2 Tesaloniki 3 - Farefare Ninkaré

Pʋ'ʋsɛ-ya Nawẽnnɛ bɔ tɔ

¹ Sɛla n deege, m sɔbiisi, sose-ya Nawẽnnɛ bɔ tɔ, tɩ tɩ Zuudãana kõ-yẽlga la ken saagɛ pa'asɛ dee tɩ nẽrba pẽgra ẽ, wʋ la ãn se'em yãma zẽ'am na.

² Ken sose-ya ẽ tɩ a fãagɛ tɔ la nẽr-wẽensɩ, la nẽr-bɛ'ɛsɩ, se'ere n soe la, la dagɩ nẽrba wuu n sakɛ Nawẽnnɛ kõ-yẽlga la.

³ La Zuudãana la de la sɩra dãana, a wʋn botɩ ya ze'ele kãŋkãŋɛ, dee gu'ura ya tɩ be'em dãana la da yãŋɛ ya.

⁴ Zuudãana la ĩyã tõma bɔ yãma sɩra mɛ, tõma mi tɩ ya ɩtɩ la tõma n yele ya se'em na, la ya wʋn ken ɩta la bɛla.

⁵ Zuudãana la wʋn basɛ tɩ ya tara Nawẽnnɛ nõŋlʋm, dee mõrgɛ zɛ kãŋkãŋɛ wʋ Krisi la.

Kã'aŋɔ zẽyãgsɩ ĩyã

⁶ M sɔbiisi, tõma yetɩ ya la Zuudãana Azezi-krisi yʋ'ʋrɛ tɩ ya zãagɛ ya mẽŋa la sɔbiisi sɛba wuu n de zẽyãgsɩ vɔa yooryooro ka dɔla pa'algɔ sɛba tɩ tõma pa'alɛ ya la.

⁷ Yãma mẽŋa mi sõŋa tɩ la masɛ mɛ tɩ ya ɩta tõma n daan ɩtɩ se'em na. Tõma n daan boe ya zẽ'am na, tõma daan ka tarɩ zẽyãgrɛ,

⁸ la tõma ka diti nẽra dia zãŋa, tõma daan tõnnɩ na wʋntɛɛŋa la yʋ'ʋŋɔ nãmsra zozo'e ka bɔɔra tɩ tõma dia yelle dɛna nãmsgɔ bɔ ya nẽra baa ayɩla.

⁹ Tõma n daan ɩtɩ bɛla la, la dagɩ tɩ tõma ka tarɩ la sore tɩ tɩ sose sõŋrɛ ya zẽ'am, tõma daan tõnnɩ tɩ pa'alɛ ya, tɩ ya mẽ ɩta la bɛla.

¹⁰ Tõma n daan boe ya zẽ'am na, tõma daan yele ya yetɩ: «Sɛka n ka boorɩ tɩ a tõm, a da di.»

¹¹ La tõma wõm tɩ nẽrba basɛba n boe ya zẽ'am dɛna zẽyãgsɩ vɔa yooryooro, dee kẽ'era nẽrba yɛla pʋam.

¹² Tõma yetɩ nẽr-bãma mɛ, dee kã'ana ba la Zuudãana Azezi-krisi yʋ'ʋrɛ tɩ ba yõkɛ ba mẽŋa mõrgɛ tõm bɩsɛ ba mẽŋa yelle.

¹³ La sãn dɛna yãma, m sɔbiisi, da kãn targɛ-ya la tõon-sõma ɩrgɔ.

¹⁴ Nẽra sãn ka sakɛ bõn-sɛba tɩ tõma yele ya gõŋɔ wã pʋam na, ya bãŋɛ a dãana lɔkra ẽ, tɩ yãnnɛ yõkɛ ẽ.

¹⁵ La ya da dɩkɛ ẽ tɩ a lebge ya bɛ, kã'an ya ẽ wʋ ya sɔbia.

Ba'asgɔ yetɔga

¹⁶ Zuudãana mẽŋa n de sũ-mã'asʋm dãana la wʋn bɔ ya sũ-mã'asʋm wakatɛ woo la sɛla woo pʋam. Zuudãana wʋn bɔna la ya wuu.

¹⁷ Mam Apolɩ n gʋlsɛ pʋ'ʋsgɔ wã la m mẽŋa nu'ugo, mam pʋ'ʋsrɩ ya. Mam gʋlsrɩ la wãna m gõnnɔ wuu pʋam, pa'ala tɩ la de la mam n gʋlsɛ.

¹⁸ Tɩ Zuudãana Azezi-krisi yel-sõnnɛ wʋn bɔna la ya wuu.