အွန်လိုင်း သမ္မာကျမ်းစာ

« အရင်

နောက်တစ်ခု »

Azã 1 - Farefare Ninkaré

Nawẽnnɛ Dayʋa Azezi-krisi n de Yetɔga n bɔ'ɔrɩ nẽrsaalba vɔm

¹ Pĩ'iluŋo wakatɛ, Yetɔga la põn bɔna mɛ. La Yetɔga la yʋʋn boe la Nawẽnnɛ zẽ'am. Ẽŋa la Nawẽnnɛ de la bʋyɩla.

² A põn bɔna la Nawẽnnɛ zẽ'am pĩ'iluŋo wakatɛ.

³ Nawẽnnɛ la ẽŋa n yʋʋn nãam sɛla woo. Sɛla sɛla ka boe tɩ Nawẽnnɛ la ẽŋa ka nãam.

⁴ Ẽŋa n de vɔm dãana. La de la ẽŋa n botɩ nẽrsaalba yẽta peelem.

⁵ Peelem na nẽegɛ lika pʋam mɛ, la lika ka yãŋɛ kĩŋe ẽ.

⁶ Nawẽnnɛ daan tõm na nẽra ayɩla, a yʋ'ʋrɛ de la Azã.

⁷ A wa'am tɩ a tɔgɛ la peelem na yelle pa'alɛ nẽrba tɩ ba wuu wʋn tã'agɛ bɔ ẽ sɩra.

⁸ Azã mẽŋa dagɩ peelem na, la a wa'am tɩ a tɔgɛ la sɛka n de peelem na yelle pa'alɛ nẽrba.

⁹ Sɛka n de peelem sɩra sɩra la, ze'ele la Nawẽnnɛ zẽ'am wa'am dũnia zuo. Ẽŋa n nẽegɛ tɩ nẽrsaalba wuu yẽta peelem.

¹⁰ Sɛka n de peelem na daan wa bɔna la dũnia zuo. Nawẽnnɛ la ẽŋa n yʋʋn nãam dũnia. Baa la bɛla, nẽrsaalba ka boorɩ tɩ ba bãŋɛ ẽ.

¹¹ A daan wa'am na a mẽŋa tẽŋa pʋam, la a nẽrba la ka to'oge ẽ.

¹² La sɛba wuu n to'oge ẽ bɔ ẽ sɩra la, a bɔ ba nõorɛ mɛ tɩ ba lebge Nawẽnnɛ kɔma.

¹³ Ba ka lebge Nawẽnnɛ kɔma wʋ nẽrsaalba n dɔgrɩ se'em na, la ka de ĩyã n boorɩ se'em, bɩɩ nẽrsaala n boorɩ se'em. La de la Nawẽnnɛ mẽŋa n botɩ ba lebge a kɔma.

¹⁴ Sɛka n de Yetɔga la daan lebge la nẽrsaala, kẽ'era tõma tẽŋasʋka. Tõma yẽ a na'am pãŋa mɛ, na'am pãŋa n de Nawẽnnɛ Bi-yẽŋa n ze'ele a Sɔ zẽ'am na'am pãŋa. La Nawẽnnɛ yel-sõnnɛ, la a sɩra wuu boe la a zẽ'am.

¹⁵ La de la ẽŋa yelle tɩ Azã daan tɔgɛ ke'enke'em yetɩ: «Ẽna n de sɛka tɩ mam põn tɔgɛ a yelle yetɩ, nẽra ayẽma n boe mam poorʋm sẽna, ẽŋa gãnnɩ mam mɛ, se'ere n soe la, a dẽŋɛ mam mɛ bɔna.»

¹⁶ Ẽŋa n botɩ tõma wuu yẽta yel-sõnnɛ woo yel-sõnnɛ, ẽn ba tara Nawẽnnɛ yel-sõnnɛ na ĩyã.

¹⁷ Nawẽnnɛ bɔ a lɔɔ la Amoyisi, tɩ a bɔ tõma. La, la sãn dɛna Nawẽnnɛ yel-sõnnɛ, la a sɩra la, la doose la Azezi-krisi tɩ a bɔ tõma.

¹⁸ Nẽra nẽra nãn ka yẽ Nawẽnnɛ. La de la Nawẽnnɛ Bi-yẽŋa la n boe la ẽ lɛ n botɩ tõma bãŋɛ ẽ, ẽŋa la Nawẽnnɛ de la bʋyɩla.

Azã bɔ Azezi kaseto
( Amatie 3:1-12 , Amarkɩ 1:1-8 , Aluki 3:1-17 )

¹⁹ Azã n daan bɔ kaseto se'em n wãna: Zifdõma nẽŋadõma sɛba n kẽ'erɩ Zerizalɛm na daan tõm na ba kãabgɔ kẽma, la Leviti dõma tɩ ba sẽŋɛ Azã zẽ'am, ka soke ẽ yetɩ: «Fõn de la ãne?»

²⁰ Tɩ Azã tɔgɛ ba vẽelga yetɩ: «Mam dagɩ Krisi tɩ Nawẽnnɛ tõm na.»

²¹ Tɩ ba le soke ẽ yetɩ: «Fõn de la ãne? Fõn de la A'eli bɩɩ?» Tɩ a lerge ba yetɩ: «Mam dagɩ A'eli.» Tɩ ba le soke ẽ yetɩ: «Fõn de la Nawẽnnɛ nõtɔ'ɔsa la n yetɩ a wa'am na bɩɩ?» Tɩ a yetɩ: «Ayɛɩ.»

²² Tɩ ba le soke ẽ yetɩ: «Bɛla fõn de la ãne? Tɩ tɩ tarɩ fõn lerge se'em na, sẽŋɛ ka tɔgɛ pa'alɛ sɛba n tõm tõma la. Fõn mẽŋa yetɩ fõn de la ãne?»

²³ Ban soke ẽ bɛla la, tɩ Azã lerge ba yetɩ: «Mam de la sɛka n mõolɛ weem tɔgra ke'enke'em yetɩ: ‹Malgɛ-ya sore tɩ a dɛna tẽntẽa bɔ Zuudãana la› », wʋ Nawẽnnɛ nõtɔ'ɔsa A'ezayi n yʋʋn põn yele se'em na.

²⁴ Nẽr-sɛba n daan sẽŋɛ Azã zẽ'am na, Farisi dõma n daan tõm ba.

²⁵ Tɩ ba daan soke ẽ yetɩ: «Fõn sãn dagna Krisi la, bɩɩ A'eli, bɩɩ Nawẽnnɛ nõtɔ'ɔsa la, bẽm tɩ fõn misra nẽrba ko'om pʋam?»

²⁶ Tɩ Azã lerge ba yetɩ: «La sãn dɛna mam, mam misri ya la ko'om pʋam, la nẽra ayɩla n boe ya tẽŋasʋka tɩ ya ka mina ẽ.

²⁷ Ẽŋa wa bɔna la mam poorʋm, la mam ka masɛ tɩ m pirge a tagra.»

²⁸ Bõn-bãna wuu daan ẽŋɛ la Betani, Zʋrdẽ kʋlaa la doone, zẽ'e-sɛka tɩ Azã daan misri nẽrba ko'om pʋam na.

Azã pa'alɛ tɩ Azezi n de Nawẽnnɛ Pebila

²⁹ Tɩ beere wiige, tɩ Azã yẽ Azezi n sẽm a zẽ'am. Tɩ a yetɩ: «Bɩsɛ-ya, ẽna n de Nawẽnnɛ Pebila n yesrɩ nẽrsaalba tõon-be'ero basra.

³⁰ La de la ẽŋa yelle tɩ mam daan yele yetɩ: ‹Nẽra n wa bɔna mam poorʋm dɛna nẽr-keko gãnna mam na, se'ere n soe la, a dẽŋɛ mam mɛ bɔna.›

³¹ Mam daan ka mi ẽn de sɛka, la mam wa'am wa misra la nẽrba ko'om pʋam, tɩ m botɩ Ɩsrayɛlɩ dõma bãŋɛ ẽ.»

³² Azã le tɔgɛ yetɩ: «Mam yẽ tɩ Nawẽnnɛ Sɩa n ze'ele Nawẽnnɛ yire sigra ãna wʋ na'adawenne, wa zoole a zuo.

³³ La mam daan ka mi ẽ, la Nawẽnnɛ n tõm mam tɩ m mise nẽrba ko'om pʋam na, yele mam tɩ: ‹Fʋ sãn wa yẽ Nawẽnnɛ Sɩa n sige zoole sɛka zuo la, la de la ẽŋa n misri nẽrba Nawẽnnɛ Sɩa la pʋam.›

³⁴ La mam yẽ ẽ mɛ, bɔ kaseto yetɩ, ẽŋa n de Nawẽnnɛ Dayʋa la.»

Azezi pɔspɔsɩ karẽnbiisi

³⁵ Tɩ beere wiige, tɩ Azã daan le zɛ bilam la a karẽnbiisi bayi,

³⁶ yẽ Azezi n sẽnnɩ, tɩ a yetɩ: «Nawẽnnɛ Pebila la n wãna.»

³⁷ Tɩ a karẽnbiisi bayi la wõm ẽn yele se'em na, isge dɔla Azezi.

³⁸ Tɩ Azezi gelge yẽ ban dolɩ ẽ, soke ba yetɩ: «Yãma eerɩ la bẽm?» Tɩ ba soke ẽ yetɩ: «Rabi, fõn kẽ'erɩ la bɛ?» (Rabi võorɛ de la karẽnsãama.)

³⁹ Tɩ Azezi lerge ba yetɩ: «Wa'am-ya tɩ ya wʋn yẽ.» Tɩ ba doose sẽŋɛ ka yẽ ẽn kẽ'erɩ zẽ'a na, daan weege bɔna a zẽ'am daar-ẽŋa, la daan de wʋ wẽngɛlŋa karf-anaasɩ.

⁴⁰ Nẽrba bayi la n wõm Azã n tɔgɛ Azezi yelle se'em doose ẽ na, ayɩla yʋ'ʋrɛ de la A'ãndre, a de la Asimõ-pɩyɛɛrɩ yɩbga.

⁴¹ Tɩ A'ãndre dẽŋɛ sẽŋɛ ka yẽ a kẽema Asimõ-pɩyɛɛrɩ, yele ẽ yetɩ: «Tõma yẽ Mesi la. La boorɩ tɩ la yetɩ Krisi.» (A võorɛ de la sɛka tɩ Nawẽnnɛ looge.)

⁴² Tɩ a daan tarɩ Asimõ sẽŋɛ Azezi zẽ'am, tɩ Azezi bɩsɛ ẽ, dee yetɩ: «Fõn de la Azã bia Asimõ. Ba wʋn wi'ira fʋ tɩ Asefasɩ, bɩɩ Apɩyɛɛrɩ.» (A võorɛ de la tãmpĩa.)

Azezi wi Afilipi, la Anatanayɛlɩ

⁴³ Tɩ beere wiige, tɩ Azezi bɔɔra tɩ a sẽŋɛ Galile, yẽ Afilipi yele ẽ yetɩ: «Dɔla mam.»

⁴⁴ Afilipi ze'ele la Betisayida tẽŋa, A'ãndre la Apɩyɛɛrɩ mẽ ze'ele la bilam.

⁴⁵ Tɩ Afilipi sẽŋɛ ka yẽ Anatanayɛlɩ, yele ẽ yetɩ: «Tõma yẽ sɛka tɩ Amoyisi yʋʋn gʋlsɛ a yelle lɔɔ gõnnɔ pʋam, tɩ a yelle ken gʋlsɛ Nawẽnnɛ nõtɔ'ɔsrɩba gõnnɔ pʋam na. A de la Azezi n ze'ele Nazarɛtɩ tẽŋa, Azozɛfʋ dayʋa.»

⁴⁶ Tɩ Anatanayɛlɩ yele ẽ yetɩ: «Bõn-sõŋɔ tã wʋn ze'ele Nazarɛtɩ?» Tɩ Afilipi lerge ẽ yetɩ: «Yi wa'am wa bɩsɛ.»

⁴⁷ Tɩ Azezi yẽ Anatanayɛlɩ n sẽm a zẽ'am, tɩ a tɔgɛ a yelle yetɩ: «Ẽna de la Ɩsrayɛlɩ nẽra sɩra sɩra n ka tarɩ yelle.»

⁴⁸ Tɩ Anatanayɛlɩ yele ẽ yetɩ: «Fõn ẽŋɛ la wãne mina mam?» Tɩ Azezi lerge ẽ yetɩ: «Fõn boe kẽnkãŋa la tẽŋa, lan dẽŋɛ Afilipi n wʋn wi fʋ la, mam yẽ fʋ mɛ.»

⁴⁹ Tɩ Anatanayɛlɩ lerge ẽ yetɩ: «Karẽnsãama, fõn de la Nawẽnnɛ Dayʋa, la Ɩsrayɛlɩ dõma naba.»

⁵⁰ Tɩ Azezi yele ẽ yetɩ: «Mam n yele fõn tɩ mam yẽ fõn boe kẽnkãŋa tẽŋa la ĩyã, tɩ fʋ bɔ mam sɩra? Fʋ wʋn yẽ bõn-kãra n gãnnɩ bõn-bãna.»

⁵¹ Dee yele ẽ yetɩ: «Mam yetɩ ya la sɩra, tɩ ya wʋn yẽ Nawẽnnɛ yire n yo'oge, tɩ Nawẽnnɛ malɛkadõma zɔnna dee sigra Nẽrsaala Dayʋa la zuo.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ