1 Pita 2 - Farefare Ninkaré

¹ Bɛla, basɛ-ya pʋtʋʋlgɔ wuu, la põmpɔrŋɔ, la pʋlibsum, la sũure, la taaba pɔ'ɔrɛ.

² Nõŋɛ-ya Nawẽnnɛ yetɔga wʋ bilɛɛsɩ n nõŋɛ ba ma bĩ'isum mã'a la. Tɩ a wʋn basɛ tɩ ya bɩ Azezi-krisi sore doosgo la pʋam, yẽ fãarɛ.

³ Tɩ yãma bãŋɛ Zuudãana la n ãn sõŋa se'em mɛ.

Nawẽnnɛ mẽŋa nẽrba

⁴ Lɛm-ya Zuudãana n de vɔm dãana la zẽ'am, ẽŋa ãn wʋ kug-sɛka tɩ nẽrba zagsɛ, tɩ Nawẽnnɛ looge ẽ tɩ a tara yõorɔ zozo'e.

⁵ Yãma mẽ vɔa mɛ. Basɛ-ya tɩ Nawẽnnɛ dɩkɛ ya tɩ ya ãna wʋ kuga mẽ deego tɩ a Sɩa bɔna mĩ, tɩ ya ãna wʋ kãabgɔ kẽma bɔna mĩ tõnna wʋ Nawẽnnɛ Sɩa n boorɩ se'em, tɩ la paara a yɛm, Azezi-krisi ĩyã.

⁶ La gʋlsɛ Nawẽnnɛ gõŋɔ pʋam yetɩ: «Bɩsɛ, mam looge la kugre n tarɩ yõorɔ zozo'e ẽebɛ m deego Siyõ, ẽŋa n de kugre n botɩ deego la tara pãŋa. Nẽr-sɛka n bɔ ẽ sɩra, yãnnɛ kãn yõkɛ ẽ.»

⁷ Yãma sɛba n bɔ ẽ sɩra la, a tarɩ la yõorɔ zozo'e bɔ ya. La sɛba n ka bɔ ẽ sɩra la, la gʋlsɛ ba yelle yetɩ: «Kug-sɛka tɩ tõnmẽtba zagsɛ la n lebge kugre n botɩ deego la tara pãŋa.»

⁸ La ken gʋlsɛ yetɩ: «La de la kug-ẽŋa n wʋn basɛ tɩ nẽrba wẽ'era nãma, dee dɛna tãmpĩ-sɛka n wʋn basɛ tɩ ba lui.» Ban wẽ'erɩ nãma la, la de la ban ka bɔ Nawẽnnɛ yetɔga sɩra la ĩyã, wʋ lan masɛ tɩ la ẽŋɛ ba se'em na.

⁹ La sãn dɛna yãma, yãma de la buuri tɩ Nawẽnnɛ looge, ya de la ẽŋa n de naba la kãabgɔ kẽma, dee ken dɛna a nẽrba n welge to'ore tara pʋpeelem. A wi ya la lika pʋam, tarɩ yese a peelem n ãn sõŋa zozo'e pʋam, tɩ ya botɩ nẽrba bãŋɛ a tõon-kãra la.

¹⁰ Kʋrʋm, ya daan dagɩ Nawẽnnɛ nẽrba, la lɛɛlɛ wã ya de la a nẽrba. A daan ka zotɩ ya ninbãalga, la a yãŋa zotɩ ya ninbãalga mɛ.

Krisi nẽrba yel-ɩrɛ

¹¹ M sɩr-nõŋrɩsɩ, yãma de la sãama la kɔɔs-weto dũnia zuo, bɛla mam kã'anɩ ya mɛ tɩ ya basɛ nẽrsaalba n boorɩ se'em n de be'em n sã'anɩ ya la.

¹² Basɛ-ya tɩ ya yel-ɩrɛ ãna sõŋa nẽr-sɛba n ka dolɩ Nawẽnnɛ na tẽŋasʋka, tɩ baa ba sãn dõta ya yetɩ ya de la tõon-be'ero dõma, ba wʋn yẽ ya tõon-sõma la, nã'asɛ Nawẽnnɛ a wa'aŋɔ daarɛ.

¹³ Sakra-ya dũnia pãnsɩ dõma wuu Zuudãana Azezi ĩyã. Sakra-ya na-keko n soe ke'eŋo wuu,

¹⁴ la ya sakra gɔmnadõma tɩ a tõm tɩ ba sɩbgrɩ sɛba n tõnnɩ tõon-be'ero, dee nã'asra nẽr-sɛba n tõnnɩ tõon-sõma la.

¹⁵ Se'ere n soe la, Nawẽnnɛ n boorɩ se'em de la ya ɩta sõŋa, basɛ tɩ nẽr-sɛba n ka mi sɛla dee tɔgra gɔɔn-yetɔga la go'oge.

¹⁶ Ɩta-ya wʋ nẽrba n soe ba mẽŋa, la da dɩkɛ-ya yan soe ya mẽŋa la tɩ la dɛna sɛla n botɩ ya tõnna be'em, tõnna-ya wʋ Nawẽnnɛ tõntõnɩba n masɛ tɩ ba tõnna se'em na.

¹⁷ Nanna-ya nẽrba wuu, nõŋɛ ya sɔbiisi, zɔta-ya Nawẽnnɛ, nanna-ya na-keko.

¹⁸ Tõntõnɩba, sakra-ya ya zuudãandõma dee zɔta ba. La, la dagɩ sɛba n de nẽr-sõma, la sũ-bʋgsʋm dõma la mã'a, sakra-ya baa sɛba n de nẽr-tɔɔsɩ la.

¹⁹ Nẽra sãn sakra nãmsgɔ n ka masɛ nɩ tɩ a nãmsɛ, ẽn sakrɩ Nawẽnnɛ na ĩyã, la de la yel-sõnnɛ.

²⁰ Fʋ sãn tõm na tõon-be'ero tɩ ba nãmsra fɔ tɩ fʋ sakɛ wĩbra, a ka tarɩ yõorɔ. La fʋ sãn tõm na tõon-sõma tɩ ba nãmsra fɔ, tɩ fʋ sakɛ wĩbra, la de la yel-sõnnɛ Nawẽnnɛ zẽ'am.

²¹ La de la bɛla ĩyã tɩ Nawẽnnɛ wi ya. Krisi mẽ daan nãmsɛ yãma ĩyã mɛ, basɛ mãmsgɔ tɩ ya dɔla a nabara ɩta wʋ ẽŋa n ẽŋɛ se'em na.

²² A daan ka tõm tõon-be'ego, la põmpɔrŋɔ ka yese a nõorʋm.

²³ Ban daan tʋ ẽ na, a ka lebse tʋ, la ban daan nãmsɛ ẽ na, a daan ka zɛbɛ la ba, a dɩkɛ a mẽŋa basɛ la sɛka n diti sarɩya la sɩra la nu'usum.

²⁴ Ẽŋa n to'oge tõma zẽ'am ki dɔ-puurŋa zuo tõma tõon-be'ero ĩyã, tɩ la sãn dɛna la tõon-be'ero tõoma, tõma ãn wʋ tɩ ki mɛ, dee vɔa ɩta sɛla n masɛ. A pɔglʋŋɔ la ĩyã tɩ ya yẽ laafɛ.

²⁵ Ya daan ãn wʋ piisi n bɔɩ, la lɛɛlɛ wã, ya leme na ya dũnsĩina la zẽ'am, ẽŋa n bɩsrɩ ya.