋ'ʋsɛ ẽ kã kã'a-sõma bɔ ẽ.

² Tɩ Abraham looge lɔg-sɛba wuu tɩ a to'oge la pia pʋam ayɩla bɔ ẽ. Amelkisedɛkɩ yʋ'ʋrɛ la võorɛ de la: «Naba n ɩtɩ sɛla n masɛ», sɛla n pa'asɛ, a de la Salɛm naba, n boorɩ tɩ la yetɩ: «Sũ-mã'asʋm naba».

³ Ba ka mi a sɔ, la a ma, la a yaabdõma. Sɛla ka boe n pa'alɩ a vɔm pĩ'iluŋo, la a vɔm ba'asgɔ, a ãn wʋ Nawẽnnɛ Dayʋa la, a de la kãabgɔ kẽema wakatɛ n ka ba'asrɩ.

⁴ Bɩsɛ-ya Amelkisedɛkɩ n tarɩ ke'eŋo se'em. Ẽŋa tɩ tɩ yaaba Abraham yʋʋn looge lɔg-sɛba tɩ a zɛbɛ to'oge la pia pʋam ayɩla bɔ ẽ.

⁵ Alevi yɩɩsɩ sɛba n de kãabgɔ kẽma la, Amoyisi lɔɔ la bɔ ba nõorɛ tɩ ba tɔ'ɔsra pia pʋam ayɩla la Abraham yɩɩsɩ n de ba mẽŋa nẽrba la zẽ'am.

⁶ La Amelkisedɛkɩ n dagɩ ba buuri la to'oge pia pʋam wuu ayɩla mɛ Abraham zẽ'am, dee kã kã'a-sõma bɔ Abraham n de sɛka tɩ Nawẽnnɛ bĩŋe nõorɛ bɔ ẽ na.

⁷ La de la sɩra, sẽ'eŋɔ ka boe, sɛka n kã kã'a-sõma bɔ nẽra n gãnnɩ sɛka tɩ a kã bɔ ẽ na.

⁸ La sãn dɛna Alevi yɩɩsɩ la n to'osrɩ pia pʋam ayɩla la, ba de la nẽrsaalba n kiiri, la Amelkisedɛkɩ de la sɛka tɩ Nawẽnnɛ gõŋɔ la yetɩ, a vɔa mɛ.

⁹ Tɩ tã wʋn yetɩ, Abraham n yʋʋn looge sɛla tɩ a to'oge la pia pʋam ayɩla bɔ Amelkisedɛkɩ la, Alevi n de sɛka tɩ a buuri to'osrɩ pia pʋrɛ la mẽ bɔ ẽ mɛ.

¹⁰ Se'ere n soe la, Amelkisedɛkɩ n yʋʋn tʋ'ʋsɛ Abraham wakat-sɛka la, tɩ Alevi nãn boe la Abraham zɩɩm pʋam.

Azezi n de kãabgɔ kẽema wʋ Amelkisedɛkɩ la wakatɛ wuu ĩyã

¹¹ Lɔɔ la tɩ Nawẽnnɛ yʋʋn bɔ a nẽrba la ẽebɛ la Leviti dõma kãabgɔ tõoma la zuo. Leviti dõma kãabgɔ tõoma la yʋʋn ka tã wʋn basɛ tɩ sɛla woo masɛ ãna wʋ Nawẽnnɛ n boorɩ se'em na. A sãn tã nɩ, la ka le de nɩ tɩ kãabgɔ kẽema buuri ayẽma wa'am wʋ Amelkisedɛkɩ la dagna Aarõ buuri.

¹² Bɛla, kãabgɔ kẽma tõoma la sãn teege, dẽnɩ tɩ lɔɔ la mẽ teege.

¹³ Tɩ Zuudãana Azezi yelle tɩ ba tɔgrɩ la, de la buuri ayẽma nẽra, la buur-ẽŋa nẽra nẽra nãn ka tõm kãabgɔ kẽema tõoma.

¹⁴ La de la vẽelga tɩ tɩ Zuudãana la de la Azuda buuri nẽra, la Amoyisi n yʋʋn tɔgɛ kãabgɔ kẽma tõoma yelle la, a ka po tɔgɛ buur-ẽŋa yelle.

¹⁵ Kãabgɔ kẽema ayẽma n ãn wʋ Amelkisedɛkɩ n wa'am na n basɛ tɩ yetɔga la tɩ tõma tɔgrɩ la dɛna vẽelga.

¹⁶ A ka lebge kãabgɔ kẽema wʋ nẽrsaala dɔgʋm lɔɔ n dolɩ se'em na, la de la vɔm n ka sã'anɩ pãŋa n botɩ a lebge kãabgɔ kẽema.

¹⁷ Nawẽnnɛ gõŋɔ la yele yetɩ: «Fʋ de la kãabgɔ kẽema wakatɛ n ka ba'asrɩ ĩyã, wʋ Amelkisedɛkɩ n ãn se'em na.»

¹⁸ Bɛla tɩ kʋrʋm nõorɛ la n yele se'em na ka le tõnna, ẽn ka tarɩ pãŋa, dee ka tara yõorɔ la ĩyã.

¹⁹ Se'ere n soe la, Amoyisi lɔɔ la ka tã'agɛ basɛ tɩ sɛla sɛla masɛ wʋ Nawẽnnɛ n boorɩ se'em na. La lɛɛlɛ wã, Nawẽnnɛ ẽŋɛ la so-paalɛ, tɩ tõma n tarɩ pʋtẽ'erɛ gu'ura sɛla n ãn sõŋɔ gãnna la basɛ tɩ tõma lɛnna Nawẽnnɛ.

²⁰ La sɛla n pa'asɛ, Nawẽnnɛ yʋʋn pɔɩ mɛ. Leviti dõma n yʋʋn lebge kãabgɔ kẽma la, Nawẽnnɛ ka pɔɩ.

²¹ La Azezi n lebge kãabgɔ kẽema la, Nawẽnnɛ pɔɩ mɛ yetɩ: «Mam n de Zuudãana la pɔɩ mɛ, mam kãn viige m nõorɛ. Fʋ de la kãabgɔ kẽema wakatɛ n ka ba'asrɩ ĩyã.»

²² La de la bɛla tɩ Azezi basɛ tɩ tɩ mina sõŋa sõŋa, tɩ Nawẽnnɛ n bĩŋe a nõorɛ se'em la tõma la, n ãn sõŋa gãnna kʋrʋm nõorɛ la.

²³ Sɛla n le pa'asɛ, kʋrʋm kãabgɔ kẽma la yʋʋn zo'oge mɛ sɔɔsna taaba, se'ere n soe la, kũm n yʋʋn gu'uri ba tɩ ba ka tãna tõnna wakatɛ wuu.

²⁴ La Azezi vɔa la wakatɛ wuu, nẽra ka sɔɔrɩ a kãabgɔ kẽema tõoma la tõnna.

²⁵ La de la bɛla tɩ a tãna wʋn fãagɛ sɛba wuu n doose la ẽŋa lɛnna Nawẽnnɛ zẽ'am na, wakatɛ wuu ĩyã. Se'ere n soe la, a vɔa mɛ wakatɛ wuu yõkra Nawẽnnɛ sɩa bɔ'ɔra ba.

²⁶ La de la kãabgɔ kẽma nẽŋadãana n ãn wãna n masɛ tɩ tɩ tara: A de la pʋpeelem dãana, ka tara yelle, ka tara dõrga, a welge a mẽŋa mɛ la tõon-be'ero dõma, tɩ Nawẽnnɛ zẽkɛ ẽ sẽŋɛ saazuum-zuum.

²⁷ Ẽŋa ka ãn wʋ kãabgɔ kẽma nẽŋadõma basɛba la, tɩ daarɛ woo la dɛna ba dẽŋɛ kãabɛ ba mẽŋa tõon-be'ero ĩyã, dee yãŋa kãabɛ nẽrba tõon-be'ero ĩyã la. Ẽŋa dɩkɛ la a mẽŋa kãabɛ nõorɛ ayɩla mã'a bɔ nẽrba tõon-be'ero ĩyã.

²⁸ Amoyisi lɔɔ la yʋʋn loorɩ la nẽrsaalba pãŋa n pɔ'ɔgɛ tɩ ba dɛna kãabgɔ kẽma nẽŋadõma. La Nawẽnnɛ n bĩŋe a nõorɛ dee pɔɩ bɛla poorʋm na, a looge la a Dayʋa n masɛ sɛla woo pʋam wakatɛ n ka ba'asrɩ ĩyã.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ