Amatie 3 - Farefare Ninkaré

Azã mõolɩ Nawẽnnɛ yetɔga, dee misri nẽrba ko'om pʋam
( Amarkɩ 1:1-8 , Aluki 3:1-18 , Azã 1:19-28 )

¹ Bɛla wẽnnɛ tɩ Azã n misri nẽrba ko'om pʋam na, wa sẽŋɛ Zude weem ka mõola

² yetɩ: «Teege-ya yɛm basɛ tõon-be'ero, tɩ Nawẽnnɛ so'olʋm lɛm mɛ.»

³ La de la Azã yelle tɩ Nawẽnnɛ nõtɔ'ɔsa A'ezayi daan gʋlsɛ yetɩ: «Nẽra ayɩla n boe weem mõola ke'enke'em yetɩ: ‹Malgɛ-ya sore sõŋa gu'ura Zuudãana. Malgɛ-ya sɔa la tɩ ba tɔ tẽntẽesɩ bɔ ẽ.› »

⁴ Azã daan yɛ la fuugo n de yʋgnɛ kõbrɔ, dɩkɛ sagãnnɛ lʋ a sɩa. A dia daan de la saniiro la seero.

⁵ Tɩ nẽrba daan ze'ele Zerizalɛm, la Zude so'olʋm wuu, la tẽn-sɛba n lɛm kʋlaaga yʋ'ʋrɛ n de Zʋrdẽ la wuu sẽnna a zẽ'am,

⁶ tɔgra ba tõon-be'ero pa'ala ẽ, tɩ a misra ba Zʋrdẽ ko'om na pʋam.

⁷ La Azã yẽ la Farisi dõma, la Saduse dõma zozo'e n sẽm a zẽ'am tɩ a mise ba ko'om pʋam, tɩ a yele ba yetɩ: «Yãma ãn wʋ kãmpẽesɩ buuri, ãne n pa'alɛ ya tɩ ya tã wʋn zoe põsɛ Nawẽnnɛ sɩbgrɛ n sẽm na?

⁸ Tõm-ya tõon-sɛba n pa'alɩ tɩ ya teege yɛm basɛ tõon-be'ero.

⁹ La ya da tẽ'esra tɩ Abraham n de ya yaaba la, ya wʋn põsɛ Nawẽnnɛ sɩbgrɛ la mɛ. Mam yetɩ ya mɛ tɩ Nawẽnnɛ tã wʋn dɩkɛ kuga wã botɩ ba lebge Abraham yɩɩsɩ mɛ.

¹⁰ Nẽra n põn tara lɩa a nu'usum tɩ a lʋbɛ tɩɩsɩ. Tɩ-sɛka woo n ka wɔnnɩ biɛ sõma, a wʋn lʋbɛ ẽ mɛ, lobge bugum pʋam, tɩ bugum di ẽ.

¹¹ Mam misri ya la ko'om pʋam tɩ la pa'alɛ tɩ ya teege yɛm basɛ tõon-be'ero. La sɛka n boe mam poorʋm sẽna la pãŋa gãnnɩ mam mɛ. La mam põn ka masɛ tɩ m pirge a tagra. Ẽŋa n wʋn mise ya Nawẽnnɛ Sɩa, la bugum pʋam.

¹² Ẽŋa wʋn welge nẽrba wʋ nẽra n zãlɩ pɩ'ɩgɔ a nu'usum tɩ a vaagɛ a si zɛɛŋa yeele, ẽŋɛ a bãarɛ pʋam dee yõ urgo la, la bugum n ka kĩŋri.»

Azezi ko'om misga
( Amarkɩ 1:9-11 , Aluki 3:21-22 )

¹³ Azezi daan ze'ele la Galile wa'am Zʋrdẽ Azã zẽ'am tɩ a mise ẽ ko'om pʋam.

¹⁴ Tɩ Azã daan zagsɛ, dee yetɩ: «La de nɩ na mam n wʋn wa'am fõn zẽ'am tɩ fõn mise mam, tɩ fõn sẽna mam zẽ'am?»

¹⁵ Tɩ Azezi lerge ẽ yetɩ: «Basɛ tɩ la ẽŋɛ bɛla lɛɛlɛ wã, tɩ la de la bɛla tɩ tɩ wʋn ẽŋɛ lan masɛ Nawẽnnɛ n boorɩ se'em na wuu.» Azezi n yele bɛla la, tɩ Azã sakɛ

¹⁶ mise ẽ, tɩ a dɔɔra. Haya, tɩ saazuum yo'oge, tɩ a yẽ Nawẽnnɛ Sɩa n signi a zuo wʋ na'adawenne.

¹⁷ Tɩ kõa ze'ele Nawẽnnɛ yire yetɩ: «Ẽna de la mam Dayʋa tɩ mam nõŋɛ la m sũure wuu, a paagɛ la mam yɛm.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ