အွန်လိုင်း သမ္မာကျမ်းစာ

1 Zã 4 - Farefare Ninkaré

Tɩ bãŋɛ-ya Nawẽnnɛ Sɩa, la be'em dãana sɩa bɔkɛ

¹ M sɩr-nõŋrɩsɩ, da bɔ-ya nẽr-sɛba wuu n yetɩ bãma tarɩ la Nawẽnnɛ Sɩa la sɩra, magɛ-ya ba bɩsɛ la sãn dɛna Nawẽnnɛ Sɩa. Se'ere n soe la, põmpɔrŋɔ nõtɔ'ɔsrɩba zozo'e n boe dũnia wã zuo.

² Bõn-sɛka n wʋn basɛ tɩ ya bãŋɛ Sɩa sɛka n de Nawẽnnɛ Sɩa n wãna: Nẽr-sɛka woo n yetɩ Azezi-krisi n wa'am dũnia zuo, la a tarɩ la nẽrsaala ĩyã, ẽŋa n tarɩ Nawẽnnɛ Sɩa.

³ La sɛka n ka tɔgrɩ Azezi yelle bɛla, ka tarɩ Nawẽnnɛ Sɩa, a tarɩ la Krisi sɩ'ɩsra la sɩa. Sɩ'ɩsra ẽŋa tɩ ya daan wõm tɩ a sẽm na, la lɛɛlɛ wã, a darɛ bɔna dũnia zuo mɛ.

⁴ La yãma, m kɔma, yãma de la Nawẽnnɛ nẽrba, la yãma yãŋɛ põmpɔrŋɔ nõtɔ'ɔsrɩba la mɛ. Se'ere n soe la, Nawẽnnɛ Sɩa n boe la yãma lɛ la, tarɩ pãŋa gãnna sɩ'ɩsra la sɩa n boe la dũnia dõma la mɛ.

⁵ Põmpɔrŋɔ nõtɔ'ɔsrɩba la de la dũnia wã bõnɔ, bɛla n soe tɩ ba tɔgra dũnia yɛla, tɩ dũnia dõma sɛlsra ba.

⁶ La sãn dɛna tõma, tõma de la Nawẽnnɛ nẽrba. Bɛla, nẽr-sɛka n mi Nawẽnnɛ selsrɩ tõma mɛ. La sɛka n dagɩ Nawẽnnɛ nẽra ka selsrɩ tõma. La de la bɛla tɩ tõma wʋn bãŋɛ sɩra Sɩa, la põmpɔrŋɔ sɩa la bɔkɛ.

Nawẽnnɛ de la nõŋlʋm dãana

⁷ M sɩr-nõŋrɩsɩ, tɩ nõŋɛ-ya taaba, se'ere n soe la, nõŋlʋm ze'ele la Nawẽnnɛ zẽ'am. Nẽr-sɛka n tarɩ nõŋlʋm de la Nawẽnnɛ bia, la a mi Nawẽnnɛ mɛ.

⁸ La nẽr-sɛka n ka tarɩ nõŋlʋm ka mi Nawẽnnɛ, se'ere n soe la, Nawẽnnɛ de la nõŋlʋm dãana.

⁹ Nawẽnnɛ n pa'alɛ ẽŋa n nõŋɛ tõma se'em n wãna: A tõm na a Dayɔ-yẽŋa dũnia zuo, tɩ tɩ tara vɔm ẽŋa ĩyã.

¹⁰ Nõŋlʋm na n doose se'em n wãna: La dagɩ tõma n dẽŋɛ nõŋɛ Nawẽnnɛ. La de la Nawẽnnɛ n nõŋɛ tõma, tõm a Dayʋa, tɩ a dɛna kãabgɔ tõma tõon-be'ero taalɛ basga ĩyã.

¹¹ M sɩr-nõŋrɩsɩ, Nawẽnnɛ n nõŋɛ tɩ bɛla la, dẽnɩ tɩ tõma mẽ nõŋɛ taaba.

¹² Nẽra nẽra nãn ka yẽ Nawẽnnɛ. Tɩ sãn nõŋɛ taaba, Nawẽnnɛ boe la tɩ lɛ mɛ, la a nõŋlʋm n boe la tɩ lɛ la, de la nõŋlʋm zõnzõnnɔ.

¹³ Bõn-sɛka n basɛ tɩ tõma bãŋɛ tɩ tõma boe la Nawẽnnɛ lɛ, tɩ Nawẽnnɛ mẽ bɔna la tõma lɛ n wãna: La de la a Sɩa tɩ a bɔ tõma la.

¹⁴ La tõma yẽ mɛ, tɩ tõma tɔgra yetɩ, Nawẽnnɛ n de Sɔ la tõm na a Dayʋa, tɩ a dɛna dũnia Fãagra.

¹⁵ Nẽr-sɛka n sakɛ yetɩ Azezi de la Nawẽnnɛ Dayʋa, Nawẽnnɛ boe la ẽ lɛ mɛ, tɩ a mẽ bɔna la Nawẽnnɛ.

¹⁶ La tõma mi mɛ, dee bɔ sɩra tɩ Nawẽnnɛ nõŋɛ tõma mɛ. Nawẽnnɛ de la nõŋlʋm dãana. Nẽr-sɛka n tarɩ Nawẽnnɛ nõŋlʋm boe la Nawẽnnɛ lɛ, tɩ Nawẽnnɛ mẽ bɔna la ẽ.

¹⁷ Tõma sãn tara Nawẽnnɛ nõŋlʋm zõnzõnnɔ, tɩ wʋn ãna wʋ Azezi n ãn se'em na dũnia wã zuo. Bɛla tɩ wʋn tara sũ-ke'eŋo sarɩyadia daarɛ.

¹⁸ Sɛka n tarɩ nõŋlʋm ka zotɩ dabeem, nõŋlʋm zõnzõnnɔ yesrɩ la dabeem, se'ere n soe la, dabeem zʋa pa'alɩ mɛ tɩ sɩbgrɛ n boe. Sɛka n zotɩ dabeem na ka tarɩ nõŋlʋm zõnzõnnɔ.

¹⁹ La sãn dɛna tõma, tõma tarɩ nõŋlʋm mɛ, se'ere n soe la, Nawẽnnɛ dẽŋɛ nõŋɛ tõma mɛ.

²⁰ Nẽr-sɛka sãn yetɩ, ẽŋa nõŋɛ Nawẽnnɛ, dee sise a sɔbia, a de la põmpɔrma. Se'ere n soe la, a sãn ka nõŋɛ a sɔbia tɩ a yẽtɩ la, a ka tã wʋn nõŋɛ Nawẽnnɛ tɩ a ka yẽtɩ la.

²¹ Nõorɛ sɛka tɩ Krisi bɔ tõma la n wãna: Nẽr-sɛka n nõŋɛ Nawẽnnɛ, dẽnɩ tɩ a mẽ nõŋɛ a sɔbia.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ