အွန်လိုင်း သမ္မာကျမ်းစာ

Aluki 16 - Farefare Ninkaré

Tõntõnna n de yɛm dãana makrɛ

¹ Tɩ Azezi le yele a karẽnbiisi la yetɩ: «Bʋraaga n daan boe dɛna bõntarsa, tara tõntõnna tɩ a bɩsra a yire yelle. Tɩ ba wa'am wa yele bõntarsa la yetɩ, tõntõnna la sã'anɩ a bõntarsõm na mɛ.

² Tɩ zuudãana la wi a tõntõnna la yetɩ: ‹Bẽm tɩ ba tɔgra fõn yelle tɩ mam wõnna wãna? Geele pa'alɛ ma fõn ẽŋɛ mam bõntarsõm na se'em. Fʋ kãn le bɩsra mam yire yelle.›

³ Tɩ tõntõnna la yele a mẽŋa yetɩ: ‹Mam zuudãana la yetɩ a dige mam a tõoma la pʋam mɛ, mam wʋn ẽŋɛ la wãne? Kʋa? Mam ka tarɩ pãŋa wʋn kɔ. La yãnnɛ n wʋn tara mam la sosgo.

⁴ Mam mi mam wʋn ẽŋɛ se'em, tɩ a sãn wa dige ma, m tara sɩrdõma n wʋn to'oge mam ba yiɛ sõŋa.›

⁵ Tɩ a wi a zuudãana sãnditba ayɩla ayɩla, soke pɔspɔsɩ dãana la yetɩ: ‹Fõn tarɩ mam zuudãana sãnnɛ la wãne?›

⁶ Tɩ a lerge yetɩ: ‹Mam tarɩ a sãnnɛ na kaam dugl-kãra kɔbga.› Tɩ a yele ẽ yetɩ: ‹To'oge fʋ sãnnɛ gõŋɔ tɔtɔ zĩ'ire gʋlsɛ yetɩ, kaam dugl-kãra pinuu.›

⁷ Dee soke ayẽma yetɩ: ‹Fõn tarɩ mam zuudãana sãnnɛ na wãne?› Tɩ a lerge yetɩ: ‹Mam tarɩ a sãnnɛ na mui bɔra kɔbga.› Tɩ a yele ẽ yetɩ: ‹To'oge fʋ sãnnɛ gõŋɔ gʋlsɛ yetɩ pinii.›

⁸ Baa la tõntõnna wã ɩrgɔ n ka doose sore la, a zuudãana pẽgɛ ẽ mɛ, ẽn tõm na yɛm na ĩyã. Dũni-ẽna wã dõma tarɩ la yɛm tõnna la taaba gãnna nẽr-sɛba n bãŋɛ Nawẽnnɛ peelem.

⁹ Bɛla ĩyã, mam yetɩ ya tɩ ya dɩkɛ dũnia bõntarsõm yõgɛ sɩrdõma, tɩ dũnia bõntarsõm na sãn wa ba'asɛ, ba wʋn to'oge ya tɩ ya bɔna Nawẽnnɛ yire wakatɛ n ka ba'asrɩ.»

Bõntarsõm sɩra sɩra

¹⁰ «Nẽr-sɛka woo n de sɩra dãana bõn-pɩgsɩ pʋam, mẽ de la sɩra dãana bõn-kãra pʋam. La sɛka n ka de sɩra dãana bõn-pɩgsɩ pʋam, mẽ ka de sɩra dãana bõn-kãra pʋam.

¹¹ Bɛla, ya sãn ka dɛna sɩra dõma dũnia wã bõntarsõm pʋam, ãne n wʋn dɩkɛ bõntarsõm sɩra sɩra gu'ule ya?

¹² La ya sãn ka dɛna sɩra dõma la bõn-sɛba n dagɩ ya mẽŋa bõnɔ, ãne n wʋn dɩkɛ bõnɔ bɔ ya tɩ la dɛna ya mẽŋa bõnɔ?

¹³ Tõntõnna ka tã wʋn sakɛ zuudãandõma bayi. A wʋn sise ayɩla mɛ, dee nõŋɛ ayɩla, bɩɩ a wʋn nanna ayɩla la mɛ, dee pɔ'ɔra ayɩla la. Bɛla, yãma ka tã wʋn sakɛ Nawẽnnɛ n de ya Zuudãana, dee botɩ bõntarsõm mẽ dɛna ya zuudãana.»

Nawẽnnɛ lɔɔ, la a so'olʋm yelle
( Amatie 11:12-13 ; 5:31-32 , Amarkɩ 10:11-12 )

¹⁴ Farisi dõma n nõŋɛ ligri la n wõm bɛla la, ba la'arɩ Azezi mɛ.

¹⁵ Tɩ Azezi yele ba yetɩ: «Yãma pa'alɩ ya mẽŋa nẽrba nẽŋam wʋ ya de la nẽr-sõma. La Nawẽnnɛ mi ya pʋtẽ'era n ãn se'em mɛ. Bõn-sɛka tɩ nẽrsaalba pẽgrɩ la, de la bõn-dẽgrɔ Nawẽnnɛ zẽ'am.

¹⁶ Amoyisi lɔɔ, la Nawẽnnɛ nõtɔ'ɔsrɩba n yʋʋn pa'alɩ nẽrba ban wʋn ãna se'em, ka paagɛ wakat-sɛka tɩ Azã wa'am na. Lan pɔsɛ Azã n misri nẽrba ko'om pʋam na, ba mõolɛ Nawẽnnɛ so'olʋm kõ-yẽlga mɛ, tɩ nẽra woo nargra pãŋa tɩ a kẽ.

¹⁷ La, la de la nãana tɩ saazuum la dũnia tole gãnna tɩ Nawẽnnɛ lɔɔ la bõn-pɩka ayɩla bɔɩ.

¹⁸ Nẽr-sɛka woo n basɛ a pɔga, dee le di pɔka ayẽma, a ẽŋɛ la be'em wʋ nẽra n gã'arɩ la a tadãana pɔga, la sɛka woo n di pɔka tɩ a sɩra basɛ mẽ ẽŋɛ la be'em.»

Bõntarsa, la nasa Alazaarɩ makrɛ

¹⁹ Tɩ Azezi yetɩ: «Bõntarsa n daan boe, yɛɛra futo n ba ãna sõŋa, dee tara sɛla woo daarɛ woo tɩ la seke.

²⁰ Tɩ nasa ayɩla mẽ daan bɔna, tɩ a yʋ'ʋrɛ dɛna Alazaarɩ, tɩ a ĩyã wuu tara nõtɔ. A daan ẽn gã la bõntarsa la zanõrʋm,

²¹ bɔɔra tɩ a di bõntarsa la n diti tɩ di-zõra luta la. Tɩ baasɩ sẽnna lɛɛla a nõtɔ la.

²² Tɩ Alazaarɩ wa ki. Tɩ Nawẽnnɛ malɛkadõma tarɩ ẽ sẽŋɛ Nawẽnnɛ yire Abraham zẽ'am. Tɩ bõntarsa la mẽ wa ki, tɩ ba laagɛ ẽ.

²³ Tɩ bõntarsa la daan bɔna bug-tẽŋa nãmsra, yãŋa gorge yẽ Abraham halɩ zẽ'a n zãagɛ, tɩ Alazaarɩ zẽa a sakʋkɔ.

²⁴ Tɩ bõntarsa la wi Abraham yetɩ: ‹M sɔ Abraham, zoe m ninbãalga, dee tõm Alazaarɩ tɩ a dɩkɛ a nu'ubiire tẽ'egɛ ko'om mã'alɛ m zɩlɩŋa, se'ere n soe la, mam boe la bugum pʋam nãmsra.›

²⁵ Tɩ Abraham yele ẽ yetɩ: ‹M bia, tẽegɛ tɩ fõn daan boe dũnia zuo wakat-sɛka la, fõn daan tarɩ bõn-sõma mɛ, dee tɩ Alazaarɩ yẽta toogo. La lɛɛlɛ wã, a sũure mã'agɛ mɛ, dee tɩ fõn yãŋa nãmsra.

²⁶ La bõn-sɛka n pa'asɛ, bog-ko'ogo n beŋe tõma la yãma, tɩ nẽra sãn bɔɔra tɩ a ze'ele kalam sẽŋɛ yãma zẽ'am, a kãn tã'agɛ. La nẽra mẽ sãn bɔɔra tɩ a ze'ele yãma zẽ'am wa'am tõma zẽ'am, a kãn tã'agɛ.›

²⁷ Tɩ a lerge Abraham yetɩ: ‹M sɔ Abraham, la sãn dɛna bɛla, mam sosrɩ fʋ mɛ tɩ fʋ tõm Alazaarɩ tɩ a sẽŋɛ mam sɔ yire,

²⁸ tɩ mam tarɩ la sɔbiisi banuu, a sẽŋɛ ka kã'an ba, tɩ ba mẽ da wa'am nãmsgɔ zẽ'a wã.›

²⁹ Tɩ Abraham yele ẽ yetɩ: ‹Ba tarɩ Amoyisi la Nawẽnnɛ nõtɔ'ɔsrɩba n gʋlsɛ gõn-sɛba la mɛ. La masɛ tɩ ba sakɛ la gõn-bãma yetɔga.›

³⁰ Tɩ a lerge ẽ yetɩ: ‹M sɔ, ayɛɩ, nẽra sãn vo'oge lebe sẽŋɛ ba zẽ'am, ba wʋn teege yɛm basɛ tõon-be'ero.›

³¹ Tɩ Abraham lerge ẽ yetɩ: ‹Ba sãn kãn sakɛ Amoyisi, la Nawẽnnɛ nõtɔ'ɔsrɩba la nõorɛ, baa nẽra n ki sãn vo'oge lebe, ba kãn sakɛ.› »

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ