အွန်လိုင်း သမ္မာကျမ်းစာ

1 Timoti 1 - Farefare Ninkaré

¹ Mam Apolɩ n de Azezi-krisi Tõntõnna n gʋlsɛ gõŋɔ wã. La de la Nawẽnnɛ n de tɩ Fãagra, la Azezi-krisi tɩ tɩ tarɩ pʋtẽ'erɛ gu'ura la, n bɔ mam nõorɛ tɩ mam dɛna a Tõntõnna.

² Mam gʋlsɛ gõŋɔ wã bɔ'ɔra la Atimõtɩ n lebge mam mẽŋa bia Azezi-krisi doosgo la pʋam. Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ fʋ yel-sõnnɛ, dee zoe fʋ ninbãalga, dee bɔ fɔ sũ-mã'asʋm.

Sɛba n zãsnɩ põmpɔrŋɔ zãsŋɔ

³ Mam n daan we'esɩ Masedʋanɩ dee yele fʋ se'em na, ken weege Efɛɛzɩ tẽŋa yele nẽr-sɛba n zãsnɩ põmpɔrŋɔ zãsŋɔ la tɩ ba da zãsʋm.

⁴ Yele ba tɩ ba basɛ kʋrʋm kʋrʋm dõma sɔlma, la yaabdõma deto kãalgɔ n ka tarɩ ba'asgɔ. Bõn-bãma tarɩ la nõke'ene sẽna, dee ka sõŋra tɩ Nawẽnnɛ tõoma sẽnna nẽŋa. Nẽrba n bɔ Nawẽnnɛ sɩra n botɩ a tõoma la sẽnna nẽŋa.

⁵ Mam yetɩ fʋ yele ba bɛla, tɩ ba tara la pʋtẽ'erɛ n ãn sõŋa, dee bãŋɛ ba sũure pʋam tɩ ba ka tarɩ dõrga, dee bɔ Nawẽnnɛ sɩra la ba sũure wuu tɩ ba nõŋlʋm zo'oge.

⁶ La nẽrba basɛba basɛ bõn-bãma mɛ, dee tɔgra yetɔg-yaalsɩ,

⁷ bɔɔra tɩ ba dɛna Nawẽnnɛ lɔɔ karẽnsãandõma, dee ka wõnna ba mẽŋa n yetɩ se'em, bɩɩ yel-sɛba tɩ ba zãsnɩ na võorɛ.

⁸ Tɩ mi tɩ Amoyisi lɔɔ ãn sõŋa, ba sãn dɩkɛ ẽ tõm wʋ lan masɛ se'em.

⁹ Tõma mi tɩ lɔɔ la ka ẽŋɛ sɛba n masɛ la ĩyã, a ẽŋɛ la nẽr-sɛba n ka sakrɩ lɔɔ, la sɛba n ka sakrɩ nõorɛ la ĩyã, la sɛba toogo n ka boe la Nawẽnnɛ, la tõon-be'ero dõma, la nẽr-sɛba n pɔ'ɔrɩ Nawẽnnɛ dee ka nanna bõn-sɛba wuu n de Nawẽnnɛ bõnɔ, la sɛba n kʋʋrɩ ba sɔdõma, la ba madõma, la sɛba n de nẽr-kʋʋrba ĩyã,

¹⁰ la sɛba n ɩtɩ yalsɩ, la bʋra-sɛba n gã la taaba, la pɔg-sɛba n gã la taaba, la sɛba n yõgrɩ nẽrba kɔɔsra, la põmpɔrndõma, la sɛba n pɔtɩ dee ka ɩta ban yele se'em na, la nẽr-sɛba n ɩtɩ sɛla woo n sɩ'ɩsrɩ sɩra kõ-yẽlga la ĩyã.

¹¹ Kõ-yẽlga ẽŋa ze'ele la sũ-yẽlga dãana Nawẽnnɛ n tarɩ na'am pãŋa la zẽ'am, ẽŋa n dɩkɛ ẽ ẽŋɛ mam nu'usum tɩ m mõolɛ.

Apolɩ pʋ'ʋsrɩ Nawẽnnɛ a yel-sõnnɛ

¹² Mam pʋ'ʋsrɩ tɩ Zuudãana Azezi-krisi n bɔ mam pãŋa, la ẽn bãŋɛ tɩ mam de sɩra dãana looge mam tɩ m tõm a tõonɛ wã.

¹³ Baa mam n daan pɔ'ɔrɩ a yʋ'ʋrɛ, nãmsra a nẽrba, dee tʋʋra ẽ na, a zoe mam ninbãalga mɛ. Se'ere n soe la, mam daan ka bãŋɛ mam ɩtɩ sɛla, mam n daan ka bɔ Azezi sɩra la ĩyã tɩ mam ɩta bɛla.

¹⁴ Tɩ Zuudãana Azezi-krisi la ẽŋɛ mam a yel-sõnnɛ mɛ zozo'e, botɩ mam bɔ ẽ sɩra, dee tara a nõŋlʋm.

¹⁵ Yetɔg-sɛka tɩ mam yetɩ m tɔgɛ wã de la sɩra, la a masɛ mɛ tɩ nẽra woo to'oge ẽ sõŋa: «Azezi-krisi wa'am dũnia zuo wa fãagɛ la tõon-be'ero dõma.» La mam n de tõon-be'ero dãana gãnna ba wuu.

¹⁶ La ẽn zoe mam ninbãalga la, la de la Azezi-krisi n pa'alɛ a sũ-mã'arɛ zozo'e la mam n de tõon-be'ero dãana gãnna la, tɩ la wʋn dɛna makrɛ pa'alɛ nẽr-sɛba n wʋn wa bɔ ẽ sɩra la, tɩ a wʋn ẽŋɛ a sũ-mã'asʋm la ba, dee bɔ ba vɔm n ka ba'asrɩ.

¹⁷ Nawẽnnɛ n de naba wakatɛ wuu, n ka kiiri, tɩ nini ka yẽta ẽ, ẽŋa ayɩla mã'a sɔna pẽka la nã'asgɔ wakatɛ n ka ba'asrɩ. Amina.

¹⁸ M bia Atimõtɩ, mam zãsŋɔ n wãna tɩ mam dɩkɛ ɩta fʋ nu'usum, wʋ ban daan to'oge Nawẽnnɛ yetɔga tɔgɛ fʋ yelle se'em na: Basɛ tɩ yetɔg-bãma bɔ fʋ pãŋa, tɩ fʋ zɛbɛ zɛbrɛ sõŋa,

¹⁹ ken bɔ Nawẽnnɛ sɩra, dee ɩta sɛla tɩ fʋ mi fʋ sũure pʋam tɩ la ãn sõŋa. Nẽrba basɛba zagsɛ bɛla mɛ, tɩ bõn-ẽŋa basɛ tɩ ba ka le dɔla Azezi sore.

²⁰ Nẽr-bãma pʋam, Ahimẽnɩ, la Alɛgsãndrɩ n daan boe mĩ, tɩ mam daan basɛ ba la Asũtãana tɩ ba yõgɛ yɛm, da le pɔ'ɔra Nawẽnnɛ.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ