Aromduma 3 - Farefare Ninkaré

¹ La sãn dɛna bɛla, Zifdõma tarɩ zu-yẽlga la bẽm pʋam gãnna sɛba n dagɩ Zifdõma, la wãaga la yõorɔ de la bẽm?

² Yõorɔ la zo'oge mɛ. Pɔspɔsɩ, Nawẽnnɛ dɩkɛ a yetɔga ẽŋɛ la Zifdõma nu'usum.

³ La ba nẽrba basɛba sãn dagna sɩra dõma, bɛla wʋn botɩ Nawẽnnɛ kãn dɛna sɩra dãana mɛ bɩɩ?

⁴ Ayɛɩ, la dagɩ bɛla. Baa nẽrba wuu sãn dɛna põmpɔrndõma, Nawẽnnɛ ken dɛna la sɩra dãana wʋ lan gʋlsɛ yetɩ: «Fʋ yetɔga pʋam, nẽrba mi tɩ fõn masɛ mɛ dɛna sɩra dãana. Nẽrba sãn zɛrgɛ fɔ, fõn tarɩ bʋʋrɔ mɛ.»

⁵ La tõma n ɩtɩ sɛla n ka masɛ la sãn botɩ nẽrba bãŋɛ tɩ Nawẽnnɛ masɛ sɛla woo pʋam, tɩ wʋn yetɩ bẽm? Tɩ wʋn yetɩ Nawẽnnɛ tõoma ka masɛ, ẽn sɩbgrɩ tɩ la ĩyã bɩɩ? Ayɛɩ, la dagɩ bɛla. Mam tɔgrɩ wʋ nẽrsaalba n tẽ'esrɩ se'em na.

⁶ Nawẽnnɛ sãn dagna sɩra dãana, a kãn yãŋɛ nɩ dita dũnia nẽrba sarɩya.

⁷ La mam põmpɔrŋɔ sãn botɩ Nawẽnnɛ sɩra pukra pa'asra, tɩ la dɛna nã'asgɔ bɔ'ɔra Nawẽnnɛ, bẽm tɩ ba wʋn di mam sarɩya tɩ mam de la tõon-be'ero dãana?

⁸ La sãn dɛna bɛla, bẽm tɩ tɩ kãn yetɩ: «Tɩ ɩta be'em tɩ la botɩ sɛla n de sõŋa wa'am?» Nẽrba basɛba dõtɩ mam tɩ mam n yele bɛla. Nawẽnnɛ wʋn di nẽr-bãma sarɩya wʋ lan masɛ.

Nẽra ka boe n masɛ Nawẽnnɛ zẽ'am

⁹ Bɛla, tõma Zifdõma gãnnɩ nẽr-sɛba n dagɩ Zifdõma la mɛ bɩɩ? Ayɛɩ! La dagɩ bɛla. Mam dẽŋɛ põn yele tɩ Zifdõma, la sɛba n dagɩ Zifdõma, tõma wuu boe la tõon-be'ero yamnɛ pʋam,

¹⁰ wʋ lan gʋlsɛ Nawẽnnɛ gõŋɔ pʋam yetɩ: «Nẽra ka boe n masɛ, baa ayɩla.

¹¹ Nẽra ka boe n tarɩ yɛm ɛɛra tɩ a bãŋɛ Nawẽnnɛ, baa ayɩla.

¹² Nẽrba wuu bure la poore bɔ Nawẽnnɛ, ba wuu tuuge mɛ. Nẽra ka boe n ɩtɩ sõŋa, baa ayɩla.

¹³ Ba nõa ãn wʋ yɔɔgɔ n vuke. Ba tarɩ ba zɩlɩsɩ la pã'asra la nẽrba. Ba nõorɛ yetɔga ãn wʋ bõnsɛla zẽlõm na.

¹⁴ Ba nõa pɩrɛ la kã'a-be'ero, la yetɔg-be'ero.

¹⁵ Ba ka yagsnɩ la nẽrba kʋa.

¹⁶ Ban doose zẽ'e-sɛka woo tole, la de la sã'aŋɔ, la toogo tɩ ba basrɩ mĩ.

¹⁷ Ba ka mi sũ-mã'asʋm sore.

¹⁸ Ba nẽnsɩ ka boe tɩ ba zoe Nawẽnnɛ.»

¹⁹ Tõma mi tɩ sɛla wuu tɩ lɔɔ la yetɩ la, a yetɩ la sɛba n dolɩ ẽ na. Bɛla tɩ nẽrba wuu nõa wʋn mũm, tɩ ba wʋn bãŋɛ tɩ ba koŋe Nawẽnnɛ zẽ'am.

²⁰ Se'ere n soe la, nẽra ka boe n tã wʋn sakɛ lɔɔ la n yele se'em na, masɛ Nawẽnnɛ zẽ'am. Lɔɔ la wen botɩ nẽra bãŋra mɛ tɩ a de la tõon-be'ero dãana.

Nawẽnnɛ n botɩ nẽrba masɛ a zẽ'am se'em

²¹ La lɛɛlɛ wã Nawẽnnɛ puke pa'alɛ ẽŋa n ɩtɩ se'em botɩ nẽrba masɛ a zẽ'am, tɩ lɔɔ la nẽŋa ka bɔna mĩ. Lɔɔ gõnnɔ, la Nawẽnnɛ nõtɔ'ɔsrɩba dẽŋɛ põn tɔgɛ a yelle mɛ.

²² La de la nẽra n bɔ Azezi-krisi sɩra ĩyã, tɩ Nawẽnnɛ botɩ a masɛ a zẽ'am. A ɩtɩ bɛla bɔ'ɔra la nẽr-sɛba wuu n bɔ Azezi-krisi sɩra la, bɔkrɛ ka boe.

²³ Se'ere n soe la, nẽrsaalba wuu tõm na tõon-be'ero koŋe Nawẽnnɛ nã'asgɔ.

²⁴ La Nawẽnnɛ yel-sõnnɛ na ĩyã, a botɩ ba masɛ a zẽ'am na zãŋa, Azezi-krisi n fãarɩ ba tõon-be'ero pʋam na ĩyã.

²⁵ Nawẽnnɛ n looge Azezi tɩ a ki, tɩ a zɩɩm yese la ĩyã, a wʋn basɛ nẽr-sɛba n bɔ ẽ sɩra la tõon-be'ero taalɛ. Bɛla Nawẽnnɛ pa'alɛ tɩ ẽŋa masɛ mɛ dɛna sɩra dãana. Kʋrʋm, Nawẽnnɛ mã'agɛ la a sũure ka sɩbgɛ nẽrsaalba ba tõon-be'ero la ĩyã.

²⁶ A ẽŋɛ bɛla tɩ a pa'alɛ lɛɛlɛ wã tɩ ẽŋa de la sɩra dãana, ẽŋa mẽŋa masɛ mɛ, dee botɩ nẽr-sɛba n bɔ Azezi sɩra la masɛ ẽŋa zẽ'am.

²⁷ Bɛla, bẽm pʋam tɩ nẽra tã wʋn wẽ yõ'ogɔ? Sɛla ka boe. Bẽm ĩyã? La dagɩ nẽra n sakrɩ lɔɔ la ĩyã tɩ a masɛ, la de la ẽn bɔ Azezi-krisi sɩra ĩyã.

²⁸ Tõma yẽ tɩ la de la nẽra n bɔ Krisi sɩra ĩyã tɩ a masɛ Nawẽnnɛ zẽ'am, la dagɩ ẽn sakrɩ lɔɔ la ĩyã.

²⁹ Bɩɩ Nawẽnnɛ de la Zifdõma mã'a Nawẽnnɛ? A ka po dɛna nẽr-sɛba n dagɩ Zifdõma la Nawẽnnɛ? A po dɛna la sɛba n dagɩ Zifdõma la Nawẽnnɛ.

³⁰ Nawẽnnɛ de la ayɩla, a wʋn botɩ Zifdõma masɛ a zẽ'am, ban bɔ sɩra ĩyã, dee botɩ sɛba n dagɩ Zifdõma la mẽ masɛ a zẽ'am, ban bɔ sɩra ĩyã.

³¹ Tõma n yetɩ nẽra n bɔ sɩra ĩyã n botɩ a masɛ la, bɛla boorɩ tɩ la yetɩ bɔ sɩra ĩyã lɔɔ la ka le tara võorɛ mɛ bɩɩ? Ayɛɩ, la dagɩ bɛla. Tõma pa'alɛ tɩ lɔɔ la tarɩ võorɛ mɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ