အွန်လိုင်း သမ္မာကျမ်းစာ

Galatɩ 3 - Farefare Ninkaré

Tɩn bɔ Nawẽnnɛ sɩra la ĩyã, tɩ tɩ masɛ a zẽ'am

¹ Yãma Galatɩ dõma, ãne n botɩ yãma zuto lebge tɩ ya ka tara yɛm? Mam daan pa'alɛ ya Krisi n ki dɔ-puurŋa zuo la yelle mɛ sõŋa sõŋa, tɩ la dɛna vẽelga bɔ ya.

² Mam boorɩ tɩ m soke ya la sokre ayɩla mã'a tɩ ya lerge mam: Yãma n to'oge Nawẽnnɛ Sɩa la, la de la yãma n sakrɩ ɩta lɔɔ la n yele se'em na ĩyã bɩɩ? Ayɛɩ, la de la yãma n wõm kõ-yẽlga la, bɔ Azezi-krisi sɩra la ĩyã.

³ Yãma yɛm na pɔ'ɔgɛ paagɛ la wãna? Yãma n pɔsɛ lebge Nawẽnnɛ nẽrba la a Sɩa pãŋa la, yãma yãŋa boorɩ tɩ ya ba'asɛ la ya mẽŋa pãŋa?

⁴ Yãma n yẽ se'em wuu la lebge la zãŋa bɩɩ? Dẽnɩ tɩ la da kãn lebge zãŋa.

⁵ Nawẽnnɛ n bɔ ya a Sɩa, dee ɩta bõn-yãlma ya tẽŋasʋka la, la dagɩ yãma n ɩtɩ lɔɔ n yele se'em na ĩyã, la de la yãma n wõm kõ-yẽlga la, bɔ Azezi-krisi sɩra la ĩyã.

⁶ Abraham zẽ'am la mẽ yʋʋn de la bɛla: La gʋlsɛ Nawẽnnɛ gõŋɔ pʋam yetɩ: «Abraham bɔ la Nawẽnnɛ sɩra, tɩ Nawẽnnɛ bɩsɛ ẽ yetɩ a masɛ ẽŋa zẽ'am.»

⁷ Bãŋɛ-ya tɩ nẽr-sɛba n bɔ Nawẽnnɛ sɩra la n sɩrɩ de Abraham yɩɩsɩ.

⁸ Nawẽnnɛ gõŋɔ la põn yele mɛ tɩ Nawẽnnɛ wʋn basɛ tɩ bu-zãŋsɩ masɛ a zẽ'am, ban bɔ ẽ sɩra la ĩyã. Nawẽnnɛ yʋʋn põn tɔgɛ kõ-yẽlga ẽŋa bɔ Abraham mɛ yetɩ: «Fõn ĩyã tɩ dũnia buuri wuu wʋn yẽ yel-sõnnɛ.»

⁹ La de la bɛla, Abraham n yʋʋn bɔ Nawẽnnɛ sɩra yẽ yel-sõnnɛ na, nẽr-sɛba n mẽ bɔ Nawẽnnɛ sɩra wʋn lagɩm na Abraham yẽ yel-sõnnɛ.

¹⁰ Nẽr-sɛba n te'ege lɔɔ la, kã'a-be'ero boe ba zuto, se'ere n soe la, la gʋlsɛ yetɩ: «Kã'a-be'ego boe nẽr-sɛka woo n ka ɩtɩ wʋ lan gʋlsɛ se'em wuu Nawẽnnɛ lɔɔ gõŋɔ pʋam na zuugo.»

¹¹ La de la vẽelga tɩ nẽra baa ayɩla ka tã wʋn yẽ bʋʋrɔ Nawẽnnɛ zẽ'am ẽn dolɩ lɔɔ la ĩyã, se'ere n soe la, la gʋlsɛ yetɩ: «Nẽra n bɔ Nawẽnnɛ sɩra masɛ a zẽ'am wʋn vɔa, ẽn bɔ ẽ sɩra la ĩyã.»

¹² Nẽra n dolɩ lɔɔ la, la dagɩ tɩ a bɔ la Nawẽnnɛ sɩra, bẽm ĩyã, la gʋlsɛ yetɩ: «Nẽr-sɛka n ɩtɩ lɔɔ la n yele se'em na, a wʋn vɔa bɛla ĩyã.»

¹³ La tõma n ka ẽŋɛ lɔɔ la n yele se'em na wuu ĩyã, Nawẽnnɛ kã'a-be'ego n boe tõma zuto. La Krisi n ki dɔ-puurŋa zuo la, a dɔkɛ kã'a-be'ego la tõma zuto mɛ, tɩ ẽŋa mẽŋa sɔɔgɛ tõma zẽ'am, tɩ kã'a-be'ego la bɔna a zuugo, se'ere n soe la, la gʋlsɛ yetɩ: «Kã'a-be'ego boe nẽr-sɛka tɩ ba yulse ẽ dɔɔgɔ zuo la zuugo.»

¹⁴ Krisi ẽŋɛ bɛla tɩ yel-sõnnɛ na tɩ Nawẽnnɛ bĩŋe nõorɛ tɩ a bɔ Abraham na, mẽ wʋn dɛna bu-zãŋsɩ bõnɔ, bãma n lagɩm na Azezi-krisi dɛna ayɩla la ĩyã, dee tɩ tõma mẽ to'oge Nawẽnnɛ Sɩa la tɩ a bĩŋe nõorɛ tɩ a bɔ tɔ, tõma n bɔ ẽ sɩra la ĩyã.

Lɔɔ la ka sã'am nõor-bĩŋre

¹⁵ M sɔbiisi, mam yetɩ m dɩkɛ la nẽrsaala yelle makɛ pa'alɛ ya. Nẽra sãn looge yɛm dee gʋlsɛ bĩŋe, tɩ la doose la tẽŋa la lɔɔ, nẽra nẽra ka tã wʋn sã'am ẽ, bɩɩ pa'asɛ sɛla mĩ.

¹⁶ Nawẽnnɛ yʋʋn bĩŋe nõorɛ bɔ la Abraham, la a yɩɩŋa. La ka gʋlsɛ yetɩ, a bĩŋe a nõorɛ bɔ la a yɩɩsɩ, wʋ la de la nẽrba zozo'e. La yetɩ, a yɩɩŋa, la de la nẽra ayɩla mã'a. Nẽr-ẽŋa de la Krisi.

¹⁷ Mam n yele se'em na võorɛ n wãna: La de tɩ Nawẽnnɛ n bĩŋe a nõorɛ la, yʋʋma kɔbsnaasɩ la pitã n tole dee tɩ a yãŋa bɔ a lɔɔ la. Bɛla lɔɔ la kãn yãŋɛ sã'am nõor-bĩŋre la tɩ a lebge zãŋa.

¹⁸ Se'ere n soe la, la sãn de nɩ na lɔɔ la dɔlga ĩyã tɩ nẽra wʋn to'oge sɛla sɔna, la ka le dɛna nõor-bĩŋre ĩyã. La, la de la Nawẽnnɛ n bĩŋe a nõorɛ la ĩyã, tɩ a ẽŋɛ Abraham yel-sõnnɛ.

¹⁹ La sãn dɛna bɛla, bẽm ĩyã tɩ Nawẽnnɛ yʋʋn bɔ lɔɔ la? A yʋʋn bɔ ẽ tɩ a botɩ nẽrba n bãŋɛ ba tõon-be'ero, halɩ ka paagɛ wakat-sɛka tɩ Abraham yɩɩŋa la wʋn wa wa'am, sɛka ĩyã tɩ a yʋʋn bĩŋe nõorɛ la. Malɛkadõma n yʋʋn to'oge lɔɔ la Nawẽnnɛ zẽ'am bɔ la, la doose la nẽra ayɩla n boe Nawẽnnɛ, la nẽrba tẽŋasʋka wẽ'era nu'ugo.

²⁰ Nẽra ka wẽ'erɩ nu'ugo la nẽra ayɩla mã'a. La Nawẽnnɛ de la a ayɩla mã'a, dee yʋʋn bĩŋe nõorɛ, tɩ nu'u-wẽ'era ka bɔna.

²¹ Bɛla, lɔɔ la sɩ'ɩsrɩ Nawẽnnɛ nõor-bĩŋre la mɛ bɩɩ? Ayɛɩ, la dagɩ bɛla baa fẽfẽe. Se'ere n soe la, lɔɔ sãn boe nɩ n tã wʋn botɩ nẽrba tara vɔm n ka ba'asrɩ, bɛla a ken tã nɩ wʋn basɛ tɩ nẽrba masɛ Nawẽnnɛ zẽ'am mɛ, ban sakrɩ lɔɔ la ĩyã.

²² La Nawẽnnɛ gõŋɔ la yetɩ, dũnia dõma wuu boe la tõon-be'ero nu'usum. La de la bɛla tɩ sɛba n bɔ Azezi-krisi sɩra la wʋn to'oge sɛla tɩ Nawẽnnɛ bĩŋe nõorɛ tɩ a bɔ ba, ban bɔ Azezi-krisi sɩra la ĩyã.

²³ Wakat-sɛka tɩ Azezi-krisi daan nãn ka wa'am tɩ nẽrba bɔ ẽ sɩra la, lɔɔ la lʋ tõma mɛ wʋ tõma boe la yʋ'a deem na, gu'ura halɩ tɩ Nawẽnnɛ wʋn wa puke Azezi-krisi tɩ tɩ wʋn bɔ sɩra la peelem.

²⁴ Bɛla lɔɔ la n yʋʋn de tõma gu'ura pa'ala tõma sore halɩ wa paam wakat-sɛka tɩ Krisi wa'am na, tɩ tõma wʋn dɛna nẽrba n masɛ Nawẽnnɛ nẽŋam, tõma n bɔ ẽ sɩra la ĩyã.

²⁵ La lɛɛlɛ wã tɩ Azezi-krisi wa'am tɩ tɩ bɔ ẽ sɩra la, lɔɔ la ka le dɛna tõma gu'ura.

²⁶ Yãma n bɔ Azezi-krisi sɩra la, ya wuu de la Nawẽnnɛ kɔma.

²⁷ Yãma wuu tɩ ba mise ya ko'om pʋam na, ya lagɩm na Krisi dɛna ayɩla, ãna wʋ ẽŋa n ãn se'em na.

²⁸ Yãma n lagɩm na Krisi la, bɔkrɛ ka le bɔna tɩ fʋ de la Zifu, bɩɩ bu-zãŋka, yamŋa bɩɩ nẽra n soe a mẽŋa, pɔka bɩɩ bʋraaga, ya wuu de la ayɩla.

²⁹ Yãma n lagɩm na Krisi la, ya de la Abraham yɩɩsɩ, wʋn to'oge sɛla tɩ Nawẽnnɛ bĩŋe nõorɛ tɩ a bɔ la.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ