အွန်လိုင်း သမ္မာကျမ်းစာ

Amatie 21 - Farefare Ninkaré

Azezi kẽ'erɩ Zerizalɛm la na'am
( Amarkɩ 11:1-11 , Aluki 19:28-40 , Azã 12:12-19 )

¹ Azezi la a karẽnbiisi la daan sẽŋɛ ka lɛm na Zerizalɛm, paagɛ tẽŋa yʋ'ʋrɛ n de Betɩfaazɩ, Oliivi tãŋa sɩa. Tɩ Azezi tõm a karẽnbiisi bayi

² yele ba yetɩ: «Sẽŋɛ-ya tẽŋa la n boe ya nẽŋa la pʋam, tɩ ya wʋn yẽ bõŋ-yã'aŋa n lʋ zɛ la a biire, lorge-ya ẽ tarɩ ba wa'am wa bɔ ma.

³ Nẽra sãn yele ya se'ere, ya yele ẽ yetɩ: ‹Zuudãana la n boorɩ ba›, tɩ a wʋn basɛ tɩ ya tarɩ ẽ wa'am tɔtɔ.»

⁴ La ẽŋɛ la bɛla tɩ Nawẽnnɛ nõtɔ'ɔsa la n yʋʋn tɔgɛ se'em na ẽŋɛ.

⁵ A yʋʋn yetɩ: «Yele-ya Siyõ tẽŋa nẽrba yetɩ: ‹Ya naba la n wãna n sẽm. A sike a mẽŋa bã la bõŋa, la a biire sẽna.› »

⁶ Tɩ karẽnbiisi la sẽŋɛ ka ẽŋɛ Azezi n yele ba se'em na,

⁷ tarɩ bõŋ-yã'aŋa la a biire wa'am, wa dɩkɛ ba futo paglɛ ba zuto tɩ Azezi bã.

⁸ Tɩ nẽr-kʋʋŋɔ zozo'e yɛrgɛ ba futo sore zuo, tɩ sɛba kɔ tɩɩsɩ võorɔ yɛrgɛ sore zuo.

⁹ Tɩ nẽr-sɛba n daan boe a nẽŋa, la sɛba n boe a poorʋm na wuu tĩi tɔgra yetɩ: «Ozaana, naba Adavidi yɩɩŋa. Pẽgɛ-ya nẽr-sɛka n sẽm na Zuudãana Nawẽnnɛ yʋ'ʋrɛ la. Ozaana! Nã'asɛ-ya Nawẽnnɛ n boe saazuum.»

¹⁰ Ban daan sẽnnɩ kẽ'era Zerizalɛm na, tẽŋa la wuu dãm mɛ, tɩ ba sɔkra taaba yetɩ: «Ãne n de ẽna?»

¹¹ Tɩ nẽr-kʋʋŋɔ la lerge ba yetɩ: «La de la Nawẽnnɛ nõtɔ'ɔsa Azezi n ze'ele Nazarɛtɩ n boe Galile so'olʋm na.»

Azezi dige nẽrba n koosrɩ Wẽnde-kãtʋm na
( Amarkɩ 11:15-19 , Aluki 19:45-48 , Azã 2:13-22 )

¹² Azezi daan kẽ la Wẽnde-kãtɛ la zẽnzakam digra sɛba wuu n koosrɩ, la sɛba n da'arɩ la, tɩ ba yɛsra, dee zã'agɛ sɛba n teerɩ ligri taablɩdõma, la sɛba n koosrɩ na'adawɛma kʋgsɩ lʋbɛ.

¹³ Dee yele ba yetɩ: «La gʋlsɛ Nawẽnnɛ gõŋɔ pʋam tɩ Nawẽnnɛ yetɩ: ‹Ba wʋn wi'ira mam deego la tɩ pʋ'ʋsgɔ deego.› La yãma dɩkɛ ẽ ẽŋɛ la nayigba lagsgɔ zẽ'a.»

¹⁴ Tɩ fɔɔsɩ, la wɔbsɩ wa'am a zẽ'am Wẽnde-kãtʋm na, tɩ a botɩ ba yẽ ĩmã'asʋm.

¹⁵ La kãabgɔ kẽma nẽŋadõma, la lɔɔ karẽnsãandõma n yẽ tõon-yãlma la tɩ Azezi tõnnɩ, la kɔma n malɩn tĩi tɔgra Wẽnde-kãtʋm na yɛta tɩ: «Ozaana! Pẽgɛ-ya naba Adavidi yɩɩŋa» la, ba sũure n daan yĩige.

¹⁶ Tɩ ba yele Azezi yetɩ: «Fõn wõm ban yetɩ se'em na?» Tɩ a lerge yetɩ: «Ẽe, mam wõm ya. Yãma nãn ka karẽŋɛ Nawẽnnɛ gõŋɔ la yetɔg-ẽna n yetɩ: ‹Fõn botɩ kɔma, la bilɛɛsɩ n nã'asra fõn.› »

¹⁷ La Azezi basɛ ba bilam, dee sẽŋɛ la Betani ka gã'arɛ.

Kẽnkãŋa n ka tarɩ biɛ yelle
( Amarkɩ 11:12-14 , 20-24 )

¹⁸ Beere n daan wiige bulika, tɩ Azezi lɛbra Zerizalɛm, tɩ a kɔm dõnna.

¹⁹ Tɩ a yẽ kẽnkãŋa n ze sore nõorʋm, sẽŋɛ tɩ a ka bɩsɛ, la a paagɛ yẽ la võorɔ mã'a. Tɩ a yele kẽnkãŋa la yetɩ: «Fʋ kãn le malɩn wɔm biɛ.» La bilam mẽŋa tɩ kẽnkãŋa la kʋɩ.

²⁰ La a karẽnbiisi la n yẽ bɛla la, la di'ige ba mɛ, tɩ ba yetɩ: «La ẽŋɛ la wãne tɩ kẽnkãŋa wã darɛ kʋɩ wãna?»

²¹ Tɩ Azezi lerge ba yetɩ: «Mam yetɩ ya la asɩra, tɩ ya sãn bɔ Nawẽnnɛ sɩra dee ka sẽ'ena, ya mẽ wʋn tã'agɛ ẽŋɛ wʋ mam n ẽŋɛ tɩ-ẽna se'em wã, la, la dagɩ bɛla mã'a, ya wʋn tã'agɛ yele tãn-ẽna yetɩ: ‹Võogɛ ka lui mõgrɛ pʋam›, la a wʋn ẽŋɛ bɛla.

²² La ya sãn sose Nawẽnnɛ sɛla dee bɔ ẽ sɩra, ya wʋn to'oge.»

Ãne n bɔ Azezi nõorɛ tɩ a tõnna?
( Amarkɩ 11:27-33 , Aluki 20:1-8 )

²³ Azezi daan kẽ la Wẽnde-kãtʋm na zãsna nẽrba, tɩ kãabgɔ kẽma nẽŋadõma, la tẽŋa la kẽma wa'am wa soke ẽ yetɩ: «Fõn yẽ nõorɛ la bɛ ɩta bõn-bãna? La ãne n bɔ fõn nõorɛ tɩ fõn ɩta?»

²⁴ Tɩ Azezi lerge ba yetɩ: «Mam wʋn soke ya sokre ayɩla, tɩ ya sãn lerge mam, mam mẽ wʋn yele ya nõor-sɛka tɩ mam tarɩ ɩta bõn-bãna.

²⁵ Yele-ya ma, Azã n daan misri nẽrba ko'om pʋam na, la de la Nawẽnnɛ n tõm ẽ bɩɩ, la de la nẽrsaalba?» Tɩ ba bãm na taaba yetɩ: «Tɩ sãn yetɩ la de la Nawẽnnɛ n tõm ẽ, a wʋn yetɩ, bẽm ĩyã tɩ tõma ka sakɛ ẽ?

²⁶ Tɩ mẽ ka tã wʋn yetɩ, la de la nẽrsaalba n tõm ẽ, dẽnɩ tɩ zɔta nẽrba la, se'ere n soe la, ba wuu sakɛ tɩ Azã de la Nawẽnnɛ nõtɔ'ɔsa.»

²⁷ Tɩ ba koŋe lerge ẽ yetɩ: «Tõma ka mi.» Tɩ a mẽ yele ba yetɩ: «Mam mẽ kãn yele ya mam n yẽ nõorɛ zẽ'e-sɛka ɩta bõn-bãna.»

Dayɔɔsɩ bayi makrɛ

²⁸ Azezi daan le yele ba yetɩ: «Pa'alɛ-ya ma yãma n tẽ'esrɩ se'em: Bʋraa n daan boe tarɩ a dayɔɔsɩ bayi, yele pɔspɔsɩ dãana la yetɩ: ‹M dayʋa, sẽŋɛ ka tõm m va'am na zĩna.›

²⁹ Tɩ a dayʋa la lerge ẽ yetɩ: ‹Mam kãn sẽŋɛ.› Tɩ la ẽŋɛ fẽe, tɩ a teege yɛm sẽŋɛ.

³⁰ Tɩ a sẽŋɛ a dayʋa bʋyi dãana la zẽ'am ka yele ẽŋa mẽ yetɩ, a sẽŋɛ ka tõm a va'am na. Tɩ a yele ẽ yetɩ: ‹M sɔ, mam wʋn sẽŋɛ.› La a yele bɛla dee ka sẽŋɛ.

³¹ Bãma bayi, ãne n ẽŋɛ a sɔ la n boorɩ se'em na?» Tɩ ba lerge yetɩ: «Pɔspɔsɩ dãana la.» Tɩ Azezi yele ba yetɩ: «Mam yetɩ ya la sɩra sɩra, tɩ lampo-tɔ'ɔsrɩba, la pɔg-yalsɩ dõma wʋn dẽŋɛ ya nẽŋa kẽ Nawẽnnɛ so'olʋm pʋam.

³² Se'ere n soe la, Azã wa'am wa pa'alɛ ya la sore tɩ ya wʋn doose masɛ Nawẽnnɛ zẽ'am, la ya ka bɔ ẽ sɩra. La lampo-tɔ'ɔsrɩba, la pɔg-yalsɩ dõma n bɔ ẽ sɩra. La baa yãma n yẽ bɛla la, ya ken ka teege yɛm bɔ ẽ sɩra.»

Nẽrba n bɩsrɩ va'am makrɛ
( Amarkɩ 12:1-12 , Aluki 20:9-19 )

³³ Azezi daan le yele ba yetɩ: «Selse-ya makrɛ ayɩla. Yidãana ayɩla n daan kɔ a va'am sele tɩɩsɩ yʋ'ʋrɛ n de viinye, mẽ lalga kaagɛ ẽ, tũ boko tɩ ba wẽkra viinye la biɛ, dee mẽ de-woko tɩ ba zɔnna bɩsra a va'am na, yãŋa dɩkɛ nẽrba tɩ ba bɩsra va'am na, dee sẽŋɛ sore.

³⁴ Tɩ viinye la biɛ go'osgo wakatɛ paagɛ, tɩ a tõm a tõntõnɩba tɩ ba sẽŋɛ sɛba n bɩsrɩ va'am na zẽ'am, ka to'oge a viinye la biɛ wa bɔ ẽ.

³⁵ Tɩ sɛba n bɩsrɩ va'am na yõgɛ tõntõnɩba la wẽ ayɩla, kʋ ayɩla, dee lobe ayẽma la kuga kʋ.

³⁶ Tɩ a le tõm tõntõnɩba basɛba n zo'oge gãnna pɔspɔsɩ dõma la. Tɩ ba le ẽŋɛ bãma mẽ bɛla.

³⁷ Tɩ a yãŋa tõm a mẽŋa dayʋa sɛba n bɩsrɩ va'am na zẽ'am, dee tẽ'esra yetɩ: ‹Ẽna n de mam mẽŋa dayʋa la, ba wʋn nan ẽ.›

³⁸ La sɛba n bɩsrɩ va'am na n yẽ ẽ na, ba yele taaba yetɩ: ‹Ẽna n wʋn wa sɔɔgɛ sɔna a sɔ bõntarsõm na. Basɛ-ya tɩ tɩ kʋ ẽ, dee tɩ bõntarsõm na lebge tõma bõnɔ.›

³⁹ Tɩ ba yõkɛ ẽ ve'ege yese va'am na kẽnkɛrŋa ka kʋ ẽ.

⁴⁰ Bɛla, va'am na dãana sãn wa'am, a wʋn ẽŋɛ sɛba n bɩsrɩ va'am na la wãne?»

⁴¹ Tɩ ba lerge yetɩ: «A wʋn nãmsɛ nẽr-bɛ'ɛsɩ bãna mɛ halɩ kʋ ba, dee dɩkɛ va'am na bɔ nẽr-sɛba n wʋn bɔ ẽ a viinye la biɛ ba go'osgo wakatɛ, tɩ ba bɩsra.»

⁴² Tɩ Azezi yele ba yetɩ: «Yãma nãn ka karẽŋɛ Nawẽnnɛ gõŋɔ la n yetɩ: ‹Kug-sɛka tɩ tõnmẽtba zagsɛ la n lebge kugre n botɩ deego la tara pãŋa. La de la Zuudãana Nawẽnnɛ n ẽŋɛ bõn-ẽna, tɩ la dɛna yel-di'iŋa bɔ tõma.›

⁴³ Bɛla, mam yetɩ ya tɩ Nawẽnnɛ wʋn to'oge a so'olʋm ya zẽ'am dɩkɛ bɔ buur-sɛba n wʋn tõm Nawẽnnɛ so'olʋm tõoma. [

⁴⁴ La kug-sɛka tɩ tõnmẽtba zagsɛ la, nẽr-sɛka woo n lui kug-ẽŋa zuo, a wʋn kɔ kɔ mɛ. La kugre la sãn lui sɛka zuo, a wʋn mẽrgɛ ẽ.]»

⁴⁵ La kãabgɔ kẽma nẽŋadõma, la Farisi dõma n wõm makrɛ la, ba bãŋɛ tɩ a tɔgrɩ la bãma yelle.

⁴⁶ Tɩ ba bɔɔra tɩ ba yõkɛ ẽ, dee zɔta nẽrba la, se'ere n soe la, ba sakɛ tɩ Azezi de la Nawẽnnɛ nõtɔ'ɔsa.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ