Aromduma 8 - Farefare Ninkaré

Vɔm tɩ Nawẽnnɛ Sɩa bɔ'ɔrɩ

¹ Bɛla, sɩbgrɛ ka le bɔna nẽr-sɛba n lagɩm na Azezi-krisi dɛna ayɩla la zuto.

² Se'ere n soe la, Nawẽnnɛ Sɩa pãŋa n bɔ'ɔrɩ vɔm Azezi-krisi ĩyã la n fãagɛ tɔ tõon-be'ero, la kũm pãŋa pʋam.

³ Lɔɔ la ka tã wʋn fãagɛ nẽrsaalba basɛ, se'ere n soe la, nẽrsaalba ɩtɩ la ba mẽŋa n boorɩ se'em botɩ a ka tarɩ pãŋa. La sɛla tɩ lɔɔ la ka tã'agɛ ẽŋɛ la, Nawẽnnɛ ẽŋɛ mɛ. A tõm na a mẽŋa Dayʋa, tɩ a lebge nẽrsaala ãna wʋ nẽrsaalba n de tõon-be'ero dõma, tɩ a ki yese tõon-be'ero. A kũm na pʋam tɩ Nawẽnnɛ di tõon-be'ero sarɩya sã'am a pãŋa nẽrsaalba pʋam.

⁴ Nawẽnnɛ ẽŋɛ bɛla tɩ tɩ masɛ ɩta wʋ lɔɔ la n yetɩ se'em na, tõma n vɔa wʋ Nawẽnnɛ Sɩa n boorɩ se'em, dee ka vɔa wʋ nẽrsaalba mẽŋa n boorɩ se'em na.

⁵ Nẽr-sɛba n vɔa wʋ nẽrsaalba n boorɩ se'em na, nẽrsaalba mẽŋa yɛmleego n boorɩ se'em na n pakɛ ba. La nẽr-sɛba n vɔa wʋ Nawẽnnɛ Sɩa n boorɩ se'em na, Nawẽnnɛ Sɩa n boorɩ se'em na n pakɛ ba.

⁶ Nẽrsaala mẽŋa yɛmleego n boorɩ se'em, sẽm na kũm. La a sãn dɔla Nawẽnnɛ Sɩa n boorɩ se'em na, la bɔ'ɔrɩ la vɔm, la sũ-mã'asʋm.

⁷ Nẽra sãn dɔla nẽrsaalba mẽŋa n boorɩ se'em na, la de la be'em la Nawẽnnɛ, se'ere n soe la, nẽrsaala mẽŋa n boorɩ se'em na ka sakrɩ Nawẽnnɛ lɔɔ la, la a põn ka tãna wʋn sakɛ ẽ.

⁸ Nẽr-sɛba n dolɩ nẽrsaalba mẽŋa n boorɩ se'em na ka tã wʋn paagɛ Nawẽnnɛ yɛm.

⁹ La yãma ka le vɔa wʋ nẽrsaalba mẽŋa n boorɩ se'em na, yãma vɔa wʋ Nawẽnnɛ Sɩa n boorɩ se'em na, Nawẽnnɛ Sɩa n boe la yãma la ĩyã. Nẽr-sɛka woo n ka tarɩ Krisi Sɩa la, a ka de Krisi nẽra.

¹⁰ La Krisi sãn bɔna la ya, Nawẽnnɛ Sɩa la bɔ'ɔrɩ ya la vɔm, Nawẽnnɛ n botɩ ya masɛ a zẽ'am na ĩyã. La ya ĩyã wʋn ki mɛ tõon-be'ero ĩyã.

¹¹ La Nawẽnnɛ n vo'oge Azezi la, a Sɩa la sãn bɔna la ya lɛ, ẽŋa n vo'oge Azezi-krisi n ki la, wʋn botɩ a Sɩa n boe la ya lɛ la, mẽ bɔ ya ĩyã n kiiri la vɔm paalga.

¹² Bɛla, m sɔbiisi, la de la pẽrgrɛ tɩ tɩ vɔa wʋ Nawẽnnɛ Sɩa n boorɩ se'em na, la dagɩ tɩ vɔa wʋ tɩ mẽŋa yɛmleego n boorɩ se'em na.

¹³ Ya sãn ɩta nẽrsaalba mẽŋa n boorɩ se'em na, ya wʋn ki mɛ. La ya sãn botɩ Nawẽnnɛ Sɩa pãŋa kʋ tõon-sɛba tɩ nẽrsaala mẽŋa boorɩ la, ya wʋn vɔa.

¹⁴ Nẽr-sɛba wuu n dolɩ sore tɩ Nawẽnnɛ Sɩa pa'alɩ ba la, de la Nawẽnnɛ kɔma.

¹⁵ Nawẽnnɛ Sɩa la tɩ a bɔ ya la ka botɩ ya dɛna yamsɩ, le zɔta dabeem. A botɩ ya dɛna la Nawẽnnɛ kɔma, tɩ a bɔ sore tɩ ya wi'ira Nawẽnnɛ yetɩ: «Abba», n boorɩ tɩ la yetɩ «tɩ Sɔ».

¹⁶ Nawẽnnɛ Sɩa la mẽŋa tɔgrɩ la tõma sɩa pa'ala yetɩ tõma de la Nawẽnnɛ kɔma.

¹⁷ Tõma n de a kɔma la, tɩ wʋn po to'oge bõn-sõma sɛba tɩ a bĩŋe tɩ a bɔ a kɔma la, tɩ wʋn lagɩm na Krisi po to'oge bõn-sɛba tɩ a wʋn to'oge la. Tõma n nãmsrɩ la Krisi lɛ la, tɩ mẽ wʋn po lagɩm na ẽ yẽ nã'asgɔ.

Nã'asgɔ sɛka n boe nẽŋa

¹⁸ Mam mi mɛ tɩ nãmsgɔ sɛba tɩ tõma tarɩ zĩna wã de la fẽe, ka tã wʋn dɩkɛ makɛ la nã'asgɔ sɛka tɩ tõma wʋn wa yẽ la.

¹⁹ Bɛla n soe tɩ sɛla wuu tɩ Nawẽnnɛ nãam na gu'ura bɔɔra tɩ ba yẽ Nawẽnnɛ kɔma nã'asgɔ n wʋn puke la tɔtɔ.

²⁰ Nawẽnnɛ n nãam bõn-sɛba la wuu lebge la sɛla n ka le tara võorɛ. La dagɩ ba mẽŋa n boorɩ bɛla, la de la Nawẽnnɛ n botɩ ba lebge bɛla, dee botɩ ba ken tara pʋtẽ'erɛ gu'ura

²¹ tɩ Nawẽnnɛ wʋn fãagɛ ba sã'aŋɔ tɩ ba boe a pʋam na mɛ, tɩ ba to'oge ba mẽŋa, lagɩm na Nawẽnnɛ kɔma po yẽ nã'asgɔ.

²² Tɩ mi tɩ halɩ wa paam zĩna, bõn-nãanɩsɩ la nãmsrɩ mɛ õosra la toogo, wʋ pɔka n virgri la.

²³ La, la dagɩ bõn-nãanɩsɩ la mã'a, tõma mẽŋa tɩ Nawẽnnɛ dẽŋɛ bɔ tɩ a Sɩa pa'alɛ tɩ tɩ wʋn yẽ nã'asgɔ la, nãmsrɩ mɛ tɩ sũure pʋam gu'ura wakat-sɛka tɩ Nawẽnnɛ wʋn fãagɛ tɩ ba'asɛ tɩ tɩ dɛna a kɔma.

²⁴ Se'ere n soe la, tõma yẽ fãarɛ mɛ, la tõma ken tara la pʋtẽ'erɛ gu'ura. La fʋ sãn yẽ sɛla tɩ fʋ tarɩ pʋtẽ'erɛ gu'ura la, fʋ ka le tara pʋtẽ'erɛ gu'ura. Ãne n tarɩ pʋtẽ'erɛ gu'ura sɛla tɩ a yẽ?

²⁵ La tõma n tarɩ pʋtẽ'erɛ gu'ura sɛla tɩ tõma nãn ka yẽ la, tõma mã'agɛ la tɩ mẽŋa gu'ura ẽ.

²⁶ Bɛla mẽ, Nawẽnnɛ Sɩa la sẽnnɩ sõŋra tõma mɛ tɩ tɔrgɔ pʋam. Se'ere n soe la, tõma ka mi tõma n wʋn pʋ'ʋsɛ Nawẽnnɛ se'em tɩ la masɛ. La Nawẽnnɛ Sɩa mẽŋa sosrɩ Nawẽnnɛ bɔ'ɔra tõma mɛ, tɔgra yetɔga tɩ nẽra ka tã wʋn tɔgɛ.

²⁷ La Nawẽnnɛ n mi nẽrba sũure la, mi sɛla tɩ Sɩa la boorɩ mɛ. Se'ere n soe la, Sɩa la sosrɩ bɔ'ɔra Nawẽnnɛ nẽrba, wʋ Nawẽnnɛ n boorɩ se'em na.

²⁸ Tɩ mi tɩ sɛla woo pʋam, Nawẽnnɛ ɩtɩ sõŋa bɔ'ɔra la nẽr-sɛba n nõŋɛ ẽ, sɛba tɩ a looge ba, masɛ wʋ ẽn looge yɛm se'em na.

²⁹ Nẽr-sɛba tɩ Nawẽnnɛ põn dẽŋɛ looge la, a põn dẽŋɛ looge la yɛm tɩ ẽŋa wʋn botɩ ba ãna wʋ a Dayʋa la, tɩ a Dayʋa la wʋn dɛna kẽema a sɔbiisi zozo'e zẽ'am.

³⁰ La nẽr-sɛba ĩyã tɩ a põn dẽŋɛ looge yɛm na, a wi ba mɛ. La sɛba tɩ a wi ba la, a botɩ ba masɛ mɛ a zẽ'am. Ẽn botɩ sɛba masɛ a zẽ'am na, a bɔ ba la nã'asgɔ.

Sɛla ka boe n wʋn welge tõma la Nawẽnnɛ nõŋlʋm

³¹ Bɛla tɩ wʋn yetɩ bẽm? Nawẽnnɛ sãn bɔna la tõma, ãne n tã wʋn zɛbɛ la tõma?

³² Nawẽnnɛ ka basɛ a mẽŋa Dayʋa la tɩ a põsɛ kũm. A basɛ mɛ tɩ ba kʋ ẽ tõma wuu ĩyã. A wʋn ẽŋɛ la wãne kãn bɔ tõma sɛla wuu la a Dayʋa la?

³³ Ãne n wʋn tã'agɛ dõrɛ nẽr-sɛba tɩ Nawẽnnɛ looge la? La de la Nawẽnnɛ mẽŋa n botɩ ba masɛ.

³⁴ Ãne n wʋn di ba sarɩya sɩbgɛ ba? Nẽra ka boe. Azezi-krisi ki mɛ, dee vo'oge, sẽŋɛ ka zẽa Nawẽnnɛ zʋʋgɔ, sɔsra tõma ĩyã.

³⁵ Ãne n wʋn welge tõma la Krisi nõŋlʋm na? Toogo bɩɩ, sũ-sã'aŋɔ bɩɩ, nãmsgɔ bɩɩ, kɔm bɩɩ, nõŋɔ bɩɩ, yel-pakrɛ bɩɩ, bɩɩ kũm n wʋn yãŋɛ welge tõma? Sɛla ka boe.

³⁶ La de wʋ lan gʋlsɛ Nawẽnnɛ gõŋɔ pʋam yetɩ: «Nawẽnnɛ, fõn doosgo ĩyã tɩ tõma põsra tɩ yõorɛ daarɛ woo. Ba ɩtɩ tõma wʋ piisi tɩ ba tarɩ sẽnna kɔɔrna.»

³⁷ La yel-bãma wuu pʋam, sɛka n nõŋɛ tõma la n bɔ'ɔrɩ tõma pãŋa tɩ tõma yãŋra.

³⁸ Mam mi sɩra sɩra, tɩ sɛla sɛla ka boe n wʋn yãŋɛ welge tõma la Nawẽnnɛ nõŋlʋm. La sãn dɛna kũm, bɩɩ vɔm, bɩɩ malɛkadõma, bɩɩ pãnsɩ dõma, bɩɩ ke'eŋo dõma, bɩɩ sɛla n boe lɛɛlɛ wã, bɩɩ sɛla n sẽm,

³⁹ bɩɩ bõn-sɛba n tarɩ pãŋa saazuum, bɩɩ sɛla n tarɩ pãŋa tẽŋa, bõn-nãanɩŋa baa ayɩla ka tã wʋn welge tõma la Nawẽnnɛ nõŋlʋm tɩ a nõŋɛ tõma tɩ Zuudãana Azezi-krisi ĩyã la.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ