အွန်လိုင်း သမ္မာကျမ်းစာ

Aluki 15 - Farefare Ninkaré

Pesgo, la lagfɔ n bɔɩ makrɛ
( Amatie 18:12-14 )

¹ Lampo-tɔ'ɔsrɩba, la tõon-be'ero dõma zozo'e n daan sẽŋɛ Azezi zẽ'am tɩ ba selse a yetɔga.

² Tɩ Farisi dõma, la lɔɔ karẽnsãandõma la yõnna yetɩ: «Bʋra-ẽna wã to'orɩ la tõon-be'ero dõma, dee dita la ba.»

³ Tɩ Azezi makɛ makrɛ wã soke ba yetɩ:

⁴ «Bʋra-kãna n boe ya pʋam tara piisi kɔbga, tɩ ayɩla sãn bɔɩ, tɩ a kãn lagsɛ piisi piswɛɩ la awɛɩ la basɛ dũnsẽkam, dee sẽŋɛ ka ɛ ayẽma n bɔɩ la halɩ yãŋa yẽ ẽ?

⁵ La a sãn yẽ ẽ, a wʋn yõkɛ ẽ mɛ buke la sũ-yẽlga.

⁶ La a sãn kule yire, a wʋn wi a sɩrdõma, la a sawiiba mɛ yele ba yetɩ: ‹Naagɛ-ya la mam tɩ tɩ ẽŋɛ sũ-yẽlga, se'ere n soe la, mam yẽ m pesgo la n bɔɩ la mɛ.›

⁷ Bɛla mam yetɩ ya tɩ tõon-be'ero dãana ayɩla sãn teege yɛm basɛ tõon-be'ero, sũ-yẽlga boe Nawẽnnɛ yire pʋam la bɛla gãnna nẽr-sõma piswɛɩ la awɛɩ n ka eerɩ tɩ ba teege yɛm.

⁸ Bɩɩ, pɔg-kãna n boe wʋn tara lig-kõba pia, tɩ ayɩla sãn bɔɩ, tɩ a kãn yõ fɩtla pɩɩsɛ deego la ɛ lagfɔ la sõŋa halɩ wa yẽ ẽ?

⁹ La a sãn yẽ ẽ, a wʋn wi a sɩrdõma, la a sawiiba mɛ yele ba yetɩ: ‹Naagɛ-ya la mam tɩ tɩ ẽŋɛ sũ-yẽlga, se'ere n soe la, mam yẽ m lagfɔ la n bɔɩ la mɛ.›

¹⁰ Bɛla mam yetɩ ya tɩ tõon-be'ero dãana ayɩla sãn teege yɛm basɛ tõon-be'ero, sũ-yẽlga boe Nawẽnnɛ malɛkadõma zẽ'am na bɛla.»

Budibla n basɛ a sɔ yire, la a kẽema makrɛ

¹¹ Tɩ Azezi le yele ba yetɩ: «Bʋraa n daan boe tara a dayɔɔsɩ bayi.

¹² Tɩ yɩbga la yele a sɔ yetɩ: ‹M sɔ, pʋɩ fʋ bõntarsõm na bɔ mam m bõnɔ.› Tɩ a sɔ pʋɩ a bõntarsõm na bɔ ba.

¹³ Tɩ la ẽŋɛ dabsa fẽe, tɩ yɩbga la lagsɛ a bõntarsõm na wuu yese sẽŋɛ tẽŋa n zãagɛ, ka tõm tõon-yooro sã'am ẽn tarɩ sɛla la wuu.

¹⁴ La ẽn sã'am a bõntarsõm na wuu ba'asɛ la, kɔm kãtɛ n wa'am tẽŋa la pʋam, tɩ a ka le tara sɛla wʋn di.

¹⁵ Tɩ a sẽŋɛ tẽŋa la nẽra ayɩla zẽ'am tɩ a dɩkɛ ẽ tɩ a tõnna. Tɩ nẽra la dɩkɛ ẽ botɩ a sẽŋɛ mõom ka gu'ura a kurkurdõma.

¹⁶ Tɩ a kɔm dõnna tɩ a bɔɔra tɩ a di kurkuri dia. Tɩ nẽra nẽra ka bɔ ẽ.

¹⁷ Tɩ a tẽ'esɛ a sũurum yetɩ: ‹Mam sɔ tarɩ tõntõnɩba zo'oge mɛ tɩ ba dita tɩgra dee basra, dee tɩ mam bɔna kalam kiira la kɔm.›

¹⁸ Yãŋa yetɩ: ‹Mam wʋn lebe kule la m sɔ yire ka yele ẽ yetɩ, mam tõm na Nawẽnnɛ la fõn be'em,

¹⁹ mam ka le masɛ tɩ ba wi mam tɩ fʋ bia. Ɩta mam wʋ fʋ tõntõnɩba la ayɩla.›

²⁰ Dee isge kulla a sɔ yire. La ẽn nãn boe zãazãarɛ la, tɩ a sɔ la yẽ ẽ, tɩ a ninbãalga yõkɛ ẽ, tɩ a zoe tʋ'ʋsɛ kɔkɛ ẽ, mõbgɛ ẽ.

²¹ Tɩ bia la yele ẽ yetɩ: ‹M sɔ, mam tõm na Nawẽnnɛ la fõn be'em. Mam ka masɛ tɩ ba le wi'ira mam tɩ fʋ bia.›

²² Tɩ a sɔ la yele a tõntõnɩba yetɩ: ‹Sẽŋɛ-ya tɔtɔ ka tarɩ fu-sɛka n ãn sõŋa gãnna la wa'am wa yɛ ẽ, dee dɩkɛ nutʋa pire a nu'ubiire, dee dɩkɛ tagra pire ẽ.

²³ La ya yõkɛ lɔl-polle n nõbɛ wa'am wa kʋ tɩ tɩ ẽŋɛ dia di, dee ẽŋɛ sũ-yẽlga.

²⁴ Se'ere n soe la, mam bia wã daan wõn na a ki mɛ, dee le vo'oge. A daan bɔɩ mɛ, tɩ tɩ le yẽ ẽ.› Tɩ ba yãŋa ɩta sũ-yẽlga.

²⁵ Wakat-ẽŋa tɩ a dayɔ-kẽema la boe la va'am. La ẽn lebe kulna wa lɛm yire la, a wõm na duursi tɩ ba wẽ'erɩ wa'ara.

²⁶ Tɩ a wi a sɔ tõntõnna ayɩla soke ẽ yetɩ: ‹Bẽm n ẽŋɛ?›

²⁷ Tɩ tõntõnna la lerge ẽ yetɩ: ‹Fʋ yɩbga la n wa'am, tɩ fʋ sɔ kʋ lɔl-polle n nõbɛ, ẽŋa n yẽ fʋ yɩbga la tɩ a tarɩ ĩmã'asʋm na ĩyã.›

²⁸ Tɩ kẽema la sũure yĩige halɩ. Tɩ a zagsɛ tɩ ẽŋa kãn kẽ yire. Tɩ a sɔ yese belem ẽ yetɩ, a wa'am wa kẽ.

²⁹ Tɩ a lerge a sɔ la yetɩ: ‹Bɩsɛ, yʋʋma zozo'e tɩ mam tõnnɩ fʋ tõoma, dee ka zagsɛ fʋ nõorɛ baa daarɛ ayɩla, la fõn ka bɔ mam bulla baa daarɛ ayɩla tɩ m kʋ tɩ mam la m sɩrdõma ẽŋɛ sũ-yẽlga.

³⁰ La fʋ bi-ẽna wã n dɩkɛ fʋ bõntarsõm sẽŋɛ ka tõm yalsɩ tõoma sã'am ba wuu dee kulum wã, fʋ kʋ la lɔl-polle bɔ ẽ.›

³¹ Tɩ a sɔ lerge ẽ yetɩ: ‹M bia, fõn boe la mam zẽ'am daarɛ woo. La mam n tarɩ sɛla wuu la de la fõn bõnɔ.

³² La, la masɛ mɛ tɩ tɩ ẽŋɛ sũ-yẽlga sɩrʋm, se'ere n soe la, fʋ yɩbga wã daan wõn na a ki mɛ, dee le vo'oge. A daan bɔɩ mɛ. Tɩ tɩ le yẽ ẽ.› »

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ