Amatie 10 - Farefare Ninkaré

Azezi looge a karẽnbiisi pia la ayi tõm ba

¹ Azezi daan wi a karẽnbiisi pia la ayi la mɛ bɔ ba pãŋa tɩ ba dige kʋlkã'arsɩ, dee botɩ bã'adõma buuri wuu, la kobro buuri wuu yẽ ĩmã'asʋm.

² Karẽnbiisi pia la ayi la tɩ a looge tɩ a tõm na yʋ'ʋra n wãna: Pɔspɔsɩ dãana de la Asimõ tɩ ba wi'iri tɩ Apɩyɛɛrɩ, la a yɩbga A'ãndre, la Azebede dayɔɔsɩ Azakɩ la a yɩbga Azã,

³ la Afilipi, la Abatelemi, la Atoma, la Amatie n de lampo-tɔ'ɔsa la, la Azakɩ n de Alfe dayʋa, la Atade,

⁴ la Asimõ n daan de Zelɔtɩ nẽra ayɩla la, la Azudaasɩ Iskariyo, sɛka n wʋn pa'alɛ tɩ ba yõkɛ Azezi la.

⁵ La de la bãna pia la ayi tɩ Azezi daan tõm, yele ba yetɩ: «Da sẽŋɛ-ya bu-zãŋsɩ la zẽ'am, la da kẽ-ya Samaari dõma tẽnsɩ pʋam.

⁶ Sẽŋɛ-ya Ɩsrayɛlɩ dõma n ãn wʋ piisi n bɔɩ la zẽ'am,

⁷ ka mõola yetɩ: ‹Nawẽnnɛ so'olʋm na lɛm mɛ.›

⁸ La ya botɩ bã'adõma yẽ ĩmã'asʋm, dee botɩ kũm vo'oge, dee botɩ kõnkɔma yẽ ĩmã'asʋm le ãna sõŋa, dee dige kʋlkã'arsɩ. Yãma to'oge la zãŋa, bɛla bɔ-ya zãŋa.

⁹ Da dɩkɛ-ya sãlma bɩɩ ligri sũm sẽŋɛ.

¹⁰ La ya da dɩkɛ tãmpɔkɔ sore la sẽnnɛ ĩyã, da dɩkɛ-ya futo bayi, bɩɩ tagra, bɩɩ doore. Ba wʋn bɔ tõntõnna ẽn boorɩ sɛla.

¹¹ Ya sãn paagɛ tẽn-kãtɛ bɩɩ tẽn-pɩka pʋam, soke-ya bãŋɛ nẽr-sõŋɔ sãn bɔna mĩ wʋn to'oge ya tɩ ya kẽ'era a yire, bɔna-ya bilam ka paagɛ daar-sɛka tɩ ya wʋn fõrgɛ tẽŋa la.

¹² Ya sãn paagɛ kẽ yire pʋam, ya pʋ'ʋsɛ ba yetɩ: ‹Sũ-mã'asʋm wʋn bɔna la ya.›

¹³ La yire la dõma sãn to'oge ya, ya sũ-mã'asʋm wʋn bɔna la ba. La ba sãn zagsɛ ka to'oge ya, ya sũ-mã'asʋm wʋn weege ya zẽ'am.

¹⁴ La yi-sɛka, bɩɩ tẽn-sɛka nẽrba sãn ka to'oge ya, bɩɩ ka selse ya yetɔga, ya yese zẽ'e-ẽŋa dee pɩɩsɛ ya nãma tẽntõnnɔ basɛ mĩ.

¹⁵ Mam yetɩ ya la sɩra sɩra, tɩ sarɩyadia daarɛ tẽn-ẽŋa dõma wʋn yẽ toogo gãnna Sodom la Gomõorɩ tẽnsɩ nẽrba.»

Azezi yetɩ nãmsgɔ n wʋn wa'am

¹⁶ Azezi le yetɩ: «Bɩsɛ-ya, mam tõm ya wʋ piisi saasaadõma tẽŋasʋka. Bɛla ĩyã, dɛna-ya yɛm dõma wʋ bõnsɛ'ɛdõma, la ya ãna wʋ na'adawɛma n ka tarɩ yelle se'em na.

¹⁷ Guuse-ya ya mẽŋa la nẽrba la. Se'ere n soe la, ba wʋn wa yõgɛ ya mɛ tarɩ sẽŋɛ sarɩyadia zẽ'esʋm, dee wẽ ya ba wẽndeto pʋam.

¹⁸ La ba wʋn yõgɛ ya sẽŋɛ gɔmnadõma, la na'adõma nẽŋam, yãma n dolɩ mam na ĩyã, tɩ ya wʋn dɛna kaset-dõma tɔgɛ bɔ bãma la bu-zãŋsɩ.

¹⁹ La ba sãn tarɩ ya sẽŋɛ, da fabla-ya yãma n wʋn tɔgɛ se'em, bɩɩ yãma n wʋn tɔgɛ sɛla yelle. Se'ere n soe la, wakat-ẽŋa mẽŋa Nawẽnnɛ Sɩa wʋn bɔ ya bõn-sɛka tɩ ya wʋn tɔgɛ.

²⁰ La dagɩ yãma mẽŋa n wʋn tɔgɛ, la de la ya Sɔ Nawẽnnɛ Sɩa la n boe ya pʋam na n wʋn tɔgɛ.

²¹ Sɔbia wʋn botɩ ba yõkɛ a sɔbia kʋ. La sɔdõma mẽ wʋn ẽŋɛ ba kɔma bɛla. La kɔma mẽ wʋn zɛbɛ la ba dɔgrɩba, botɩ ba kʋ ba.

²² Nẽrba wuu wʋn sise ya mam yʋ'ʋrɛ la ĩyã. La sɛka n ze'ele kãŋkãŋɛ ka paagɛ ba'asgɔ, a wʋn yẽ fãarɛ.

²³ Ba sãn nãmsɛ ya tẽŋa ayɩla pʋam, ya zoe sẽŋɛ tẽŋa ayẽma. Mam yetɩ ya la sɩra, tɩ ya kãn yãŋɛ kaagɛ Ɩsrayɛlɩ tẽnsɩ ba'asɛ dee tɩ mam n de Nẽrsaala Dayʋa la leme wa'am.

²⁴ Karẽnbia ka gãnnɩ a karẽnsãama, la tõntõnna mẽ ka gãnnɩ a zuudãana.

²⁵ La karẽnbia sãn wa ãna wʋ a karẽnsãama la, la tõntõnna sãn wa ãna wʋ a zuudãana la, la seke mɛ. Ban wi'iri yidãana la tɩ Abelzebuli n de Asũtãana la, ba wʋn tʋʋra a yire la dõma gãnna la bɛla.»

La masɛ tɩ ya zɔta la Nawẽnnɛ

²⁶ «Bɛla, da zɔta-ya nẽrsaalba, tɩ bõn-sɛka woo n lile, wʋn lilge. La bõn-sɛka woo n sʋgɛ, wʋn puke.

²⁷ Mam n yele ya se'em lika pʋam wã, tɔgɛ-ya ẽ peelem pʋam. La sɛla tɩ mam waasʋm ya la, zom-ya deto zuto mõolɛ ẽ.

²⁸ Da zɔta-ya sɛba n kʋʋrɩ ĩyã, dee ka tãna wʋn kʋ sɩa la. Zɔta-ya Nawẽnnɛ n tã wʋn botɩ ya ĩyã, la ya sɩa sã'am bug-tẽŋa la.

²⁹ Ba ka koosrɩ mõom niinto bayi la lag-kõbrɛ ayɩla mã'a? La baa niila ayɩla kãn ki, tɩ la sãn dagna ya Sɔ Nawẽnnɛ n sakɛ.

³⁰ La baa yãma zuugo zomto, Nawẽnnɛ mi ba wuu kãllɛ mɛ.

³¹ Bɛla ĩyã, da zɔta-ya dabeem, yãma tarɩ yõorɔ gãnna niinto zozo'e mɛ.

³² Nẽr-sɛka woo n wʋn ze'ele nẽrba nẽŋam yetɩ ẽŋa de la mam nẽra, mam mẽ wʋn ze'ele mam Sɔ Nawẽnnɛ n boe saazuum nẽŋam yetɩ a de la mam nẽra.

³³ La nẽr-sɛka woo n sɩ'ɩsɛ nẽrba nẽŋam yetɩ ẽŋa ka mi mam, mam mẽ wʋn sɩ'ɩsɛ mam Sɔ Nawẽnnɛ n boe saazuum nẽŋam tɩ mam ka mi ẽ.»

Tɩ nõŋɛ Azezi gãnna

³⁴ «Da tẽ'esɛ-ya tɩ mam tarɩ la nõ-yẽnnɛ wa'am dũnia zuo. Mam ka wa'am tɩ m botɩ nẽrba dɛna nõorɛ ayɩla dũnia zuo, la de la welgre tɩ mam tarɩ wa'am.

³⁵ Se'ere n soe la, mam wa'am tɩ m welge la dayɔɔsɩ la ba sɔdõma, la pugunto la ba madõma, la dayɔɔsɩ pɔgba la ba sɩrba madõma.

³⁶ Tɩ nẽra mẽŋa yir-dõma wʋn dɛna a bɛ'ɛba.

³⁷ Nẽr-sɛka n nõŋɛ a sɔ bɩɩ a ma gãnna mam, a ka masɛ tɩ a dɛna mam nẽra. La nẽr-sɛka woo n nõŋɛ a dayʋa bɩɩ a pɔyʋa gãnna mam, a ka masɛ tɩ a dɛna mam nẽra.

³⁸ La nẽr-sɛka woo n ka sakɛ nãmsgɔ wʋ nẽra n zɛɛrɩ a kũm dɔ-puurŋa dɔla mam, a ka masɛ tɩ a dɛna mam nẽra.

³⁹ La nẽr-sɛka woo n boorɩ tɩ a gu a vɔm, a wʋn koŋe ẽ. La nẽr-sɛka n basɛ a vɔm mam ĩyã, a wʋn yẽ ẽ.»

Nẽr-sɛba n tarɩ yɔɔrɔ

⁴⁰ «Nẽr-sɛka woo n to'oge ya, a to'oge la mam. La nẽr-sɛka woo n to'oge mam, a to'oge la sɛka n tõm mam na.

⁴¹ La nẽr-sɛka woo n to'oge Nawẽnnɛ nõtɔ'ɔsa ẽn de Nawẽnnɛ nõtɔ'ɔsa la ĩyã, a wʋn to'oge Nawẽnnɛ nõtɔ'ɔsa yɔɔrɔ. La nẽr-sɛka woo n to'oge sɩra dãana ẽn de sɩra dãana la ĩyã, a wʋn to'oge sɩra dãana yɔɔrɔ.

⁴² La nẽr-sɛka woo n bɔ mam nẽrba wã ayɩla ko-mã'asga tɩ a yũ, ẽn de mam karẽnbia la ĩyã, mam yetɩ ya la sɩra, tɩ a kãn koŋe yɔɔrɔ.»