Amatie 28 - Farefare Ninkaré

Azezi vo'ore

¹ Zifdõma vo'osgo daarɛ n daan tole, tɩ beere wiige Lasrɩ daarɛ bulika yʋ'ʋŋɔ yʋ'ʋŋɔ, tɩ Amaari n ze'ele Magdala, la Amaari ayẽma isge sẽŋɛ tɩ ba ka bɩsɛ yɔɔgɔ la.

² Tɩ tẽŋa daan mĩim zozo'e, tɩ Zuudãana Nawẽnnɛ malɛka ze'ele saazuum sigum wa bilge kugre la bĩŋe kẽnkɛrŋa zẽa a zuo.

³ A nẽŋa daan yẽgrɩ wʋ sa-yãka. Tɩ a futo pelge ãna yɩlɩ yɩlɩ.

⁴ Tɩ dabeem yõkɛ sɛba n gu'uri yɔɔgɔ la. Tɩ ba gõgra dee ãna wʋ ba ki mɛ na.

⁵ Tɩ malɛka la yele pɔgsɩ la yetɩ: «Da zoe-ya dabeem, mam mi tɩ ya eerɩ la Azezi tɩ ba ka dɔ-puurŋa zuo kʋ la.

⁶ A ka boe kalam. A vo'oge mɛ wʋ ẽn daan yele se'em na. Wa'am-ya wa bɩsɛ ban daan bĩŋe ẽ zẽ'e-sɛka la,

⁷ dee sẽŋɛ-ya tɔtɔ ka yele a karẽnbiisi la yetɩ, a vo'oge mɛ. La a wʋn dẽŋɛ ya nẽŋa sẽŋɛ Galile. Bilam tɩ ya wʋn ka yẽ ẽ. Sɛla tɩ mam tarɩ tɩ m yele ya n bɛla.»

⁸ Tɩ pɔgsɩ la fõrgɛ yɔɔm na tɔtɔ la dabeem, dee tara sũ-yẽlga zozo'e, zɔta wɛ'ɛsa tɩ ba ka yele Azezi karẽnbiisi la sɛla n ẽŋɛ la.

⁹ Tɩ Azezi darɛ tʋ'ʋsɛ pʋ'ʋsɛ ba. Tɩ ba lɛm ẽ ka dũma tẽŋa a nẽŋam gʋrɛ a nãma nã'asɛ ẽ.

¹⁰ Tɩ Azezi yele ba yetɩ: «Da zoe-ya dabeem, sẽŋɛ-ya ka yele m sɔbiisi la yetɩ, ba sẽŋɛ Galile, tɩ la de la bilam tɩ ba wʋn yẽ mam.»

¹¹ Pɔgsɩ la n daan boe sore wɛ'ɛsa la, tɩ sɛba n gu'uri yɔɔgɔ la nẽrba basɛba sẽŋɛ tẽŋa pʋam ka tɔgɛ pa'alɛ kãabgɔ kẽma nẽŋadõma bõn-sɛba wuu n ẽŋɛ la.

¹² Tɩ kãabgɔ kẽma nẽŋadõma, la tẽŋa la kẽma la lagsɛ kʋ nõorɛ ayɩla, bɔ sʋdaasɩ la ligri zozo'e,

¹³ dee yele ba yetɩ: «Yele-ya nẽrba la yetɩ, yʋ'ʋŋɔ tɩ yãma gã gĩsra dee tɩ Azezi karẽnbiisi la wa'am wa zũ kũm na.

¹⁴ La gɔmna la sãn wõm bɛla, tõma wʋn tɔgɛ la ẽ lɛ, yese ya yelle la pʋam.»

¹⁵ Tɩ sʋdaasɩ la to'oge ligri la, dee ẽŋɛ wʋ ban yele ba se'em na. Tɩ yetɔg-ẽŋa saagɛ Zifdõma la tẽŋasʋka halɩ wa paam zĩna.

Azezi puke a mẽŋa pa'alɛ a karẽnbiisi

¹⁶ Karẽnbiisi pia la ayɩla la daan sẽŋɛ la Galile, ka zom tãn-sɛka tɩ Azezi bɔ ba nõorɛ yetɩ ba sẽŋɛ la zuo.

¹⁷ La ba yẽ ẽ mɛ, ka dũma tẽŋa a nẽŋam nã'asɛ ẽ, la basɛba daan sẽ'enɩ mɛ.

¹⁸ Tɩ Azezi lɛm ba, yele ba yetɩ: «Nawẽnnɛ bɔ mam pãŋa wuu n boe saazuum, la tẽŋa wã zuo mɛ.

¹⁹ Bɛla, sẽŋɛ-ya dũnia wuu ka botɩ nẽrba buuri wuu lebge mam karẽnbiisi. Mise-ya ba ko'om pʋam, la Sɔ Nawẽnnɛ, la a Dayʋa, la a Sɩa yʋ'ʋrɛ.

²⁰ La ya zãsʋm ba tɩ ba sakɛ bõn-sɛba wuu tɩ mam bɔ ya nõorɛ tɩ ya ɩta la. La bãŋɛ-ya tɩ mam boe la ya mɛ wakatɛ wuu, halɩ tɩ la ka paagɛ dũnia ba'asgɔ.»