Amatie 2 - Farefare Ninkaré

Bãŋrɩba sẽŋɛ ka yẽ Azezi

¹ Ba daan dɔgɛ Azezi la Bɛtelɛm n boe Zude so'olʋm, se'emwẽnnɛ tɩ A'erɔdɩ de naba la. Tɩ bãŋrɩba ze'ele dapɔa bɔba wa'am Zerizalɛm,

² wa soke yetɩ: «Bia la tɩ ba dɔgɛ la boe la bɛ, sɛka n wʋn dɛna Zifdõma naba la? Tõma yẽ la a wõrbiire dapɔa bɔba, bɛla ĩyã tɩ tõma wa'am tɩ tɩ nã'asɛ ẽ.»

³ La naba A'erɔdɩ n daan wõm bɛla la, ẽŋa la Zerizalɛm dõma wuu yɛm n yɔɔrɩ.

⁴ Tɩ A'erɔdɩ daan lagsɛ kãabgɔ kẽma nẽŋadõma, la lɔɔ karẽnsãandõma la wuu, soke ba yetɩ: «Tẽn-kãna tɩ ba wʋn dɔgɛ Krisi la?»

⁵ Tɩ ba yele ẽ yetɩ: «Bɛtelɛm n boe Zude so'olʋm na, se'ere n soe la, Nawẽnnɛ nõtɔ'ɔsa la yʋʋn gʋlsɛ yele la wãna:

⁶ ‹Bɛtelɛm n de tẽn-pɩka, fʋ ka pɔ'ɔgɛ Zude so'olʋm tẽn-kãra la pʋam, se'ere n soe la, nẽra n wʋn yese fõn pʋam dɛna nẽŋadãana bɩsra Ɩsrayɛlɩ dõma n de mam nẽrba la yelle.› »

⁷ La A'erɔdɩ sʋgɛ mɛ wi bãŋrɩba la soke ba bãŋɛ wẽnse'ere tɩ wõrbiire la yese,

⁸ dee tõm ba yetɩ: «Sẽŋɛ-ya Bɛtelɛm ka ɛ soke bãŋɛ bia la yelle sõŋa sõŋa, la ya sãn yẽ ẽ, ya leme wa'am wa yele mam tɩ mam mẽ sẽŋɛ ka nã'asɛ ẽ.»

⁹ La ban wõm naba la yetɔga la, ba sẽnnɩ mɛ wɛ'ɛsa, darɛ le yẽ wõrbiire la tɩ ba daan yẽ dapɔa bɔba la n tole ba nẽŋa, tarɩ ba halɩ ka paagɛ bia la n boe zẽ'e-sɛka la ze'ele.

¹⁰ La ban daan yẽ wõrbiire la, ba sũure ẽŋɛ yẽlʋm mɛ halɩ zozo'e.

¹¹ Tɩ ba kẽ yire la pʋam yẽ bia la, la a ma Amaari, ka dũma tẽŋa bia la nẽŋam nã'asɛ ẽ, dee lorge ba lɔgrɔ loose ban tarɩ sɛla la bɔ ẽ. Ba daan de la sãlma, la tɩdarɛ, la miiri n tarɩ yũuŋ-yẽlga.

¹² Tɩ Nawẽnnɛ daan kã'an ba zãasŋɔ pʋam yetɩ, ba da le doose naba A'erɔdɩ zẽ'am, bɛla tɩ ba daan doose sore ayẽma lebe kule ba tẽŋa.

A'erɔdɩ boorɩ tɩ a kʋ Azezi

¹³ Bãŋrɩba la n fõrgɛ la, tɩ Nawẽnnɛ malɛka puke a mẽŋa pa'alɛ Azozɛfʋ zãasŋɔ pʋam, yele ẽ yetɩ: «Isge tarɩ bia la, la a ma la zoe sẽŋɛ Ezipti ka bɔna bilam halɩ tɩ m le wa yele fʋ se'ere. Se'ere n soe la, naba A'erɔdɩ wʋn ɛɛra bia la mɛ tɩ a kʋ.»

¹⁴ Tɩ Azozɛfʋ isge yʋ'ʋŋɔ tarɩ bia la, la a ma la sẽŋɛ Ezipti,

¹⁵ ka bɔna bilam halɩ tɩ A'erɔdɩ wa ki. La ẽŋɛ la bɛla, tɩ Zuudãana Nawẽnnɛ n yʋʋn botɩ a nõtɔ'ɔsa yele se'em na ẽŋɛ. A yʋʋn yetɩ: «Mam wi m Dayʋa la n boe Ezipti la tɩ a wa'am.»

¹⁶ La A'erɔdɩ n daan bãŋɛ tɩ bãŋrɩba la pã'asɛ ẽŋa mɛ na, a sũure n yĩige halɩ, tɩ a tõm nẽrba yetɩ ba sẽŋɛ Bɛtelɛm, la tẽn-sɛba n boe a kẽnkɛrsɩ la wuu ka kʋ budim-sɛba wuu n masɛ wʋ yʋʋma ayi, la sɛba n ka paagɛ bɛla la, wʋ ẽŋa n daan soke bãŋrɩba la bãŋɛ se'emwẽnnɛ tɩ wõrbiire la yese la.

¹⁷ Bɛla tɩ Nawẽnnɛ nõtɔ'ɔsa Azeremi n yʋʋn yele se'em na ẽŋɛ. A yʋʋn yetɩ:

¹⁸ «Ba wõm tagursi Rama tẽŋa, kʋʋnɔ la fablɩgɔ zozo'e. La de la Arasɛlɩ n kellɩ a kɔma yelle, tɩ ba pã'asra ẽ tɩ a ka sakra tɩ a go'oge. Se'ere n soe la, a kɔma la ka le bɔna.»

¹⁹ La naba A'erɔdɩ daan wa ki mɛ, tɩ Zuudãana malɛka puke a mẽŋa pa'alɛ Azozɛfʋ zãasŋɔ pʋam Ezipti, yele ẽ yetɩ:

²⁰ «Isge tarɩ bia la, la a ma la lebe Ɩsrayɛlɩ tẽŋa, se'ere n soe la, sɛka n daan eerɩ bia la tɩ a kʋ la ki mɛ.»

²¹ Tɩ Azozɛfʋ isge tarɩ bia la, la a ma la kule Ɩsrayɛlɩ tẽŋa.

²² La a daan wõm mɛ tɩ Arkelawusi n sɔɔgɛ a sɔ A'erɔdɩ zẽ'am di Zude na'am. Tɩ a daan zoe dabeem ka sẽŋɛ Zude so'olʋm. Tɩ Nawẽnnɛ kã'an ẽ zãasŋɔ pʋam, tɩ a sẽŋɛ Galile so'olʋm.

²³ A daan sẽŋɛ ka kẽ'era la tẽŋa yʋ'ʋrɛ n de Nazarɛtɩ. Bɛla tɩ Nawẽnnɛ nõtɔ'ɔsrɩba la n daan yele se'em na ẽŋɛ. Ba daan yetɩ: «Ba wʋn wi'ira Krisi la tɩ Nazarɛtɩ nẽra.»