အွန်လိုင်း သမ္မာကျမ်းစာ

2 Korẽntɩ 10 - Farefare Ninkaré

Apolɩ tɔgrɩ a tõoma yelle

¹ Mam Apolɩ tɩ ya yetɩ, mam sãn bɔna yãma zẽ'am, mam de la nẽr-bʋgsgɔ, la mam sãn ka bɔna yãma zẽ'am, mam tarɩ la bʋraanɛ tɔgra la, mam belnɩ ya mɛ la Krisi sũ-bʋgsʋm, la a sõŋa.

² Mam sosrɩ ya mɛ tɩ ya da ɩta, tɩ mam sãn wa'am wa bɔna ya zẽ'am, la dɛna pẽrgrɛ tɩ mam tara bʋraanɛ tɔgra, se'ere n soe la, mam mi tɩ mam wʋn tɔgɛ la bʋraanɛ la nẽr-sɛba n yetɩ tõma ɩtɩ la tõma nẽrsaalba mẽŋa n boorɩ se'em na.

³ Tõma de la nẽrsaalba, la tõma ka zɛbrɩ wʋ nẽrsaalba n ɩtɩ se'em na.

⁴ Zɛbrɛ lɔg-sɛba tɩ tõma tarɩ zɛbra la dagɩ nẽrsaala zɛbrɛ lɔgrɔ, ba de la pãŋa n ze'ele Nawẽnnɛ zẽ'am, n tã sã'ana sɛla wuu n tarɩ ke'eŋo. Tõma tarɩ ba sã'ana la tẽ'esgɔ sɛba wuu n de põmpɔrŋɔ,

⁵ la bõn-sɛba wuu n zẽkrɩ ba mẽŋa botɩ nẽrba ka bãŋra Nawẽnnɛ pãŋa. Dee yãŋra tẽ'esgɔ buuri wuu botɩ ba sakra Krisi.

⁶ Yãma sãn wa ẽŋɛ sɛla n pa'alɛ tɩ ya sakrɩ Nawẽnnɛ nõorɛ sõŋa, tõma mãasʋm mɛ tɩ tɩ sɩbgɛ sɛba n sɩ'ɩsrɩ la wuu.

⁷ Yãma bɩsrɩ la sɛla tɩ yãma nini yẽtɩ la. Nẽra sãn tẽ'esɛ tɩ ẽŋa de la Krisi nẽra, a dãana mẽ tẽ'esɛ wãna wã: Ẽŋa n de Krisi nẽra la, tõma mẽ de la Krisi nẽrba.

⁸ La mam sãn wẽ m yõ'ogɔ zo'oge fẽe la ke'eŋo sɛka tɩ Zuudãana bɔ tõma la, yãnnɛ ka tarɩ mam, la de la Zuudãana n bɔ tõma ke'eŋo tɩ tɩ sõŋɛ ya tɩ ya sẽŋɛ nẽŋa Nawẽnnɛ doosgo pʋam, la dagɩ tɩ sã'am ya.

⁹ Mam ka boorɩ tɩ la ãna wʋ mam yetɩ m kẽ'esɛ ya la dabeem la m gõnnɔ na.

¹⁰ Se'ere n soe la, nẽrba n yetɩ se'em n wãna: «Apolɩ gõnnɔ na yetɔga kɛ'ɛm mɛ, dee dɛna toogo. La a mẽŋa sãn bɔna tõma zẽ'am, a ka tarɩ pãŋa, tɩ a yetɔga la dɛna ninbãalga.»

¹¹ Nẽr-sɛka dãana n tɔgrɩ bɛla la, a bãŋɛ sõŋa tɩ tõma n ka boe yãma zẽ'am dee tɔgra se'em gõnnɔ na pʋam na, tõma sãn wa'am wa bɔna ya zẽ'am, tõma ken ãna la bɛla.

¹² Tõma kãn saagɛ zõsõm tɩ mẽŋa, bɩɩ dɩkɛ tɩ mẽŋa makɛ la sɛba n pa'alɛ ba mẽŋa tẽ'esɛ tɩ bãma ãn sõŋa la. Ba dɩkrɩ la ba mẽŋa mãmsra, makra ba mẽŋa la taaba. Ban ɩtɩ se'em na, ba ka tarɩ yɛm.

¹³ La sãn dɛna tõma, tõma kãn wẽ yõ'ogɔ tɩ la yõsgɛ, tõma wʋn wẽ yõ'ogɔ masɛ la tõon-sɛka tɩ Nawẽnnɛ bɔ tõma la beene. Ẽŋa n bɔ tõma sore tɩ tõma paagɛ yãma zẽ'am.

¹⁴ Tõma ka yõsgɛ tɩ beene wʋ tõma ka wa'am na yãma zẽ'am na, tõma n de pɔspɔsɩ nẽrba n wa'am yãma zẽ'am wa mõolɛ Krisi kõ-yẽlga la.

¹⁵ Tõma ka wẽ'erɩ yõ'ogɔ la tõon-sɛba tɩ nẽrba basɛba tõm, bɛla tõma ka yõsgɛ. La tõma tarɩ pʋtẽ'erɛ tɩ yãma n bɔ Nawẽnnɛ sɩra la wʋn pa'asra mɛ, tɩ tõma tõonɛ na zɔ'ɔra pa'asra yãma zẽ'am, tɩ la ken masɛ Nawẽnnɛ n bɔ tõma se'em na beene.

¹⁶ Tɩ tõma yãŋa wʋn mõolɛ kõ-yẽlga la so'olʋm sɛba n boe ya nẽŋa la pʋam, tɩ la kãn dɛna tɩ tõma wẽ'era yõ'ogɔ la tõon-sɛba tɩ nẽrba basɛba dẽŋɛ tõm ba tõoma zẽ'am.

¹⁷ La gʋlsɛ Nawẽnnɛ gõŋɔ pʋam yetɩ: «Nẽr-sɛka n boorɩ tɩ a wẽ yõ'ogɔ, a wẽ yõ'ogɔ la sɛla tɩ Zuudãana ẽŋɛ la.»

¹⁸ Se'ere n soe la, la dagɩ nẽr-sɛka n pa'alɩ a mẽŋa tɩ ẽŋa ãn sõŋa la n masɛ, la de la nẽr-sɛka tɩ Zuudãana Nawẽnnɛ yetɩ a ãn sõŋa la.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ