Amatie 14 - Farefare Ninkaré

Azã kũm yelle

¹ Wakat-ẽŋa tɩ Galile naba A'erɔdɩ daan wõm ban tɔgrɩ Azezi yelle,

² tɩ a yele a tõntõnɩba yetɩ: «Ẽna de la Azã n daan misri nẽrba ko'om pʋam na n vo'oge. La de la bɛla n soe tɩ a tara pãŋa tõnna tõon-yãlma.»

³ Se'ere n soe tɩ a yele bɛla la, A'erɔdɩ mẽŋa n daan botɩ ba yõkɛ Azã lʋ tarɩ ka kẽ'esɛ yʋ'a deem a kẽema Afilipi pɔga A'erodɩadɩ ĩyã.

⁴ Se'ere n soe la, A'erɔdɩ daan fãagɛ la Afilipi pɔga di, tɩ Azã daan yele ẽ yetɩ: «La ka masɛ tɩ fʋ fãagɛ ẽ di.»

⁵ A'erɔdɩ daan boorɩ tɩ a kʋ Azã mɛ, dee zɔta tẽŋa la nẽrba, se'ere n soe la, ba tẽ'esɛ tɩ Azã de la Nawẽnnɛ nõtɔ'ɔsa.

⁶ La A'erɔdɩ daan wa ɩta la a dɔka daarɛ kibsa, tɩ A'erodɩadɩ pɔyʋa wa nẽrba nẽŋam, tɩ A'erɔdɩ sũure ẽŋɛ yẽlʋm halɩ zozo'e,

⁷ tɩ a pɔɩ yele pugla la yetɩ, bõn-sɛka wuu tɩ a wʋn sose, ẽŋa wʋn bɔ ẽ.

⁸ Tɩ a ma botɩ a yele naba A'erɔdɩ yetɩ: «Dɩkɛ Azã n mise nẽrba ko'om pʋam na zuugo ẽŋɛ la-pɛsŋa pʋam bɔ mam kalam.»

⁹ Tɩ naba la sũure sã'am, la ẽn pɔɩ la ĩyã, la sãama la ĩyã, tɩ a bɔ nõorɛ yetɩ ba bɔ pugla la ẽn boorɩ sɛla la.

¹⁰ Dee tõm nẽra tɩ a sẽŋɛ yʋ'a deem ka wike Azã zuugo.

¹¹ Tɩ a sẽŋɛ ka wike zuugo la ẽŋɛ la-pɛsŋa pʋam tarɩ ka bɔ pugla la, tɩ a to'oge ka bɔ a ma.

¹² Tɩ Azã karẽnbiisi wa'am wa dɩkɛ kũm na ka laagɛ, dee sẽŋɛ ka yele Azezi.

Azezi bɔ nẽr-kʋʋŋɔ dia

¹³ Azezi n daan wõm bɛla la, a kẽ la õorŋɔ fõrgɛ wɛ'ɛsa kẽnkɛrŋa, zẽ'a tɩ nẽrba ka boe. Tɩ nẽr-kʋʋŋɔ la bãŋɛ, ze'ele tẽnsɩ pʋam babsɛ ẽ la nãma.

¹⁴ Tɩ Azezi paagɛ ze'ele õorŋɔ la zuo sige, yẽ nẽr-kʋʋŋɔ la, tɩ ba ninbãalga yõkɛ ẽ, tɩ a botɩ ba bã'adõma yẽ ĩmã'asʋm.

¹⁵ Tɩ zaanõorɛ paagɛ, tɩ karẽnbiisi la lɛm Azezi yele ẽ yetɩ: «Zẽ'a wã de la mõom, dee tɩ wẽnnɛ kẽ'era, bɛla botɩ nẽrba la sẽŋɛ tẽnsɩ la pʋam ka da dia di.»

¹⁶ Tɩ Azezi yele ba yetɩ: «La ka de pẽrgrɛ tɩ ba sẽŋɛ, ya mẽŋa bɔ ba dia.»

¹⁷ Tɩ ba lerge ẽ yetɩ: «Tõma tarɩ la borborɩ banuu, la zũma bayi mã'a.»

¹⁸ Tɩ Azezi yele ba yetɩ: «Tarɩ-ya ba wa'am wa bɔ ma.»

¹⁹ Dee botɩ nẽr-kʋʋŋɔ la zĩ'ire mõorɔ zuo. Tɩ a dɩkɛ borborɩ banuu, la zũma bayi la, gorge bɩsɛ saazuum pʋ'ʋsɛ Nawẽnnɛ, dee fiise borborɩ la bɔ a karẽnbiisi la tɩ ba pʋɩ nẽr-kʋʋŋɔ la, tɩ ba to'oge pʋɩ ba.

²⁰ Tɩ ba wuu di tɩgɛ, dee tɩ karẽnbiisi la vaagɛ bõn-gito n deege pɩrɛ pɩtɔ pia la ayi.

²¹ Sɛba n daan di dia la, bʋraasɩ daan de wʋ tʋsanuu, tɩ pɔgsɩ la kɔma kãllɛ ka pa'asɛ.

Azezi sẽnnɩ ko'om zuo

²² Bɛla poorʋm tɩ Azezi basɛ a karẽnbiisi la tɩ ba kẽ õorŋɔ dẽŋɛ ẽ dɔɔra mõgrɛ la doone ke bɔba, dee tɩ a mẽŋa weege tɩ a keese nẽr-kʋʋŋɔ la.

²³ Ẽn daan keese nẽr-kʋʋŋɔ la kɩ'ɩlɩm na, a sẽŋɛ la kẽnkɛrŋa ka zom tãŋa zuo tɩ a pʋ'ʋsɛ Nawẽnnɛ. Tɩ wẽnnɛ kẽ, tɩ ẽŋa ayɩla mã'a bɔna mĩ.

²⁴ La õorŋɔ la daan boe la mõgrɛ la pʋam zãazãarɛ, tɩ ko-mĩ'isi wẽ'era ẽ, tɩ ba nãmsra, se'ere n soe la, kʋsebgo n vugri tʋ'ʋsra ba.

²⁵ Tɩ beere yɔna wiire, tɩ Azezi sẽnna ko'om na zuo wɛ'ɛsa a karẽnbiisi la bɔba.

²⁶ Tɩ karẽnbiisi la yẽ tɩ a sẽnnɩ ko'om na zuo, tɩ ba palẽŋa ẽkɛ, tɩ ba yetɩ: «A de la ki-isgne.» Tɩ dabeem yõkɛ ba, tɩ ba kaasra tagursi.

²⁷ Bilam mẽŋa tɩ Azezi yele ba yetɩ: «Keŋe-ya ya sũure, la de la mam, da zoe-ya dabeem.»

²⁸ Tɩ Apɩyɛɛrɩ yele yetɩ: «Zuudãana, la sãn sɩrɩ dɛna la fõn, bɔ mam nõorɛ tɩ m sẽŋɛ ko'om na zuo wa'am fʋ zẽ'am.»

²⁹ Tɩ Azezi yele ẽ yetɩ: «Wa'am.» Tɩ Apɩyɛɛrɩ yese õorŋɔ la pʋam sẽnna ko'om na zuo wɛ'ɛsa Azezi zẽ'am.

³⁰ La Apɩyɛɛrɩ bɩsɛ la kʋsebgo la n vugri zo'oge la, tɩ dabeem yõkɛ ẽ. Tɩ a bɔna mĩ tɩ a mise, kaasɛ yetɩ: «Zuudãana, fãagɛ ma.»

³¹ Tɩ Azezi darɛ tẽegɛ nu'ugo gʋrɛ ẽ dee yetɩ: «Fʋ ka bɔ mam sɩra zo'oge, bẽm tɩ fʋ yɛm yɔɔra?»

³² Tɩ ba kẽ õorŋɔ la pʋam, tɩ kʋsebgo la go'oge.

³³ Tɩ karẽnbiisi la n boe õorŋɔ la pʋam na ka dũma Azezi nẽŋam yetɩ: «Fõn sɩrɩ de la Nawẽnnɛ Dayʋa la.»

Azezi botɩ bã'adõma yẽ ĩmã'asʋm Zenezarɛtɩ

³⁴ Tɩ ba pãrgɛ mõgrɛ la dooge paagɛ Zenezarɛtɩ tẽŋa.

³⁵ Tɩ zẽ'e-ẽŋa nẽrba bãŋɛ Azezi, tõm nẽrba tẽn-sɛba n lɛm na wuu, tɩ ba tarɩ bã'adõma wuu wa'am a zẽ'am.

³⁶ Ba daan sose ẽ yetɩ a basɛ tɩ bã'adõma la kalʋm a fuugo nõorɛ mã'a. La sɛba wuu n daan kalʋm a fuugo la yẽ ĩmã'asʋm mɛ.