အွန်လိုင်း သမ္မာကျမ်းစာ

Hiburuduma 2 - Farefare Ninkaré

Da zagsɛ-ya Nawẽnnɛ fãarɛ

¹ Bɛla n soe tɩ la masɛ tɩ tõma gʋrɛ yetɔga la tɩ tɩ wõm na sõŋa sõŋa, tɩ tɩ da bʋrgɛ.

² Malɛkadõma n yʋʋn tɔgɛ yetɔg-sɛba kʋrʋm na ẽŋɛ ba tõonɛ mɛ, nẽr-sɛba n sɩ'ɩsɛ ka sakɛ ba la, yẽ sɩbgrɛ sɛka n masɛ tɩ ba yẽ la mɛ.

³ La sãn dɛna bɛla, tõma sãn pɔ'ɔgɛ Nawẽnnɛ fãarɛ kãtɛ ẽna, tõma wʋn ẽŋɛ la wãne põsɛ sɩbgrɛ? Zuudãana mẽŋa n daan põn dẽŋɛ mõolɛ fãarɛ ẽŋa yelle, tɩ nẽr-sɛba n wõm na pa'alɛ tõma tɩ la de la sɩra.

⁴ Tɩ Nawẽnnɛ mẽŋa mẽ tõm tõon-yãlma, la yel-kɩrsɩ, la bõn-yãlma buuri wuu to'oto'ore, dee bɔ nẽrba a Sɩa pãŋa wʋ ẽn boorɩ se'em, pa'alɛ tɩ la de la sɩra.

Azezi n tarɩ fãarɛ wa'am

⁵ La dagɩ malɛkadõma tɩ Nawẽnnɛ yetɩ ba sɔna dũnia sɛka n sẽm tɩ tõma tɔgra a yelle la.

⁶ La nẽra n tɔgɛ Nawẽnnɛ gõŋɔ la pʋam zẽ'a ayẽma yetɩ: «Nẽrsaala de la bẽm tɩ fõn tẽra a yelle? Nẽrsaala bia de la bẽm tɩ fõn bɩsra a yelle?

⁷ Fõn basɛ mɛ tɩ a ka paagɛ malɛkadõma wakatɛ fẽe mã'a, dee yãŋa nã'asɛ ẽ, bɔ ẽ na'am pãŋa la pẽka.

⁸ Fõn basɛ mɛ tɩ a sɔna sɛla woo.» Lan yetɩ Nawẽnnɛ basɛ tɩ sɛla woo sakra nẽrsaala la, a ka basɛ tɩ sɛla weege ka sakra ẽ. La, lan de se'em na, tõma nãn ka yẽtɩ tɩ sɛla woo sakrɩ ẽ.

⁹ La tõma yẽ tɩ la de la Azezi tɩ Nawẽnnɛ sike tɩ a ka paagɛ malɛkadõma wakatɛ fẽfẽe, dee yãŋa nã'asɛ ẽ, bɔ ẽ na'am pãŋa la pẽka ẽn nãmsɛ ki la ĩyã. La de la Nawẽnnɛ yel-sõnnɛ ĩyã, tɩ a ki nẽrsaalba wuu ĩyã.

¹⁰ Nawẽnnɛ n de sɛka n basɛ tɩ sɛla woo bɔna, dɛna a bõnɔ na, la masɛ la ẽŋa yɛm n boorɩ se'em tɩ a botɩ Azezi nãmsɛ, ẽŋɛ sɛla woo ba'asɛ, fãagɛ nẽrba, tarɩ a kɔma zozo'e sẽŋɛ a na'am pãŋa zẽ'am.

¹¹ Azezi n malgrɩ nẽrba tɩ ba dɛna pʋpeelem dõma, la sɛba tɩ a malgɛ tɩ ba dɛna pʋpeelem dõma la lagɩm tara la Sɔ ayɩla. Bɛla n soe tɩ a ka zɔta yãnnɛ tɩ a wi ba tɩ a sɔbiisi.

¹² Bɛla tɩ a yele Nawẽnnɛ yetɩ: «Mam wʋn tɔgɛ fʋ yelle m sɔbiisi zẽ'am, mam wʋn nã'asɛ fɔ ba lagsgɔ zẽ'am.»

¹³ Dee le yetɩ: «Mam wʋn dɩkɛ m sɩra wuu bɔ la Nawẽnnɛ.» Dee ken yetɩ: «Mam n wãna, mam na kɔm-sɛba tɩ Nawẽnnɛ bɔ mam na.»

¹⁴ Kɔma la tɩ a tɔgrɩ la n de nẽrsaalba tara ĩyã la zɩɩm na, bɛla tɩ Azezi mẽ lebge nẽrsaala wʋ bãma la ki, tɩ a kũm na sã'am Asũtãana n de sɛka n basɛ tɩ nẽrba kiira la pãŋa.

¹⁵ La de la bɛla tɩ a ẽŋɛ fãagɛ sɛba tɩ kũm dabeem tarɩ ba botɩ ba ãna wʋ yamsɩ ba vɔm na wuu pʋam na basɛ.

¹⁶ La dagɩ malɛkadõma tɩ a wa'am tɩ a sõŋɛ, la de la Abraham yɩɩsɩ la tɩ a wa'am tɩ a sõŋɛ.

¹⁷ Bɛla n soe tɩ la daan masɛ tɩ a lebge nẽrsaala ãna wʋ a sɔbiisi la sɛla woo pʋam, tã'agɛ dɛna ba kãabgɔ kẽma nẽŋadãana n de ninbãal-zɔta, dee dɛna sɩra dãana Nawẽnnɛ tõoma pʋam. A ẽŋɛ la bɛla yese nẽrba tõon-be'ero, naagɛ ba la Nawẽnnɛ.

¹⁸ Azezi mẽŋa n daan yẽ nãmsgɔ wakatɛ sɛba tɩ Asũtãana makɛ ẽ bɩsɛ la, a tã wʋn sõŋɛ nẽr-sɛba n yẽtɩ nãmsgɔ la mɛ, bɔ ba pãŋa.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ