အွန်လိုင်း သမ္မာကျမ်းစာ

« အရင်

နောက်တစ်ခု »

Amatie 27 - Farefare Ninkaré

Ba tarɩ Azezi sẽŋɛ gɔmna Apilatɩ zẽ'am
( Amarkɩ 15:1 , Aluki 23:1-2 , Azã 18:28-32 )

¹ Beere n daan wiige bulika, tɩ kãabgɔ kẽma nẽŋadõma, la tẽŋa la kẽma la wuu lagsɛ tɔgɛ kʋ yetɩ ba kʋ Azezi.

² Tɩ ba lʋ ẽ tarɩ sẽŋɛ Apilatɩ n de gɔmna zẽ'am ka bɔ ẽ.

Azudaasɩ kũm
( Tõoma 1:18-19 )

³ Azudaasɩ n de sɛka n daan pa'alɛ tɩ ba yõkɛ Azezi la, n yẽ tɩ ba tɔgɛ Azezi yelle kʋ yetɩ ba kʋ ẽ na, a sũure sã'am mɛ. Tɩ a tarɩ lig-kõba pitã la sẽŋɛ tɩ a ka lebse kãabgɔ kẽma nẽŋadõma, la tẽŋa la kẽma la,

⁴ dee yetɩ: «Mam ẽŋɛ la be'em, mam n pa'alɛ tɩ ba yõkɛ sɛka n ka ẽŋɛ be'em tɩ ba kʋ ẽ na.» Tɩ ba yele ẽ yetɩ: «La ka pakɛ tõma. La de la fõn yelle.»

⁵ Tɩ Azudaasɩ dɩkɛ ligri la lobge Wẽnde-kãtɛ la pʋam, dee sẽŋɛ ka pire mĩ'isi ki.

⁶ Tɩ kãabgɔ kẽma la dɩkɛ ligri la yetɩ: «Ba de la zɩɩm ligri, la ka masɛ tɩ tɩ dɩkɛ ba naagɛ la Wẽnde-kãtɛ la ligri.»

⁷ Tɩ ba bãm, dɩkɛ ligri la da yagba va'am tɩ a dɛna sãama laarɛ zẽ'am.

⁸ Bɛla n soe tɩ ba ken wi'ira zẽ'e-ẽŋa tɩ zɩɩm va'am, halɩ wa paam zĩna.

⁹ La de la bɛla tɩ Nawẽnnɛ nõtɔ'ɔsa Azeremi n yʋʋn gʋlsɛ se'em na ẽŋɛ. A yʋʋn yetɩ: «Ba dɩkɛ la lig-kõba pitã, lig-sɛba tɩ Ɩsrayɛlɩ dõma sakɛ tɩ ba dɩkɛ da ẽ na,

¹⁰ ba dɩkɛ la bãma da yagba va'am wʋ Zuudãana Nawẽnnɛ n yele mam se'em na.»

Ba tɔgɛ kʋ yetɩ ba kʋ Azezi
( Amarkɩ 15:2-20 , Aluki 23:3-5 , 13-25 , Azã 18:33—19:16 )

¹¹ Ban daan tarɩ Azezi sẽŋɛ gɔmna la zẽ'am na, tɩ a soke ẽ yetɩ: «Fõn de la Zifdõma naba?» Tɩ Azezi lerge ẽ yetɩ: «La de la fõn yele se'em na.»

¹² La kãabgɔ kẽma nẽŋadõma, la tẽŋa la kẽma daan dõrɛ ẽ mɛ, tɩ a ka lerge se'ere.

¹³ Tɩ Apilatɩ yele ẽ yetɩ: «Fõn ka wõm ban tɔgrɩ se'em wuu dõta fɔ?»

¹⁴ Tɩ Azezi ka lerge yetɔga la baa ayɩla, tɩ la di'ige gɔmna la halɩ zozo'e.

¹⁵ La Zɔɔg-basɛ kibsa wakatɛ woo gɔmna la ẽn yese la nẽra ayɩla yʋ'a deem basɛ, nẽr-sɛka tɩ nẽr-kʋʋŋɔ la boorɩ.

¹⁶ La wakat-ẽŋa bibɛ'a ayɩla n daan boe yʋ'a deem, tɩ a yʋ'ʋrɛ dɛna Abarabasɩ, tɩ nẽrba wuu mina a yelle.

¹⁷ Tɩ nẽr-kʋʋŋɔ la n lagsɛ la, tɩ Apilatɩ soke ba yetɩ: «Ãne tɩ yãma boorɩ tɩ m yese basɛ bɔ ya, Abarabasɩ bɩɩ Azezi tɩ ba wi'iri tɩ Krisi la?»

¹⁸ Apilatɩ daan mi tɩ la de la sũure ĩyã tɩ ba yõkɛ Azezi wa bɔ ẽŋa.

¹⁹ La Apilatɩ n daan zĩ sarɩyadia zẽ'am na, tɩ a pɔga tõm tɩ ba wa yele ẽ yetɩ: «Yese fʋ nu'ugo pʋpeelem dãana la yelle pʋam, se'ere n soe la, mam zãasʋm mɛ a yelle yʋ'ʋŋɔ, tɩ la nãmsɛ mam zozo'e.»

²⁰ La kãabgɔ kẽma nẽŋadõma, la tẽŋa la kẽma daan yele nẽrba la mɛ tɩ ba sose Apilatɩ tɩ a basɛ Abarabasɩ bɔ ba, dee kʋ Azezi.

²¹ Tɩ gɔmna la le soke ba yetɩ: «Nẽr-bãna bayi wã, yãma boorɩ tɩ m basɛ la ãne bɔ ya?» Tɩ ba lerge yetɩ: «Abarabasɩ.»

²² Tɩ a soke ba yetɩ: «Bɛla, yãma boorɩ tɩ m ẽŋɛ Azezi tɩ ba wi'iri tɩ Krisi la, la wãne?» Tɩ ba wuu lerge yetɩ: «Ka ẽ dɔ-puurŋa zuo.»

²³ Tɩ a soke ba yetɩ: «A ẽŋɛ la bẽm n de be'em?» Tɩ ba malɩn tɔgra ke'enke'em yetɩ: «Ka ẽ dɔ-puurŋa zuo.»

²⁴ La Apilatɩ n yẽ tɩ ẽŋa kãn yãŋɛ ẽŋɛ sɛla, dee tɩ nẽrba la gita pa'asra la, tɩ a dɩkɛ ko'om peege a nu'usi nẽr-kʋʋŋɔ la wuu nẽŋam, dee yele yetɩ: «Mam nẽŋa ka boe ẽna wã kʋa pʋam. La de la yãma yelle.»

²⁵ Tɩ nẽr-kʋʋŋɔ la wuu lerge yetɩ: «A kʋa la taalɛ bɔna tõma la tɩ kɔma zuto.»

²⁶ Tɩ Apilatɩ basɛ Abarabasɩ bɔ ba, dee botɩ ba wẽ Azezi la ka'asa, dee dɩkɛ ẽ bɔ tɩ ba ka ka ẽ dɔ-puurŋa zuo.

²⁷ Tɩ gɔmna la sʋdaasɩ tarɩ Azezi kẽ gɔmna la yire, tɩ sʋdaasɩ wuu lagsɛ kaagɛ ẽ.

²⁸ Tɩ ba yɛɛsɛ Azezi futo, dee yɛ ẽ fuugo n de gomusga,

²⁹ dɩkɛ gõ'osɩ wʋgɛ mũŋa vuge ẽ, dɩkɛ dasaarɛ zãntɛ a zʋʋgɔ nu'ugo, yãŋa ka dũma tẽŋa a nẽŋam la'ara ẽ yetɩ: «Zifdõma naba, naa!»

³⁰ La ba daan tʋbsrɩ la nõtõorʋm ɩta ẽ, dee tɔ'ɔsra dasaarɛ la wẽ'era a zuugo.

³¹ La ban la ẽ kɩ'ɩlɩm na, ba yɛɛgɛ gomusga fuugo la mɛ, dee dɩkɛ a mẽŋa fuugo la lebe yɛ ẽ, tara ẽ wɛ'ɛsa tɩ ba ka ka dɔ-puurŋa zuo.

Ba ka Azezi dɔ-puurŋa zuo
( Amarkɩ 15:21-32 , Aluki 23:26-43 , Azã 19:17-27 )

³² Ban daan ze'ele tẽŋa pʋam yɛsra la, ba tʋ'ʋsɛ la bʋraaga ayɩla yʋ'ʋrɛ n de Asimõ n ze'ele Sirɛnɩ, tɩ ba pẽrgɛ ẽ tɩ a to'oge Azezi kũm dɔ-puurŋa la buke.

³³ Tɩ ba paagɛ zẽ'a tɩ ba wi'iri a yʋ'ʋrɛ tɩ Golgota, a võorɛ de la zuwaŋrɛ zẽ'a,

³⁴ dɩkɛ dãam n gaam na tɩɩm n ãn toogo bɔ Azezi tɩ a yũ. Tɩ a leme ba, zagsɛ ka yũ.

³⁵ Tɩ ba daan ka ẽ dɔ-puurŋa zuo, dee dɩkɛ a futo tɩ ba pʋɩ la taaba, pɔsɛ tɩ ba bãŋɛ nẽra woo n wʋn to'oge sɛka.

³⁶ Dee yãŋa zẽa gu'ura ẽ.

³⁷ Ba daan gʋlsɛ la gʋlsgɔ pa'alɛ se'ere n soe tɩ ba kʋ ẽ, lablɛ a zuum dɔ-puurŋa la zuo. Ba daan gʋlsɛ yetɩ: «Ẽna de la Azezi n de Zifdõma naba la.»

³⁸ Ba daan tarɩ la fãarba bayi wa po ka dɔ-puursi zuto, ayɩla Azezi zʋʋgɔ bɔba, ayẽma a gɔbga bɔba.

³⁹ Tɩ sɛba n dolɩ bilam tɔlla la, lɔbra ba zuto dee tʋʋra ẽ

⁴⁰ yetɩ: «Dagɩ fõn daan yetɩ fõn wʋn wõrgɛ Wẽnde-kãtɛ la, dee le mẽ ẽ dabsa atã pʋam? Fʋ sãn sɩrɩ dɛna la Nawẽnnɛ Dayʋa, fãagɛ fʋ mẽŋa ze'ele dɔ-puurŋa la zuo sige.»

⁴¹ Kãabgɔ kẽma nẽŋadõma, la lɔɔ karẽnsãandõma, la tẽŋa la kẽma mẽ daan tʋʋrɩ ẽ mɛ yetɩ:

⁴² «A daan fãagrɩ nẽrba basɛba mɛ, dee ka tãna wʋn fãagɛ a mẽŋa. A sãn dɛna Ɩsrayɛlɩ dõma naba, a ze'ele dɔ-puurŋa la zuo sige nãnannɛ wã, tɩ tõma wʋn bɔ ẽ sɩra.

⁴³ A te'ege Nawẽnnɛ mɛ yetɩ ẽŋa de la Nawẽnnɛ Dayʋa, Nawẽnnɛ sãn nõŋɛ ẽ, a fãagɛ ẽ lɛɛlɛ wã.»

⁴⁴ Tɩ fãarba la tɩ ba ka dɔ-puursi zuto lɛm ẽ na mẽ tɔgra ẽ be'em.

Azezi kũm
( Amarkɩ 15:33-41 , Aluki 23:44-49 , Azã 19:28-30 )

⁴⁵ La daan pɔsɛ la wʋntɛɛŋa zuu-tẽŋasʋka, tɩ tẽŋa la wuu lebge lika tarɩ ka paagɛ zaanõorɛ karf-atã.

⁴⁶ Karf-atã la wakatɛ tɩ Azezi tɔgɛ ke'enke'em yetɩ: «Eli, Eli, lama sabaktani.» La võorɛ de la: «Mam Wẽnnaam, mam Wẽnnaam, bẽm tɩ fõn basɛ mam?»

⁴⁷ Tɩ sɛba n ze lɛm bilam na basɛba wõm bɛla, yetɩ: «A wi'iri la A'eli.»

⁴⁸ Tɩ ba nẽra ayɩla zoe sẽŋɛ ka dɩkɛ nẽtɩŋa lʋsɛ dã-mĩ'isgo pʋam zẽkɛ la dɔɔgɔ bɔ ẽ tɩ a yũ.

⁴⁹ Tɩ sɛba yetɩ: «Basɛ tɩ gu bɩsɛ A'eli la sãn wʋn wa'am wa fãagɛ ẽ.»

⁵⁰ Tɩ Azezi le kaasɛ ke'enke'em, dee ki.

⁵¹ Tɩ fuugo la n yuli Wẽnde-kãtɛ la pʋam beŋe zẽ'e-sõŋɔ la ãagɛ pʋsʋka saazuum halɩ ka paagɛ tẽŋa. Tɩ tẽŋa mĩim, tɩ tãmpĩisi wõrɛ.

⁵² Tɩ yɔɔrɔ be'ese, tɩ pʋpeelem dõma zozo'e n yʋʋn ki vo'oge.

⁵³ Tɩ Azezi n wa vo'oge la, tɩ ba ze'ele yɔɔrɔ pʋam yese kẽ Zerizalɛm, tɩ nẽrba zozo'e yẽ ba.

⁵⁴ La Rom sʋdaasɩ kɛ'ɛma, la sʋdaasɩ la n ze gu'ura Azezi la n yẽ tẽŋa la n mĩim, la bõn-sɛba n ẽŋɛ la, dabeem n yõkɛ ba zozo'e, tɩ ba yetɩ: «A sɩrɩ de la Nawẽnnɛ Dayʋa.»

⁵⁵ La pɔgsɩ zozo'e n daan ze zãazãarɛ dee bɩsra, ba daan ze'ele la Galile doose Azezi tɩ ba sõŋra ẽ.

⁵⁶ Amaari n ze'ele Magdala, la Amaari n de Azakɩ la Azozɛfʋ ma, la Azebede dayɔɔsɩ la ma n daan boe pɔg-bãma pʋam.

Azezi laarɛ
( Amarkɩ 15:42-47 , Aluki 23:50-56 , Azã 19:38-42 )

⁵⁷ Bʋraaga ayɩla n daan de bõntarsa, n ze'ele Arimate, tɩ a yʋ'ʋrɛ dɛna Azozɛfʋ. A de la Azezi karẽnbia.

⁵⁸ Wẽnnɛ n daan mã'agɛ, tɩ a sẽŋɛ Apilatɩ zẽ'am ka sose ẽ tɩ a basɛ tɩ a dɩkɛ Azezi kũm na sẽŋɛ ka laagɛ. Tɩ Apilatɩ bɔ nõorɛ tɩ ba bɔ ẽ.

⁵⁹ Tɩ Azozɛfʋ dɩkɛ kũm na, dɩkɛ tãn-paalɛ n ãn sõŋa vile ẽ,

⁶⁰ tarɩ ẽ ka laagɛ yɔ-paalɛ pʋam tɩ a botɩ ba tũ tãmpĩa ĩyã, a mẽŋa ĩyã. Tɩ ba bilge kug-kãtɛ lige yɔɔgɔ la nõorɛ dee fõrgɛ.

⁶¹ Amaari n ze'ele Magdala, la Amaari ayẽma la daan zĩ mɛ tɩ ba nẽŋa tɔ yɔɔgɔ la.

⁶² Daar-sɛka tɩ Zifdõma mãasnɩ ba vo'osgo daarɛ la n tole tɩ beere wiige, tɩ kãabgɔ kẽma nẽŋadõma, la Farisi dõma lagsɛ taaba sẽŋɛ Apilatɩ zẽ'am,

⁶³ ka yele ẽ yetɩ: «Zuudãana, tõma tẽrɩ tɩ põmpã'asʋm dãana wã, ẽn daan nãn vɔa la, a daan yetɩ: ‹Mam wʋn vo'oge dabsa atã daarɛ.›

⁶⁴ Bɛla, bɔ nõorɛ tɩ ba gu'ura yɔɔgɔ la sõŋa sõŋa ka paagɛ dabsa atã daarɛ, la sãn dagna bɛla, a karẽnbiisi la wʋn wa zũ kũm na mɛ dee yele nẽrba tɩ a vo'oge mɛ. Pã'asgɔ ẽna wã yãŋa wʋn dɛna be'em gãnna pɔspɔsɩ la.»

⁶⁵ Tɩ Apilatɩ yele ba yetɩ: «Tarɩ-ya gu'urba sẽŋɛ ka basɛ tɩ ba gu'ura yɔɔgɔ la wʋ yãma n boorɩ se'em na.»

⁶⁶ Tɩ ba sẽŋɛ ka bɩ yɔɔgɔ la nõorɛ dee basɛ tɩ gu'urba gu'ura ẽ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ