အွန်လိုင်း သမ္မာကျမ်းစာ

Aluki 17 - Farefare Ninkaré

Tɩ da botɩ nẽra basɛ Nawẽnnɛ sore, la tɩ basɛ taaba tõon-be'ero taalɛ
( Amatie 18:6-7 , 21-22 , Amarkɩ 9:42 )

¹ Tɩ Azezi yele a karẽnbiisi la yetɩ: «La ka tã tɩ bõn-sɛba n pã'asrɩ nẽrba tɩ ba basra Nawẽnnɛ sore la ka wa'am. La nẽr-sɛka n wʋn botɩ bõn-bãma wa'am na wʋn yẽ toogo.

² Ba sãn dɩkɛ nẽerɛ kug-kãtɛ lʋ yulse a yugla lobe ẽ basɛ ko-kãtɛ pʋam, n sõɩ ẽŋa n wʋn botɩ bi-pɩka ayɩla basɛ Nawẽnnɛ sore.

³ Guuse-ya ya mẽŋa. Fʋ sɔbia sãn tõm be'em, fʋ kã'an ẽ. La a sãn teege yɛm basɛ tõon-be'ero la, fʋ basɛ ẽ taalɛ.

⁴ La a sãn ẽŋɛ fʋ be'em nõorɛ ayopɔɩ daarɛ ayɩla, dee leme fʋ zẽ'am nõorɛ ayopɔɩ wa yetɩ: ‹Mam tõm na be'em, bɔ mam sugri›, dẽnɩ tɩ fʋ basɛ ẽ taalɛ.»

Tɩ bɔ Azezi sɩra

⁵ Tɩ Zuudãana Azezi karẽnbiisi pia la ayi la yele ẽ yetɩ: «Botɩ tɩ bɔ fɔ sɩra zo'oge.»

⁶ Tɩ Zuudãana la yele ba yetɩ: «Ya sãn bɔ mam sɩra fẽe wʋ sɔ'ɔrɔ biire la, ya tã wʋn yele kẽnkãŋa wã tɩ a võogɛ sẽŋɛ ka sele mõgrɛ pʋam ke, la a wʋn sakɛ ya nõorɛ mɛ.»

Tõntõnna masɛ mɛ tɩ a tõm a tõonɛ

⁷ «Tẽ'esɛ-ya bɩsɛ, nẽra sãn bɔna yãma pʋam tara tõntõnna tɩ a kɔɔra, bɩɩ gu'ura a dũnsi, tɩ tõntõnna la sãn ze'ele va'am wa'am, a wʋn yele ẽ mɛ yetɩ, wa'am wa di bɩɩ?

⁸ Ayɛɩ, a wʋn yele ẽ yetɩ: ‹Dʋgɛ m dia, dee teege fuugo yɛ, tarɩ dia la wa'am wa bɔ ma tɩ m di. M sãn di dee yũ ba'asɛ, tɩ fʋ mẽ yãŋa di dee yũ.›

⁹ La zuudãana la n yele tõntõnna la tɩ a ẽŋɛ se'em, tɩ a ẽŋɛ la, zuudãana la kãn pʋ'ʋsɛ ẽ.

¹⁰ Bɛla mẽ, ya sãn ẽŋɛ sɛla woo tɩ Nawẽnnɛ yele ya tɩ ya ẽŋɛ la, ya yetɩ: ‹Tõma wen dɛna la tõntõnɩba, tõma ka narɩ pʋ'ʋsgɔ, se'ere n soe la, la de la tɩ tõoma, la masɛ mɛ tɩ tɩ tõm.› »

Azezi botɩ kõnkɔma pia yẽ ĩmã'asʋm

¹¹ Azezi daan boe la sore wɛ'ɛsa Zerizalɛm dɔla Samaari la Galile tẽŋasʋka,

¹² paagɛ tẽŋa ayɩla pʋam, tɩ kõnkɔma pia tʋ'ʋsra ẽ, ze'ele kẽnkɛrŋa

¹³ kaasra yetɩ: «Zuudãana Azezi, zoe tɩ ninbãalga.»

¹⁴ La ẽn yẽ ba la, tɩ a yele ba yetɩ: «Sẽŋɛ-ya kãabgɔ kẽma la zẽ'am tɩ ba ka bɩsɛ ya ĩyã la n ãn se'em.» La ban sẽnnɩ wɛ'ɛsa la, tɩ bã'asɩ la basɛ ba, tɩ ba ãna sõŋa.

¹⁵ La ba nẽra ayɩla n yẽ tɩ a kõnkɔm na basɛ ẽ na, tɩ a lɛbra Azezi zẽ'am dee tɔgra ke'enke'em pẽgra Nawẽnnɛ,

¹⁶ sẽŋɛ ka ka dũma dɩkɛ a nẽŋa võglɛ tẽŋa Azezi nẽŋam pʋ'ʋsɛ ẽ. A daan de la Samaari nẽra.

¹⁷ Tɩ Azezi yetɩ: «La dagɩ bãma pia n yẽ ĩmã'asʋm? Tɩ bawɛɩ la bɔna la bɛ?

¹⁸ Bẽm tɩ ẽna n de sãana la mã'a n leme wa'am tɩ a pʋ'ʋsɛ Nawẽnnɛ a yel-sõnnɛ?»

¹⁹ Dee yele ẽ yetɩ: «Fõn bɔ mam sɩra la n botɩ fʋ yẽ fãarɛ, isge sẽŋɛ.»

Nawẽnnɛ n diti na'am se'em
( Amatie 24:23-28 , 37-41 )

²⁰ Farisi dõma soke Azezi mɛ tɩ ba bãŋɛ wakat-sɛka tɩ Nawẽnnɛ wʋn di na'am nẽrba sʋkam. Tɩ a lerge ba yetɩ: «Nawẽnnɛ sãn wa dita na'am, la ka de sɛla tɩ nẽrba tã wʋn yẽ la nini.

²¹ La nẽra kãn yetɩ: ‹Bɩsɛ-ya, a boe la kalam›, bɩɩ ‹a boe la ke›. Bãŋɛ-ya tɩ Nawẽnnɛ boe la ya tẽŋasʋka dita na'am.»

²² La Azezi yele a karẽnbiisi la yetɩ: «Wakatɛ sẽm mɛ tɩ ya wʋn bɔɔra tɩ ya yẽ Nẽrsaala Dayʋa la, baa la sãn dɛna daarɛ ayɩla, la ya kãn yẽ ẽ.

²³ La nẽrba wʋn yele ya yetɩ: ‹Bɩsɛ-ya, a boe la ke›, bɩɩ ‹bɩsɛ-ya, a boe la kalam.› Da kãn sẽŋɛ-ya, da doose-ya ba.

²⁴ Se'ere n soe la, daar-sɛka tɩ Nẽrsaala Dayʋa la wʋn leme na, la wʋn ãna wʋ saaga n ẽn yãkɛ saazuum tɩ la nẽegɛ zẽ'a wuu se'em na.

²⁵ La, lan dẽŋɛ tɩ bõn-bãma wʋn ẽŋɛ, dẽnɩ tɩ a nãmsɛ zozo'e tɩ zamãan-ẽna wã dõma zagsɛ ẽ.

²⁶ Wakat-sɛka tɩ Nẽrsaala Dayʋa la wʋn leme wa'am na, la wʋn ãna wʋ Anoe wakatɛ tɩ la yʋʋn ãn se'em na.

²⁷ Nẽrba yʋʋn diti mɛ, dee yũura, tɩ bʋraasɩ dita pɔgba, tɩ pɔgsɩ mẽ ɛlla sɩrba, tɩ la wa paagɛ daar-sɛka tɩ Anoe kẽ õorŋ-kãtɛ la pʋam, dee tɩ ko'om yãŋa wa'am wa pɩrɛ zẽ'a wuu libe nẽrba wuu tɩ ba ki.

²⁸ La mẽ wʋn ãna wʋ Alotɩ wakatɛ n yʋʋn ãn se'em na. Ba yʋʋn diti mɛ, dee yũura, dee da'ara, dee kɔɔsra, dee bʋta, dee mẽta,

²⁹ ka paagɛ daar-sɛka tɩ Alotɩ fõrgɛ Sodom tẽŋa la, dee tɩ bugum n diti kidibre ze'ele saazuum lui tẽŋa kʋ ba wuu.

³⁰ Nẽrsaala Dayʋa la lemŋo daarɛ la mẽ wʋn di'ige ba la bɛla.

³¹ Daar-ẽŋa, nẽr-sɛka n boe gɔsgɔ dee tɩ a lɔgrɔ bɔna deego pʋam, a da sige bɔɔra tɩ a ze'ele dɩkɛ ba zoe. La nẽr-sɛka n boe a va'am, da lebe kule.

³² Tẽegɛ-ya lan yʋʋn ẽŋɛ Alotɩ pɔga se'em na.

³³ Nẽr-sɛka woo n boorɩ tɩ a gu a vɔm, a wʋn koŋe ẽ, la nẽr-sɛka n sakɛ tɩ a koŋe a vɔm, a wʋn yẽ ẽ.

³⁴ Mam yetɩ ya tɩ nẽrba bayi sãn gã sõŋɔ ayɩla pʋam yʋ'ʋŋɔ, ba wʋn dɩkɛ ayɩla, dee basɛ ayẽma.

³⁵ La pɔgsɩ bayi sãn bɔna nẽerʋm nẽena, ba wʋn dɩkɛ ayɩla, dee basɛ ayẽma.

³⁶ [Bʋraasɩ bayi sãn bɔna va'am, ba wʋn dɩkɛ ayɩla, dee basɛ ayẽma.]»

³⁷ Tɩ karẽnbiisi la soke Azezi yetɩ: «Zuudãana, bõn-ẽna wʋn ẽŋɛ la bɛ?» Tɩ a lerge yetɩ: «Zẽ'e-sɛka tɩ bõn-kɩ'ɩsɩ boe la, zẽ'e-ẽŋa tɩ zõa lagsrɩ taaba.»

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ