အွန်လိုင်း သမ္မာကျမ်းစာ

Aluki 1 - Farefare Ninkaré

Se'ere n soe tɩ Aluki gʋlsɛ gõŋɔ la

¹ Mam sɩr-sõŋɔ Ateofili, nẽrba zozo'e n mõrgɛ gʋlsɛ yel-sɛba wuu n ẽŋɛ tõma zẽ'am na.

² Ba gʋlsɛ yel-bãma wuu wʋ nẽrba basɛba n daan yẽ yɛla la wuu halɩ ba pĩ'iluŋo, dee mõolɛ kõ-yẽlga la tɔgɛ pa'alɛ tɩ tõma wõm se'em na.

³ Bɛla ĩyã tɩ mam mã'agɛ m mẽŋa doose yel-bãma nãma sõŋa sõŋa halɩ ba pĩ'iluŋo pʋam, tɩ mam tẽ'esɛ tɩ la ãn sõŋa tɩ m gʋlsɛ yɛla la n doose taaba se'em na bɔ fɔ.

⁴ Mam gʋlsrɩ wãna tɩ fʋ bãŋɛ mɛ tɩ yel-bãna wuu tɩ ba pa'alɛ fʋ la de la sɩra.

Azakari bia Azã tɩ ba wʋn dɔgɛ yelle

⁵ Se'emwẽnʋm tɩ A'erɔdɩ daan de Zude tẽŋa naba la, bʋraa n daan boe tɩ a yʋ'ʋrɛ dɛna Azakari. A daan de la Zifdõma kãabgɔ kẽema, a de la Abiya buuri nẽra. Tɩ a pɔga yʋ'ʋrɛ dɛna A'elizabɛtɩ, ẽŋa mẽ daan de la kãabgɔ kẽma nẽŋadãana Aarõ buuri.

⁶ Bãma bayi daan de la nẽrba n ɩtɩ sõŋa Nawẽnnɛ nifum, dee sakra Nawẽnnɛ nõorɛ, la a lɔɔ la wuu sõŋa.

⁷ La ba daan ka tarɩ bia, se'ere n soe la, A'elizabɛtɩ daan de la kõndɔgrɛ, la bãma bayi la wuu mẽ kʋrgɛ mɛ.

⁸ La wakatɛ n daan paagɛ tɩ Abiya buuri kẽ Wẽnde-kãtɛ la pʋam tɩ ba tõm. Tɩ Azakari mẽ kẽ tɩ a tõm.

⁹ Kãabgɔ kẽma la malŋɔ daan de la ba pɔsɛ looge nẽr-sɛka n wʋn kẽ zẽ'e-sõŋɔ pʋam yõ tɩdarɛ bɔ Nawẽnnɛ. Tɩ ba daan pɔsɛ, tɩ la yõkɛ Azakari. Tɩ Azakari kẽ tɩ a yõ.

¹⁰ La tɩdarɛ la yõ'a wakatɛ nẽr-kʋʋŋɔ la wuu boe la yẽŋa pʋ'ʋsra Nawẽnnɛ.

¹¹ Tɩ Nawẽnnɛ malɛka darɛ wa'am Azakari zẽ'am wa zɛ tɩdarɛ yõ'a bĩmbĩnne na zʋʋgɔ bɔba.

¹² La Azakari n yẽ ẽ na, a palẽŋa n ẽkɛ halɩ, tɩ dabeem kẽ ẽ.

¹³ Tɩ malɛka la yele ẽ yetɩ: «Azakari, da zoe dabeem, tɩ Nawẽnnɛ wõm fʋ pʋ'ʋsgɔ mɛ. Fʋ pɔga A'elizabɛtɩ wʋn dɔgɛ la budibla, tɩ fʋ sɩ a yʋ'ʋrɛ tɩ Azã.

¹⁴ La fʋ wʋn ẽŋɛ sũ-yẽlga sɩrʋm. La nẽrba zozo'e wʋn ẽŋɛ sũ-yẽlga bia la dɔka ĩyã.

¹⁵ A wʋn dɛna la nẽr-keko Zuudãana Nawẽnnɛ nifum, la a kãn yũ dãam bɩɩ bõn-yũula n bugri. Nawẽnnɛ Sɩa wʋn bɔna la ẽ halɩ lan pɔsɛ ẽn boe a ma pʋʋrʋm, la wakatɛ wuu.

¹⁶ A wʋn botɩ Ɩsrayɛlɩ nẽrba zozo'e lebe sakɛ ba Zuudãana Nawẽnnɛ.

¹⁷ La a wʋn dẽŋɛ Zuudãana nẽŋam tara Nawẽnnɛ Sɩa pãŋa wʋ Nawẽnnɛ nõtɔ'ɔsa A'eli n daan tarɩ se'em na. La a wʋn naagɛ sɔdõma la ba kɔma yɛla, dee wʋn botɩ nẽr-sɛba n sɩ'ɩsrɩ Nawẽnnɛ nõorɛ la tara yɛm ɩta wʋ sɛba n ɩtɩ sɛla n masɛ la. A wʋn botɩ nẽrba mãasʋm sõŋa gu'ura tɩ Zuudãana.»

¹⁸ Tɩ Azakari soke malɛka la yetɩ: «Bẽm n wʋn botɩ mam bãŋɛ tɩ bõn-ẽna de la sɩra? Se'ere n soe la, mam de la bʋra-yã'aŋa dee tɩ mam pɔga mẽ kʋrgɛ.»

¹⁹ Tɩ malɛka la lerge ẽ yetɩ: «Mam yʋ'ʋrɛ de la Agabrɩyɛlɩ, mam ze la Nawẽnnɛ nẽŋam. Ẽŋa n tõm mam yetɩ, m wa'am yele fʋ yetɔg-yẽlga wã.

²⁰ La fõn ka sakɛ mam yetɔga la ĩyã, fʋ nõorɛ n wʋn mãam. La wakatɛ sãn paagɛ, bõn-sɛba tɩ mam yele fʋ la wʋn ẽŋɛ. La fʋ kãn le tãna tɔgra, halɩ tɩ la paagɛ daar-sɛka tɩ bõn-bãna wʋn ẽŋɛ la.»

²¹ Wakat-ẽŋa, nẽrba la daan gu'uri mɛ tɩ Azakari yese. La ẽn daan boe zẽ'e-sõŋɔ la pʋam yuura la, ba palẽŋa n ẽkɛ.

²² La ẽn yãŋa wa yese la, a ka tã'agɛ tɔgɛ la nẽrba la. A nõorʋm n mãam tɩ a tara nu'usi magra pa'ala ba. Bɛla tɩ ba bãŋɛ tɩ a yẽ la bõn-yãlma zẽ'e-sõŋɔ la pʋam.

²³ Dabs-sɛba tɩ Azakari daan wʋn tõm Wẽnde-kãtɛ la pʋam n ba'asɛ la, a daan lebe kule la a yire.

²⁴ Dabs-bãna poorʋm, tɩ a pɔga A'elizabɛtɩ yõkɛ pʋʋrɛ bɔna yire wõr-sɩnuu.

²⁵ Dee yetɩ: «Wãna de la Zuudãana Nawẽnnɛ tõoma. Wakat-ẽna ẽŋa n yãŋa bɩsɛ mam yelle, dee yese bõn-ẽna n de nɩ yãnnɛ bɔ mam nẽrba tẽŋasʋka.»

Malɛka n tɔgɛ Azezi dɔka yelle

^26-27 Pugla ayɩla n daan boe Galile tẽŋa ayɩla yʋ'ʋrɛ n de Nazarɛtɩ, tɩ a yʋ'ʋrɛ dɛna Amaari. A daan nãn ka mi bʋraa. La bʋraa ayɩla yʋ'ʋrɛ n de Azozɛfʋ n yetɩ a di ẽ. Azozɛfʋ de la naba Adavidi buuri nẽra. La wakat-sɛka tɩ A'elizabɛtɩ daan tarɩ pʋʋrɛ wõr-sɩyoobɩ pʋam na, tɩ Nawẽnnɛ tõm a malɛka Agabrɩyɛlɩ tɩ a sẽŋɛ Amaari zẽ'am.

²⁸ Tɩ malɛka la sẽŋɛ Amaari zẽ'am ka pʋ'ʋsɛ ẽ yetɩ: «Fʋ tõoma. Zuudãana Nawẽnnɛ boe la fʋ mɛ, a ẽŋɛ fʋ yel-sõnnɛ mɛ.»

²⁹ La Amaari n daan wõm malɛka yetɔga la, a palẽŋa n ẽkɛ, tɩ a tẽ'esra malɛka la n yele se'em na võorɛ n de sɛla.

³⁰ Tɩ malɛka la yele ẽ yetɩ: «Amaari, da zoe dabeem, tɩ Nawẽnnɛ ẽŋɛ fʋ yel-sõnnɛ mɛ.

³¹ Fʋ wʋn yõkɛ la pʋʋrɛ dɔgɛ budibla, sɩ a yʋ'ʋrɛ tɩ Azezi.

³² A wʋn dɛna la nẽr-keko. La ba wʋn wi'ira ẽ tɩ, Nawẽnnɛ n gãnnɩ wuu Bia. La Zuudãana Nawẽnnɛ wʋn bɔ ẽ a yaaba Adavidi na'am,

³³ tɩ a dɛna Azakɔbɩ buuri naba wakatɛ wuu, a na'am na kãn malɩn ba'asɛ.»

³⁴ Tɩ Amaari soke malɛka la yetɩ: «Mam ka mi bʋraa, la wʋn ẽŋɛ la wãne tɩ mam yõkɛ pʋʋrɛ?»

³⁵ Tɩ malɛka la lerge ẽ yetɩ: «Nawẽnnɛ n gãnnɩ sɛla wuu Sɩa wʋn sige fʋ zuo, la Nawẽnnɛ pãŋa wʋn bɔna la fɔ, bɛla bia la tɩ fʋ wʋn dɔgɛ la wʋn welge la to'ore, ba wʋn wi'ira ẽ tɩ Nawẽnnɛ Dayʋa.

³⁶ Bãŋɛ tɩ fʋ sõogɔ A'elizabɛtɩ tɩ ba yetɩ a de la kõndɔgrɛ la, a tarɩ la pʋʋrɛ wõr-sɩyoobɩ n wãna. Baa la ẽn kʋrgɛ la, a wʋn dɔgɛ la budibla.

³⁷ Se'ere n soe la, sɛla sɛla ka boe tɩ Nawẽnnɛ ka tã ɩta.»

³⁸ Tɩ Amaari lerge yetɩ: «Mam de la Zuudãana Nawẽnnɛ tõntõn-pɔka. Nawẽnnɛ botɩ la ẽŋɛ wʋ fõn yele se'em na.» Tɩ malɛka la fõrgɛ dee basɛ ẽ.

Amaari sẽŋɛ ka bɩsɛ A'elizabɛtɩ

³⁹ La dabsa bãma pʋam, tɩ Amaari isge sẽŋɛ tɔtɔ paagɛ Zude so'olʋm tẽŋa ayɩla tɩ tãnsɩ boe mĩ.

⁴⁰ La ẽn paagɛ la, a kẽ la Azakari yire pʋ'ʋsɛ A'elizabɛtɩ.

⁴¹ La A'elizabɛtɩ n wõm a pʋ'ʋsgɔ la, bia la wẽrgɛ mɛ a pʋʋrʋm. Tɩ Nawẽnnɛ Sɩa wa'am A'elizabɛtɩ zẽ'am la pãŋa,

⁴² tɩ a tĩi tɔgɛ yetɩ: «Nawẽnnɛ ẽŋɛ la fõn yel-sõnnɛ gãnna pɔgsɩ la wuu. La bia la tɩ fʋ wʋn dɔgɛ la, tarɩ yel-sõnnɛ mɛ.

⁴³ Mam de la ãne tɩ mam Zuudãana ma sẽna mam zẽ'am?

⁴⁴ Se'ere n soe la, mam wõm fõn pʋ'ʋsgɔ la, bia la n boe mam pʋʋrʋm na wẽrgɛ mɛ la sũ-yẽlga.

⁴⁵ Fõn sakɛ tɩ Zuudãana Nawẽnnɛ yetɔga tɩ a tɔgɛ bɔ fʋ la wʋn sɩrɩ ẽŋɛ la, fʋ yẽ zu-yẽlga.»

Amaari n yõom yõoma pẽgɛ Nawẽnnɛ la yelle

⁴⁶ Tɩ Amaari yele yetɩ: «Mam pẽgrɩ Zuudãana Nawẽnnɛ la m sũure wuu.

⁴⁷ Mam tarɩ sũ-yẽlga mɛ, Nawẽnnɛ n de mam Fãagra la ĩyã,

⁴⁸ se'ere n soe la, a bɩsɛ mam n de a tõntõn-pɔg-tarma la yelle mɛ. Bɛla lan pɔsɛ lɛɛlɛ wã wɛ'ɛsa, zamãana wuu nẽrba wʋn wi'ira mam tɩ zu-yẽlga dãana.

⁴⁹ Se'ere n soe la, Nawẽnnɛ n tã wuu la n ẽŋɛ bõn-kãra bɔ mam. A de la pʋpeelem dãana.

⁵⁰ La nẽr-sɛba n zotɩ ẽ na, a zotɩ ba ninbãalga mɛ zamãana wuu.

⁵¹ A dɩkɛ la a nu'ugo tõm tõon-kãra, dee botɩ zẽk-m-mẽŋa dõma la zoe wɩrgɛ la ba zẽk-m-mẽŋa pʋtẽ'era la.

⁵² La sãn dɛna pãnsɩ dõma, a sikri ba mɛ ba na'am pʋam, dee zẽkra sik-m-mẽŋa dõma.

⁵³ La sɛba n ka tarɩ sɛla la, a bɔ'ɔrɩ ba bõntarsõm zɔ'ɔra mɛ, dee botɩ bõntatba lebe fõrgɛ dee ka to'oge sɛla sɛla.

⁵⁴ A tẽerɩ zɔta tõma Ɩsrayɛlɩ nẽrba n de a tõntõnɩba la ninbãalga mɛ, dee sõŋra tõma,

⁵⁵ wʋ ẽn yʋʋn bĩŋe a nõorɛ la tõma yaaba Abraham, la tõma sɔ-yaabdõma, la ba yɩɩsɩ la wuu tɩ a wʋn sõŋra tõma wakatɛ wuu se'em na.»

⁵⁶ La Amaari daan weege A'elizabɛtɩ zẽ'am ẽŋɛ wʋ wõr-sɩtã, dee yãŋa lebe kule.

Azã dɔka yelle

⁵⁷ A'elizabɛtɩ dɔka wakatɛ n daan paagɛ la, a dɔgɛ la budibla.

⁵⁸ Tɩ a sawiiba, la a yir-dõma wõm tɩ Zuudãana Nawẽnnɛ zoe a ninbãalga zo'oge, tɩ ba wuu lagɩm ɩta sũ-yẽlga la ẽ.

⁵⁹ Bia la dɔka dabsa anii daarɛ tɩ ba wa'am tɩ ba wã ẽ, daan bɔɔra tɩ ba sɩ a yʋ'ʋrɛ a sɔ Azakari yʋ'ʋrɛ.

⁶⁰ La a ma ka sakɛ, yetɩ: «Ayɛɩ, a yʋ'ʋrɛ wʋn dɛna la Azã.»

⁶¹ Tɩ ba lerge yetɩ: «Ya yir-dõma la pʋam nẽra ka boe mĩ tɩ a yʋ'ʋrɛ dɛna Azã.»

⁶² Tɩ ba yɩbsɛ la nu'usi soke bia la sɔ tɩ ba bãŋɛ ẽŋa n boorɩ tɩ ba sɩ bia la yʋ'ʋrɛ se'em.

⁶³ Tɩ a botɩ ba bɔ ẽ dɔ-palaka, tɩ a to'oge gʋlsɛ yetɩ: «A yʋ'ʋrɛ de la Azã.» Tɩ la di'ige nẽrba la waa wuu.

⁶⁴ La ẽn gʋlsɛ yele bɛla la, bilam mẽŋa tɩ a zɩlɩŋa lakɛ, tɩ a tã'agɛ tɔgra pẽgra Nawẽnnɛ.

⁶⁵ Tɩ dabeem yõkɛ sɛba n lɛm bilam na wuu. Tɩ kõ-ẽŋa saagɛ Zude tẽn-sɛba tɩ tãnsɩ boe mĩ na wuu.

⁶⁶ Bãma wuu n daan wõm yɛla la, ba daan tẽ'esrɩ mɛ dee sɔkra yetɩ: «Bi-ẽna yetɩ a wa ãna la wãne?» Zuudãana Nawẽnnɛ pãŋa boe la ẽ mɛ.

Azakari n to'oge Nawẽnnɛ yetɔga bɔ nẽrba la yelle

⁶⁷ Nawẽnnɛ Sɩa n wa'am bia la sɔ Azakari zẽ'am la pãŋa. Tɩ a to'oge Nawẽnnɛ yetɔga tɔgɛ yetɩ:

⁶⁸ «Basɛ-ya tɩ pẽgɛ Nawẽnnɛ n de Ɩsrayɛlɩ Zuudãana la, se'ere n soe la, a wa'am mɛ wa bɩsɛ a nẽrba yelle, fãagɛ ba basɛ.

⁶⁹ A bɔ tõma la Fãagra n tarɩ pãŋa n wʋn yese a tõntõnna Adavidi buuri la pʋam,

⁷⁰ wʋ ẽŋa n yʋʋn botɩ a nõtɔ'ɔsrɩba tɔgra kʋrʋm se'em na.

⁷¹ A yetɩ a wʋn fãagɛ tɔ tɩ bɛ'ɛba nu'usum, la nẽr-sɛba n sisri tõma la nu'usum.

⁷² Bɛla, a zoe tɩ yaabdõma ninbãalga mɛ, dee tẽegɛ ẽn yʋʋn bĩŋe a nõorɛ la ba la yelle.

⁷³ Se'ere n soe la, a yʋʋn bĩŋe nõorɛ mɛ la tɩ yaaba Abraham

⁷⁴ tɩ a wʋn fãagɛ tɔ tɩ bɛ'ɛba nu'usum, dee wʋn botɩ tɩ tõm a tõoma, tɩ dabeem kana.

⁷⁵ Dee dɔla ẽ la pʋpeelem, dee ɩta tɩ la masra ẽn boorɩ se'em ka paagɛ tɩ vɔm tɛka.

⁷⁶ La fõn, m bia, ba wʋn wi'ira fʋ tɩ Nawẽnnɛ n gãnnɩ wuu nõtɔ'ɔsa. Bɛla ĩyã, fõn wʋn dẽŋɛ tɩ Zuudãana la nẽŋam malgɛ sore bɔ ẽ,

⁷⁷ dee yele Nawẽnnɛ nẽrba la tɩ ba bãŋɛ tɩ a wʋn fãagɛ ba basɛ ba tõon-be'ero taalɛ.

⁷⁸ La de la Nawẽnnɛ n zotɩ tõma ninbãalga la ĩyã tɩ a wʋn botɩ a peelem n ãn wʋ wʋntɛɛŋa n yẽkɛ bulika la,

⁷⁹ nẽegɛ bɔ nẽr-sɛba n boe lika pʋam, la nẽr-sɛba n zotɩ kũm dabeem na, dee pa'alɛ tɩ so-sɛka tɩ tɩ wʋn doose yẽ sũ-mã'asʋm.»

⁸⁰ Tɩ bia la daan bɩta, tɩ a pʋtẽ'erɛ pa'asra. A daan boe la weem ka paagɛ daar-sɛka tɩ a wa'am Ɩsrayɛlɩ dõma la zẽ'am tɩ ba bãŋɛ ẽ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ