1 Pita 5 - Farefare Ninkaré

Kã'aŋɔ

¹ Mam yetɩ m kã'an na sɛba n de Nawẽnnɛ nẽrba kẽma bɔna ya pʋam na. Mam mẽ de la kẽema, dee dɛna Krisi nãmsgɔ la kaset-dãana, la mam wʋn po yẽ a na'am pãŋa n wʋn wa puke la mɛ.

² Mam yetɩ ya mɛ tɩ ya bɩsra Nawẽnnɛ nẽrba la tɩ a gu'ule ya wʋ dũnsĩima la. La, la da kãn dɛna dɔk-m-zuugo yelle, la dɛna la yɛmleego wʋ Nawẽnnɛ n boorɩ se'em na. Da ɩta-ya yan boorɩ bõntarsõm ĩyã, ɩta-ya ya yɛm n boe a pʋam ĩyã.

³ Da ɛɛra-ya tɩ ya sɔna sɛba tɩ ba dɩkɛ gu'ule ya la, la pãŋa. Dɛna-ya nẽrba tɩ ya yel-ɩrɛ wʋn pa'alɛ ba sɛla n ãn sõŋa, tɩ ba ãna wʋ yãma n ãn se'em na.

⁴ Tɩ dũnsĩin-kɛ'ɛma la sãn wa puke, ya wʋn to'oge yɔɔrɔ n ka sã'anɩ n tarɩ pẽka.

⁵ Bɛla mẽ, kɔmbɩ'ɩsɩ, sakra-ya kẽma la. La ya wuu tara sik-m-mẽŋa la taaba, tɩ la gʋlsɛ yetɩ: «Nawẽnnɛ sisri zẽk-m-mẽŋa dõma mɛ, dee ɩta sik-m-mẽsɩ dõma yel-sõnnɛ.»

⁶ Bɛla, sike ya mẽŋa Nawẽnnɛ n de ke'eŋo dãana la nẽŋam, tɩ wakatɛ sãn paagɛ, a wʋn zẽkɛ ya.

⁷ Basɛ-ya ya fablɩgɔ la wuu bɔ ẽ, tɩ a bɩsrɩ ya yelle mɛ.

⁸ Dɛna-ya nẽrba n yõkrɩ ya mẽŋa, dee guusra ya mẽŋa sõŋa, tɩ ya bɛ Asũtãana eerɩ ya mɛ, wʋ gɩgnɛ n kaarɩ ɛɛra sɛla tɩ a yõkɛ obe.

⁹ Bɔ-ya Azezi-krisi sɩra ze'ele kãŋkãŋɛ, dee sɩ'ɩsɛ Asũtãana, la ya bãŋɛ tɩ ya sɔbiisi n boe dũnia zẽ'a woo mẽ nãmsrɩ la nãmsgɔ bãma mẽŋa buuri.

¹⁰ Ya wʋn ken nãmsɛ mɛ wakatɛ fẽe. La Nawẽnnɛ n soe yel-sõnnɛ wuu la wi ya mɛ tɩ ya po yẽ a na'am pãŋa n ka tarɩ ba'asgɔ, yãma n lagɩm na Krisi dɛna ayɩla la ĩyã. Ẽŋa wʋn le malgɛ ya tɩ ya ãna sõŋa, bɔ ya pãŋa tɩ ya ze'ele kãŋkãŋɛ, tɩ sɛla kãn tã'agɛ botɩ ya bike.

¹¹ Ẽŋa n soe pãŋa wakatɛ n ka ba'asrɩ. Amina.

Pʋ'ʋsgɔ

¹² Mam botɩ Asilvẽ n gʋlsɛ gõn-pɩka wã, ẽŋa n de sɔbia tɩ mam bɩsɛ tɩ a de sɩra dãana. Mam gʋlsɛ gõŋɔ wã tɩ m bɔ ya la bʋraanɛ, dee botɩ ya bãŋɛ tɩ yel-sõnnɛ na tɩ ya tarɩ la, de la Nawẽnnɛ yel-sõnnɛ mẽŋa mẽŋa pʋam tɩ ya boe.

¹³ Nawẽnnɛ nẽrba n boe Babilɔnɩ tɩ a tũ'use ba wʋ yãma la pʋ'ʋsrɩ ya, Amarkɩ n lebge mam dayʋa la mẽ pʋ'ʋsrɩ ya.

¹⁴ Pʋ'ʋsɛ-ya taaba la nõŋlʋm. Sũ-mã'asʋm wʋn bɔna la yãma sɛba wuu n lagɩm na Krisi dɛna ayɩla la.