အွန်လိုင်း သမ္မာကျမ်းစာ

Aluki 23 - Farefare Ninkaré

Ba tarɩ Azezi sẽŋɛ gɔmna Apilatɩ zẽ'am
( Amatie 27:1-2 , 11-14 , Amarkɩ 15:1-5 , Azã 18:28-38 )

¹ Tɩ ba wuu tarɩ Azezi sẽŋɛ Apilatɩ zẽ'am

² ka dõrɛ ẽ yetɩ: «Tõma yẽ bʋra-ẽna tɩ a boe mĩ dãmna la tɩ tẽŋa wã dee yetɩ ba da yɔɔra lampo bɔ'ɔra Rom na-keko, dee ken yetɩ ẽŋa de la Krisi, ẽŋa de la naba.»

³ Tɩ Apilatɩ soke ẽ yetɩ: «Fõn de la Zifdõma naba?» Tɩ Azezi lerge ẽ yetɩ: «La de la fõn yele se'em na.»

⁴ Tɩ Apilatɩ yele kãabgɔ kẽma nẽŋadõma la, la nẽr-kʋʋŋɔ la yetɩ: «Mam ka yẽ bʋraaga wã yel-sɛka n wʋn botɩ tɩ di a sarɩya.»

⁵ Tɩ ba sĩna dee bʋla yetɩ: «A zãsŋɔ la tɩ a pɔsɛ zãsʋm Galile la Zude wa paam kalam na, tarɩ la dãmŋɔ sẽna nẽrba pʋam.»

Ba tarɩ Azezi sẽŋɛ A'erɔdɩ zẽ'am

⁶ Apilatɩ n wõm bɛla la, a soke mɛ tɩ a bãŋɛ, bʋra-ẽna sãn dɛna Galile nẽra.

⁷ La ẽn bãŋɛ tɩ a ze'ele la Galile n de naba A'erɔdɩ so'olʋm pʋam na, tɩ a botɩ ba tarɩ ẽ sẽŋɛ ka bɔ naba A'erɔdɩ. A'erɔdɩ mẽ daan boe la Zerizalɛm wakat-ẽŋa.

⁸ La A'erɔdɩ n yẽ Azezi la, a sũure ẽŋɛ yẽlʋm mɛ halɩ, se'ere n soe la, a wõm Azezi yelle tɩ la yuuge mɛ, tɩ a bɔɔra tɩ a yẽ ẽ. A tarɩ pʋtẽ'erɛ tɩ a wʋn tõm na tõon-yãlma tɩ a yẽ.

⁹ A'erɔdɩ daan soke Azezi la sokrɩsɩ zozo'e, tɩ a ka lerge ẽ.

¹⁰ Tɩ kãabgɔ kẽma nẽŋadõma, la lɔɔ karẽnsãandõma n boe mĩ na dõrɛ ẽ zozo'e yetɩ, a tõm na be'em.

¹¹ Tɩ A'erɔdɩ la a sʋdaasɩ yaalɛ ẽ, dɩkɛ fu-sõŋɔ yɛ ẽ, tɩ ba la ẽ, dee tarɩ ẽ lebe ka bɔ Apilatɩ.

¹² Daar-ẽŋa, A'erɔdɩ la Apilatɩ n de bɛ'ɛba la taaba la, lebge la sɩtɔ.

Apilatɩ di Azezi sarɩya tɩ ba kʋ ẽ
( Amatie 27:15-26 , Amarkɩ 15:6-15 , Azã 18:39—19:16 )

¹³ Tɩ Apilatɩ wi kãabgɔ kẽma nẽŋadõma, la tẽŋa la kẽma, la nẽrba wuu

¹⁴ yele ba yetɩ: «Yãma tarɩ bʋra-ẽna wa'am wa bɔ mam yetɩ a tarɩ la dãmŋɔ sẽna nẽrba pʋam. La mam n soke ẽ yãma nẽŋam kalam wã, mam ka yẽ a yel-sɛka n botɩ yãma dõrɛ ẽ na.

¹⁵ La A'erɔdɩ mẽ ka yẽ a yelle, bɛla tɩ a tarɩ ẽ leme wa'am wa bɔ tõma. Bʋraaga wã ka tõm be'em n masɛ tɩ ba kʋ ẽ.

¹⁶ Mam wʋn botɩ ba wẽ ẽ mɛ la ka'asa dee basɛ ẽ tɩ a fõrgɛ.» [

¹⁷ Zɔɔg-basɛ kibsa wakatɛ woo dẽnɩ tɩ Apilatɩ yese sɛba n boe yʋ'a deem nẽra ayɩla basɛ.]

¹⁸ Tɩ ba wuu kɔ'ɔn lagɩm tãsra yetɩ: «Kʋ bʋra-ẽna, dee yese Abarabasɩ bɔ tɔ.»

¹⁹ Abarabasɩ daan dãmɛ na tẽŋa, kʋ nẽra, tɩ ba yõkɛ ẽ yʋ.

²⁰ Tɩ Apilatɩ le tɔgra la nẽr-kʋʋŋɔ la bɔɔra tɩ a basɛ Azezi.

²¹ Tɩ ba zagsɛ, dee kaasra yetɩ: «Ka ẽ dɔ-puurŋa zuo, ka ẽ dɔ-puurŋa zuo.»

²² Tɩ Apilatɩ le yele ba nõor-atã pʋam yetɩ: «Bẽm be'em tɩ a tõm? Mam ka yẽ yel-sɛka tɩ a tõm tɩ la masɛ tɩ ba kʋ ẽ. Mam wʋn botɩ ba wẽ ẽ na ka'asa dee basɛ ẽ.»

²³ Tɩ ba ken kaasra ke'enke'em yetɩ: «Ka ẽ dɔ-puurŋa zuo.» Tɩ ba kaasga la zo'oge gãŋɛ.

²⁴ Tɩ Apilatɩ sakɛ ẽŋɛ ban boorɩ se'em na,

²⁵ yese bʋra-sɛka n daan dãmɛ tẽŋa kʋ nẽra la basɛ, ẽŋa tɩ nẽrba la boorɩ tɩ a basɛ, dee dɩkɛ Azezi bɔ sʋdaasɩ tɩ ba ẽŋɛ ẽ nẽrba la n boorɩ se'em na.

Ba ka Azezi dɔ-puurŋa zuo
( Amatie 27:32-44 , Amarkɩ 15:21-32 , Azã 19:17-27 )

²⁶ Ban tarɩ Azezi wɛ'ɛsa la, ba tʋ'ʋsɛ la Sirɛnɩ tẽŋa bʋraaga yʋ'ʋrɛ n de Asimõ n ze'ele va'am lɛmna, tɩ ba yõkɛ ẽ botɩ a to'oge dɔ-puurŋa la buke dɔla Azezi poore.

²⁷ La nẽr-kʋʋŋɔ n dolɩ ẽ, tɩ pɔgsɩ kɛlla fabla wẽ'era nupʋ'ʋrɔ a ĩyã.

²⁸ Tɩ Azezi wẽrgɛ ba bɔba yele ba yetɩ: «Zerizalɛm pɔgsɩ, da kɛlla-ya mam ĩyã, kɛlla-ya ya mẽŋa la ya kɔma ĩyã.

²⁹ Se'ere n soe la, dabsa sẽna tɩ ba wʋn yetɩ: ‹Pɔg-kõndɔgrɩba, la sɛba n ka dɔgɛ, sɛba tɩ kɔma ka mõgɛ ba bĩ'isum tarɩ zu-yẽlga.›

³⁰ La nẽrba wʋn wa yele tãnsɩ tɩ ba lui dĩ ba, dee yele kũnkũma yetɩ, ba lile ba.

³¹ Se'ere n soe la, ba sãn ɩta dɔ-mã'asa wãna, la wʋn ẽŋɛ dɔ-kɛ'ɛsɩ la wãne?»

³² La ba tarɩ la tõon-be'ero dõma bayi sẽŋɛ tɩ ba lagɩm ba la Azezi kʋ.

³³ La ba paagɛ la zẽ'a tɩ ba wi'iri tɩ Zuwaŋrɛ, bilam tɩ ba ka Azezi dɔ-puurŋa zuo, dee ka tõon-be'ero dõma bayi la dɔ-puursi zuto, ayɩla a zʋʋgɔ bɔba, ayɩla a gɔbga bɔba.

³⁴ Tɩ Azezi yetɩ: «M Sɔ, basɛ ba tõon-be'ero taalɛ, tɩ ba ka mi ban ɩtɩ sɛla.» Tɩ ba dɩkɛ a futo tɩ ba pʋɩ taaba, pɔsɛ tɩ ba bãŋɛ nẽra woo n wʋn to'oge fu-sɛka.

³⁵ La nẽrba la ze la bilam bɩsra ẽ, tɩ Zifdõma kẽma la la'ara ẽ yetɩ: «A fãagɛ nẽrba basɛba mɛ, a sãn sɩrɩ dɛna la Krisi tɩ Nawẽnnɛ looge la, a fãagɛ a mẽŋa.»

³⁶ Tɩ sʋdaasɩ la mẽ la'ara ẽ, lɛm dɩkɛ dã-mĩ'isgo bɔ ẽ

³⁷ yetɩ: «Fʋ sãn dɛna Zifdõma naba, fãagɛ fʋ mẽŋa.»

³⁸ La ba gʋlsɛ la gʋlsgɔ lablɛ a zuum yetɩ: «Ẽna wã de la Zifdõma naba la.»

³⁹ Tɩ tõon-be'ero dõma la n boe dɔ-puursi zuto la ayɩla tʋ Azezi yetɩ: «Dagɩ fõn de Krisi la? Fãagɛ fʋ mẽŋa dee fãagɛ tõma.»

⁴⁰ Tɩ ayẽma la tãsɛ a tadãana la yetɩ: «Fõn ka zotɩ Nawẽnnɛ? Ba wʋn kʋ tõma wuu mɛ.

⁴¹ La sãn dɛna tõma, tõma n tõm tõon-be'ero la, la masɛ mɛ tɩ ba kʋ tõma, la nẽr-ẽna wã ka ẽŋɛ sɛla n de be'em.»

⁴² Dee yele Azezi yetɩ: «Fʋ sãn wa dita fʋ na'am na, fʋ tẽegɛ m yelle.»

⁴³ Tɩ Azezi yele ẽ yetɩ: «Mam yetɩ fʋ la sɩra, tɩ zĩna nõo fʋ wʋn bɔna la mam Nawẽnnɛ yire.»

Azezi kũm
( Amatie 27:45-56 , Amarkɩ 15:33-41 , Azã 19:28-30 )

^44-45 La daan de wʋ wʋntɛɛŋa zuu-tẽŋasʋka, tɩ tẽŋa la wuu lebge lika, tɩ wʋntɛɛŋa ka le yẽkɛ halɩ ka paagɛ zaanõorɛ karf-atã. Tɩ fuugo la n yuli Wẽnde-kãtɛ la pʋam beŋe zẽ'e-sõŋɔ la ãagɛ pʋsʋka.

⁴⁶ Tɩ Azezi tɔgɛ ke'enke'em yetɩ: «M Sɔ, mam basrɩ m sɩa la fõn nu'usum.» A yele la bɛla dee ki.

⁴⁷ Tɩ Rom sʋdaasɩ kɛ'ɛma yẽ lan ẽŋɛ se'em na, nã'asra Nawẽnnɛ yetɩ: «Asɩra, bʋraaga wã de la nẽr-sõŋɔ.»

⁴⁸ La nẽr-kʋʋŋɔ la wuu n wa'am tɩ ba bɩsɛ lan wʋn ẽŋɛ se'em na, yẽ lan ẽŋɛ se'em na mɛ. Tɩ ba lebe kulla, dee wẽ'era nupʋ'ʋrɔ.

⁴⁹ La nẽr-sɛba wuu n mi Azezi, la pɔg-sɛba n doose ẽ halɩ Galile wa'am na, ze la kẽnkɛrŋa bɩsra lan ɩtɩ se'em na.

Azezi laarɛ
( Amatie 27:57-61 , Amarkɩ 15:42-47 , Azã 19:38-42 )

⁵⁰ Bʋraaga ayɩla yʋ'ʋrɛ n daan de Azozɛfʋ. A de la Arimate tẽŋa nẽra, dee dɛna Zifdõma sarɩyaditba nẽra ayɩla. A de la nẽr-sõŋɔ tɩ a ɩrgɔ wuu masɛ,

⁵¹ la a daan gu'uri mɛ tɩ Nawẽnnɛ wa'am wa di na'am nẽrba tẽŋasʋka. La ba sarɩyaditba la n daan looge yɛm tɩ ba ẽŋɛ se'em na, a daan ka sakɛ.

⁵² Azezi n ki la, ẽŋa n sẽŋɛ Apilatɩ zẽ'am ka sose Azezi kũm na, tɩ Apilatɩ sakɛ.

⁵³ Tɩ a sike kũm na vile ẽ na tãnnɛ tarɩ ka bĩŋe yɔɔgɔ tɩ ba tũ tãmpĩa ĩyã nãn ka laagɛ nẽra mĩ pʋam.

⁵⁴ La de la daar-ẽŋa tɩ Zifdõma mãasnɩ ba vo'osgo daarɛ. Wẽnnɛ sãn kẽ tɩ ba vo'osgo daarɛ wʋn pɔsɛ.

⁵⁵ Tɩ pɔg-sɛba n doose Azezi Galile wa'am na, doose Azozɛfʋ sẽŋɛ ka yẽ yɔɔgɔ la, dee yẽ ban bĩŋe Azezi kũm na se'em,

⁵⁶ dee lebe kule ka mãasʋm tɩdarɛ kaam buuri to'oto'ore tɩ ba tarɩ wa ẽŋɛ kũm na. La vo'osgo daarɛ la ba vo'ose wʋ Amoyisi lɔɔ la n bɔ nõorɛ se'em na.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ