အွန်လိုင်း သမ္မာကျမ်းစာ

2 Korẽntɩ 4 - Farefare Ninkaré

Tõma pãŋa ze'ele la Nawẽnnɛ zẽ'am

¹ Nawẽnnɛ n zoe tõma ninbãalga bɔ tõma tõon-ẽŋa la ĩyã n soe tɩ tõma bʋraanɛ ka bɔ'ɔra.

² Tõma zagsɛ mɛ ka tõnna tõon-sɛba wuu n sʋgɛ n de yãnnɛ tõoma la, tõma ka ɩtɩ yɛm pã'asra nẽrba. La tõma ka teerɩ Nawẽnnɛ yetɔga. Tõma tɔgrɩ pa'ala la sɩra vẽelga vẽelga, tɩ nẽrba sũure n mi se'em na wʋn bãŋɛ tɩ tõma ɩtɩ sɛla n ãn sõŋa Nawẽnnɛ nifum.

³ La kõ-yẽlga la tɩ tõma mõolɩ la sãn ken sʋgɛ mɛ, a sʋgɛ la nẽr-sɛba n wʋn sã'am na.

⁴ La de la sɛba n ka bɔ Nawẽnnɛ sɩra la. Asũtãana n de dũnia wã naba la n pĩ ba yɛm tɩ ba da bãŋɛ Krisi n de Nawẽnnɛ wõnnɛ na kõ-yẽlga na'am pãŋa.

⁵ La dagɩ tõma mẽŋa yelle tɩ tõma mõolɩ, la de la Azezi-krisi n de Zuudãana la kõa tɩ tõma mõolɩ. La sãn dɛna tõma, tõma de la yãma tõntõnɩba Azezi ĩyã.

⁶ Nawẽnnɛ n yʋʋn yetɩ: «Peelem nẽegɛ lika pʋam» na, la de la ẽŋa n botɩ peelem nẽegɛ tõma sũa pʋam, botɩ tõma bãŋɛ Nawẽnnɛ na'am pãŋa n nẽegɛ Krisi nẽŋa zuo.

⁷ La tõma n tarɩ bõntarsõm ẽŋa la, tõma ãn wʋ yɔgrɔ lɔgrɔ tɩ ba dɩkɛ tʋʋlʋm bõnɔ ẽŋɛ mĩ. Tɩ la pa'alɛ tɩ pãn-kãtɛ ẽŋa ka ze'ele tõma zẽ'am, a ze'ele la Nawẽnnɛ zẽ'am.

⁸ Tõma yẽtɩ nãmsgɔ buuri to'oto'ore mɛ sɛla woo pʋam, la a ka yãŋɛ tõma. Tõma fablɩ mɛ ka mina tõma n wʋn ẽŋɛ se'em, la tõma bʋraanɛ ka bo'oge.

⁹ Nẽrba nãmsrɩ tõma mɛ, la Nawẽnnɛ ka basɛ tõma, ba wẽ'erɩ tõma lʋbra mɛ, la tõma ka ki.

¹⁰ Tõma tarɩ nãmsgɔ mɛ tɩ ĩyã pʋam wʋ Azezi kũm nãmsgɔ la daarɛ woo ka gɔ'ɔra, tɩ nẽrba wʋn yẽ Azezi vɔm tõma pʋam.

¹¹ Tõma n vɔa wã, tõma põsrɩ tɩ yõorɛ mɛ wakatɛ wuu Azezi ĩyã, tɩ nẽrba wʋn yẽ a vɔm tõma ĩyã n kiiri la pʋam.

¹² Bɛla, kũm zɩgrɩ la a kʋ tõma, tɩ yãma yẽta vɔm.

¹³ La gʋlsɛ Nawẽnnɛ gõŋɔ pʋam yetɩ: «Mam bɔ sɩra mɛ n soe tɩ mam tɔgɛ.» Tõma mẽ bɔ Nawẽnnɛ sɩra mɛ, bɛla n soe tɩ tõma tɔgra.

¹⁴ Tõma mi mɛ tɩ Nawẽnnɛ n vo'oge tɩ Zuudãana Azezi la, a mẽ wʋn po vo'oge tõma mɛ la Azezi, la a wʋn lagɩm tarɩ tõma la yãma sẽŋɛ a zẽ'am.

¹⁵ Bõn-bãma wuu n ɩtɩ la de la yãma ĩyã. Bɛla tɩ Nawẽnnɛ yel-sõnnɛ wʋn paara nẽrba zozo'e, tɩ nẽrba wʋn pʋ'ʋsra Nawẽnnɛ a yel-sõnnɛ zɔ'ɔra pa'asra, tɩ la dɛna a nã'asgɔ.

¹⁶ Bɛla tɩ tõma bʋraanɛ ka bɔ'ɔra. La baa tõma ĩyã n sã'anɩ na, tõma sɩa lebgrɩ la paalga daarɛ woo.

¹⁷ Nãmsgɔ sɛka tɩ tõma yẽtɩ wakatɛ fẽfẽe wã de la pɩka ka tãna wʋn dɩkɛ makɛ la nã'asgɔ zozo'e n ka tarɩ ba'asgɔ tɩ a wʋn botɩ tõma yẽ la.

¹⁸ Tõma pʋtẽ'erɛ n boe la sɛla la, dagɩ sɛla tɩ nini yẽtɩ. A de la sɛla tɩ nini ka yẽtɩ. Bõn-sɛka tɩ nini yẽtɩ tollɩ mɛ. La sɛla tɩ nini ka yẽtɩ la boe la wakatɛ n ka ba'asrɩ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ