အွန်လိုင်း သမ္မာကျမ်းစာ

« အရင်

နောက်တစ်ခု »

Aluki 24 - Farefare Ninkaré

Azezi vo'ore
( Amatie 28:1-10 , Amarkɩ 16:1-8 , Azã 20:1-10 )

¹ Lasrɩ daarɛ bulika yʋ'ʋŋɔ yʋ'ʋŋɔ tɩ pɔgsɩ la isge dɩkɛ kaam na tɩ ba mãasʋm na tarɩ sẽŋɛ yɔɔm na.

² Ban paagɛ la, ba yẽ tɩ kugre la tɩ ba dɩkɛ lige yɔɔgɔ nõorɛ la bilge mɛ gã kẽnkɛrŋa.

³ Tɩ ba kẽ yɔɔgɔ la pʋam bɩsɛ ka yẽ Zuudãana Azezi kũm na.

⁴ Tɩ ba zɛ yɛrɩ, bilam mẽŋa tɩ ba yẽ bʋraasɩ bayi n ze lɛm ba, yɛ futo tɩ ba yẽgra.

⁵ Tɩ pɔgsɩ la palẽŋa ẽkɛ, tɩ ba suure ba zuto tẽŋa. Tɩ bʋraasɩ la soke ba yetɩ: «Bẽm tɩ yãma ɛɛra nẽr-sɛka n vɔɩ sɛba n ki zẽ'am?

⁶ A ka boe kalam. A vo'oge mɛ. Tẽegɛ-ya ẽŋa n daan nãn boe Galile dee yele ya se'em na,

⁷ a yetɩ, ba wʋn yõkɛ Nẽrsaala Dayʋa la mɛ tarɩ ka bɔ tõon-be'ero dõma, tɩ ba ka ẽ dɔ-puurŋa zuo, la dabsa atã daarɛ, a wʋn vo'oge mɛ.»

⁸ Tɩ ba yãŋa tẽegɛ a yetɔga la,

⁹ ze'ele yɔɔm na lebe kule ka yele a karẽnbiisi pia la ayɩla la, la nẽrba basɛba la wuu lan ẽŋɛ se'em na wuu.

¹⁰ Ba daan de la Amaari n ze'ele Magdala, la Azanɩ, la Azakɩ ma Amaari, la pɔgsɩ basɛba, bãma n daan tɔgɛ yel-bãna bɔ Azezi karẽnbiisi pia la ayɩla la.

¹¹ La ba daan tẽ'esɛ tɩ pɔgsɩ la n yele ba se'em na ka tarɩ võorɛ, tɩ ba ka sakɛ tɩ la de sɩra.

¹² La Apɩyɛɛrɩ isge mɛ zoe sẽŋɛ yɔɔm na ka veese bɩsɛ, yẽ tãna la mã'a, lebe kule ka zɛ yɛrɩ bõn-sɛba n ẽŋɛ la ĩyã.

Karẽnbiisi tʋ'ʋsɛ Azezi Emayusi sore zuo
( Amarkɩ 16:12-13 )

¹³ Daar-ẽŋa mẽŋa tɩ Azezi karẽnbiisi bayi wɛ'ɛsa tẽŋa ayɩla yʋ'ʋrɛ n de Emayusi. Bilam na Zerizalɛm zãagɛ masɛ wʋ kilomẽtrɩ pia la ayɩla.

¹⁴ Ba daan tɔgrɩ la taaba bõn-sɛba wuu n ẽŋɛ la yelle.

¹⁵ La ban daan sõsrɩ la taaba la, tɩ Azezi lɛm ba, tɩ ba lagɩm sẽnna.

¹⁶ La ba yɛm lige mɛ, tɩ ba ka bãŋɛ ẽ.

¹⁷ Tɩ a soke ba yetɩ: «Bẽm yelle tɩ yãma sẽnna dee tɔgra la taaba?» Tɩ ba ze'ele zũŋe ba nẽnsɩ.

¹⁸ Tɩ ba nẽra ayɩla yʋ'ʋrɛ n de Akleopasɩ soke ẽ yetɩ: «Fõn mã'a n boe Zerizalɛm ka bãŋɛ bõn-sɛka n ẽŋɛ dabsa wã pʋam?»

¹⁹ Tɩ a soke ba yetɩ: «Bẽm ẽŋɛ?» Tɩ ba yele ẽ yetɩ: «Azezi n ze'ele Nazarɛtɩ la, a de la Nawẽnnɛ nõtɔ'ɔsa n tarɩ pãŋa a tõoma la a yetɔga pʋam, Nawẽnnɛ la nẽrba wuu nifum.

²⁰ Tɩ tõma kãabgɔ kẽma nẽŋadõma, la tẽŋa la kẽma botɩ ba yõkɛ ẽ, di a sarɩya yetɩ ba kʋ ẽ, tɩ ba ka ẽ dɔ-puurŋa zuo, tɩ a ki.

²¹ La tõma daan tarɩ pʋtẽ'erɛ tɩ la de la ẽŋa n wʋn fãagɛ Ɩsrayɛlɩ dõma la. La zĩna de la dabsa atã n wãna tɩ yel-ẽna wã ẽŋɛ.

²² La tõma pɔgsɩ basɛba n botɩ tõma palẽŋa ẽkɛ. Ba isge la bulika yʋ'ʋŋɔ yʋ'ʋŋɔ sẽŋɛ yɔɔm na,

²³ leme wa yele tõma yetɩ bãma ka yẽ kũm na, bãma yẽ la malɛkadõma, tɩ ba yele bãma yetɩ a vo'oge mɛ.

²⁴ Tɩ tõma nẽrba basɛba mẽ sẽŋɛ yɔɔm na, ka yẽ tɩ la sɩrɩ ãn wʋ pɔgsɩ la n yele se'em na. La ba ka yẽ Azezi.»

²⁵ Tɩ Azezi yele ba yetɩ: «Yɛm-ka-like dõma, bẽm tɩ ya ka bɔ Nawẽnnɛ nõtɔ'ɔsrɩba n yʋʋn yele se'em na wuu sɩra tɔtɔ?

²⁶ La ka masɛ nɩ tɩ Krisi nãmsɛ la bõn-bãna wuu, dee yãŋa di a na'am na?»

²⁷ Tɩ a yãŋa pa'alɛ ba bõn-sɛba wuu n gʋlsɛ tɔgra ẽŋa yelle Nawẽnnɛ gõnnɔ la pʋam, a pɔsɛ pa'alɛ la Amoyisi, la Nawẽnnɛ nõtɔ'ɔsrɩba la wuu n gʋlsɛ la võorɛ n de se'em.

²⁸ La ban daan sẽŋɛ ka lɛm tẽn-sɛka tɩ ba we la, a ẽŋɛ wʋ a boorɩ tɩ a tole mɛ na.

²⁹ Tɩ ba sose ẽ yetɩ: «Doose tõma kẽ gã'arɛ, se'ere n soe la, wẽnnɛ kẽ mɛ, zẽ'a boe mĩ sɔbra mɛ.» Tɩ a sakɛ doose ba kẽ.

³⁰ La ba daan zĩ'ire mɛ tɩ ba di, tɩ Azezi dɩkɛ borborɩ pʋ'ʋsɛ Nawẽnnɛ, dee fiise bɔ ba.

³¹ Tɩ ba yɛm yãŋa like, tɩ ba bãŋɛ ẽŋa n de nẽr-sɛka. Tɩ a bɔɩ ba nẽŋam bilam mẽŋa.

³² Tɩ ba yɛta taaba yetɩ: «Ẽŋa n tɔgɛ yetɔga la pa'alɛ tõma, dee tɔgra yel-sɛba n boe Nawẽnnɛ gõŋɔ pʋam pa'ala tõma sore zuo la, tõma sũure ka ẽŋɛ yẽlʋm zo'oge sɩra?»

³³ Tɩ ba isge wakat-ẽŋa lebe Zerizalɛm ka yẽ a karẽnbiisi pia la ayɩla la, la sɛba n boe ba zẽ'am na tɩ ba lagsɛ taaba mɛ.

³⁴ Tɩ ba yele ba yetɩ: «Tɩ Zuudãana la sɩrɩ vo'oge mɛ, Asimõ yẽ ẽ mɛ.»

³⁵ Tɩ nẽrba bayi la mẽ yele ba bõn-sɛba n ẽŋɛ sore la zuo, la ẽŋa n fiisri borborɩ la, bãma n bãŋɛ ẽ se'em.

Azezi puke a mẽŋa pa'alɛ a karẽnbiisi
( Amatie 28:16-20 , Amarkɩ 16:14-18 , Azã 20:19-23 , Tõoma 1:6-8 )

³⁶ Ban boe mĩ tɔgra bɛla la, tɩ Azezi darɛ wa'am wa zɛ ba tẽŋasʋka, yele ba yetɩ: «Sũ-mã'asʋm bɔna la ya.»

³⁷ Tɩ dabeem yõkɛ ba, tɩ ba palẽŋa ẽkɛ, tɩ ba tẽ'esɛ tɩ bãma yẽ la ki-isgne.

³⁸ Tɩ a yele ba yetɩ: «Bẽm tɩ ya palẽŋa ẽkɛ, tɩ ya tẽ'esra pʋtẽ'era bʋyi bʋyi?

³⁹ Bɩsɛ-ya mam nu'usi, la mam nãma, la de la mam. Sa'abɛ-ya mam bɩsɛ, ki-isgne ka tarɩ nẽnnɔ, la kõba, wʋ yãma n yẽ mam n tarɩ se'em wã.»

⁴⁰ A tɔgɛ bɛla dee pa'alɛ ba la a nu'usi, la a nãma.

⁴¹ Ba sũure n ãn yẽlʋm dee tɩ la di'ige ba, tɩ ba ken ka bɔ sɩra, tɩ a soke ba yetɩ: «Yãma tarɩ sɛla wʋn di kalam mɛ bɩɩ?»

⁴² Tɩ ba dɩkɛ zũn-sẽ'enɛ bɔ ẽ.

⁴³ Tɩ a to'oge obe ba nifum bilam.

⁴⁴ Bɛla poorʋm, a yele ba yetɩ: «Mam n daan ken bɔna la yãma la, mam n yele ya bõn-sɛba la n wãna. Mam daan yele ya yetɩ: Dẽnɩ tɩ bõn-sɛba wuu n gʋlsɛ mam yelle Amoyisi lɔɔ gõnnɔ pʋam, la Nawẽnnɛ nõtɔ'ɔsrɩba gõnnɔ pʋam, la yõoma gõnnɔ pʋam na ẽŋɛ.»

⁴⁵ Tɩ Azezi like ba yɛm tɩ ba bãŋɛ bõn-sɛba n boe Nawẽnnɛ gõnnɔ pʋam na võorɛ,

⁴⁶ yele ba yetɩ: «La gʋlsɛ yetɩ, Krisi la wʋn nãmsɛ mɛ ki, la dabsa atã daarɛ a wʋn vo'oge mɛ.

⁴⁷ Ẽŋa yʋ'ʋrɛ ĩyã tɩ ba wʋn pɔsɛ Zerizalɛm mõolɛ bɔ buuri wuu yetɩ, ba teege yɛm basɛ tõon-be'ero, tɩ Nawẽnnɛ wʋn basɛ ba tõon-be'ero taalɛ.

⁴⁸ Yãma n de bõn-bãma wuu kaset-dõma wʋn pa'alɛ nẽrba wuu.

⁴⁹ La mam wʋn tõm sɛka tɩ mam Sɔ daan bĩŋe nõorɛ bɔ ya la, tɩ a wa'am wa bɔna la ya. Bɔna-ya Zerizalɛm gu'ura halɩ tɩ a ze'ele saazuum wa'am wa bɔ ya pãŋa.»

Azezi zom Nawẽnnɛ yire
( Amarkɩ 16:19-20 , Tõoma 1:9-11 )

⁵⁰ Bɛla poorʋm, Azezi tarɩ ba mɛ tẽŋa la pʋam yese sẽŋɛ ka lɛm Betani, zẽkɛ a nu'usi saazuum kã kã'a-sõma bɔ ba.

⁵¹ Ẽŋa n boe mĩ kã'ara kã'a-sõma bɔ'ɔra ba la, a basɛ ba mɛ dee zom Nawẽnnɛ yire.

⁵² Tɩ karẽnbiisi la ka dũma tẽŋa nã'asɛ ẽ, dee lebe Zerizalɛm la sũ-yẽlga zozo'e.

⁵³ Ba daan boe la Wẽnde-kãtʋm na daarɛ woo pẽgra Nawẽnnɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ