အွန်လိုင်း သမ္မာကျမ်းစာ

1 Korẽntɩ 15 - Farefare Ninkaré

Azezi-krisi vo'ore

¹ M sɔbiisi, lɛɛlɛ wã mam boorɩ tɩ m tẽegɛ ya la kõ-yẽlga la tɩ mam daan mõolɛ bɔ ya tɩ ya bɔ sɩra zɛ kãŋkãŋɛ la yelle.

² Ya sãn gʋrɛ ẽ kãŋkãŋɛ wʋ mam n mõolɛ ya se'em na, ya wʋn yẽ fãarɛ. La sãn dagna bɛla, yan bɔ sɩra la de la zãŋa.

³ Zãsŋɔ sɛka n gãnnɩ tɩ mam daan to'oge n bɛla tɩ mam dẽŋɛ zãsʋm ya: Krisi ki la tõma tõon-be'ero ĩyã, wʋ lan gʋlsɛ Nawẽnnɛ gõŋɔ pʋam se'em na.

⁴ Tɩ ba daan laagɛ ẽ, tɩ Nawẽnnɛ botɩ a vo'oge dabsa atã daarɛ, wʋ lan gʋlsɛ Nawẽnnɛ gõŋɔ pʋam se'em na.

⁵ La a daan dẽŋɛ dɩkɛ a mẽŋa pa'alɛ la Apɩyɛɛrɩ, dee yãŋa dɩkɛ a mẽŋa pa'alɛ karẽnbiisi pia la ayi la.

⁶ Bɛla poorʋm tɩ a dɩkɛ a mẽŋa pa'alɛ a karẽnbiisi n gãnnɩ kɔbsnuu wakatɛ ayɩla. Ba nẽrba basɛba zozo'e ken vɔa mɛ, la basɛba ki mɛ.

⁷ Bɛla poorʋm tɩ a dɩkɛ a mẽŋa pa'alɛ Azakɩ, dee yãŋa dɩkɛ a mẽŋa pa'alɛ Tõntõnɩba la wuu.

⁸ Bɛla wuu poorʋm, a dɩkɛ a mẽŋa pa'alɛ la mam n ãn wʋ bia tɩ ba dɔgɛ tɩ a wakatɛ ka paagɛ la.

⁹ Mam de la pɩka Tõntõnɩba la wuu zẽ'am, dee ka nara tɩ ba wi'ira mam tɩ Tõntõnna, mam n daan nãmsɛ Nawẽnnɛ nẽrba la ĩyã.

¹⁰ La Nawẽnnɛ yel-sõnnɛ ĩyã tɩ mam dɛna mam n de se'em lɛɛlɛ wã. Yel-sõnnɛ na tɩ Nawẽnnɛ bɔ mam na dagɩ zãŋa. Mam tõm gãnna Tõntõnɩba basɛba la wuu mɛ. La, la dagɩ mam mẽŋa n tõnnɩ bɛla, Nawẽnnɛ yel-sõnnɛ na ĩyã tɩ mam yãŋɛ tõnna bɛla.

¹¹ Bɛla, la sãn dɛna la mam n mõolɛ kõ-yẽlga la, bɩɩ bãma, tɩ wuu mõolɛ la kõ-yẽlga sɛka tɩ mam tẽegɛ ya a yelle la, sɛka tɩ ya daan sakɛ la.

Kũm vo'ore

¹² Tõma n mõolɩ tɩ Krisi ki mɛ dee vo'oge la, wãne tɩ ya nẽrba basɛba yetɩ, sɛba n ki la kãn vo'oge?

¹³ La sãn dɛna sɩra tɩ nẽr-sɛba n ki la kãn vo'oge, bɛla Krisi yi ka vo'oge.

¹⁴ La Krisi sãn ka vo'oge, kõ-yẽlga la tɩ tõma mõolɩ la de la zãŋa, tɩ yãma bɔ sɩra la mẽ dɛna zãŋa.

¹⁵ La sãn dɛna bɛla, tõma yi parnɩ mɛ bɔ'ɔra Nawẽnnɛ, tõma n yetɩ, Nawẽnnɛ botɩ Krisi vo'oge mɛ, dee tɩ kũm kãn vo'oge la ĩyã.

¹⁶ Sɛba n ki la sãn kãn vo'oge, bɛla, Krisi yi ka vo'oge.

¹⁷ La Krisi sãn ka vo'oge, yan bɔ sɩra la de la zãŋa, la ya tõon-be'ero taalɛ ken bɔna la ya zuto.

¹⁸ La sɛba n bɔ Krisi sɩra dee ki la mẽ yi bɔɩ mɛ.

¹⁹ Tõma n tarɩ pʋtẽ'erɛ la Krisi la sãn dɛna la tõma n vɔa dũnia wã zuo mã'a ĩyã, tõma n yi de ninbãal-dõma gãnna nẽrsaalba wuu.

²⁰ La, la dagɩ bɛla, Krisi ki dee vo'oge mɛ, ẽŋa n de pɔspɔsɩ dãana n vo'oge, pa'alɛ tɩ nẽrba basɛba n ki la mẽ wʋn vo'oge.

²¹ La de la nẽra ayɩla ĩyã tɩ nẽrba kiira, bɛla, la mẽ de la nẽra ayɩla ĩyã tɩ kũm wʋn vo'oge.

²² Nẽrsaalba wuu de la Adam yɩɩsɩ, bɛla tɩ ba kiira. Bɛla tɩ nẽr-sɛba wuu n mẽ de Krisi nẽrba wʋn vo'oge.

²³ La nẽra woo tarɩ la a wakatɛ, pɔspɔsɩ de la Krisi n vo'oge, la a lemŋo daarɛ, sɛba n de a nẽrba la wʋn vo'oge mɛ.

²⁴ Bɛla poorʋm, Krisi wʋn sã'am sɛba wuu n soe ke'eŋo, la na'am, la pãŋa wuu, dee yãŋa dɩkɛ so'olʋm na lebse bɔ a Sɔ Nawẽnnɛ, dee tɩ sɛla woo ba'asɛ.

²⁵ Bɛla, dẽnɩ tɩ Krisi di na'am halɩ ka paagɛ wakat-sɛka tɩ Nawẽnnɛ wʋn botɩ a bɛ'ɛba wuu bɔna a nãma tẽŋa.

²⁶ Kũm n de bɛ-sɛka tɩ a wʋn wa sã'am poorʋm.

²⁷ La gʋlsɛ Nawẽnnɛ gõŋɔ pʋam yetɩ: «Nawẽnnɛ dɩkɛ sɛla woo ẽŋɛ la a nãma tẽŋa.» Lan yetɩ Krisi n soe sɛla woo la, la ka tã tɩ a sɔna Nawẽnnɛ mẽŋa n botɩ a sɔna sɛla woo la.

²⁸ La Nawẽnnɛ sãn dɩkɛ sɛla woo ẽŋɛ Krisi nu'usum, ẽŋa n de Nawẽnnɛ Dayʋa la mẽ wʋn dɩkɛ a mẽŋa ẽŋɛ Nawẽnnɛ nu'usum. Tɩ Nawẽnnɛ dɛna nẽŋadãana sɔna sɛla woo.

²⁹ Sɛba n ki la sãn kãn malɩn vo'oge, nẽr-sɛba n botɩ ba misra ba ko'om pʋam sɛba n ki ĩyã la, wʋn ẽŋɛ la wãne? Kũm sãn kãn malɩn vo'oge, bẽm tɩ ba ɩta bɛla?

³⁰ La bẽm tɩ tõma põsra tɩ yõorɛ wakatɛ wuu?

³¹ M sɔbiisi, mam põsrɩ m yõorɛ mɛ daarɛ woo, mam n yetɩ ya se'em na de la sɩra. La de la sɩra wʋ mam n ɩtɩ sũ-yẽlga ya yelle yãma n dolɩ Zuudãana Azezi-krisi ĩyã se'em na.

³² La sãn dɛna la dũnia zuo vɔm mã'a ĩyã, mam n daan yẽ yɛla Efɛɛzɩ tẽŋa wʋ mam zɛbrɩ la we-dũnsi la, a yõorɔ de la bẽm? La sãn dɛna tɩ kũm kãn vo'oge, tɩ wʋn yele nɩ wʋ nẽrba basɛba n yetɩ se'em na: «Basɛ-ya tɩ tɩ dita dee yũura, tɩ beere tɩ wʋn ki mɛ.»

³³ Da pã'asɛ-ya ya mẽŋa. Fʋ sãn dɔla nẽr-be'ego, fʋ wʋn lebge la nẽr-be'ego.

³⁴ Basɛ-ya tẽ'esɛ yooro, dee da le tõnna tõon-be'ero. Mam yetɩ ya tɩ la de la yãnnɛ bɔ ya: Ya nẽrba basɛba ka mi Nawẽnnɛ.

Sɛba n wʋn vo'oge la ĩyã n wʋn ãna se'em

³⁵ La nẽr-sɛka wʋn soke yetɩ: «Sɛba n ki la wʋn vo'oge la wãne wãne? Ba wʋn wa tara la ĩyã bẽm buuri?»

³⁶ Sokre ẽna de la gɔɔn-sokre! Fõn ka mi tɩ fʋ sãn bʋrɛ sɛla biire, a yɛm n wʋn bule yese vɔa, dee tɩ a pɔkɔ põ'ogɛ?

³⁷ La sãn dɛna la ke-biire bɩɩ sɛla ayẽma biire tɩ fʋ dɩkɛ bʋrɛ, a de la biire mã'a. La a sãn yese, a ka le ãna wʋ sɛka tɩ fʋ bʋrɛ la.

³⁸ Nawẽnnɛ botɩ bõnbuuri la yɛsra ãna wʋ ẽŋa n boorɩ tɩ ba ãna se'em na. Bõnbuuri woo n yesrɩ ãna se'em de la to'oto'ore.

³⁹ Bõn-vɔɔsɩ mẽ ka tarɩ ĩyã ayɩla. Nẽrsaalba ĩyã de la to'ore, dũnsi ĩyã de la to'ore, niinto ĩyã de la to'ore, tɩ zũma ĩyã mẽ dɛna to'ore.

⁴⁰ Bõn-sɛba n boe saazuum tarɩ la ba ĩyã, tɩ sɛba n boe tẽŋa zuo mẽ tara ba ĩyã, la ba sõŋa dagɩ ayɩla.

⁴¹ Wẽntulle peelem boe la a to'ore, tɩ wõrga peelem bɔna a to'ore, tɩ wõrbiɛ peelem mẽ bɔna ba to'ore. La wõrbiɛ la peelem mẽ le bɔna la to'oto'ore.

⁴² Kũm vo'ore la mẽ wʋn wa ãna la bɛla. Nẽra sãn ki tɩ ba laagɛ ẽ, a ĩyã põ'orɩ mɛ. La Nawẽnnɛ sãn wa vo'oge ẽ, a kãn le põ'ogɛ.

⁴³ Ba sãn laagɛ kũm, a lɔrɛ mɛ dee dɛna gille. La a sãn vo'oge, a ãn na sõŋa, dee tara pãŋa.

⁴⁴ Ban laagɛ ẽ na, a tarɩ la dũnia zuo ĩyã. La Nawẽnnɛ sãn wa vo'oge ẽ, a tarɩ la ĩyã tɩ Nawẽnnɛ Sɩa bɔ ẽ. Dũnia zuo ĩyã boe mɛ, la ĩyã tɩ Nawẽnnɛ Sɩa bɔ'ɔrɩ mẽ boe mɛ.

⁴⁵ La gʋlsɛ Nawẽnnɛ gõŋɔ pʋam yetɩ: «Adam n de pɔspɔsɩ nẽra la, Nawẽnnɛ n bɔ ẽ vɔm.» La Krisi tɩ ba wi'iri tɩ poorʋm Adam na, tarɩ la Sɩa n bɔ'ɔrɩ vɔm.

⁴⁶ La dagɩ ĩyã tɩ Nawẽnnɛ Sɩa bɔ'ɔrɩ la tɩ tɩ to'orɩ yiɛn. Tɩ to'orɩ la dũnia wã ĩyã yiɛn, dee yãŋa wʋn to'oge ĩyã tɩ Nawẽnnɛ Sɩa bɔ'ɔrɩ.

⁴⁷ Nawẽnnɛ yʋʋn dɩkɛ la tẽŋa tẽntõnnɔ nãam pɔspɔsɩ nẽra la. La poorʋm nẽra la ze'ele la Nawẽnnɛ yire wa'am.

⁴⁸ Dũnia nẽrba wuu ãn wʋ nẽr-sɛka tɩ Nawẽnnɛ yʋʋn dɩkɛ tẽŋa tẽntõnnɔ nãam na. Tɩ Nawẽnnɛ yire nẽrba mẽ ãna wʋ nẽr-sɛka n ze'ele Nawẽnnɛ yire wa'am na.

⁴⁹ Bɛla, tõma n ãn wʋ nẽr-sɛka tɩ Nawẽnnɛ dɩkɛ tẽntõnnɔ nãam na, tɩ mẽ wʋn wa ãna wʋ nẽr-sɛka n ze'ele Nawẽnnɛ yire wa'am na.

⁵⁰ M sɔbiisi, bɛla tɩ mam gʋlsɛ yele ya tɩ, nẽrsaala ĩyã wã kãn tã'agɛ kẽ Nawẽnnɛ so'olʋm pʋam. Ĩyã wã n põ'orɩ la kãn tã'agɛ yẽ vɔm n ka ba'asrɩ.

⁵¹ Selse-ya tɩ m yele ya yelle n sʋgɛ. Tõma nẽrsaalba wuu kãn ki dee tɩ dũnia ba'asɛ, la tɩ wuu ĩisi wʋn teege mɛ.

⁵² Dũnia ba'asgɔ daarɛ, benkonne n wʋn peebe, tɩ tɩ wuu teege tɔtɔ nini kãbsɩgɔ pʋam. Benkonne na sãn peebe, sɛba n ki la wʋn vo'oge la ĩyã n kãn malɩn ki, la Nawẽnnɛ wʋn teege tõma ĩyã mɛ.

⁵³ Dẽnɩ tɩ nẽrsaala ĩyã wã n põ'orɩ la, lebge ĩyã n ka põ'orɩ, tɩ ĩyã n kiiri la, lebge ĩyã n ka kiiri.

⁵⁴ La ĩyã n põ'orɩ la sãn lebge ĩyã n ka põ'orɩ, tɩ ĩyã n kiiri la lebge ĩyã n ka kiiri, wakat-ẽŋa tɩ Nawẽnnɛ gõŋɔ n gʋlsɛ se'em na wʋn ẽŋɛ. La gʋlsɛ yetɩ: «Nawẽnnɛ yãŋɛ kũm, tɩ kũm ka le bɔna.

⁵⁵ Kũm, fʋ pãŋa boe la bɛ? Fʋ toogo boe la bɛ?»

⁵⁶ La de la tõon-be'ero n botɩ kũm tara pãŋa kʋʋra nẽrba. Tɩ lɔɔ botɩ tõon-be'ero yẽta pãŋa.

⁵⁷ Tɩ pʋ'ʋsɛ Nawẽnnɛ a yel-sõnnɛ, ẽŋa n botɩ tõma yãŋɛ tõon-be'ero, la kũm, Zuudãana Azezi-krisi ĩyã la.

⁵⁸ Bɛla, m sɔbi-nõŋrɩsɩ, mõrgɛ-ya ze'ele kãŋkãŋɛ. Tõnna-ya Zuudãana tõoma la wakatɛ wuu da basɛ, yãma n mi tɩ nãmsgɔ sɛka tɩ ya nãmsrɩ Zuudãana la ĩyã dagɩ zãŋa la.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ