အွန်လိုင်း သမ္မာကျမ်းစာ

Amatie 15 - Farefare Ninkaré

Yaabdõma zãsŋɔ, la sɛla n botɩ nẽra dɛna dẽgrɔ
( Amarkɩ 7:1-23 )

¹ Tɩ Farisi dõma, la lɔɔ karẽnsãandõma n ze'ele Zerizalɛm wa'am wa soke Azezi yetɩ:

² «Bẽm tɩ fõn karẽnbiisi la ka sakra tɩ yaabdõma malŋɔ la? Ba sãn yetɩ ba di, ba ka peerɩ nu'usi wʋ tɩ yaabdõma n ɩtɩ se'em na.»

³ Tɩ a lebe soke ba yetɩ: «Bẽm ẽŋɛ tɩ yãma mẽ sɩ'ɩsra Nawẽnnɛ nõorɛ la, ya mẽŋa malŋɔ ĩyã?

⁴ Nawẽnnɛ yetɩ: ‹Nanna fʋ sɔ, la fʋ ma.› Dee le yetɩ: ‹Sɛka n tɔgɛ a sɔ bɩɩ a ma be'em, dẽnɩ tɩ ba kʋ ẽ.›

⁵ La yãma yetɩ, nẽra sãn yele a sɔ bɩɩ a ma yetɩ: ‹Mam n tarɩ nɩ bõn-sɛka tɩ m sõŋɛ fɔ la, de la Nawẽnnɛ bõnɔ›, la ka le dɛna tɩ a ẽŋɛ sɛla bɔ a sɔ.

⁶ Bɛla, ya basrɩ tɩ Nawẽnnɛ yetɔga la lebge la zãŋa, dee dɔla ya mẽŋa malŋɔ.

⁷ Pʋlibsum dõma wã, A'ezayi yʋʋn sɩrɩ to'oge Nawẽnnɛ yetɔga tɔgɛ ya yelle, tɩ Nawẽnnɛ yetɩ:

⁸ ‹Nẽr-bãna wã pẽgrɩ mam na ba nõorɛ yetɔga, la ba sũure zãagɛ la mam mɛ.

⁹ Ban nã'asrɩ mam na, la de la zãŋa. Se'ere n soe la, ba zãsnɩ na zãsŋɔ n de nẽrsaalba lɔɔ.› »

¹⁰ La Azezi wi nẽr-kʋʋŋɔ la, tɩ ba wa'am na a zẽ'am, tɩ a yele ba yetɩ: «Selse-ya sõŋa sõŋa wõm a võorɛ:

¹¹ La dagɩ sɛla n kẽ'erɩ nẽrsaala nõorʋm n botɩ a dɛna dẽgrɔ, la de la sɛla n ze'etɩ nẽrsaala nõorʋm yɛsra n botɩ a dɛna dẽgrɔ.»

¹² Bɛla tɩ a karẽnbiisi la lɛm ẽ, soke ẽ yetɩ: «Fõn mi tɩ Farisi dõma la n wõm fõn tɔgɛ bɛla la, la dõn ba sũure mɛ?»

¹³ Tɩ Azezi lerge yetɩ: «Sɛla woo tɩ mam Sɔ Nawẽnnɛ ka bʋrɛ, ba wʋn võogɛ ẽ basɛ.

¹⁴ Basɛ-ya ba, tɩ ba ãn wʋ fɔɔsɩ n ve'erɩ fɔɔsɩ. Fʋa sãn vɛ'ɛra fʋa, bãma bayi wuu wʋn lui la boko pʋam.»

¹⁵ Tɩ Apɩyɛɛrɩ yele ẽ yetɩ: «Pa'alɛ tɔ makrɛ la võorɛ.»

¹⁶ Tɩ Azezi soke ba yetɩ: «Yãma yɛm mẽ ka like?

¹⁷ Yãma ka mi tɩ bõn-sɛka woo n kẽ'erɩ nẽrsaala nõorʋm tollɩ la a pʋʋrʋm, tɩ a yẽ'era ba basra?

¹⁸ La sɛla n yesrɩ nẽrsaala nõorʋm ze'ele la a sũure pʋam, la de la bõn-bãma n botɩ a dɛna dẽgrɔ.

¹⁹ Se'ere n soe la, pʋtẽ'e-yooro ze'etɩ la nẽrsaala sũure pʋam botɩ a bɔɔra tɩ a ẽŋɛ be'em: Nẽr-kʋa, la yalsɩ, la taaba pɔgba la taaba sɩrba gã'a, la nayigum, la põmpɔrŋɔ, la pɔ'ɔrɛ yetɔga.

²⁰ La de la bãna wã n dẽgrɩ nẽrsaala. La nẽra sãn di dee ka peege nu'usi, bɛla ka dẽgrɩ nẽra.»

Kanaan pɔka bɔ Azezi sɩra
( Amarkɩ 7:24-30 )

²¹ Azezi daan fõrgɛ bilam sẽŋɛ la Tiiri, la Sidõ so'olʋm.

²² Tɩ Kanaan pɔka ze'ele tẽn-bãma wa'am a zẽ'am wa tɔgra ke'enke'em yetɩ: «Zuudãana, Adavidi yɩɩŋa, zoe m ninbãalga, mam pɔyʋa tɩ kʋlkã'arga nãmsra ẽ halɩ zozo'e.»

²³ Tɩ Azezi ka lerge ẽ se'ere. Tɩ a karẽnbiisi la paagɛ a zẽ'am yele ẽ yetɩ: «Ẽŋɛ bɔ ẽ tɩ a fõrgɛ, tɩ a kaasrɩ dɔla tɔ.»

²⁴ Tɩ Azezi lerge ba yetɩ: «Nawẽnnɛ tõm mam na Ɩsrayɛlɩ dõma n ãn wʋ piisi n bɔɩ la mã'a zẽ'am.»

²⁵ Tɩ pɔka la paagɛ ka dũma tẽŋa a nẽŋam yele ẽ yetɩ: «Zuudãana, sõŋɛ ma.»

²⁶ Tɩ Azezi lerge yetɩ: «La ka masɛ tɩ ba dɩkɛ kɔma dia bɔ baasɩ.»

²⁷ Tɩ pɔka la lerge yetɩ: «Zuudãana, la de la sɩra. La baasɩ diti la di-zõra n luti ba dãana taablɩ tilum.»

²⁸ Tɩ Azezi lerge ẽ yetɩ: «Pɔka, fʋ bɔ mam sɩra zo'oge mɛ. La wʋn ẽŋɛ wʋ fõn boorɩ se'em na bɔ fɔ.» La wakat-ẽŋa mẽŋa tɩ a pɔyʋa la yẽ ĩmã'asʋm.

Azezi botɩ nẽrba zozo'e yẽ ĩmã'asʋm

²⁹ Azezi daan ze'ele bilam sẽŋɛ la Galile mõgrɛ la nõorʋm, ka zom tãŋa zuo zẽa.

³⁰ Tɩ nẽr-kʋʋŋɔ zozo'e tarɩ kɔɔrnɔ, la fɔɔsɩ, la kobro, la mugro, la bã'adõma basɛba zozo'e wa'am Azezi nẽŋam. Tɩ Azezi botɩ ba yẽ ĩmã'asʋm.

³¹ La nẽrba la n daan yẽ mugro la n tɔgrɩ, tɩ kobro la yeege, tɩ kɔɔrnɔ na sẽnna, tɩ fɔɔsɩ la yẽta la, la daan di'ige ba mɛ, tɩ ba pẽgra Nawẽnnɛ n de Ɩsrayɛlɩ dõma Zuudãana la.

Azezi le bɔ nẽr-kʋʋŋɔ dia
( Amarkɩ 8:1-10 )

³² Azezi daan wi a karẽnbiisi la mɛ yele ba yetɩ: «Nẽr-kʋʋŋɔ wã ninbãalga n tarɩ mam, se'ere n soe la, la de la dabsa atã n wãna tɩ ba boe mam zẽ'am, dee ka tara dia wʋn di. La mam ka boorɩ tɩ m basɛ ba tɩ ba kule la kɔm, ba tã wʋn ka vibe sore mɛ.»

³³ Tɩ a karẽnbiisi la soke ẽ yetɩ: «Tɩ wʋn yẽ dia la bɛ, zẽ'e-ẽna n de mõom wã, bɔ nẽr-kʋʋŋɔ wã wuu tɩ la seke ba?»

³⁴ Tɩ Azezi soke ba yetɩ: «Yãma tarɩ la borborɩ balɛ?» Tɩ ba lerge yetɩ: «Bayopɔɩ, la zũn-pɩgsɩ fẽe.»

³⁵ Tɩ Azezi yele nẽr-kʋʋŋɔ la yetɩ, ba zĩ'ire tẽŋa.

³⁶ Dee dɩkɛ borborɩ bayopɔɩ la, la zũma la pʋ'ʋsɛ Nawẽnnɛ, dee fiise bɔ a karẽnbiisi la, tɩ ba to'oge pʋɩ nẽr-kʋʋŋɔ la.

³⁷ Tɩ ba wuu di tɩgɛ, dee tɩ ba vaagɛ bõn-gito n deege pɩrɛ pɩtɔ bayopɔɩ.

³⁸ Sɛba n daan di dia la, bʋraasɩ de la tʋsa anaasɩ, tɩ pɔgsɩ la kɔma kãllɛ ka pa'asɛ.

³⁹ Bɛla poorʋm, Azezi basɛ nẽr-kʋʋŋɔ la tɩ ba kule mɛ, dee kẽ õorŋɔ sẽŋɛ Magdala.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ