Amatie 7 - Farefare Ninkaré

Da zɛrgra-ya taaba

¹ «Da zɛrgra-ya taaba, tɩ Nawẽnnɛ mẽ da zɛrgɛ ya.

² Se'ere n soe la, yan wʋn zɛrgɛ nẽrba se'em na, Nawẽnnɛ mẽ wʋn zɛrgɛ ya la bɛla. La sɛla tɩ ya dɩkɛ makɛ bɔ nẽrba la, ẽŋa tɩ Nawẽnnɛ wʋn dɩkɛ makɛ bɔ ya.

³ Bẽm tɩ fʋ bɩsra sɔkɔ n boe fʋ sɔbia nifum, dee ka bɩsra dɔɔgɔ n boe fʋ mẽŋa nifum na?

⁴ Fõn ẽŋɛ la wãne yɛta fʋ sɔbia yetɩ, a basɛ tɩ fʋ yese sɔkɔ a nifum, dee tɩ dɔɔgɔ bɔna fõn mẽŋa nifum?

⁵ Pʋlibsum dãana, dẽŋɛ yese dɔɔgɔ la fʋ mẽŋa nifum, dee yãŋa tã'agɛ yẽ sõŋa yese sɔkɔ la n boe fʋ sɔbia nifum na.

⁶ Da dɩkɛ-ya Nawẽnnɛ bõn-sõma bɔ baasɩ, la ya da dɩkɛ sɛla n tarɩ yõorɔ zozo'e lobge kurkurdõma nẽŋam, tɩ ba wʋn nẽ ba mɛ la ba nãma, dee tɩ baasɩ la wẽrgɛ dõn ya zõrzõrʋm.»

Azezi zãsʋm pʋ'ʋsgɔ yelle

⁷ «Sose-ya Nawẽnnɛ, tɩ a wʋn bɔ ya. Ɛ-ya, tɩ ya wʋn yẽ. Wẽ-ya kʋlɩŋa, tɩ a wʋn yo'oge bɔ ya.

⁸ Se'ere n soe la, nẽr-sɛka woo n sosrɩ Nawẽnnɛ, a wʋn bɔ ẽ. La nẽr-sɛka woo n eerɩ, wʋn yẽ. La nẽr-sɛka n wẽ'erɩ kʋlɩŋa, ba wʋn yo'oge bɔ ẽ.

⁹ Ãne n boe yãma pʋam tɩ a bia wʋn sose ẽ borborɩ, tɩ a bɔ ẽ kugre?

¹⁰ Bɩɩ a sãn sose zũfo, tɩ a bɔ ẽ bõnsɛla?

¹¹ Yãma nẽrsaalba n de tõon-be'ero dõma la sãn mina tɩ ya bɔ ya kɔma bõn-sõma, ya Sɔ Nawẽnnɛ n boe saazuum kãn bɔ yãma sɛba n sosrɩ ẽ na bõn-sõma n gãnnɩ bɛla?

¹² Yãma n boorɩ tɩ nẽrba ɩta se'em bɔ'ɔra ya la, yãma mẽ ɩta bɛla bɔ'ɔra ba. Ẽna de la Nawẽnnɛ lɔɔ, la a nõtɔ'ɔsrɩba n gʋlsɛ se'em n bɛla.»

Sorɔɔrɔ bayi yelle

¹³ «Doose-ya zanõrɛ n ãn mika kẽ, se'ere n soe la, zanõ-yalŋa, la so-kãtɛ la we'esɩ la sã'aŋɔ zẽ'am, la nẽrba zozo'e dolɩ la bilam.

¹⁴ La zanõ-mika, la so-bãalga we'esɩ la vɔm zẽ'am. La de la nẽrba fẽe n dolɩ ẽ.»

Tɩa woo la a biɛ

¹⁵ «Guuse ya mẽŋa la nẽr-sɛba n parnɩ tɩ bãma de la Nawẽnnɛ nõtɔ'ɔsrɩba la. Ba wʋn ẽŋɛ ba mẽŋa wʋ saasaadõma n dɩkɛ piisi gãna fʋrɛ ba mẽŋa wa'am ya zẽ'am wʋ ba de la piisi la, dee tɩ ba pʋam ba sã'ana wʋ saasaadõma la.

¹⁶ Ba tõoma pʋam tɩ ya wʋn bãŋɛ ba. Bẽm ĩyã, zãaŋa ka tã wʋn wɔm tã'ama, la kẽkɔ ka tã wʋn wɔm kẽnkãma.

¹⁷ Tɩ-sõŋɔ woo wɔnnɩ na biɛ sõma, la tɩ-be'ego woo wɔnnɩ na biɛ be'ero.

¹⁸ Tɩ-sõŋɔ ka tã wʋn wɔm biɛ be'ero, la tɩ-be'ego mẽ ka tã wʋn wɔm biɛ sõma.

¹⁹ Tɩ-sɛka woo n ka wɔnnɩ biɛ sõma, ba wʋn lʋbɛ ẽ mɛ yõ la bugum.

²⁰ Bɛla, la de la nẽrba la tõoma pʋam tɩ yãma wʋn bãŋɛ ban de nẽr-sɛba.»

Nẽr-sɛba n sakrɩ Nawẽnnɛ asɩra sɩra

²¹ Azezi daan le yele yetɩ: «Dagɩ nẽr-sɛka woo n wi'iri mam tɩ ‹Zuudãana, Zuudãana› la n wʋn kẽ Nawẽnnɛ so'olʋm pʋam. La de la nẽr-sɛka n ɩtɩ mam Sɔ Nawẽnnɛ n boe saazuum n boorɩ se'em na n wʋn kẽ.

²² Sarɩyadia daarɛ, nẽrba zozo'e wʋn yele mam yetɩ: ‹Zuudãana, Zuudãana, tõma daan dɩkɛ la fõn yʋ'ʋrɛ to'oge Nawẽnnɛ yetɔga tɔgɛ bɔ nẽrba. La fõn yʋ'ʋrɛ tɩ tõma daan dɩkɛ dige kʋlkã'arsɩ, dee daan tõm tõon-yãlma zozo'e la fõn yʋ'ʋrɛ.›

²³ La mam wʋn yele ba yetɩ: ‹Mam põn ka mina ya, sẽŋɛ-ya fõrgɛ, tõon-be'ero dõma wã.› »

Deto bayi mẽa makrɛ

²⁴ «Nẽr-sɛka woo n wõm mam yetɔga wã, dee ẽŋɛ wʋ yetɔga la n yele se'em na, a dãana ãn wʋ yɛm dãana n mẽ a yire tãmpĩa zuo.

²⁵ Tɩ saaga ni, tɩ ko'om pɩrɛ kʋlsɩ zoe wẽ ẽ, tɩ kʋsebgo vuge wẽ ẽ, tɩ a ka lui, se'ere n soe la, a mẽ la tãmpĩa zuo.

²⁶ La nẽr-sɛka woo n wõm mam yetɔga wã, dee ka sakɛ ɩta yetɔga la n yele se'em na, a ãn wʋ yalma n mẽ a yire tẽntõnbĩ'isgo zuo.

²⁷ Tɩ saaga ni, tɩ ko'om pɩrɛ kʋlsɩ zoe wẽ ẽ, tɩ kʋsebgo vuge wẽ ẽ, tɩ a wuu lui saam saam.»

²⁸ La Azezi n tɔgɛ yetɔga la kɩ'ɩlɩm na, zãsŋɔ la di'ige nẽrba la zozo'e mɛ.

²⁹ Se'ere n soe la, a zãsŋɔ la tarɩ la pãŋa, la ka ãn wʋ ba lɔɔ karẽnsãandõma n zãsnɩ se'em na.