Amatie 24 - Farefare Ninkaré

Wẽnde-kãtɛ la sã'aŋɔ, la dũnia ba'asgɔ toogo

¹ Azezi daan ze'ele la Wẽnde-kãtɛ la pʋam yese fõrgra. Tɩ a karẽnbiisi la lɛm ẽ pa'alɛ ẽ tɩ a bɩsɛ Wẽnde-kãtɛ la n mẽ sõŋa se'em.

² Tɩ a yele ba yetɩ: «Yãma yẽ bõn-bãna wã wuu? Mam yetɩ ya la sɩra, tɩ ba wʋn lʋbɛ ba wuu mɛ saam saam, tɩ kugre baa ayɩla kãn weege a tadãana zuo.»

³ La a daan sẽŋɛ ka zẽa la Oliivi tãŋa zuo, tɩ a karẽnbiisi la mã'a sẽŋɛ a zẽ'am ka yele ẽ yetɩ: «Yele to wakat-sɛka tɩ bõn-bãma wuu wʋn ẽŋɛ, la sɛla n wʋn pa'alɛ fõn lemŋo, la dũnia ba'asgɔ wakatɛ.»

⁴ Tɩ a yele ba yetɩ: «Guuse ya mẽŋa tɩ nẽra da pã'asɛ ya tɩ ya tuuge.

⁵ Nẽrba zozo'e n wʋn dɩkɛ mam yʋ'ʋrɛ wa'am wa pã'asra ya, tɩ ba nẽra woo yetɩ: ‹Mam n de Krisi la.› La ba wʋn botɩ nẽrba zozo'e tuuge mɛ.

⁶ Ya wʋn wa wõm zɛbrɛ yelle, la zɛbrɛ dãmnɛ. La da basɛ-ya tɩ dabeem tarɩ ya. Dẽnɩ tɩ bõn-bãma ẽŋɛ, la, la nãn dagɩ dũnia ba'asgɔ.

⁷ Buuri ayɩla nẽrba wʋn isge zɛbra la buuri ayẽma nẽrba, tɩ so'olʋm ayɩla isge zɛbra la so'olʋm ayẽma, la kɔm, la tẽn-mĩiŋo wʋn bɔna zẽ'esɩ zozo'e.

⁸ La bõn-bãma nãn de la toogo la sẽŋrɛ, la ãn wʋ pɔka virgre toogo n nãn sẽŋrɩ la.

⁹ Ba wʋn yõgɛ ya mɛ tarɩ ka bɔ tɩ ba nãmsɛ ya, kʋ ya, la buuri wuu wʋn sisra ya mam yʋ'ʋrɛ ĩyã.

¹⁰ Nẽrba zozo'e wʋn basɛ sɩra sore, dee ɩta taaba zãmɔ, dee sisra taaba.

¹¹ La nẽrba zozo'e wʋn isge parɩm yetɩ bãma de la Nawẽnnɛ nõtɔ'ɔsrɩba pã'asɛ nẽrba zozo'e tɩ ba tuuge.

¹² Tõon-be'ero wʋn wa pa'asɛ mɛ halɩ tɩ nẽrba zozo'e nõŋrɛ ba'asɛ.

¹³ La nẽr-sɛka n wʋn mõrgɛ ze'ele kãŋkãŋɛ ka paagɛ ba'asgɔ wʋn yẽ fãarɛ.

¹⁴ Nawẽnnɛ so'olʋm kõ-yẽlga wʋn mõolɛ dũnia wuu mɛ, tɩ buuri wuu wõm, dee tɩ dũnia ba'asgɔ yãŋa paagɛ.

¹⁵ Ya wʋn wa yẽ sɛka n de bõn-be'ego n sã'anɩ sɛla woo la, sɛka tɩ Nawẽnnɛ nõtɔ'ɔsa Adanɩyɛlɩ yʋʋn tɔgɛ a yelle la, tɩ a boe Nawẽnnɛ zẽ'e-sõŋɔ la.» Sɛka n karẽŋrɩ mõrgɛ wõm a võorɛ.

¹⁶ «Ya sãn wa yẽ bɛla, nẽr-sɛba n boe Zude zoe zom tãnsɩ zuto.

¹⁷ La nẽr-sɛka n boe gɔsgɔ da sige bɔɔra tɩ a kẽ deem dɩkɛ sɛla.

¹⁸ La nẽr-sɛka n boe va'am da kãn lebe kule yire tɩ a dɩkɛ a fuugo.

¹⁹ Dabs-bãma, la wʋn dɛna la toogo bɔ pɔg-sɛba n tarɩ pʋa, la sɛba n tarɩ kɔma tɩ ba mõgra la.

²⁰ Sose-ya Nawẽnnɛ tɩ ya zʋa la wakatɛ da dɛna ɔɔrɔ wakatɛ, bɩɩ vo'osgo daarɛ.

²¹ Se'ere n soe la, wakat-ẽŋa, la wʋn dɛna la toogo halɩ zozo'e tɩ ba nãn ka yẽ halɩ dũnia n pĩ'ilum wa paam wakat-ẽŋa, la toog-ẽŋa buuri kãn le malɩn wa'am.

²² Nawẽnnɛ sãn ka bo'oge nɩ dabs-bãma sõorɛ, nẽra nẽra ka boe n wʋn põsɛ. La nẽr-sɛba tɩ a looge la ĩyã tɩ a bo'oge dabs-bãma sõorɛ.

²³ La nẽr-sɛka sãn yele ya yetɩ: ‹Bɩsɛ-ya, Krisi la boe la kalam›, bɩɩ ‹bɩsɛ-ya, a boe la ke›, ya da sakɛ.

²⁴ Nẽrba wʋn wa'am wa parɩm tɩ bãma n de Krisi, la nẽrba wʋn wa'am wa parɩm tɩ bãma n de Nawẽnnɛ nõtɔ'ɔsrɩba tõnna tõon-yãlma, la yel-kɩrsɩ, bɔɔra tɩ ba sãn tã'agɛ, ba botɩ nẽr-sɛba tɩ Nawẽnnɛ looge la tuuge.

²⁵ Mam dẽŋɛ yele ya mɛ tɩ la nãn ka paam.

²⁶ Bɛla, ba sãn yele ya yetɩ: ‹Bɩsɛ-ya, a boe la weem›, da sẽŋɛ-ya. Bɩɩ, ba sãn yetɩ: ‹A boe la deem›, ya da sakɛ.

²⁷ Nẽrsaala Dayʋa la lemŋo wʋn ãna wʋ saaga n ẽn yãkɛ dapoore bɔba nẽegɛ ka paagɛ zanõa bɔba la.

²⁸ Bõn-kɩ'ɩsɩ n boe zẽ'e-sɛka la, zõa lagsrɩ taaba la bilam.»

Azezi n de Nẽrsaala Dayʋa la lemŋo

²⁹ «Toogo dabsa la poorʋm, wẽntulle wʋn sobge mɛ, tɩ wõrga kãn le nẽera a peelem, tɩ wõrbiɛ wʋn ze'ele saazuum lui. La bõn-sɛba n boe saazuum wʋn mĩim mɛ.

³⁰ La sɛla n pa'alɩ Nẽrsaala Dayʋa la lemŋo la wʋn puke saazuum. Tɩ dũnia nẽrba buuri wuu wʋn kaasra fabla. La ba wʋn yẽ Nẽrsaala Dayʋa la n boe sawara pʋam sẽna la pãŋa, tɩ a na'am pãŋa peelem nẽegɛ zozo'e.

³¹ La a wʋn tõm na a malɛkadõma, tɩ benkonne peebe, tɩ ba sẽŋɛ dũnia zʋʋgɔ, la gɔbga, la dapoore, la zanõrɛ ka lagsɛ nẽr-sɛba tɩ Nawẽnnɛ looge la, halɩ ka paagɛ dũnia tɛka wuu.

³² Dɩkɛ-ya makrɛ la kẽnkãŋa bãŋɛ zãsŋɔ la võorɛ. Kẽnkãŋa wila sãn wa pusra võ-paala, ya mi tɩ sigre lɛm mɛ.

³³ Bɛla, ya mẽ sãn wa yẽ tɩ bõn-bãna wuu ɩtɩ, ya bãŋɛ tɩ Nẽrsaala Dayʋa la lɛm mɛ, a boe la zanõrʋm.

³⁴ Mam yetɩ ya la sɩra, tɩ bõn-bãna wuu wʋn ɩta mɛ, dee tɩ zamãan-ẽna yãŋa tole.

³⁵ Saazuum la tẽŋa wʋn tole mɛ, la mam yetɔga la kãn malɩn tole.

³⁶ Nẽra nẽra ka mi daar-sɛka la wakat-sɛka tɩ Nẽrsaala Dayʋa la wʋn leme wa'am, baa malɛkadõma n boe Nawẽnnɛ yire, bɩɩ Dayʋa la mẽŋa ka mi, sãn dagna Sɔ Nawẽnnɛ mã'a.

³⁷ Nẽrsaala Dayʋa la lemŋo, la wʋn ãna wʋ Anoe wakatɛ n yʋʋn ãn se'em na.

³⁸ Se'ere n soe la, lan dẽŋɛ sã'aŋɔ sa-kãtɛ la, nẽrba yʋʋn diti mɛ dee yũura, tɩ bʋraasɩ dita pɔgsɩ, tɩ pɔgsɩ ɛlla sɩrba, dee tara ba pɔyɔɔsɩ sɩɩra, halɩ wa paagɛ daar-sɛka tɩ Anoe kẽ õorŋ-kãtɛ la pʋam na.

³⁹ Ba yʋʋn ka bãŋɛ tɩ yelle boe, halɩ tɩ saaga wa ni, tɩ ko'om pe'ege nẽrba la wuu. La mẽ wʋn ãna la bɛla Nẽrsaala Dayʋa la lemŋo wakatɛ.

⁴⁰ Daar-ẽŋa bʋraasɩ bayi wʋn bɔna va'am, tɩ ba dɩkɛ ayɩla, dee basɛ ayẽma.

⁴¹ Tɩ pɔgsɩ bayi wʋn bɔna nẽerʋm, tɩ ba dɩkɛ ayɩla, dee basɛ ayẽma.

⁴² Bɛla, guuse ya mẽŋa, se'ere n soe la, ya ka mi daar-sɛka tɩ ya Zuudãana la wʋn leme wa'am.

⁴³ Bãŋɛ-ya tɩ yidãana sãn mina nayiga n wʋn wa'am yʋ'ʋŋɔ wakat-sɛka wa zũ ẽ, a wʋn gu'ura a yire mɛ, a kãn basɛ tɩ nayiga la kẽ zũ ẽ.

⁴⁴ Bɛla, mãasʋm-ya gu'ura, tɩ Nẽrsaala Dayʋa la sẽm na wakat-sɛka tɩ ya ka tẽ'esrɩ tɩ a wʋn wa'am na.»

Tõntõn-sõŋɔ, la tõntõn-be'ego makrɛ

⁴⁵ Azezi le yetɩ: «Ãne n de tõntõn-sõŋɔ n tarɩ yɛm? La de la ẽŋa tɩ a zuudãana wʋn yetɩ a bɩsra a yire yelle, bɔ'ɔra a tõntõnɩba dia wʋ lan masɛ, dee sẽŋɛ sore.

⁴⁶ Zuudãana la sãn leme wa yẽ tɩ tõntõnna la tõm wʋ ẽŋa n yele ẽ se'em na, tõntõnna la tarɩ zu-yẽlga.

⁴⁷ Mam yetɩ ya la sɩra, tɩ a zuudãana la wʋn dɩkɛ ẽŋa n tarɩ sɛla la wuu bɔ ẽ mɛ tɩ a bɩsra.

⁴⁸ La a sãn dɛna tõntõn-be'ego, tẽ'esɛ yetɩ ẽŋa zuudãana la yuuri mɛ ka kulna,

⁴⁹ yãŋa wẽ'era a tõntõn-taaba la, dita dee yũura la dã-yũuriba,

⁵⁰ a zuudãana la wʋn kulum na daar-sɛka tɩ a ka tẽ'esrɩ tɩ a wʋn wa'am, la wakat-sɛka tɩ a ka mi, wa di'ige ẽ.

⁵¹ La a wʋn dige ẽ mɛ botɩ a lagɩm na pʋlibsum dõma yẽ sɩbgrɛ. Zẽ'e-ẽŋa tɩ ba wʋn kɛlla, dee dɩkɛ ba nu'usi gɩ nõorʋm.»