အွန်လိုင်း သမ္မာကျမ်းစာ

Amatie 9 - Farefare Ninkaré

Azezi botɩ kɔɔrŋɔ yẽ ĩmã'asʋm
( Amarkɩ 2:1-12 , Aluki 5:17-26 )

¹ Azezi daan kẽ õorŋɔ lebe dooge la mõgrɛ la ke bɔba kule Kapɛrnaʋm, ẽn kẽ'erɩ zẽ'a la.

² Tɩ nẽrba basɛba zɛ bʋraa ayɩla n de kɔɔrŋɔ n gã a bõn-gã'ala pʋam wa'am a zẽ'am. Tɩ Azezi yẽ ban bɔ ẽ sɩra la, yele kɔɔrŋɔ la yetɩ: «M bia, keŋe fʋ sũure, fʋ tõon-be'ero taalɛ ka le bɔna fʋ zuo.»

³ Tɩ lɔɔ karẽnsãandõma basɛba tẽ'esra ba sũure pʋam yetɩ: «Bʋra-ẽna pɔ'ɔrɩ la Nawẽnnɛ.»

⁴ La Azezi mi ban tẽ'esrɩ se'em na mɛ, tɩ a yele ba yetɩ: «Bẽm tɩ yãma tẽ'esra pʋtẽ'e-be'ero ya sũure pʋam?

⁵ Bẽm n de nãana gãnna? Mam sãn yele bʋraa la yetɩ, a tõon-be'ero taalɛ ka le bɔna a zuo, bɩɩ mam sãn yele ẽ yetɩ, a isge sẽnna n de nãana gãnna?

⁶ Mam wʋn botɩ ya bãŋɛ tɩ Nẽrsaala Dayʋa tarɩ nõorɛ dũnia zuo wʋn basɛ tõon-be'ero taalɛ.» Azezi yele bɛla, dee yele kɔɔrŋɔ la yetɩ: «Isge, dɩkɛ fʋ bõn-gã'ala la kule.»

⁷ Tɩ a isge kule.

⁸ Tɩ nẽr-kʋʋŋɔ la yẽ bɛla, tɩ dabeem yõkɛ ba, tɩ ba nã'asra Nawẽnnɛ ẽn bɔ nẽrsaalba nõor-ẽŋa la ĩyã.

Azezi wi Amatie tɩ a dɔla ẽ
( Amarkɩ 2:13-17 , Aluki 5:27-32 )

⁹ Azezi daan ze'ele la bilam sẽnna tɔlla, yẽ bʋraa yʋ'ʋrɛ n de Amatie n zĩ tɔ'ɔsra lampo. Tɩ a yele ẽ yetɩ: «Isge dɔla mam.» Tɩ Amatie isge dɔla ẽ.

¹⁰ Tɩ Azezi sẽŋɛ ka zẽa Amatie yire dita, tɩ lampo-tɔ'ɔsrɩba, la tõon-be'ero dõma zozo'e wa'am wa lagɩm na Azezi la a karẽnbiisi la zẽa dita.

¹¹ Tɩ Farisi dõma yẽ bɛla, soke a karẽnbiisi la yetɩ: «Bẽm tɩ yãma karẽnsãama la lagɩm na lampo-tɔ'ɔsrɩba, la tõon-be'ero dõma dita.»

¹² Tɩ Azezi wõm bɛla, yele ba yetɩ: «Sɛba n tarɩ ĩmã'asʋm ka eerɩ tɩba, la de bã'adõma n eerɩ tɩba.

¹³ Sẽŋɛ-ya ka zãsʋm Nawẽnnɛ gõŋɔ n yele se'em na võorɛ, Nawẽnnɛ yetɩ: ‹Mam boorɩ tɩ nẽrsaalba zɔta la taaba ninbãalga, dee dagɩ tɩ ba dɩkɛ ba bõnɔ kãabra bɔ'ɔra mam.› Bɛla, mam ka wa'am tɩ m wi sɛba dõma n yetɩ bãma masɛ mɛ na, mam wa'am na tõon-be'ero dõma ĩyã.»

Ba soke Azezi nõorlʋa yelle
( Amarkɩ 2:18-22 , Aluki 5:33-39 )

¹⁴ Tɩ Azã karẽnbiisi wa'am Azezi zẽ'am wa soke ẽ yetɩ: «Bẽm tɩ tõma la Farisi dõma lʋta nõorɛ, dee tɩ fõn karẽnbiisi la ka lʋta?»

¹⁵ Tɩ Azezi yele ba yetɩ: «Nẽra sãn di pɔka ẽŋɛ kibsa wi a tadãandõma tɩ ba wa'am naagɛ la ẽ dita, ba tã wʋn ẽŋɛ sũ-sã'aŋɔ wakat-sɛka tɩ pɔgdita la ken bɔna la ba lɛ mɛ bɩɩ? Ayɛɩ. La dabsa sẽm mɛ, tɩ ba wʋn yese pɔgdita la ba zẽ'am. Bɛla tɩ ba yãŋa wʋn lʋ nõorɛ.

¹⁶ Nẽra kãn dɩkɛ tãn-paalga lige fu-kɛka. A sãn ẽŋɛ bɛla, tãn-paalga la wʋn botɩ fu-kɛka la ãagɛ mɛ gãŋɛ bɛla.

¹⁷ La nẽra kãn dɩkɛ dã-paalga sũm wɔ-kɛgsɩ pʋam. A sãn ẽŋɛ bɛla, dã-paalga la sãn kɛlla, ba wʋn botɩ wɔɔsɩ la tãsɛ mɛ, tɩ dãam na ka'agɛ, tɩ wɔɔsɩ la mẽ sã'am. La masɛ tɩ ba dɩkɛ dã-paalga sũm na wɔ-paalsɩ pʋam, bɛla tɩ ba wuu kãn sã'am.»

Pɔka n yẽ ĩmã'asʋm, la pugla vo'ore yelle
( Amarkɩ 5:21-43 , Aluki 8:40-56 )

¹⁸ Azezi n ken tɔgra la ba bɛla la, tɩ Zifdõma nẽŋadãana ayɩla wa'am a zẽ'am, wa ka dũma tẽŋa a nẽŋam yele yetɩ: «Mam pɔyʋa n ki lɛɛlɛ wã, wa'am wa dɩkɛ fʋ nu'ugo paglɛ a zuo, tɩ a vo'oge.»

¹⁹ Tɩ Azezi la a karẽnbiisi la daan isge dɔla ẽ wɛ'ɛsa.

²⁰ Ban daan we'esɩ la, tɩ pɔka ayɩla n luti sɩkẽŋa yʋʋma pia la ayi tɩ la ka gɔ'ɔra, wa'am Azezi poorʋm wa kalʋm a fuugo nõorɛ.

²¹ Se'ere n soe la, a daan tẽ'esrɩ a sũurum yetɩ: «Mam sãn kalʋm a fuugo mã'a, mam wʋn yẽ ĩmã'asʋm.»

²² Tɩ Azezi gelge yẽ ẽ, yele ẽ yetɩ: «M bia, keŋe fʋ sũure! Fõn bɔ mam sɩra la n basɛ tɩ fʋ yẽ ĩmã'asʋm.» Tɩ pɔka la yẽ ĩmã'asʋm bilam mẽŋa.

²³ Tɩ Azezi paagɛ Zifdõma nẽŋadãana la yire yẽ wɩ-pɛɛbrɩba la nẽr-kʋʋŋɔ n bɔgrɩ.

²⁴ Tɩ a yele ba yetɩ: «Yese-ya, tɩ pugla la ka ki, a gĩsri mɛ.» Tɩ nẽrba la la'ara ẽ.

²⁵ La ẽn botɩ nẽr-kʋʋŋɔ la yese la, a kẽ la deem gʋrɛ pugla la nu'ugo, tɩ a isge.

²⁶ Tɩ yel-ẽna saagɛ tẽŋa la wuu.

Azezi botɩ fɔɔsɩ bayi yẽta

²⁷ Azezi daan yese zẽ'e-ẽŋa mɛ fõrgra, tɩ fɔɔsɩ bayi dɔla ẽ tɔgra ke'enke'em yetɩ: «Adavidi yɩɩŋa, zoe tɩ ninbãalga!»

²⁸ Tɩ Azezi paagɛ kẽ yire, tɩ fɔɔsɩ la paagɛ a zẽ'am, tɩ a soke ba yetɩ: «Yãma bɔ sɩra tɩ mam wʋn tã'agɛ ẽŋɛ yan boorɩ se'em na?» Tɩ ba lerge yetɩ: «Ẽe! Zuudãana.»

²⁹ Tɩ a kalʋm ba nini dee yetɩ: «La wʋn ẽŋɛ wʋ yan bɔ sɩra se'em na.»

³⁰ Tɩ ba nini na pike yẽta. Tɩ a kã'an ba yetɩ: «Da basɛ-ya tɩ nẽra bãŋɛ.»

³¹ La ban fõrgɛ la, ba mõolɛ bõn-ẽŋa mɛ tẽŋa la zẽ'a woo.

Azezi botɩ muko tɔgra

³² Ban daan yesrɩ la, tɩ ba tarɩ nẽra tɩ kʋlkã'arga dolɩ ẽ, tɩ a dɛna muko, wa'am Azezi zẽ'am.

³³ Tɩ Azezi dige kʋlkã'arga la, tɩ a yese. Tɩ muko la tɔgra. Tɩ la di'ige nẽr-kʋʋŋɔ la, tɩ ba yetɩ: «Nẽra nẽra nãn ka yẽ wãna buuri Ɩsrayɛlɩ pʋam.»

³⁴ La Farisi dõma daan yetɩ: «La de la kʋlkã'arsɩ naba n bɔ ẽ pãŋa, tɩ a tara digra kʋlkã'arsɩ la.»

Azezi zoe nẽr-kʋʋŋɔ ninbãalga

³⁵ Azezi daan kaarɩ la tẽn-kãra la tẽn-pɩgsɩ wuu, zãsna nẽrba Zifdõma wẽndeto pʋam, mõola Nawẽnnɛ so'olʋm kõ-yẽlga, dee botɩ bã'adõma, la kobro buuri wuu yẽta ĩmã'asʋm.

³⁶ La Azezi n yẽ nẽr-kʋʋŋɔ la, ba ninbãalga n yõkɛ ẽ. Se'ere n soe la, ba targɛ mɛ bãlɛ, ãna wʋ piisi n ka tarɩ dũnsĩina.

³⁷ Tɩ a yele a karẽnbiisi la yetɩ: «Va'am na bõnkɔɔla lagsgɔ zo'oge mɛ, la tõntõnɩba n wʋn lagsɛ bõnkɔɔla la pɔ'ɔrɩ mɛ.

³⁸ Bɛla ĩyã, sose-ya va'am na dãana tɩ a tõm tõntõnɩba pa'asɛ tɩ ba lagsɛ bõnkɔɔla la.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ