အွန်လိုင်း သမ္မာကျမ်းစာ

1 Zã 2 - Farefare Ninkaré

Krisi n de tõma sõŋra

¹ M kɔma, mam gʋlsrɩ ya wãna tɩ ya da tõm na tõon-be'ero. La nẽra sãn tõm be'em, tõma tarɩ la sõŋra n boe tɩ Sɔ Nawẽnnɛ zẽ'am, la de la Azezi-krisi n de pʋpeelem dãana.

² La de la ẽŋa n dɩkɛ a mẽŋa bɔ tɩ la dɛna kãabgɔ, tɩ Nawẽnnɛ basɛ tõma tõon-be'ero taalɛ. La, la dagɩ tõma mã'a tõon-be'ero taalɛ, la de la dũnia nẽrba wuu tõon-be'ero taalɛ.

³ Tɩ sãn sakra Nawẽnnɛ nõorɛ, bɛla n pa'alɩ tɩ tɩ sɩrɩ mi ẽ.

⁴ Nẽr-sɛka n yetɩ ẽŋa mi ẽ, dee ka sakra a nõorɛ, a de la põmpɔrma, la a ka tarɩ sɩra.

⁵ Nẽr-sɛka n sakrɩ Nawẽnnɛ yetɔga la, nẽr-ẽŋa n tarɩ Nawẽnnɛ nõŋlʋm sɩra sɩra. Bɛla n pa'alɩ tɩ tɩ lagɩm na ẽ dɛna ayɩla.

⁶ Sɛka n yetɩ ẽŋa lagɩm na Nawẽnnɛ, dẽnɩ tɩ a dãana vɔa wʋ Azezi-krisi n daan vɔa se'em na.

Nawẽnnɛ nõorɛ de la tɩ nõŋɛ taaba

⁷ M sɩr-nõŋrɩsɩ, la dagɩ nõor-paalga tɩ mam gʋlsɛ bɔ'ɔra ya, a de la nõor-kɛka tɩ ya tarɩ halɩ pɔspɔsɩ la. Nõor-kɛka ẽŋa de la kõ-sɛka tɩ ya daan wõm na.

⁸ La a yɛrɩ dɛna la nõor-paalga tɩ mam gʋlsɛ bɔ'ɔra ya. La de la Azezi-krisi zẽ'am, la yãma zẽ'am tɩ yel-ẽŋa de sɩra, se'ere n soe la, lika la tollɩ mɛ, dee tɩ peelem sɩra sɩra darɛ nẽera.

⁹ Nẽr-sɛka n yetɩ ẽŋa boe la peelem pʋam, dee sisra a sɔbia, ken bɔna la lika pʋam.

¹⁰ Nẽr-sɛka n nõŋɛ a sɔbia, vɔa la peelem pʋam, bɛla ĩyã sɛla ka boe a zẽ'am n wʋn basɛ tɩ a tuuge.

¹¹ La sɛka n sisri a sɔbia, boe la lika pʋam, la a sẽnnɩ na lika pʋam, ka mina ẽn we'esɩ zẽ'a, se'ere n soe la, lika la fɔ a nini mɛ.

¹² Mam gʋlsɛ bɔ'ɔra la yãma, m kɔma, se'ere n soe la, Nawẽnnɛ basɛ ya tõon-be'ero taalɛ mɛ Azezi-krisi yʋ'ʋrɛ ĩyã.

¹³ Mam gʋlsɛ bɔ'ɔra la yãma, m sɔdõma, se'ere n soe la, yãma mi sɛka n boe halɩ lan dẽŋɛ dũnia pĩ'iluŋo la mɛ. Mam gʋlsɛ bɔ'ɔra la yãma, m kɔmbɩ'ɩsɩ, se'ere n soe la, yãma yãŋɛ be'em dãana Asũtãana la mɛ.

¹⁴ Mam gʋlsɛ bɔ'ɔra la yãma, m kɔma, se'ere n soe la, yãma mi tɩ Sɔ Nawẽnnɛ mɛ. Mam gʋlsɛ bɔ'ɔra la yãma, m sɔdõma, se'ere n soe la, yãma mi sɛka n boe halɩ lan dẽŋɛ dũnia pĩ'iluŋo la mɛ. Mam gʋlsɛ bɔ'ɔra la yãma, m kɔmbɩ'ɩsɩ, se'ere n soe la, yãma tarɩ pãŋa mɛ, Nawẽnnɛ yetɔga la boe ya pʋam mɛ, la yãma yãŋɛ be'em dãana Asũtãana la mɛ.

Da nõŋɛ-ya dũnia

¹⁵ Da nõŋɛ-ya dũnia, la bõn-sɛba n boe a pʋam na. Nẽra sãn nõŋɛ dũnia wã, Nawẽnnɛ n de tɩ Sɔ la nõŋlʋm ka boe la a dãana lɛ.

¹⁶ Se'ere n soe la, bõn-sɛba n de dũnia wã bõnɔ de la nẽrsaala mẽŋa n boorɩ se'em, la nini n yẽ sɛla bɔɔra n de be'em, la nẽra n pa'alɩ a mẽŋa a bõntarsõm ĩyã. Bãma wuu ka ze'ele tɩ Sɔ Nawẽnnɛ zẽ'am, ba de la dũnia bõnɔ.

¹⁷ Dũnia, la bõn-sɛba wuu tɩ nẽrba yɛmleego boorɩ la tollɩ mɛ. La nẽr-sɛka n ɩtɩ Nawẽnnɛ n boorɩ se'em n wʋn bɔna wakatɛ n ka ba'asrɩ.

Krisi sɩ'ɩsrɩba yelle

¹⁸ M kɔma, lɛɛlɛ wã la de la dũnia ba'asgɔ wakatɛ. Yãma wõm tɩ ba yetɩ Krisi sɩ'ɩsra n sẽm. La lɛɛlɛ wã, Krisi sɩ'ɩsrɩba zo'oge mɛ bɔna, bɛla tõma mi mɛ tɩ la de la dũnia ba'asgɔ wakatɛ.

¹⁹ Nẽr-bãma ze'ele la tõma zẽ'am yese, la ba daan dagɩ tõma nẽrba sɩra sɩra. Ba daan sãn de nɩ tõma nẽrba, ba wʋn weege nɩ bɔna la tõma zẽ'am. La ban basɛ tõma la, dẽnɩ tɩ la ẽŋɛ bɛla tɩ la pa'alɛ vẽelga tɩ ba nẽra baa ayɩla dagɩ tõma nẽra.

²⁰ La sãn dɛna yãma, Krisi bɔ ya Nawẽnnɛ Sɩa mɛ, bɛla yãma wuu mi sɩra mɛ.

²¹ Mam n gʋlsɛ bɔ ya la, mam ka yetɩ ya ka mi sɩra la, la tõn dɛna la yan mi ẽ na ĩyã, la yãma mi tɩ sɛla n de põmpɔrŋɔ ka ze'etɩ sɩra pʋam.

²² Ãne n de põmpɔrma la? La de la sɛka n sɩ'ɩsrɩ yetɩ Azezi dagɩ Krisi la. Ẽŋa n de Krisi sɩ'ɩsra la. A sɩ'ɩsrɩ la Sɔ Nawẽnnɛ, la a Dayʋa la.

²³ Nẽr-sɛka n sɩ'ɩsrɩ Dayʋa la, mẽ ka boe la Sɔ la. La nẽr-sɛka n yetɩ ẽŋa mi Dayʋa la, mẽ boe la Sɔ la mɛ.

²⁴ La sãn dɛna yãma, mõrgɛ-ya tara yetɔg-sɛba tɩ ya daan wõm halɩ pɔspɔsɩ la ya sũure pʋam. Ba sãn ken bɔna ya sũure pʋam, yãma mẽ wʋn ken bɔna la Sɔ, la Dayʋa la lɛ.

²⁵ Krisi n bĩŋe nõorɛ tɩ a bɔ tɩ sɛla n wãna: La de la vɔm n ka ba'asrɩ.

²⁶ La de la nẽr-sɛba n zɩgrɩ tɩ ba pã'asɛ ya tɩ ya tuuge la yelle tɩ mam gʋlsɛ wãna bɔ'ɔra ya.

²⁷ La sãn dɛna yãma, Nawẽnnɛ Sɩa la tɩ ya to'oge Krisi zẽ'am na, boe la ya lɛ mɛ, yãma ka le ɛɛra tɩ ba zãsʋm ya. Nawẽnnɛ Sɩa la n boe la ya lɛ la, zãsnɩ ya sɛla woo mɛ, la de la sɩra, a ka parnɩ. Bɔna-ya la Krisi wʋ ẽn zãsnɩ ya se'em na.

²⁸ Ẽe, m kɔma, bɔna-ya la ẽ lɛ, tɩ a sãn wa puke daarɛ tɩ tɩ tara sũ-ke'eŋo, tɩ yãnnɛ da yõkɛ tɔ a nẽŋam a lemŋo la daarɛ.

²⁹ Yãma mi tɩ Krisi de la sɛka n masɛ, bɛla, bãŋɛ-ya tɩ nẽr-sɛka n mẽ ɩtɩ sɛla n masɛ de la Nawẽnnɛ bia.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ