1 Tesaloniki 4 - Farefare Ninkaré

Tɩn wʋn ɩta se'em tɩ la paagɛ Nawẽnnɛ yɛm

¹ Sɛla n pa'asɛ, m sɔbiisi, yãma zãsʋm tõma zẽ'am mɛ yãma n wʋn ɩta se'em paagɛ Nawẽnnɛ yɛm. Yãma põn ɩta la bɛla. La tõma kã'anɩ ya mɛ, dee bɛlna ya la tɩ Zuudãana Azezi yʋ'ʋrɛ tɩ ya malɩn ẽŋɛ gãŋɛ bɛla.

² Yãma mi bõn-sɛba tɩ tõma daan to'oge tɩ Zuudãana Azezi zẽ'am pa'alɛ ya tɩ ya ɩta la.

³ Nawẽnnɛ n boorɩ tɩ ya ãna se'em n wãna: Welge-ya to'ore dɛna pʋpeelem dõma, dee yõkɛ ya mẽŋa da tõnna yalsɩ tõoma.

⁴ La ya nẽra woo bãŋɛ ẽŋa n wʋn tara a ĩyã se'em la pʋpeelem tɩ la ãna sõŋa.

⁵ Da basɛ-ya tɩ yalsɩ tõoma yɛmleego tara ya, wʋ sɛba n ka dolɩ Nawẽnnɛ n ɩtɩ se'em na.

⁶ Yel-ẽna pʋam, nẽra da kãn tõm a tadãana sɛla n ka ãn sõŋa, bɩɩ fã sɛla n de a bõnɔ. Tɩ daan põn dẽŋɛ yele ya, dee kã'an ya mɛ, tɩ Zuudãana wʋn sɩbgɛ sɛba n tõnnɩ tõon-be'ero bãma mɛ.

⁷ Nawẽnnɛ ka looge to tɩ tɩ tõnna tõon-dẽgrɔ, a looge to tɩ tɩ welge la to'ore tara pʋpeelem.

⁸ Bɛla, nẽr-sɛka n zagsɛ pa'algɔ ẽna, a ka zagsɛ nẽrsaala, a zagsɛ la Nawẽnnɛ n bɔ tɔ a Sɩa la.

⁹ La sãn dɛna yãma n wʋn nõŋɛ sɔbiisi se'em yelle, la ka le dɛna tɩ gʋlsɛ bɔ ya. Nawẽnnɛ põn zãsʋm yãma ya wʋn nõŋɛ taaba se'em mɛ.

¹⁰ La yãma sɩrɩ nõŋɛ ya sɔbiisi wuu n boe Masedʋanɩ so'olʋm wuu la bɛla. La tõma kã'anɩ ya mɛ tɩ ya malɩn ẽŋɛ gãŋɛ bɛla pa'asɛ.

¹¹ Mõrgɛ ya mẽŋa vɔa la sũ-mã'asʋm, la ya bɩsra ya mẽŋa tõoma yelle, tõnna-ya la ya mẽŋa nu'usi dita, wʋ tõma n daan yele ya se'em na.

¹² Ɩta-ya bɛla, tɩ ya yel-ɩrɛ la basɛ tɩ ya yẽ nã'asgɔ nẽr-sɛba n ka dolɩ Nawẽnnɛ na zẽ'am. La ya da zɛ gu'ura tɩ nẽra bɔ ya sɛla.

Zuudãana Azezi lemŋo

¹³ M sɔbiisi, tõma boorɩ tɩ ya bãŋɛ la sɩra nẽr-sɛba n ki la yelle, tɩ ya sũure da sã'am wʋ nẽr-sɛba n ka tarɩ pʋtẽ'erɛ gu'ura sɛla la.

¹⁴ Tõma n bɔ sɩra tɩ Azezi ki mɛ, dee vo'oge la, bɛla tõma ken bɔ sɩra mɛ tɩ sɛba n dolɩ Azezi dee ki la, Nawẽnnɛ wʋn botɩ ba bɔna la Azezi.

¹⁵ Zuudãana zãsŋɔ n wãna tɩ tõma yetɩ tɩ pa'alɩ ya: Wakat-sɛka tɩ Zuudãana la lemnɩ la, tõma sɛba n ken vɔa Zuudãana lemŋo daarɛ la kãn dẽŋɛ sɛba n ki la Zuudãana zẽ'am.

¹⁶ Se'ere n soe la, nõorɛ n wʋn bɔ, tɩ malɛkadõma naba tɔgɛ ke'enke'em, tɩ Nawẽnnɛ benkonne peebe, tɩ Zuudãana mẽŋa ze'ele Nawẽnnɛ yire sige, tɩ sɛba n dolɩ Azezi dee ki la dẽŋɛ vo'oge.

¹⁷ Tɩ Nawẽnnɛ lagɩm bãma, la tõma sɛba n ken vɔa la zẽkɛ sawara pʋam tɩ tɩ tʋ'ʋsɛ Zuudãana la saazuum, tɩ tɩ bɔna la Zuudãana la lɛ wakatɛ wuu.

¹⁸ Bɛla, kɛŋra-ya taaba sũure la yetɔg-bãna.